Shoomy
بـترولـي خـاص
ملك .. سأل الشعب .. سؤال وقال اللي يجاوب عليه صح ...!!
راح اعطيه فلووس مرة كثيير وكل شي يبغاه
والسؤال
شنو أكثر شي شنو اكبر شي ...؟؟؟؟
راح الخادم .. على بيته وقاعد يفكر..
جته بنته .. وقالت : شفيك ؟؟
قام قالها الملك اليوم سأل الشعب سؤال وقال اللي يجاوب عليه:
راح يعطيه فلوس وكل شي يبيه...
وأنا مو عارف الإجابة..
البنت : شنو السؤال ...؟؟
الخادم : شنو أكثر شي وشنو اكبر شي ...؟؟
البنت : روح عند الملك وقوله اكبر شي أرضك وأكثر شي مالك ..
راح الخادم عند الملك وقاله : يا ملك أنا لقيت إجابة لسؤالك ..
قال الملك : تفضل ..
الخادم : أكثر شي مالك وأكبر شي ارضك ..
الملك : منو قالك الإجابة ...؟؟؟
الخادم : بنتي ..
الملك : طيب روح قولها ..
لابسة ومهي لابسة..
ماشية ومهي ماشية ...
هدية ولا مو هدية ؟؟؟
الخادم راح عند بنته وقالها .. : الملك يقولك
لابسة وماهي لابسه
ماشية ومهي ماشية ..
هدية ولا مو هدية ؟؟؟
البنت: طيب روح جيب لي شبكة .. وغنمة ... ولحمة ..
استغرب الأب الخادم من الطلبات
بس راح وجابها ..
لبست البنت الشبكة وركبت الغنمة .. ومسكت اللحمة وراحت
ودخلت عند الملك ..
وقالت : يا ملك .. أنا لابسة شبكة ومو لابسة ..
وماشية بس مو على رجولي على غنمة..
وهذي لحمة انت تعتبرها هدية ولا مو هدية..
الملك .. اعجب بذكاء البنت وقالها
تتزوجيني؟؟
اتزوجت بنت الخادم الملك .. وعاشو في سبات ونبات .. وخلفوا صبيان وبنات
المهم .... بعد سنين ..
كان في خادم من الخدم أعطاه الملك حصان هدية
وفي يوم نام الخادم ونسي انه يأكل الحصان قام هاج الحصان ..
فراحله الملك وطرد الخادم وقاله هات الحصان ورووح..
راح الخادم وهو زعلااان ..
المهم شافته الملكة .. وقالتله شفيك ..
قالها: الملك طردني واخذ مني الحصان..
قامت قالتله: اخذ صنارة واقعد اصطاد بالحديقة على العشب
ولو ياك الملك وقالك شتسوي قوله إذا انت ما رزقتني يمكن ربي يرزقني..
سوا الخادم مثل ما قالتله الملكة ..
راحله الملك .. وقاله شقاعد تسوي..؟؟
الخادم : إذا انت ما رزقتني يمكن ربي يرزقني..
قام الملك قاله : منو قالك تقول جذي؟.
الخادم : الملكة..
عصب الملك ..
ومل من ذكاء البنت..
وراح لها ..
وقالها : شوفي يا بنت الناس .. لمي إغراضك وروحي بيت اهلك .. بس قبل ما تروحين .. سويلي شاي .. وخذي أغلى شي عندك
المهم .. قامت البنت سوتله شاي وحطتله فيه منوم
المهم صحي الملك .. ولقى نفسه في بيت الخادم (أبو البنت)
قام قال :: شللي يابني هني ...!!!!!
البنت : مو انت قلت لي روحي بيت أهلك وخذي أغلى شي عندك ...!!
وأنت أغلى شي عندي
