مساكم الله بالخير يا شباب ويا مهندسين
هذا الاعلان منشور في جريده الوطن اليوم (صفحه 21 كامله) ... وطبعا السالفه المعروفه ان في شباب محسوبين على الجمعية وكانوا يفترون على المهندسين ويقولون لهم :" نبي نستأذنكم عشان نحط اساميكم في اعلان مدفوع بالجرايد عباره عن شكر من مهندسين القطاع الى رئيس الوزراء والاعلان على حساب جمعية المهندسين" والشباب على اللى كنت اشوفه -وانا معاهم- عطيناهم اسامينا وراحوا .. هالكلام قبل اكثر من شهر ..
اليوم ... يطلع الاعلان بالشكل البايخ والمشين هذا ... مهندسين بالقطاع النفطى يشكرون الجمعيه !! وطبعا الاعلان المفروض انه مدفوع من حساب الجمعيه لان محد فينا دفع شى !!!
الجمعيه موقفها سيء ويفشل وجدا متخاذل من الزياده العامه ... حيث اعلنت رفضها للزياده "من اولها" وهذى عينه من تصريحاتهم المشرفه ( اقرا من رفض المشروع) :
طبعا .. الاخ/ ناجي العبدالهادي نائب رئيس الجمعيه وواحد من الشباب اللى اشكروهم بالاعلان الاول فوق !! مختصر كلامه: انى ارفض الزياده وابى كادر المهندسين وانا اللى يهمونى المهندسين وما يهمنى احد غيرهم سواء جموع العمال او اللى دون الطبقه المخمليه (المهندسين) .. والمشكله ان التصريحات هذى تسبب حرج للمهندسين في القطاع مع اخوانهم العمال .. والبركه بتصريحات الاخ !!
المهندسين اللى استقالوا معروفين بالاسم .. وكلهم لقوا فرص عمل بالمجال الاستثمارى ... الدوام بالغترة والعقال ومن 8 ليما 1 ومعاش اكثر ... لا استقالوا عشان كادر ولا عشان نيله ... بس مشكله اللى يتاجر بالموضوع بالطريقة هذى !!
موقف الجمعيه الاساسى معروف بالتخاذل عن الزيادة وحتى عن الكوادر في البداية ، ولو ما شافوا الاخوان المهندسين اللى بالقطاع النفطي( اللى مو محسوبين عليهم) اشلون يشتغلون بروحهم واشلون قاعده تتسهل امورهم باجراءات تطبيق الكادر واشلون تعاونوا معاهم الفتوى والتشريع وديوان الخدمة المدنية .. لو مو كل هذا التسهيلات جان ما شرفوا وتلزقوا بآخر لقمه علبوا "ساهمنا" !!
حتى ان نقابة المؤسسة رفعت قضيه ووجهت انذار قضائى للمؤسسة بتطبيق الكوادر في القرار 27/2006 وبعدها صارت 3 جلسات بالمحكمة الاداريه (كلها تأجيل) والجلسه الاخيره بعد جم يوم للنطق بالحكم .. وليلحين نسمع ان جمعيه المهندسين (ناويه) ترفع قضيه عشان كادر المهندسين بالقطاع النفطي وتطبيق القرار 27/2006 ... خلف الله علينا لو كنا خريجين الاسكندريه جان افزعولنا بدل فزعتهم لمهندسين القطاع الخاص !!!
ما ننكر انجاز الاخ/ عادل الخرافي بزيادة كادر المهندسين في القطاع الحكومي ... وكذلك لهم انجازات يشكرون عليها ويعلم الله انى من الناس اللى صوت لهم وانا مغمض (مع الاسف)... بس لا تحقرني و تخذلنى وعقب تقول تعالوا اشكرونى باعلان لانى سويت لكم الزيادة وانت مالك شى بالموضوع !!!
للعلم فقط ان "لجنه مهندسين القطاع النفطي" اللى يرأسها م. ناصر العيدان واللى يعتبر من مؤسسين قائمة الميثاق (بنفط الكويت) مو مآخذه الشرعيه من جموع المهندسين في القطاع ... والاسباب معروفه مانبي نخوض فيها ( بالعربي .. تمثل روحها)
الخلاصه .. اغلب (اذا مو كل) اللى مدونه اسمائهم في هذا الاعلان (وسهل تعرفونهم) ما يتبعون لجنه المهندسين، ولا يعرفونهم ولا حصل لنا الشرف ليلحين بمعرفتهم، لو تسألون هالمهندسين اللى منشوره اسمائهم(وانا منهم) راح يقسمون بالله العظيم انهم ما يدرون ان الاعلان راح يكون شكر بالصوره المخزيه هذى !! غصب تبون تتلزقون بالزياده وانكم ساهمتم فيها يا جمعية المهندسين ؟!! كافى شكلى بايخ وانت حاط اسمى بآخر الاعلان اشكرك !!! واخزياه
احلى فقره بالاعلان هى الاخيره : " ونشهد امام الله والقطاع النفطي ان جمعية المهندسين الكويتيه قد وفرت لنا مالم نكن نتوقعه ... " والله عيب
لكن ..
ان لم تستحي فاصنع ما شأت
