الى من ننتمي ؟

frfosha

بـترولـي مميز
صباح الخير يا اخوان ويا خوات موضوعي اليوم منقول من برنامج 6/6 مقدمه يوسف عالحميد الجاسم والضيوف المشاركين هم الشيخ أحمد الفهد والمحامي على البغلي والمحامي على الزعابي ، وما جاء بالموضوع والذي شدني اليه والاصغاء لهم بأن السؤال ( هل انت ولائك وانتمائك للكويت أم ولائك وانتمائك لبعض الطوائف ؟؟؟)
صحيح في الاونه الاخيره لا نتكلم بأننا كويتيين قمنا نتكلم بأننا حضر أم بدو أو شيعي أو سني على العلم كلنا تحت أرض الكويت وكويتيين باعتقادكم لماذا جاءت هذه الفكره ومن المفروض التعديل يأتي من أين وكيف على هذا الفكر الذي قد يدمر هذا البلد وأتمنى أن لا يفهم الموضوع بالمعنى الخاطىء وأن يكون هناك روح المناقشه الطيبه لانها والله مشكله كبيره تدخل مجتمعنا بهذا الوقت ويجب ان يتم اصلاح هذا البلد من هذه الظاهره ونطلب الحلول والمناقشات المفيده .

ولكم جزيل الشكر ،،،
 

Shoomy

بـترولـي خـاص
للاثنين

يعني انا كويتيه وشيعيه
شايله اسم الشيعه بديرتي وبرا الديره
وشايله اسم الكويت باليره وبرا الديره

يعني امثل الاثنين
 

كلمـ ولو جبر خاطر ـه

بـترولـي نشيط جدا
بالعكس فرفوشا موضوعج حيل حلو واللي يفهمه غلط غلطان

الشاعر يقول

الغرب يصنع طايرات وصواريخ *** والشرق الاوسط ضاع نفطه بلاشي
حطولهم في صفحة العلم تاريخ ** واحنا بماضينا نعيد النقاشي



هذا اللي يبونا اننا نلهى بموضوع

وتلقينهم دايم يخلقولنا سالفه علشان لا جا الليل

كل واحد يروح الديوانيه ويقعد يخرط بهالسوالف اللي دون براهين

والغرب قاعد يصعد ومع الاسف حنا قاعدين نصعد على درج كهربائي نازل يعني بس نرفع الرجل الاولى ونبي نرفع الثانيه نلقى الاولى ردت لمكانها
 

حنان

بـترولـي خـاص
فرفوشة مشكورة على هالموضوع انا بصراحة احس بانتماء غير طبيعي للكويت واحس ان اسم هالدولة اهو الدم اللي في عروقي مع اني " بدون" مو كويتية بس يكفي اني عشت فيها ولدت فيها تربيت فيها
انا واهلي وعايلتي وكلنا يعني مااتصور حياتي بيكون في شعار ارفعه فيها غير الكويت
حتن وانا شيعية بس شيعية وين؟ في الكويت
ليش للكويت
يعني الاهم الكويت بس هذا ما يعني اني ما امثل انتمائي الطائفي
اصلا تدرين كل شي فينا المفروض يكون للكويت حتن بنقاشنا
اسلوبنا
كلامنا
وحتى تعصبي الطائفي للكويت
مشكورة ونسني موضوعج واااااااااايد
 

frfosha

بـترولـي مميز
بعد عمري حنونه اي هذا اللي نبيه منكم نبي كلنا نقول كويتيين وليس كويتي شيعي او سني او حضري او بدوي احنا كلنا واحد وكلن تحت على الكويت وعسى الله يحفظ الكل سواء ان كان كويتي او غير كويتي ، والله يا اختي انه في ناس غير كويتيين ولكن ولائهم وحبهم لهذه الارض غير طبيعي وعسى الله يحفظ الكل والجميع
 

SOS_KW

بـترولـي خـاص
أعضاء الشرف
عزيزتي frfosha بصراحة هذا البرنامج للتفلسف فقط ولا أرى به أي نوع من الديمقراطية .. واللي يقهر أكثر انهم مرات عديدة يتكلمون باسم الشعب ولا يستطيع أي أحد ان يرد كلامهم وذلك لعدم تخصيص رقم خاص للاتصال بهم حتى يرد عليهم الرد الصحيح .. وفيه نوع من الفتنة والتحيز لشريحة معينة في المجتمع ..


بلادي وإن جارت علي عزيزة ... وأهلي وإن ظنوا علي كرام
 

ABDULLAH

قــلــم بــتــرولــي
أعضاء الشرف
أعتز مهماصار إني كويتي عربي مسلم مع مصلحة الكويت في كل شيء و مع الفقير و المسكين و ربي حسيبي
و الحكمة ضالة المسلم وين ما كانت فإذا جاءت من شخص من أي توجه و تتماشى مع المصلحة العامة و المباديء و بعيدة عن الشبهة فهي ضالتي
 

frfosha

بـترولـي مميز
مشكورين على المرور حبايبي كلكم ، بس يا سوس بالعكس هذا الشي ما فيه فتنه باعتقادي انه هذا واقع والكل عايشه وانا عجبني تدرين ليش حتى نوضح للناس انا لا ننجرف تحت افكار بعض هالاعضاء وانه المفروض كلنا نقول كويتيين بس واتفق معاج على سالفة انه باقي الشعب لا يمكنه الوصول او الاتصال على بعض البرامج المثاله والمهمه انا اعتبرها خلال بعض القنوات ويحاولون ان يكون هناك البعض باستضافتهم بس هم مرات ما نلومهم لانا في الاغلب يمكن ما يقدر يسيطر على اعصابه ويبدى يغلط بالكلام فيمكن يكونون ماخذين حذرهم من هالمواضيع
 
أعلى