الكهرباء بالكويت جاري الانتظار

[النك تحت الصيانه]

السلام عليكم ورحمة الله وبركاته صارلهم اكثر من ثلاث سنين ويقولون ترشيد ماترشيد للحين ماوصلوا الى حل الله يستر على السنه الجايه لاتنقطع لحد لان مافيه حل على الوقع

 

[كريستاله]

حملات الترشيد كلفت الملايين وماشفنا نتيجه ولا حل

الحل بمحطه توليد كهربا يديده تستوعب المناطق اليديده اللي اهي سبب الظغط على المحطه السابقه بس هالشي يكلف الدوله المليارات

شكلنا السنه اليايه قاعدين على ضوء الشموع و المهفات

 

[النك تحت الصيانه]

ههههههههه بس صراحه حلوة شموع ومهفااات

 

[النك تحت الصيانه]

اظاهر مستانسين بشتاء يصير خير بصيف بشوفكم كلكم راح ادشون على الموضوع

 

[نشيط]

الفلووس تنصرف على حملة ترشييد بدوون اي فاايده

 

[النك تحت الصيانه]

نشيط يسلموو على مرورك المصيبه ان كل سنه نفس السالفه

 

[فيصل العجمي]

السلام عليكم ورحمة الله وبركاته

كنت اتمنى ان نرى ردود وحلول ونقاش من الاخوه المشاركين بدل التعليق بكلمتين دون النقاش حول هذه القضيه المهمه خصوصا وان هذا القسم اسمه منتدى النقاشات الجاده.

مشكلة الكهرباء انها تترتب عليها مشاكل أكبر,, المشاريع الأسكانيه راح تتعطل لعدم توفر الكهرباء وبالتالي الأجارات راح تزيد وبالتالي المواطن الغلبان راح يتبهذل اكثر وهلم جراً.

القضيه اكبر من الوزير ,, القضيه في اعتقادي هي في مناقصة المحطات الجديده فحسب مانسمع ان هناك طق ومطاقق على مستوى عالي للحصول على مناقصات تلك المحطات والتي تصل لمئات الملايين ,

و

 

[SOS_KW]

السلام عليكم ورحمة الله وبركاته

كنت اتمنى ان نرى ردود وحلول ونقاش من الاخوه المشاركين بدل التعليق بكلمتين دون النقاش حول هذه القضيه المهمه خصوصا وان هذا القسم اسمه منتدى النقاشات الجاده.

مشكلة الكهرباء انها تترتب عليها مشاكل أكبر,, المشاريع الأسكانيه راح تتعطل لعدم توفر الكهرباء وبالتالي الأجارات راح تزيد وبالتالي المواطن الغلبان راح يتبهذل اكثر وهلم جراً.

القضيه اكبر من الوزير ,, القضيه في اعتقادي هي في مناقصة المحطات الجديده فحسب مانسمع ان هناك طق ومطاقق على مستوى عالي للحصول على مناقصات تلك المحطات والتي تصل لمئات الملايين ,

و

فعلا كلامك صحيح عزيزي Q8ow وأنا برأيي أن تقوم الدولة بدلا من حملة الترشيد اللي من وجهة نظري لا تودي ولا تجيب .. هي حملة نعم .. ولكنها كانت أشبه بتشغيل بطالة مقنعة لدينا وتنفيع .. وكان من الأفضل بدل صرف الملايين على حملات الترشيد أن تستغل في تطوير محطات الكهرباء وتجديدها حتى لو كلفت أكثر ... يا أخي خلنا نعتبرها من ميزانية اعادة اعمار العراق ولبنان وغيرها ... ألسنا أحق أم باب النجار مخلع

وسؤال .. اذا سقطت منك 100 فلس مثلا يعني .. أول ما تفكر أن تبحث عنها تحت قدميك أليس كذلك .. لا ربعنا يحجزون تذاكر أولا على الهونولولو وبعدين اذا ما لقوها يحجزون لأماكن أقرب وأقرب حتى يصلوا الى تحت قدمهيم مع ان الاحتمال الكبير في البداية أن تكون قد سقطت تحت القدم ... ونكون قد وفرنا الكثير الكثير من المال والجهد والوقت

وسلمتم ودمتم

 

[النك تحت الصيانه]

مشكورين على المرور والمناقشة حنا الى نعرفه ان صيف 2008 نفس السالفه حنا ماننكر حملة الترشيد وجهودهاا الطيبة بلعكس ماقصروا اخوانااا بس نبي التقدم والزدهار في ديرتنااا سواء كان من كهرباء او اعمار او سياحه والى الاامام ياكــــــويت

 

[فيصل العجمي]

مشكور اخوي نك تحت الصيانه على طرح هذه المشكله المهمه

وارجع واقول لابد ان تعجل الحكومه بحل هذه المشكله حتى لا تتوقف المشاريع الاسكانيه

 

[النك تحت الصيانه]

Q8OW بلعكس اخوي هذا اقل شي اسويه حق بلدنااا العزيز واشكرك اخوي على مرورك على الموضوع وهذا شي يسعدني

 

[زهرة التوليب]

اكيد ما يوصلون لحل
شوف العماير اللي طلعت بالديره والمجمعات ماشاء الله شكثرها
وكل هذا حمل زايد على الكهربه

ودامهم يخططون حق هالمشاريع والعماير والمناطق السكنيه
ليش قبلها ما يزيدون محطات الكهربه !!!

اول مره اشوف ديره تفكر بالعكس ؟
يعني نفس حمل الكهربه صار له قرن يبونه يتحمل عماير يديده ومجمعات ومناطق سكنيه وغيره وغيره ؟؟

ما ادري شنو راح يسوون لما الناس يطلع لها بيوت في منطقه جابر وسعد وصباح ؟؟؟
شكله بنعيش على الشموع

 

[بلبل عنقريزي]

انا اقول اتسنع الحكومه بس وبلاش لعب بعقول العالم
خل تلتفت شوي للكويت وشعبها وتحط هالاموال بديرتنا
خلاص عاد ملينا من هالسالفه اغنى دوله وجنا بنغلاديش

الحلول يبيلها وقفه جاده من حكومتنا الكريمه

 

[كي او سي]

الله يعطيكم العافية

ترشيد ما منها فايدة نهائيا، والدليل الاستبيان اللي بالجرايد او مواقع الانترنت من منتديات وغيرها والمعارضين لها اكثر من المؤيدين

مشكلة الكويت تكمن بالتجار واعضاء مجلس الامة ، القرارات موجودة من زمان ولكن بسبب المشاكل اللي حاصله معاهم وخاصة كل

واحد يبي المشروع حق نفسه او اذا شركة اجنبية تبي تدير او تبنى اي مشروع يتحاربون ويتسابقون على الوكالة

كل هذا بسبب الاحتكار الموجود في الدولة والقوانين الغير مفعلة ضدهم والتي سببها الحكومة

ولهذه الاسباب الحكومة ايضا لا تثق بهم بسبب الحسد والبغض فيما بينهم

وابصراحة انا أأيد نظرة الحكومة هذي لان مو معقولة مشاريع بمليارات الدولارات مثل مدينة الحرير و المصفاة الرابعة ومحطات توليد الكهرباء ومحطات المياه وغيرها من المشاريع الضخمة تذهب لناس لهم اطماع ونفوذ وفي نفس الوقت المفروض من الحكومة المبادرة بحل سريع لهذه المشاكل، لان راح يجينا يوم لا كهرباء ولا ماي ولا حاجة في عز من الناس محتاجه (حلوه هذي)، والشعب قام يزيد يوم عن يوم

الحل: تطبيق القوانين على الجميع بدون استثناء للكبير والصغير ، للغني والفقير، للمواطن والاجنبي راح تلقون الكويت كما كانت درة الخليج

 

[النك تحت الصيانه]

زهرة التوليب بلبل كي او سي اشكركم على مرورك بلموضوع وجهه نظر صحيحه