الى منظمي (وطنك) .. آسفين خذلناكم !!

فيصل الكندري

نـقـابـة نـفـط الـكـويـت
أعضاء الشرف
بالبداية نتقدم بجزيل الشكر وعظيم العرفان للأخوه في تجمع (وطنك) على كل ما بذلوه من وقت وجهد تطوعي استقطعوه من وقت اهاليهم وانفسهم في سبيل قضية عادله وحق مشروع لأكثر من 20 الف موظف بين القطاع النفطي والقطاع الطبي وشباب الخطوط الجوية الكويتيه ...

وايضا نتقدم بجزيل الشكر والعرفان للسادة اعضاء مجلس الامة الموقرين الذين آلوا الحضور والوقوف بجانب حقوق العمال وموظفى الدولة من نخبة ابنائها الاطباء والطيارين ...

سامحونى على اللى بقوله بس هالكلام لازم ينقال ...

امر محزن ان نخذل نحن هذة الجهود الجبارة وهذة الاموال التي تم صرفها من اعلانات وقاعة احتفالات فضلا عن مجهود اخواننا بعدم حضورنا لمثل هذا التجمع ... !!!

امر محزن لما يتفق اعضاء مجلس الامة ال16 او 17 على نقطة واحد وهي: وين ال20 الف اللى يبون الزياده ؟؟!!! القاعه ما يتعدى عدد الحضور فيها ال 300 نفر !!

التلفزيون والصحافة وحتى الاذاعة كانت حاضره الملتقى ... كلام الاعضاء كان جدا متفائل وقالوا ان الوعد في جلسة 4/12 واذا ما صار ننطر الى شهر 2 وعقبها اذا ما صار انطبق الزيادات بمشروع بقانون نفس ما صار مع كادر المعلمين وهالكلام كله يحتاج الى شهرين من الصبر .. ما اعتقد ان في عضو من اعضاء مجلس الامه من الغباء انه يلزم نفسه بكلمة تمس 20 الف موظف امام الصحافة والتلفزيون ويوعد انه يوقف معاك خلال شهرين فقط الا اذا كان فعلا جاد بالموضوع !! .. اصلا وين تلاقى 27 عضو يوقفون معاك بهالسرعة والسهاله نفس اللى صارت مع تجمع وطنك ؟؟ حتى اشكال اعضاء مجلس الامة متحبطه .. " احنا معاكم وراح ندعمكم .. بس وين ربعكم ؟! خابينا بال20 الف وماكو احد بالقاعة "

كان الاجدى بالاخوان اللى "مبسطين" في بيوتهم وماعندهم شغل الا القرقه بالمنتدى ويقولون شكو تجمع وطنك جايبين اعضاء مجلس الامه ولازم قضايانا تنحل من الاتحاد وباجى الكلام اللى الواحد يفتشل يقوله .. كان الاولى فيهم انهم يحضرون و يكثرون سواد القطاع امام اعضاء مجلس الامه ... اقلها ان الحضور له رهبة ويخلى الحكومة والاعضاء يدرون ان هالقطاع يبى مطالبته وعلى قلب واحد ومستعد يضرب عن العمل اذا استدعى الامر ...

كلنا عندنا اشغال وكلنا عندنا التزامات، والملتقى كان في خبر عنه من اسبوع ، ما كان فجأه ... وبالاخير من 20 الف ما يحضر الا 300 .. مع ان القاعة تشيل 850 كرسى .. هذا والله الامر المخجل .. حتى الكراسى اكثر من الحضور !!!

ما اتوقع ابد ان احنا "قدها" اذا صار وقت الاضراب ... اذا ملتقى بفندق وراحه وبراد ما حضرنا ... وقت الجد و الالتزام والمسئولية راح تضربون ؟؟؟!! .. خير ان شاء الله

عموما كل الشكر لتجمع وطنك وللاخوه اعضاء مجلس الامة وللاخوه اللى حضروا الملتقى وكان على حساب اوقاتهم واعمالهم .. والحق عمره ما يضيع دام وراه مطالب .


الدعوه مفتوحه للي يبى يحضر جلسة مجلس الامة يوم 4/12 واللى احد بنودها مناقشة الزيادة النفطية !!!

ملاحظه : اشوه ان جلسة 4/12 راح يناقشون فيها ديون المواطنين وهذى القضية اللى راح تترس مقاعد مجلس الامة والا لو الجلسة مخصصة لمناقشة الزياده النفطيه .. جان افلسنا من زمان ...


ادري راح اسمع كلام من كل صوب "يرقع" و" يحبط" وراح اسمع كلام ان احنا مو على منتكم ولا على منة اعضاء مجلس الامة ولا تجمع وطنك ولا اتحاد البترول و ......! كل واحد يقول اللى بخاطره ... بس خل نعترف ان العيب فينا احنا .. الكل قاعد يخدمنا واحنا الا نبي اللقمة تنحط بحلوجنا وما نبى انساعد احد

سامحونى على الاطالة بس صج هذا الكلام اللى بقلوب اخوانكم القائمين على تجمع وطنك
 

اسامه

بـترولـي نشيط
اخى فيصل

كلامك صحيح لان شعب الكويت شعب غير مبالى ( يتكلمون كثير ولايعملون) ماتشوف طقاقينهم واجد
 

مواطن

بـترولـي مميز
كلامك عدل ....فعلا شي مخزي يعني وين هالبشرية معقولة محد هامه

بس يا ليت حطيتوا عذر وقلتوا مداومين على الاقل شي يحفظ ماء الوجه

واعتقد الي خلي الغالبية تتقاعس هي المماطلة وتاخر الاجتماع

مما خدر الغالبية
 

سالم الخالدي

رئيس اللجنة الإعلامية
فريق الإعلام
أخوي فيصل جزاك الله خير

والله عورت قلوبنا من كلامك


لكن مانقول الا الله يسامحنا لكن لا تلومنا والله حنا محبطين جدا من الظروف اللي نمر فيها

والله لا تلومنا الكل مكسور من الصدمات اللي تصادفه كل يوم

صار عندنا عدم ثقة بعد ماوصلت الزيادة الى آخر خطوة

وفي نفس الوقت شوف الزيادات تجي للعالم من كل صوب بدون مطالبات ولا مجالس ولا اضرابات وحنا نتفرج


جالسين نشوف الأسعار ترتفع في الثلاث أشهر ثلاث مرات وحنا نتفرج

شايفين ان زيادة الأسعار محد يناقشها ولا أحد يراقبها تنزاد وتطلع في كل شهر بدون جلسات ولا نقاشات ولا خدمة مدنية ولا أعضاء مجلس أمه





وحنا رواتبنا تمر على عشرين مسؤول وثلاثين جلسة عشان تقر

أرجوك يالكندري لا تلومنا الناس من الهم والاحباط ماقامت تثق بأحد ..الناس فقدت الثقة في كل مسؤول

الله المستعان
 
التعديل الأخير:

فيصل الكندري

نـقـابـة نـفـط الـكـويـت
أعضاء الشرف
الاخوان مواطن و اسامة .. واخوى الوسام


كلنا محبطين وكلنا متضايقين وكلنا انشوف الخير يحوش اللى حوالينا واحنا انتحاسد بينا


ماكان مطلوب مني ومنك غير انك تحضر وتشرب عصيرك وتآكل عشاك وتمشي ... اعتبرها فسحه .. اعتبرها تغيير جو بدال الدوانيه او قعدت البيت


وربعنا يبون اضراب شامل!! ... شكله راح يصير اضراب فاشل اذا احنا اصحاب الشأن ما تواجدنا و ثبتنا وبينا للناس مطالبنا ..

اصلا بعد الجرايد والايميلات والتلفونات والمسجات والمنتدى وما بقى وسيلة اتصال ما استعملوها الاخوان بالتجمع لنشر اعلان الملتقى.. بعد كل هذا ، حتى لو انا عضو نقابة وشفت الحضور اليوم راح اغير حساباتي واخاف اعلن الاضراب ... الزم ما علي كرامتى جدام الناس ..اذا تجمع "سلمي" باعضاء مجلس الامة محد حضر الا 300( الله يعطيهم العافية ويآجرهم) باجر تبوني اعلن الاضراب" الشامل" محد راح "يفزعلي" مع العمال ويوقف مع اضرابي ..هذى مصيبه !!

توقعنا ان الصالة صغيره وما راح تكفى وراح تترس عيون الاعضاء وترهبهم وراح يتلزقون فينا بعد ... كل عضو قال كلمته وطار مع الباب .. صراحه ما الومهم .. بهرجه واعلان ومجهود جبار وماكو حضور ... راح يمشى ليش يقعد

اللى راح راح .. وخلونا ننطر مع الناس ليما شهر 2 ابرك .. بلا اضراب بلا كلام احنا مو قده ..
 

khaled

بـترولـي نشيط
تحياتي الى كل الاخوان وعلى الجهود اللتي بذلوها في هذا الجانب
لاكن اسمحولي انا بقول هالكلام بس لاحد يزعل مني وهذى راي الكثيرين من الاخوان
التناحر الحاصل مابين النقابات والاتحاد والتصريحات المختلفه من كل جه يبين عدم التنسيق بينهم والتفرقه
هذا ماولد عدم الثقة في النقابات وتنسيقهم والدليل على ذالك الكثير

وكان هذى احد الاسباب لعدم الحضور في المؤتمر اللي حصل والاضراب اذا حصل راح يكون فاشل
الكل يعلم بان الزيادة للحد يستطيع يستثنيها من الامر الاميري وهذى شي خالصين منه اذن ليش مجمعين النواب الواجب الاصرار على عدم المساس بالزيدة وان لاتكون منقوصه
 

سفاري الكويت

بـترولـي نشيط جدا
أخوي فيصل جزاك الله خير



لكن مانقول الا الله يسامحنا لكن لا تلومنا والله حنا محبطين جدا من الظروف اللي نمر فيها

والله لا تلومنا الكل مكسور من الصدمات اللي تصادفه كل يوم

صار عندنا عدم ثقة بعد ماوصلت الزيادة الى آخر خطوة




الله المستعان

والله كلامك عين الصواب يا الوسام

والله ما قمت اطل بالمنتدى من زمان من كثر الاحباط ولا ادور خبر الزيادة
وما اصدق خبر بالزيادة الا لما أمسكها بيدي مو اشوفها بالبنك بعد!
 

الصنديد

بـترولـي جـديـد
والله صج الحضور يفشل

خلنا نشوف جلسة مجلس الامه

شكلنا احنا المديونين بس اللي بنحضر
 

Q8_oil

بـترولـي خـاص
أخوي الكندري

إنت رحت هناك مو عشان تتابع الموضوع و لكن عشان إنتخابات نقابة الشركة !!

أنا أقول بدل ما تهد شغلك و تجابل المنتدى و تدزز إيميلات حق الناس بالشكرة عشان تظبطهم للإنتخابات أنا أقول جابل شغلك و حلل معاشك أحسن ترى الشركة قاعدة تدفعلك عشان تنتج مو عشان تدز إيملات و تدش منتديات !!
 

الصنديد

بـترولـي جـديـد
أخوي الكندري

إنت رحت هناك مو عشان تتابع الموضوع و لكن عشان إنتخابات نقابة الشركة !!

أنا أقول بدل ما تهد شغلك و تجابل المنتدى و تدزز إيميلات حق الناس بالشكرة عشان تظبطهم للإنتخابات أنا أقول جابل شغلك و حلل معاشك أحسن ترى الشركة قاعدة تدفعلك عشان تنتج مو عشان تدز إيملات و تدش منتديات !!

علشان جذيه حامض على بوزكم الزيادات

دام تفكيركم بكل من اجتهد واشتغل علشان يساهم معانا في تحريك الزيادات بانه يفكر بالانتخابات فلا طبنا ولا غدى الشر

وتبون زياده بعد انت ليش ماشاركت ولو بوقتك وحضرت اذا الاخ فيصل حضر مشكور علشان الانتخابات انت ليش ما حضرت علشان تساهم في صرف الزيادات

على الاقل الاخ فيصل عنده هدف يبني عليه

ولا انت للاسف وبعض اللي متابعهم في المنتدى من فتره لا هدف ولامنطق ولا لون ولا رائحه بعد
 

norema-sarto

بـترولـي مميز
صح لسانك (( فيصل الكندري ))
والله إحنا يالحريم شاددييين الظهر بالرياييل

وخاللين الهمه عليكم

فهالله هالله

وإنشالله ما تقصرووون

تحياتي لكم
 

Q8_oil

بـترولـي خـاص
الصنديد انا حمد الله طلعت من الشركة و مالي شغل فيكم ولا فيها

شركة كلها واسطات و أحزاب و جماعات و كل واحد يشتغل يقول أنا أشتغل للديرة مو لشي ثاني و الكنادرة أول ناس

و بعدين أي هدف !!

هدف يفوز بالنقابة عشان يضبط ربعه أو يدخلهم و يوظفهم بالشركة !!

لا تخليني اطلع خياسهم

ترى إللي قاعد يكلمك كان جريد 15 و شايف بلاوي وايد بس خل الواحد ساكت
 

الصنديد

بـترولـي جـديـد
الصنديد انا حمد الله طلعت من الشركة و مالي شغل فيكم ولا فيها

شركة كلها واسطات و أحزاب و جماعات و كل واحد يشتغل يقول أنا أشتغل للديرة مو لشي ثاني و الكنادرة أول ناس

و بعدين أي هدف !!

هدف يفوز بالنقابة عشان يضبط ربعه أو يدخلهم و يوظفهم بالشركة !!

لا تخليني اطلع خياسهم

ترى إللي قاعد يكلمك كان جريد 15 و شايف بلاوي وايد بس خل الواحد ساكت

دام طلعت من الشركه الله يسهل عليك ويرزقك

واذا بيضبط ربعه عليه بالعافيه اهو وربعه اهو مو الجديد على هالشغله سابقه ابوسعد وابوخالد ماقصروا بربعهم

بس اهم شي مكاسبنا وزياداتنا لا تضيع

يا اخي المجتهد بنقوله الله يعطيك العافيه اما المتقاعس فاولله ماله عندنا غير المهانه
 

يورياوي

بـترولـي مميز
والله احنا نفشل والله الحظور مايتعدي 200 ولا بعد الخطوط والاطباء اكثر والله تفشلون بروحي قاعد ماعرف الاجم واحد بس

وتبون اضراب بعد بتوهجون النقابات

ماودي اسولف اكثر علشان لا ازعلكم منني بس صج عيب عليكم الناس تتعب وانتوا بس تبون الاخبار الزينه والبيزات



اخوي فيصل مجهودكم واضح وبالنسبة لي الله يعلم كم تألمت بسبب الحظور المخزي
 

mohammed

بـترولـي نشيط جدا
الله يوفقكم يا فيصل الكندري

والندوه كانت جدا ممتازه احببنا ان نغطيها لاكن الظروف حالت دون تغطيتها
 

brilliant

المـراقب الـعـام
امس الحظور كان طيب وترس نص الصاله صحيح كثير ناس مشوا بعد الساعه 8 بس كلن واشغاله

وصدقني الناس متحبطه ومالومها عقب هالاجرائات والقرارات والتاخيرات الي خلتهم يملون من هالامور

وهم تفكك النقابات كان سبب كبير في عدم الحظور لان كلن يتبع نقابته

على كل حال لو كان الحضور هو الي بيقر الزياده حصلت الكل موجود من شباب وبنات ,,, لكن الناس متحبطه

كل الشكر للي ساهموا في هالمجهود لكن هذا لا يعيق جهودهم ومثابرتهم

وارجوا عدم التحبيط اكثر :)
 

يورياوي

بـترولـي مميز
اخي المشرف اي حظور اللي تتكلم عنه والله مايتعدون 200 واللي موجودين طلعوا خايفين يطوفهم البوفيه وحتي اعضاء مجلس الامةتكلموا بسالفة الحظور
 
أعلى