شالسالفة؟!!!!

[أبو خالد]

الحين بس موقعنا (كي أو سي) هو اللي ما عنده سالفة غير الانتخابات والنقابة


يا جماعة أنا قبل لا أكتب هذا المقال .. دشيت منتديات الشركات الثانية اللي بالقطاع ... ما لقيتهم كثرنا بسوالفنا عن الانتخابات والقوائم .... إلخ

الكي أو سي فيها مشاكل أكثر وأهم من الانتخابات واللي يمكن حلها بطرق شتى .. وليس باللجوء للنقابة وتحمليها العبء كله عن كل الأخطاء والمظالم الحاصلة بالشركة


اللي عنده مشكلة .. يشهرها بالمنتدى عشان الكل يقراها وتوصل أكبر قدر من الموظفين . وبعدها يتم اتخاذ اجراء .. سواء على مستوى الأفراد أو المجموعات

صار همنا وشغلنا الشاغل بس النقابات والانتخابات وهذي القائمة شسوت ؟ ومن القائمة اللي تتوقعون نجاحها؟!!!


يبا .... نصنا ما يصوت ولا يدري عن هوا دار الانتخابات!!! والنص الثاني ما يحق له ... وين دربك؟؟

 

[بلبل عنقريزي]

الله يرحم والديك على هالكلام الطيب
وربي انغثينا صج
مو ناقص الا التشهير بالعالم على شان الوصول للكراسي

فيه مواضيع اهم
انا من الناس اللي كرهت طاري الانتخابات

 

[sanjar]

انا معاك 100% وانا والله استانست يوم شفت المنتدى وقلت منتدى يجمع شباب الشركة بس الحين ما احب ادخل ولا اشارك من كثر الكلام والمواضيع عن النقابة والمشكلة ان العدد الكبير من اللي يتكلمون في النقابة مو كلهم بس اكثرهم يبون قائمة معينه وشابين على الباقي يتكلمون فيهم بحق وبغير حق .
بس نقول الله يهدي الجميع

 

[جونم جقرم]

ياا رجل الناااس ملت وتعبت من طرح الشكاااوي والعيوووب ولا يووجد آذان صااغية
فا عكسوو الموضووع علي الأنتخاابات
يعني عندك قاائمة داابلة سبدك حط عليييهاا الدعووة ديمقرااطية

 

[brilliant]

اخوي ابو خالد كلامك جميل ويكتب بماء الذهب

ياليت الكل مثلك

 

[كويتي]

أخي العزيز بوخالد؛ معاك حق في بعض ما طرحت و لكن إسمحلي أوضح الحاصل ( و هو أمر طبيعي) فالكل يناقش ما يدور على الساحة؛ و بالوقت الحالي ترتب جميع القوائم أوراقها من أجل خوض تلك الملحمة الإنتخابية؛ فمن باب أولى تجد أن أغلب الكلام يدور عن رحى هذه الملحمة؛ لأن نتائجها تمسنا جميعاً؛

مثال: قلة قليلة بالوقت الحالي تناقش الغزو أو تحرير العراق من الطاغية؛ بينما أتى وقت كان شغلنا الشاغل هو متابعة كل ما يستجد للوقوف على آخر أخبار عن هذا الموضوع أو ذاك؛ هي طبيعة بشرية أخي العزيز؛ و هذا حال الدنيا دول؛

أتفق معك بأن إسلوب البعض بالطرح أو حتى بإختيار المواضيع لمجرد اللإستفزاز لا غير و بينما هؤلاء البعض يعتقدون أنهم يشنون حرب إعلامية بأساليبهم هم بواقع الأمر يبعدون كل البعد عن أهدافهم ( هذا إن كان ليدهم أهداف غير الشخصية منها طبعاً ) ؛ و كما تعلم أن القائمين على هذا المنتدى ينادون و يشرفون و يحررون للبعد عن هذا اللغط و هذا الطرح الذي من شأنه التقليل من أهمية و فاعلية منتدانا الذي نلتقي به لنتباحث أمور تهم الجميع و وضع إقتراحات تفيد الكل؛

إن خُلِيَتْ خُرِبَتْ و أنا أخوك؛ و أهل الخير شرواك كثيرين و المفروض أن نفوت الفرصة على (المخربين) و نستمر بالتواجد و طرح ما من شأنه تفعيل هذا المنتدى لما أنشئ له؛

والله من وراء القصد،؛،​

 

[فيصل العجمي]

السلام عليكم ورحمة الله وبركاته

المثل يقول ان عرف السبب بطل العجب

والسبب في ان مواضيع هذا القسم اغلبها عن الانتخابات هو ان انتخابات نقابة شركة نفط الكويت على الابواب فمن الطبيعي ان ترى جميع القوائم تطرح برامجها الانتخابيه وتحاول ان تروج لاهدافها

 

[المشاكس]

من الطبيعي تكون أكثر المواضيع عن الأنتخابات .....

أعتقد قبل فتره بسيطه جداً كانت أكثر المواضيع تتكلم عن الزياده وشصار ووين وصلت ولما تم رفضها تحولت المواضيع عن موقف النقابان وغيرها .... ف الوقت الحالي شي طبيعي نتكلم فيه عن النقابه والأنتخابات

 

[أبو خالد]

يعطيكم ألف عافية على الاستجابة

مسألة إن الانتخابات على الأبواب وأنها حديث الساعة أنا معكم فيها

بس السالفة مصخت حبتين ... من تم افتتاح المنتدى وحنا ما عندنا غير الانخابات (رجاءا سو مرور سريع على مواضيع المنتدى وتواريخها)... راح تجد أغلبية المشاركين منغمسين في الانتخابات وتبعاتها..


لا زلت أكرر . في ناس واجد بالمنتدى لا يعنيها أمر الانتخابات وخلافه ... وللأسف أكثرهم الذين يتناقشون فيها (ما يصوت ولا يدري عن موعدها حتى)

 

[AD-01]

بو خالد

كلام جميل وتشكر عليه

نتمنى انك تفتح مواضيع عن المشاكل الموجوده بالشركة وخلنا انتناقش فيها بالمنتدى

 

[المهندس]

يا بوخالد هم كلهم قائمتين اللي ماخذهم الحماس شوي - والاشخاص الموجودين كانو في قوائم سابقه - يعني ينط من قائمه لي قائمه - ما عمرهم فكرو في مصلحه العمل - والدليل وقت الندوه الكل رفع ايده يعني يبون يحرجون النقابه الحاليه ما يدرون انهم يظرون جميع العمال.

يا قوائم نبي اتحادكم ووحدتكم في المصالح العاميه - اما في المصالح الشخصيه كل واحد وبكيفه

ودمتم