السلام عليكم ارجو المساعده للضروره

Mechanicall · 11 مايو 2017

يعطيكم العافياااا يا جماعاااا

قبل شوي رديت من الشركه و قريت العقد و في اشياء حاب استعلم عنها

كاتبين بالعقد 30 يوم و لما قلتلهم اني تبع ال koc تكويت و اللائحه عندهم كاتبين 42 يوم

قالولي لا تحاتي ال 30 يوم بس جدام الهيكله والقوى العامله و انت تابع للقانون الكويتي وهوه ال 42 يوم

كلامهم صح و لا تدليس بالوقائع ؟

و لما قلتلهم العقد مو كاتبين الحقوق الاخرى المذكوره في لائحه ال koc بما اني تبعهم على قولتهم مثل التذاكر السنويه والبونص و ما الى ذلك

قالولي هذا كله عند ال HR و ما ينذكر بالعقد الي بنرسله للهيكله مادري القوى العامله , صحيح هالكلام ؟

و قلتلهم ليش مو كاتبين بالعقد اني موظف بقرار من قبل ال koc

قالولي ان كتاب ال koc مرفق مع العقد ,ما مدى صحه هالشي؟

و العقد بالعربي و مكتوب انه غير محدد المده اقصاها خمس سنوات

ف ارجو منكم المشوره والنصح

نفطي جديد · 11 مايو 2017

والله يا خوي بالنسبه للعقود كل شركه تكتب العقد بشكل و محد يحاسبهم يعني صاحبي معطينه عرض عمل ورقه كامله مكتوب فيها "As per koc
مو محددين ولا شي, اذا تبي تتأكد راجع التكويت مبنى B4 و توكل على الله و وقع ما بيدك شي.

AAT · 12 مايو 2017

سلمك الله كل شركه لها طريقة خاصه بصياغه العقود ومن واقع تجربه شخصيه بالعقود القديمه واليديده بحكم تجديدي/تغيري للشركات. والحين بالذات العقود اليديده امحرصين التكويت ومدققين بذكر اغلب التفاصيل المهمه او الاساسيه تكون بالعقود واضحه ومكتوبه فمستغرب من عقدك صراحه..

1- احرص ان الاجازه 42 يوم ( تفرق معاك بالمستحقات ونهاية الخدمة وبالتامينات والهيكله ووقت لا بتطلع اجازه ويخصمون عليك تاالي يقولك انت موقع على شهر خصوصا مو مذكور بعقدك انه يتماشى مع بنود التكويت وتعال عابل عاد)
2- الراتب الاساسي/احقيتك بالبدلات والعمل الاضافي او العلاوات الاضافيه اذا في + مسماك الوظيفي/طبيعة عملك او ساعات العمل (مو شرط تنذكر، لكن يفضل لان تفرق معاك في حال استغلالك من قبل رب العمل)
3- تذكرة السفر
4- التامين الصحي
5- مدة العقد لازم تكون مذكوره (سنه اقل شي، و5 اكثر شي وقابليتها للتجديد) تاكد منه يمكن فاهم غلط لان هم تندرج تحت معنى ( يحقلك تستقيل بهلمده و لك فترة اخطار يعني مو حاكرينك الشركه)
6- مستحقاات نهاية الخدمه
7- ان هذا العقد يخضع لقوانين ولوائح ادارة التكويت ووزارة الشؤون (يعني في درجة وظيفيه وتقييم وزياده وبونص سنوي الخ..)
حاولت اختصر كثر مااقدر وهاذي اهم الامور الي المفروض تكون حريص عليها، واي شي مو فاهمه من الشركة حاول تكلم مدير المشروع او الموارد البشريه بشركتك تستفسر او اخذ صوره من العقد اذا رضو قبل ماتوقع وراجع التكويت اقطع الشك باليقين.

بالتوفيق