بوق وسرقه اشكره عيني عينك !!

الكاتب : puma.kw | المشاهدات : 893 | الردود : 14 | ‏24 يناير 2008
  1. puma.kw

    puma.kw بـترولـي نشيط جدا

    182
    0
    0
    السلام عليكم ورحمة الله وبركاته

    يا جماعه في موضوع بسيط جدآ بس آثاره السلبيه كبيره جدآ جدآ والموضوع حصل معاي شخصيا اكثر من 12 مره الموضوع بأختصار ان مطعم برجر كنج اللي موجود على خط الملك فهد بأتجاه الوفره والشاليهات لاحظت انهم يبوقون بطريقه غير ملحوظه وذكيه وتطوف على كل الزباين !! ادري استغربتوا من كلامي المهم انا دايم اطلب منهم وجبة الوبر ويقولي ادفع 1400 وكنت ادفع مره بالصدفه دققت بسعر الوجبه اللي مكتوب على اللوحه الاعلانيه لقيته 1300 سألت اللي يبيع وقلتله الوجبه بـــ 1300 ليش تقولي ادفع 1400 تغير لون وجهه وقالي لان انا معطيك شبس اكبر من اللي مع الوجبه بشي بسيط قلتله الحجم الكبير زيادته 200 فلس قالي لا هذا الشبس بين الكبير وبين اللي مع الوجه المهم سكت ونسيت الموضوع رديت بعد كم يوم ومريت المطعم وطلبت وكنت حريص على السعر ابي اشوف شنو راح يقول المهم دفعني 4200 لاني طالب 3 وجبات وبر للتوضيح سعر الوجبه الواحده 1300 يعني المفروض يكون الحساب 3900 مو 4200 ولما سألت الموظف عن السبب قالي لانه حاط جبنه مع الوجبه قلتله الوجبه معاها جبنه بالاساس قال سوري اقصد الشبس كبير شوي المهم طلعت السالفه بوق ببوق وتهاوشت مع الموظف وطلبت المسؤؤل وجاني المسؤؤل واعتذر وقالي ادفع اللي تبيه المهم دفعت حسابي ومشيت المشكله كل ما امر المطعم يسير معاي نفس الموقف طبعآآ كلكم تمرون وتطلبون من المطعم هذا وانتوا رايحين الشاليه او المخيم او الاصطبلات ياريت اللي يمر يدقق على السعر علشان يتأكد ,, صج المبلغ تافه وبسيط بالنسبه لنا بس بالنسبه للي يبوق يعتبر ثروه وعليكم الحسبه كم راح يطلع بالشهر من الـــ 100 فلس بالوجبه الواحده

    سوري على الاطاله بس عن جد الموضوع ماهو هين !!
     
  2. dehen_3ood

    dehen_3ood بـترولـي خـاص أعضاء الشرف

    يا مال العافية اخي الكريم على هالمشاركة والطرح المفيد

    سبق وصارت معاي هذه الحادثة بس في ماكدونادز
    واتضح إن أغلب مطاعم الوجبات السريعة إذا ما حددت لهم حجم نوع الوجبة
    reqular or medium
    اهم تلقائيا راح يحسبون لك الحجم الكبير
    فلازم الواحد يكون حريص ويطلب الحجم إللي يبيه !!
    وعليكم بالعافية
     
  3. الغالية

    الغالية بـترولـي خـاص

    1,035
    0
    0
    يعطيك العافيه اخوي

    والسالفة هذي تصير واااااااااااايد في الجمعيااااات او المحلات .. يحسبون الشغله مرتين والواحد ما يكون منتبه !!

    غير اللي يحط لك الأغراض بالأكياس .. مرات ياخذ من شغلك اللي يعجبه ويحطه تحت كومة الأكياس !!

    انتبهوا يا جماعة الخير ...
     
  4. بيروتي

    بيروتي بـترولـي جـديـد

    32
    0
    0
    الف شكر لك على هالموضوع

    والله يعطيك العافيه على هالتنبيه

    لان لو انت ما تكلمت وغيرك ما تكلم

    بياكلونا هالنصابين وياليت اللى تصيرله

    هالسالفه لايسكت ويوصلها لاكبر مستوى

    اكرر شكري لصاحب الموضوع
     
  5. special

    special بـترولـي نشيط جدا

    184
    0
    0
    الله يرحم والديك على هالموضوع

    والمشكله النصابين بكل مكان حتى

    بالبنزين حطوا بالكم للى يعبون لكم

    ترى احيانا ما يصفر العداد يخلي فيه ربع

    دينار او اكثر

    الف شكر لك
     
  6. جونم جقرم

    جونم جقرم بـترولـي خـاص أعضاء الشرف

    8,202
    0
    0
    منــدوب نفطـي (: ---> 66698897
    خـيـمـة فـُـوق طـِـعـسـ
    الله يعطييييييك العاافية
    يا أخواان أحب انوه علي شغلة حتي الي يستخدم الكي بالنت بالمقااضي يحط بااله ويكوون حريص
    بعض المحلاات يشخطهاا مرتيين يعني يحسب السعر مرتييين وانت تقااسط السعر دبل
     
  7. الناهض

    الناهض بـترولـي خـاص

    2,144
    0
    0
    شركة نفط الكويت
    كلامك عدل

    مره 1300
    ومره1400


    لا وأبشرك مره 1550

    الله يجزاك خير علي هالمعلومه
     
  8. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    تصير وايد خاصة انهم يدرون انه الكويتي ما يحب يحسب : )
     
  9. redrose

    redrose بـترولـي نشيط جدا

    442
    0
    0
    والله حاله
    البوق صار عادي بالديره
     
  10. Mr. Engineer

    Mr. Engineer بـترولـي مميز

    662
    0
    0
    انتبهوا يا جماعة و ركزوا في الحساب ترى قاعد ننباق أشكره...

    أنا مرة في مركز سلطان المحاسب يمرر قوطي قيمر قيمته يمكن 150 فلس، طلع الحساب على الشاشة 1.800 دينار، زين إنه كنت مركز ...

    سألته شلون القيمر سعره 1.800 دينار!!!

    ولا يشيك على الجهاز ولا مكتوب زيت زيتون!!!

    طلعوا لاصقين لصقة الزيت زيتون على القيمر و احنا بس نخم بهالأغراض و ندفع بدون ما ندري شنو شرينا...


    المفروض الواحد لما يرجع البيت ياخذ الفاتورة و يقارنها مع الأغراض، و إذا فيه أي نقص أو غلط في الحساب يراجعهم و ما يسكت عن حقه عشان لا يتمادون في السرقة!!!

    بس الملاعين شكلهم يدرون إنه في ناس تشيك من وراهم، فأغلب اللي مكتوب في الفاتورة تلاقيه أصناف عامة عشان ما تقدر تحسب من وراهم....


    ديروا بالكم يا جماعة!!!

    شكراً fhd.KW على الموضوع المهم

    تحياتي
     
  11. المشاكس

    المشاكس بـترولـي خـاص أعضاء الشرف

    998
    1
    0
    هم حطوا بالكم ياجماعه ترى البوق حتى في التقارير السنوية ..... يقرون عليك التقرير ويقولك التك النهائي ولما توافق تتفاجأ بعدين ولا التك في السيستم غير ألي قالوه لك .......

    والله مشكلة الحياة صارت كلها بوق في بوق
     
  12. HUMMER

    HUMMER بـترولـي خـاص

    مشكور اخوي على الموضوع والتنبيه وفعلا لازم الواحد يجيك عليهم
     
  13. kuwaity

    kuwaity بـترولـي جـديـد

    37
    0
    0
    :)
    kuw
    البوق في كل مكاان ,,وحاميها حراميهاا
     
  14. n3n7

    n3n7 بـترولـي نشيط جدا

    271
    0
    0
    والله انا ملاحظ الشغله هذي بس مو متاكد من السعر لاان قبل يومين مار المطعم ودافع دينار ونص مع العلم البيبسي حجم عشان جذي قلت يمكن ان المطعم بعيد شوي يصير غالي طلعت السالفه بوق ياااساتر محد ماكلها الى المواطن المسكين قاصينه قص لنى الله ياشبااااب ديربالكم على فلوسكم
    مشكور اخوي على هالموضوع وزين نبهتني
    ومني تحياتي لكم
     
  15. ABDULLAH

    ABDULLAH قــلــم بــتــرولــي أعضاء الشرف

    10,727
    1
    36
    موظف في ش نفط الكويت
    وطن النهار - الكويت موطني
    يا فهد مشكور على الموضوع و حرصك على إخوانك ، جزاك الله خير على حرصك ان شاء الله

    مع الأسف اللي ما يخاف الله يلعب لعب و يستحل ما حرم الله و يستحل فلوس الناس بالباطل

    لا نكون مغفلين ، لازم ندقق لازم نراجع الحسابات
     
جاري تحميل الصفحة...

مشاركة هذه الصفحة