تطبيق القانون النفطي وكلمه من القلب يا اخوان!

الكاتب : فورمن | المشاهدات : 1,296 | الردود : 13 | ‏24 أغسطس 2014
  1. فورمن

    فورمن بـترولـي جـديـد

    3
    0
    0
    السلام عليكم ورحمة الله وبركاته

    اما بعد

    يسعدني التواصل معاكم في هذا المنتدى الجميل وحبيت اشارك اول موضوع لي مع كثره متابعتي للموضوع من الطرفين النقابه و الموظفين

    الموضوع الي بشاركم فيه الحين اتمنى الكل يتقبله بسعه صدر كبيره ولا يزعل لاني بقول كل الي اعرفه واذا اخطأت اتمنى تصححوني خطئي


    في البدايه رأيت كثير من مواضيع النقابه وترحكاتهم وجهودهم وسعيهم في سبيل الموظفين لنيل حقوقهم بالكامل او جزء منها

    ورأيت كثير من التفاعل من الموظفين للنقابه وتشجيعهم ودعمهم بالكلام والحضور والموافقه ومحاسبتهم وشكرهم

    والنقابه حاليا حيل مشكوره سواء تطبق القانون بلي كنتوا تطمحون له او غير ذلك

    يا شباب القانون النفطي مو بس فلوس صدقوني الموضوع اكبر من جذي الوضع صار استقرار

    اضرب مثال من عندي حلو وصغير البيت لي كان اساسه قوي تقدر تبني مليون طابق بعكس البيت الي اساسه تعبان

    احنا بالاساس القطاع النفطي الخاص ماكان عندنا اساس وضعنا حيل تعبان وماكان في مستقبل والكل ينظر الينا نظره

    المواطن الي مايستحق أي شي بسبب لا يوجد لنا قانون يدعمنا ونقدر نحاسب فيه او بالاخص يوجد قانون غير مطبق


    والحمدالله تم تطبيق القانون النفطي الخاص وحتى لو كان مافي مبلغ وغير مساوي بالقطاع النفطي الحكومي

    بس اقول الحمدالله الف الحمدالله والشكر لله على التطبيق

    هذي البدايه وليست النهاية صار عندنا مستقبل في الترقيه وزياده الراتب يعني كل قريد يزيد راتبك

    صار عندك حافز تشتغل وتقدر تحاسب اذا ما خذيت حقك في لائحه وتحاسب المسؤولين عليها

    صار عندك امان وظيفي وعكس سابقا.

    مميزات حلوه ويشكرون النقابه عليها

    والي يقول هذا قليل بحقنا واحنا نستاهل احسن من جذي ارد واقوله بس هم الحمدالله والشكر لله يا اخوي

    لانه في ناس بفكرها انه خلاص انتهى دور النقابه لا بالعكس هذا التطبيق يشجع النقابه بالمطالبه والتعديل

    التفكير للاحسن

    اضرب مثال على موظفين البترول الوطنيه ما نالوا الي يمتلكونه حاليا بيوم وليله او كن فيكون

    بالعكس النقابه من فتره لي فتره تطالب وتحسن وتعدل وتصير مفاوضات ينقصون شي من مميزاتهم ويزيدون ويعدلون اشياء اخرى

    كلامي هذا بقول حق البعض احنا بأول المشوار وهناك الكثير من المشاوير لنا والنقابه دورها لم ينتهي ولن ينتهي

    وارد واقول النقابه موظفين وبشر حالهم حالنا وبدون زعل اخاطب الفئه الي يشتمون ويتمصخرون ويستهزء بالنقابه

    والله لو اشيل النقابه واحطك مكانهم كان ضعت وماعرفت شتسوي

    نقابتنا شنو عندها يا بشر من وسيله ضغط على المؤسسه؟؟ بتقولون نفس ماقلتوا بأجتماع الاتحاد اضراب؟؟

    تضرب؟ شنو بتسوي باضرابك؟؟ :) بكل صراحه ولا شي

    بترفع قضيه على تطبيق القانون ؟؟ نقول رفعوا قضيه؟؟ تنطر قضائنا سنين طويله؟؟؟ صارت مشكله بيكلمون المؤسسه تتوقعون المؤسسه شبتقول؟؟ بترحب فيهم؟ اكيد بتقول اخذ حقك بالقضاء مادام رفعتوا قضيه

    يا ناس مع احترامي نقابتنا تحتاج دعم ومو ناقصه شتم ولا تقليل قيمه ومحاسبه مثل ماقتلكم اهي على الله ثم علينا احنا الموظفين

    بعد موظفين مو معاها شالفايده

    والسموحه على الاطاله واتمنى ماتأخذون كلامي بحساسيه واختلاف بالرأي لا يفسد من الود قضيه وشكرا.
     
  2. Q8Root

    Q8Root بـترولـي جـديـد

    32
    5
    0
    و عليكم السلام ورحمة الله وبركاته
    كلامك مضبوط بس هل التواصل مع الموظفين و اعلامهم بآخر المستجدات حول تطبيق اللائحه مو من مسئوليات النقابه ؟؟
    احنا مع النقابه مو ضدها لانه بالنهاية الطرفين بيستفيد من تطبيق اللائحه بس ليش نظل معلقين ننطر موظفين عاديين يحطون لنا مواضيع تم تطبيق اللائحه و الثاني ينزل صور عقد قديمه و منهم من يكتب تغيردات غير صحيحه.
    وين النقابه ليش ما تتواصل معانا و ليش تعلقنا ترا بس لو تقولنا شنو الي بيصير وياها احنا بنوقف وياهم و نعذرهم لكن سكوتهم هذا اهو الي تخلى الناس توجه التهم لهم.
     
  3. sarey

    sarey بـترولـي نشيط جدا

    194
    7
    18
    تقص علينا يالطيب ولا تقص على نفسك ؟؟!!

    جميع موظفين شركات القطاع الخاص في نفط الكويت وعددهم بالآلاف لم يستدعى منهم شخص واحد بخصوص عقد جديد أو قريد أو ومميزات وخرابيط !!!!

    ادارة التكويت والشركات نفسهم يقولون ماعندنا شي

    خلها على الله بس يرحم والديك !!
     
  4. فورمن

    فورمن بـترولـي جـديـد

    3
    0
    0
    اخوي ساري الصبر مفتاح الفرج واتحفظ بالرد لانه بس لو تعيد تراجع تعليقاتك تلقاها كلها احباط ونكد ومافي تفائل يا اخي تفاءلوا بالخير تجدوه
     
  5. فورمن

    فورمن بـترولـي جـديـد

    3
    0
    0
    اخــوي رووت شنو نطلب من النقابه التصريح؟ صرحت النقابه وقالت بلشوا تطبيق

    وحطوا صور مع المؤسسه

    واعلنوا الشركات الي وقعوا والحمدالله الشباب الي وقعوا نزلوا عقودهم

    يعني للامانه تبي النقابه تروح الشركات وتصور مع الشباب وترسل لكم صور والعقود ؟؟

    الحين التطبيق بأذن الله قاعد يمشي اتكلم عن المصافي بغض النظر عن ال koc

    لاني مو متابعهم بس ان شاءالله يخلصونهم لانه حسب توقعي عدد موظفيين عقود ال koc اكثر واضعاف موظفين عقود knpc

    فهذا يحتاج جهد ووقت وان شاءلله تفرج وتفرحون وتوقعون العقود بأذن الله
     
  6. Yes

    Yes مشرف منتدى القطاع النفطي الخاص مشرف

    379
    136
    43
    ذكر
    موظف في #القطاع_النفطي_الخاص
    الكويت
    جاري التطبيق والتأخير من (التكويـت) للأسف..

    السلام عليكم ورحمة الله وبركاته



    الأخوان (فورمن) و(ساري) يرجى الإطلاع على الموضوع التالي للأهمية:ـ

    توقيع العقد الجديد من قبل احد الاخوه وهو موظف في القطاع النفطي الخاص(الموضوع مدعم بالصور)..ـ


    http://www.q8ow.com/vb/t51370/


    أرجو ان يكون الموضوع ذو فائدة..


    ولا حول ولا قوة إلا بالله

    حسبنا الله ونعم الوكيل

    والسلام عليكم ورحمة الله وبركاته
     
  7. hanter

    hanter بـترولـي نشيط جدا

    234
    0
    0
    سلام عليكم اولا في ناس كثير وقعو وخلصو ولله الحمد في knpc اما في ال koc ان شاء الله من شهر تسعه يبلشون توقيع والموضوع منتهي وانا امس امكلم النقابه والحمد الله النقابه جدا متعاونه واحب اقول حق الي يقول وين النقابه ماترد علينا اقوله النقابه ماقصرو حطو جميع ارقامهم وتلفوناتهم مفتوحه واي احد عنده استفسار يتصل ياخي مو لازم يرد عليك في المنتدى دق واسأل وخلاص لازم يتابعونك في المنتدى ياخي كفايه جابولك القانون عند رجولك شتبي بعد شوف النقابات الثانيه شصار فيها انحلت وصار فيها خيانات اما نقابتنا اوعدت ونفذت حتى لو كان في اشياء ناقصه راح يتم المطالبه فيها وارد واكرر الي يبي النقابه يدق ولايقد يتحلطم ويهرج فكونا
     
  8. sarey

    sarey بـترولـي نشيط جدا

    194
    7
    18
    أخي العزيز أنا من عادتي التفاؤل ولله الحمد ، بس الواحد يتفائل لما يشوف شي ولو نسبته واحد بالميه ، لكن لما تراجع المؤسسة والتكويت وتراجع شركتك وكلهم يقولون توكل على الله مالكم شي ، وين أتفائل ، ممكن تقولي !!!

    هذا الكلام لعقود ال koc فقط ، الشركات الثانية مادري عنها
     
  9. Q8Root

    Q8Root بـترولـي جـديـد

    32
    5
    0
    اخوي و koc ليش التكويت الى الان ماسوو شي للائحه و الاخ hanter كاتب انه شهر 9 بيخلص كل شي . ليش النقابه ما تقول هالكلام بنفسها .
     
  10. hanter

    hanter بـترولـي نشيط جدا

    234
    0
    0
    اخوي قلت واكرر دق على النقابه والي بخاطرك اسأل عنه انا دقيت عليهم وقالولي من اول شهر 9 بيبلشون في koc لانه عقودهم وايد وان شاء الله نهاية شهر 9 كل الموضفين موقعين عقودهم الجديد وهذا الكلام من النقابه وknpc تقريبا اكثر الموضفين خلصو ووقعو
    ياخوان ميصير تهاجمون الناس عشان مايردون عليكم في المنتدى حطو ارقامهم وقالو الي يبي يدق ويسأل بس اضاهر في ناس وايد تستحي ادق طولو بالكم ومافي الى الخير دام تطبق راح يطبق على الكل
     
  11. محسن السويدي

    محسن السويدي بـترولـي نشيط جدا

    279
    30
    28
    ذكر
    ميكانيكي
    الكويت
    السلام عليكم ورحمة الله وبركاتة
    يا أخواني قال الله تعالئ في كتابه العزيز ( إن مع العسر يسرا ) و كل ما تأملت في قول الله سبحانه وكلت امري لله
     
  12. sarey

    sarey بـترولـي نشيط جدا

    194
    7
    18
    اللي يقول دق على النقابه ، النقابه أخوانا ونعرفهم وأكيد كلامهم زين ومطمن وكل شي تمام من صوبهم ، بس جهة التنفيذ مسكرين الجام ولا عندهم تجهيزات للقانون هذا ولا مراسلات ولا حتى سكرتير يشتغل على القانون ، الكل يقول ماعندنا شي وماوصلنا شي !!!
     
  13. hanter

    hanter بـترولـي نشيط جدا

    234
    0
    0
    ياخوي ساري حدث العاقل بما يعقل الناس وقعت عقوده واكثر موضفين knpc وقعو وخلصو والدور ان شاء الله جاي koc وتقلي مافيه تنفيذ ؟ وبنسبه حق الي يقولك ماجانه شي اكيد بيقولك مافي اخبار عشان مايصير زحمه عند التكويت متكتمين على الخبر واحب اقولك وابشرك من اول 9 راح تشوف توقيع الموضفين من koc وراح ترتاح مثل ما اخوانه في knpc ارتاحو لا تحاتي
     
  14. sarey

    sarey بـترولـي نشيط جدا

    194
    7
    18
    الله كريم ان شاء الله ، ننطر ونشوف
     
جاري تحميل الصفحة...

مشاركة هذه الصفحة