مطبخ المنتدى ( مع فهرس بالمشاركة الأولى)

[engineera]

السلام عليكم

موضوعي اليوم طباخ اب طباخ ويالله يا بنات همتكم معاي كل وحده تحط الوصفات تبعها وحتى الشباب اللي يحبون يطبخون او ياكلون لوول شجعونا عاد

وهم في شغلات سهله بعلمها حق الشباب اللي مايعرفون يسون غير البيض


فهرس الطبخات (متجدد):

أولاً: الأطباق الرئيسية:

طبق المعكرونه بالبشاميل
مجبوس الدياي
السليق اللين
برياني الدياي الهندي
ستيك بصلصة المشروووووووووم
مطبق زبيدي
صينية قطع اللحم المشوي بالخضار
صدور دجاج بصلصة الليمون الأخضر
دجاج مشوي مع مكرونة اللينجوين
روبيان بالكاري والبطاطا


ثانياً: الأطباق الجانبية:

بيض بالبطاط
قوارب البطاط بالدجاج
بيتزا
فطيره جبن بالزعتر
خبز بالثوم وخبز البيتزا(الخبز الفرنسي)


ثالثاً: الشوربات:
شوربة الكراث
شوربه الخضار بالدياي
شوربة العدس


رابعاً: السلطات:

سلطة السيزر
سلطة الجرجير و البربير
سلطه المعكرونه
سلطة المعكرونة 2
سلطه لذيذه وحلوه
سلطة البطاطا والباذنجان مع شرائح البطاطس المقرمشة
مخلل الطماطم الخضراء
المعبوج الأخضر


خامساً: الحلويات:
حلو المانجا ( المشاركة الأولى، بعد الفهرس)
شوكلات فوندو (Chocalate FnoDo)
الفرق بين شلال الكاكاو .. والفوندو (Chocolate Fountain Vs Chocolate Fondue)
قرص عقيلي
حلو السنيكرز السريع
حلو الترتل السريع+حلو كيكة الكاكاو والسنيكرز
كعكة التيراميسو
الحليب المكثف المحلى (البديل للـ Nestle)
بسكويت بالسمارتيز


سادساً: المشروبات:

شراب الكاكو الساخن (HoT ChoCaLaTe Drink)
القهوة العربية (1)
القهوة العربية (2)
عصير فخفخينا
حليب بنكهات مختلفة (أفكار)






اليوم يايبتلكم ولأول مرة حلو المانجا نفس مال الخباز وطريقة سهلة:

المقادير:

1- علبة كيك فانيلا جهاز من الجمعية
الخلطه

2-علبة دريم ويب
3-جبن فلاديلفيا
4-نص علبة المنجا مثلجة
5-جلي مشمش مذوب بكوبين ماي حار
6-2 قيمر
الطبقة البرتقالية
7-نص علبة المانجا المثلجه
8-علبة جلي مشمش مذوب بكوبين ماي حار

الطريقة

1-نحط الكيك في صحن بايركس
2-نخلط المكونات تبع الخلطه ونصبها فوقهم
3-نحطها في الثلاجه لحيد ماتمسك الخلطه وتصك وتصير جامده
4-نخلط مكونات الطبقة البرتقاليه مع بعض
5-نصبها فوق الكيكه والخلطه بشويش عشان ماتختلط
ونردها الثلاجه عشان تمسك

وهني وعافيه

 

[م.محمد]

شخباري بيض

اذا تبين نعلمج نعلمج

انا واحد اعرف اطبخ

خل اقولج طبق المعكرونه:


تسلق المعكرونة في ماي به قفشه شاي ملح وقفشتين طعام زيت لمدة 10 دقائق ثم تصف
تدهن صينية البايركس بالزيت ثم توضع طبقة من المعكرونة المسلوقة
يوضع جلاصين من الباشميل ويوزع بانتظام على المعكرونة
تضاف حشوة اللحم المفروم وتوزع بإنتظام في الصينية
تضاف باقي المعكرونة المسلوقة وتوزع كالسابق
يضاف باقي الباشميل ويوزع بإنتظام
توضع في الفرن على حرارة 350 فهرنهيت حتى يحمر السطح الخارجي تقريباً 45 دقيقة

ونسيت اقولكم المقادير :


نصف كيلو معكرونة والشكل حسب الرغبة
نصف كيلو لحم مفروم
بصلتين متوسطتي الحجم
نصف ملعقة طعام فلفل أسود مطحون
ملح
ملعقتي طعام زيت
عدد 6 جلاصات صلصة بيضاء
عدد 6 قفاش طعام طحين أبيض - لعمل الصلصة البيضاء
عدد 6 جلاصات حليب سائل بارد - لعمل الصلصة البيضاء
عدد 6 قفاش طعام سمن كريسكو - لعمل الصلصة البيضاء

وبالهنى والشفى

 

[م.محمد]

وهذي طريقه مجبوس الدياي :


يحمر البصل مع الثوم مع شوي من الزيت علشان يصير لونه ذهبي
تقطع الديايه نصفين و توضع على خليط البصل والثوم
نحط الطماط والكسبرة والبهارات والملح وأربع أكواب من الماء المغلي
ونحطهاعلى النار حتى ينضج الدياي
يستخرج الدياي بعد النضج ويوضع في صينية ويحمر في الفرن
ونحط العيش في ماء الدياي ويترك على نار هادئة حتى ينضج تماما
يغرف العيش في الوعاء المعد للتقديم ويدهن بالسمن البلدي
يزين بالصنوبر والزبيب واللوز
يوضع الدياي المحمر فوق الرز

والمقادير :


ديايه متوسطة الحجم
كوبان منالعيش المغسول والمصفى
أربع حبات طماط متوسطة الحجم مقطعة إلى قطع صغيرة
حبة بصل متوسطة الحجم مقطعة قطع صغيرة
قفشتين طعام كسبرة خضراء
قفشتين طعام زيت من نوع جيد
قفشه طعام سمن بلدي حسب الرغبة
ثوم حسب الرغبة
ملح

وبالهنى والشفى

وعندي بعد بس اخشهم حق بعدين

 

[engineera]

مشاللللللللللللللللللللللللللللللله هذا شنوووووووووو لا لا ماقدر الصراحه انت منافس قوي يا مهندس م.محمد وانا داشه بموضوع خفيف وسهل و انت حدك داش بالعميق

يالله زين يا هني مرتك فيك بتطبخلها كل يوم طبق

 

[engineera]

اليوم يايبتلكم طريقه اتسون فيها البيض حق المبتدئين يعني بس عجيبه وهيا


بيض ابطاط

المقادير تكفي لشخصان او ثلاث :
1-بيضتين او ثلاث بيضات
2-بصله كبيره مقطعه
3-بطاطا حجم وسط (7cm) تقريبا نقطعها الى مكعبات صغيرة جدا ونغسلها
4-ملعقتي زيت او نصف زبده
5-ملح وفلفل وكركم حسب الرغبه
6-ماء

الطريقه:

1-نحط البطاط في المقلاة وونصب فوقها الماء وبعض الملح حتى يتم تغطيت البطاطا بالماء الى ان يتبخر واحسن شي غطوا المقلاة
2-قبل ان يتبخرر الماء كليا نضع ملعقتي الزيت او الزبده مع البصل الى ان يذبل ويصبح لين ونرش فوقها شوية فلفل اسود ويمكن اضافة بعض الكركم لاضافة لون برتقالي جميل على البطاطس ونحط البيض فوقه ونخلطه مع بعض الى ان ينضج البيض
3-يتم تقديمه


وهني وعافيه

 

[engineera]

شوكلات فوندو
Chocalate FnoDo



اول شي واهم شي تشترون الطبق مال الفوندو وتلاقونه في سيرز

المقادير:

1-اشترو اي نوع كاكاو تحبونه مثل جلكسي او سنيكرز او مارس او كادبوري (6 قطع)
2-علبة قيمر
3- 3 قطع زبده صغيره
4-حمام مائي
5-موز مقطع+فراوله مقطعه+مارشميلو+انواع بسكويتات (عيدان بسكويت+عيدان البسكويت بالكاكاو+ويفير+كوكي)+اناناس مقطع+عنب +بطيخ

الطريقه:

1-نحضر الحمام المائي اللي اهو عبارة عن ماء مغلي في جدر على النار ونحط الكاكاو في جدر اصغر او ماعون بايركس داخل الماء يعني الكاكو يذوب نتيجة سخونه الماء (لشباب لاني ادري مافهمو شنو حمام مائي )
2-نبتدي نحرك الكاكاو اللي يذوب ونضيفله القيمر بالبداية وقطعه زبده ونضيف القيمر تدريجيا الى ان يصبح قوام الكاكو سائل شوي ويمكن اضافة زبده اكثر او قيمر اكثر حسب الرغبه اذا تبونه حيل سائل
3-نصبه في ماعون الفوندو ونشب الشمعه ونحط الفواكه وانواع البسكويتات المراده

ملاحظه:يمكن عمل نفس الطريقه للكاكاو الابيض او الكاكاو المر Dark choclate or white choclate

وانا صراحه سويته حق يمعة الاهل ولانهم وايد ماشالله يبتلهم فناجين قهوه وصبيت لهم فيها الكاكاو من صحن الفوندو عشان كل واحد يغمس على كيفه واحلى شي الاناناس كان عجيييييييييييييييييب ويا الفودندو
وهني وعافية

 

[engineera]

الحين يايبتلكم طريقه شراب الكاكو الساخن المفضل عندي

HoT ChoCaLaTe Drink



طبعا هذي الطريقه انا اسويها
المقادير:

1-اي نوع كاكاو بودر اتحبونه (جليكسي او نسكويك او اوفالتين)ملعقتين كبار
2-كريمه جاهزة او سائله تخفقونها بالخلاط ..حسب الرغبه
3- ربع ملعقة صغيرة او اقل من فلفل احمر (مالت استكانه شاي)
4-ملعقه صغيره قرفه او ملعقتين قرفه (ملعقة عاديه)(اللي فيهم ضغط لا يحطون قرفه اكثر من ملعقة لانها يرفع الضغط بعيد الشر عني وعنكم)
5-25-50 مل ماء او بالاصح فنجان او فنجانين ماء
6-حليب كوب واحد
7-سكر حسب الرغبة

الطريقه:

1-نحط الماء والفلفل والقرفه مع بعض عشان يذوبون وعقب ما يغلي الماء ويذوبون انضيفهم على الحليب
2-نغلي الحليب ونحط سكر حسب الرغبه والكاكاو الى ان نشوف رغوه بيضه فوق الحليب
3-نصب الحليب في الكوب ونحط الكريمه فوقها ونرش فوق الكريمه شوية كاكاو بودر

وهني وعافيه

 

[م.محمد]

مشاللللللللللللللللللللللللللللللله هذا شنوووووووووو لا لا ماقدر الصراحه انت منافس قوي يا مهندس م.محمد وانا داشه بموضوع خفيف وسهل و انت حدك داش بالعميق

يالله زين يا هني مرتك فيك بتطبخلها كل يوم طبق

لووووووووووووووووووووووووول

والمخفي اعظم

لا تتحدين

 

[Reader]

الله يستر................
عسي يكون الطبق متجانس المكونات
ولا يودي الي باطنية مبارك الكبير

ياكثر ما تكتبون وتجمعون وصفات ويا قلة ما تدخلون المطبخ.........!!!​

 

[م.محمد]

اليوم يايبتلكم طريقه اتسون فيها البيض حق المبتدئين يعني بس عجيبه وهيا


بيض ابطاط

المقادير تكفي لشخصان او ثلاث :
1-بيضتين او ثلاث بيضات
2-بصله كبيره مقطعه
3-بطاطا حجم وسط (7cm) تقريبا نقطعها الى مكعبات صغيرة جدا ونغسلها
4-ملعقتي زيت او نصف زبده
5-ملح وفلفل وكركم حسب الرغبه
6-ماء

الطريقه:

1-نحط البطاط في المقلاة وونصب فوقها الماء وبعض الملح حتى يتم تغطيت البطاطا بالماء الى ان يتبخر واحسن شي غطوا المقلاة
2-قبل ان يتبخرر الماء كليا نضع ملعقتي الزيت او الزبده مع البصل الى ان يذبل ويصبح لين ونرش فوقها شوية فلفل اسود ويمكن اضافة بعض الكركم لاضافة لون برتقالي جميل على البطاطس ونحط البيض فوقه ونخلطه مع بعض الى ان ينضج البيض
3-يتم تقديمه


وهني وعافيه

اقول نبي شي قوي .. مانبي بيض

شكلج مبتدأه

 

[م.محمد]

الله يستر................
عسي يكون الطبق متجانس المكونات
ولا يودي الي باطنية مبارك الكبير

ياكثر ما تكتبون وتجمعون وصفات ويا قلة ما تدخلون المطبخ.........!!!​

لا تحاتي يا الحبيب .. حط ببطنك بطيخ صيفي

 

[النزغة]

شخباري الحريم يطبخون الحين الموضة الرياييل اهما الي يبدعون بالطبخ و احنا ناكل و نظعف ; P

 

[النزغة]

طبعا كنت اتغشمر و حسافة مو من هواياتي الطبخ بس اعرف اسوي قهوة عربية تبون الوصفة الصعبة؟

 

[م.محمد]

شخباري الحريم يطبخون الحين الموضة الرياييل اهما الي يبدعون بالطبخ و احنا ناكل و نظعف ; P

صح لسانج

بس قصدج تاكلون وتنتفخون

 

[م.محمد]

طبعا كنت اتغشمر و حسافة مو من هواياتي الطبخ بس اعرف اسوي قهوة عربية تبون الوصفة الصعبة؟

الله يهداج ليش متعبه نفسج


قولي خل اعطيج ملاحظات الشيف

 

[النزغة]

القهوة العربية 1

شوف تيب القهوة و الماي و تخلية يغلي على ناااار هااادية و تنساها شوي ...

بعدين تيب الهيل و شوي زعفران و كل شي تحب تحطة حطة بالدلة و لما تغلي القهوة عدل و تطلع ريحتها

صبها بالدلة وراح تختلط مع الاشياء اللي حطيتها مع بعض

و ذووووق الطعم بعدين لووول عجيبة الوصفة ادري و الشرح واو

 

[engineera]

النزغه لوووووووووووووووووووول هذي قهوتج
عيل سمعي القهوه اشلون يسونها اهل البدو(ونعم فيهم) وانا تعلمتها من رفيجتي عطتني الوصفه وهي مشالله خبره اهي وخواتها واهلها في الطبخ بس احنا نسوي كميه اقل اهي ماشالله اتكثر بكل شي عاد مادري لي كلمتها اتأكد من طريقتها مرة ثانيه واعطيج طريقتها بس قهوتها حلوة كانت

القهوة العربية 2

تيبين ماي كوب ربع تقريبا مع فنجان قهوه وتخلينها تغلي غلوه وحده عقبها اتيبين تقريبا من قفشة كبيرة الى فنجان هيل طبعا احنا نحط قفشه كبيرة لانه اذا زودنا بالهيل اتصير مرة شوي اتحطينها في المطارة وعقبها اتصبين فوقها القهوه وتخلينها تتخدر

 

[engineera]

اقول نبي شي قوي .. مانبي بيض

شكلج مبتدأه

افا والله افا هذا بيـــــــــــــــــــــــض وبــــــــــــــــــــطاط ومــــــــــــــا ادراك ماهو بيض وبطاط
بعدين وايد ناس مايعرفونه وهذي فنتك من فناتك امي لوول

اي وهذي حق مبتدئين صح بس مو انا المبتدئه...

 

[engineera]

قوارب البطاط بالدجاج

المقادير:

12حبة بطاط
كوب و نصف دجاج منزوع العظم و الجلد و مقطع مكعبات صغيرة
بهارات و ملح
عصير خمس حبات بندورة متوسطة الحجم
2 حبة بصل مقطع مكعبات
2 ملعقة زيت
رشة هيل


الطريقة:

- نسلق البطاط لمدة 5 دقائق ثم نقطعها بالطول و نقوم بتفريغها من الداخل ثم نقلييها إلى أن تأخذ اللون الذهبي .

- الحشوة :
- نضع الزيت في قدر على النار مع نصف مقدار البصل إلى أن يتحمر البصل ثم نضع الدجاج و البهارات و الملح و الفلفل الأسود و نقلب حتى ينضج الدجاج ثم نحشي البطاطا بالدجاج .

- الصوص :
- نضع الباقي من البصل في قدر على النار حتى يتحمر ثم نضع عصير الطمام على البصل و نتبل بالملح و الفلفل الأسود مع رشة هيل و نتركه على نار هادئة لمدة 7 دقائق .
- نضع الصلصة على البطاطا و نغطي الصينية بورق المنيوم ثم توضع في الفرن حتى تنضج .
- ننزع ورق الألمنيوم و نحمر الصينية من فوق و تقدم .

 

[EQUATER-1]

ماشاءالله عليج مواضيعج كلها اكل باكل يعني اذا بنتبعج يمكن بعد 6 شهور يمكن يبيلنا عملية شفط دهون