إن لم تمت بالسيف متّ بحادث...

الكاتب : العابر | المشاهدات : 806 | الردود : 11 | ‏4 فبراير 2008
  1. العابر

    العابر بـترولـي خـاص

    بسم الله الرحمن الرحيم..

    والصلاة والسلام على صفوة الخلق محمد صلوات الله وسلامه عليه...

    السلام عليكم ورحمة الله وبركاته إخواني وأخواتي في هذا المنتدى الكريم..

    إلي جمعنا من غير ميعاد مع الناس الطيبه... والله يجعل تجمعنا على مايحبه ويرضاه...

    إنتقيت هذا العنوان من مقوله سابقه هي : (تعددت الأسباب والموت واحد فإن لم تمت بالسيف متّ بغيره)
    بس عندنا في الكويت كالعاده كل شي غير تحت شعار "الكويت غير:)"
    الموت لا بالسيف ولا بالسم ولا غرق ولا أعاصير ولا بلاوي الموت عندنا صار (بحادث) يعني وأنت ماشي في حال سبيلك ماسك سايدك مالك شغل بأحد ماتشعر إلا وإلي قاشك من وراء ولا أنت داش بشبه وراها نخله وراها صبه يعني العمليه كلها 5 دقايق ولا أنت واصل الصليبيخات يصلون عليك !:confused:
    وإذا مسكت هالمتهور إلي داعمك ورع مواليده 1990 تقوله عسى ماشر:mad: يقولك مستعجل تقوله طيب وش عندك يقولك أما يبي يلحق على ستار اكاديمي ولا شاعر المليون ولا مباراه يعني المسأله تموت عشان واحد مستهتر ومتهور يبي يلحق برنامج!:eek:

    الموت الحمر اذا الي داعمك هندي ولا بنغالي تقوله عسى ماشر يقولك بابا أنا ما يعرف !
    شتسوي فيه تشخط فيه وهو يهز راسه !
    :confused:
    الخلاصه من الموضوع...راحوا بناتنا وإعيالنا وإخوانا وأهاليناا ضحايا للحوادث والسرعه في بلد الخير
    حنا مانعترض عالقضاء والقدر وكلن له خاتمته بس إعتراضنا على هالتهور ياخي إشفيها إن سقت السياره بركاده وتأني ياخي إذا أنت عجل ومطيور وبايع عمرك أمك تبيك أبوك يبيك إخوانك وخواتك يبونك ديرتك تبيك وإذا محد يبيك هالمساكين إلي بتدعمهم لهم أهل وأحباب يبونهم والمشكله محد يفهم من تفحيط إلى سرعه جنونيه والحين هابين بجيب سفاري عند كل دوار على قولته "يشل" ياخي شارع أبوك هو ! :mad:

    مايصير ياجماعه والله حالة الوفيات عندنا من الحوادث والضحايا وصلت أرقام خياليه شنو ضحايا الحرب العالميه الثانيه إحنا لو قعدنا عالحال هذا فنى الشعب مايصير
    والمشكله مافيه يد تضرب من حديد يعني الحكومه متساهله في هالأمر.. ولا واحد يصير عليه حادث ويموت وتترمل زوجته ويتيتمون إعياله وإعيشون محرومين وإلي داعمه مايمديه ينسجن ساعتين إلا و طالع بواسطه العضو الفلاني ولا الوزير ولا من عائلة فلان هوامير وماشابه إيه ليش يطلع يعني هو بشر وإلي مات قطوه ولا شجره ! :mad:

    ياجماعه والله ياجماعه الحال مزري ومزري جدا لازم نبحث لحل هذي القضيه إشفيها إذا مسكت واحد داق الطبلون وخالفته وسجنته ونشرت صورته بجرايد الكويت ويطلع خبره بنشرة الأخبار ويمنع التوسط في موضوعه وإلي يبي يتوسط مومشكله يتوسط بس ها ينسجن بداله خله يروينا شهامته هالعضو وينسجن بدال المجرم ولا شهم وبطل عالفاضي بالسوالف نبي فعل تعال يافلان ياواسطه يابيه ياكبير ودش بدال ورع مستهتر ميتم له عائله دش بداله السجن :cool:
    شهروا بهالمستهترين بالجرايد وشاشات التلفاز..إحنا ياخلاف علينا القناة الأولى مالها متابعين خلاص خلونا نستفيد منها خصصوا برنامج مدته ساعتين يوميا يعرض فيه كل الجرايم والحوادث منها الناس تعرف المخطي وينبذ ويصبح لحاله ومنها يرجع لقناة الكويت المشاهدين:)...


    أنا طولت عليك لكن يشهدالله من حر مافيني وحبي لديرتي وخوفي على أهلها...

    تعددت الأسباب والموت واحد فإن لم تمت بالسيف مت بحادث بالكويت:(
     
  2. computer department

    computer department بـترولـي مميز

    725
    0
    0
    مهندسه كمبيوتر
    ديره الخير ( الكــويت )
    مشكور اخوي العابر على الموضوع ومــــــا قصرت
    والله يخلي الكويت وأهلهــــــا ويحفظهم من كـــل شر :)
     
  3. العابر

    العابر بـترولـي خـاص

    اللهم أمين

    وأسعدني مرورك
     
  4. workerq8

    workerq8 بـترولـي مميز

    613
    6
    18
    الموت حقيقة لكنها غايبة على بعض السائقين المتهورين
    في كل يوم اصبحنا نخشى ركوب السيارة وكأنه تابوت لا نعلم متى يغلق علينا
     
  5. redrose

    redrose بـترولـي نشيط جدا

    442
    0
    0
    والله وايد مستهترين بالشارع
    اللأسف ماكوا قانون
    .............
     
  6. العابر

    العابر بـترولـي خـاص

    الله كريم

    واسعدني مروركم
     
  7. غيوم

    غيوم بـترولـي خـاص أعضاء الشرف

    7,298
    1
    0
    مكشور أخوي " العابر " علي طرح هذا الموضوع البالغ للأهمية

    بصرحة أنا وحده من الناس أقول بقلبي قبل لا أركب السيارة يا ريت أوصل للمكان الي أبيه سالمه

    و الله يهدي هالناس يسوقون بسرعة ما أدري شنو وراهم

    الله يحفظنا و يحفظ شعب الكويت من كل شر

    تحياتي لك
     
  8. القحطاني

    القحطاني بـترولـي خـاص أعضاء الشرف

    4,717
    0
    0
    مشكور اخوي العابر على الموضوع ومــــــا قصرت

    والله يخلي الكويت وأهلهــــــا امنين

    :)
     
  9. ACmilan

    ACmilan بـترولـي خـاص أعضاء الشرف

    3,410
    0
    0
    ــــــــــــــــــــ
    kuwait
    اشكرك يالعابر

    والله يبعدنا عن الحوادث
     
  10. dehen_3ood

    dehen_3ood بـترولـي خـاص أعضاء الشرف

    موضوع جميل واسلوب شيق في السرد قواك الله اخي العابر

    السرعة الزايدة والطيارة بالسواقة صارت شي عادي ومألوف بشوارعنا لأن مافي رادع ولا في رهبة !!
    ومافي وعي من قبل المواطنين بخطورة السرعة ولا في احترام لقوانين المرور
    وللي يحز بالنفس إن أكثر من يصاب بحوادث مميتة ولا مكسر بمستشفى العظام هم من الشباب بمقتبل العمر
    مو حرام ؟؟ يروحون من جيس أهلهم ولا يتحرولون ويقعدون !! ليش؟
    لأنه ساكب بالموتر ومستانس وشاخط يعني مسيطر على الوضع !! وشنو آخرتها
    (لا حول ولا قوة إلا بالله العلي العظيم)
     
  11. الناهض

    الناهض بـترولـي خـاص

    2,144
    0
    0
    شركة نفط الكويت
    شيئ مؤلم والله

    الله كريم انشالله

    واللي عقد روس الحبال يحلها ونا خوك..
     
  12. العابر

    العابر بـترولـي خـاص

    الله يرحمنا برحمته
    ويحسن خاتمتنا جميع..

    وأسعدني مروركم جميعا..
    ولا هنتوا
     
جاري تحميل الصفحة...

مشاركة هذه الصفحة