شنو يعني فندق خمس نجوم...؟!!

الكاتب : PARADISEY | المشاهدات : 1,069 | الردود : 3 | ‏14 نوفمبر 2011
  1. PARADISEY

    PARADISEY بـترولـي نشيط

    142
    0
    0
    Guesse
    Kuwait

    شنو يعني فندق خمس نجوم؟

    [​IMG]
    [​IMG]


    في ناس وايد تسمع وماتدري والبعض يعرف والبعض شبة عارف معنى تقييم الفنادق بالنجوم، شنو يعني نقول الفندق نجمتين أو ثلاث أو أربع أو خمس نجوم؟

    بالنسبة للسؤال، من أول الأسئلة اللي تمر عليك بهالموضوع هم: عالمياً منو يحدد هالفندق تقييمه كذا نجمة؟

    الجواب: محد! يوم دوّرت بالموضوع استغربت انه ماكو نظام عالمي ثابت متفق عليه (لا رواه مسلم ،،، لا أتقشمر ) بخصوص تقييم الفنادق بالنجوم. يعني في دول تختلف بأسس تقييمها عن دول ثانية، خاصة بين أمريكا ودول أوروبا. بدول أوروبا غالباً في مكاتب حكومية تدير هالشغله وتهتم بالتقييم، بس بأمريكا منظمات مختلفة. بأمريكا السالفة متوزعة بين مجموعة منظمات متفرقة مستقلة عن بعضها البعض (بس مرخصة حكومياً).

    يعني باختصار ماكو جهة معينة عالمية ثابتة نروح عندها وتقيّم الفندق جم نجمة. في وايد منظمات بس لي الحين مو عالمية كفاية ولا معترفين فيها بشكل رسمي بهالمجال، وتقييم هالمنظمات مختلف بينهم بين بعض، يمكن منظمة تعطي فندق 5 نجوم ومنظمة ثانية تعطيه 4.

    مع هذا تبقى بعض الأساسيات بالتقييم محد يقدر ينكر أهميتها بالحسبه، مثل: حراسة أمنية 24 ساعة، مطابقة المبنى لقواعد الأمن والسلامة، مساحة الغرف، جودة الأثاث المستخدم، الألوان، الإضاءة، الديكور، الأجهزة المتوفرة،،،

    هذي العوامل المعروفة، بس يمكن محد فكر انه موقع أو منطقة الفندق نفسه مرات يدش بالحسبه، سهولة المدخل حق الفندق، المنظر اللي يطل عليه الفندق، توفر المصاعد، عندهم نادي صحي، صالون تجميل، صالة استقبال واسعة، عندهم حوض،…الخ.

    مع كل الاختلافات نقدر نلقى نمط عام حق التقييم الموجود، يتلخص كالتالي:

    [frame="2 70"][​IMG] نجمة – توفير الحاجات الأساسية، غرفة فيها فراش وتكرمون حمام، ولا يصير ببالكم دام انه نجمة وحده يعني لازم وصخ ويلوّع الجبد، ماله علاقة أصلاً، يمكن يكون نجمة بس نظيف ومرتب ما عليه مشاكل، بس انه محدود بغرفة وحمام وسلة زبالة وهالسوالف الأساسية. تلقى ماكو مطعم بهالفندق والخدمة شوي متواضعة حيل باللي تقدمه حقك.[/frame]

    [frame="2 70"][​IMG][​IMG] نجمتين – أساسيات وشوي زيادة، مثل النجمة بس شوي أحسن، مثلاً تلقى تلفون وتلفزيون وهم خدمة غرف شوي أحسن، مرات يكون عندهم مطعم بالفندق وخدمة تنظيف الغرف يومياً.[/frame]

    [frame="2 70"][​IMG][​IMG][​IMG] ثلاث نجوم – حق الراحة، غالباً حق الشركات الفندقية المشهورة. العادة يكون عندهم مطاعم زينه ونادي صحي وخدمات أعمال وقاعات اجتماع وتوصيل وخدمة غرف …الخ. يهتمون بالأثاث ومساحة الغرفة تكون كبيرة نسبياً ودايما يراعون اللمسة العصرية بالديكور. الفنادق بثلاث نجوم تستهدف أكثر شي اللي يسافرون لحاجات العمل والشركات.[/frame]

    [frame="2 70"][​IMG][​IMG][​IMG][​IMG] أربع نجوم – قمة الراحة، هني تدش عالفخامة. الفندق بهالمستوى يكون ضخم، فخم، ويلق لق من بعيد، يعطي خدمة مثالية وإضافات وايد عشان يضمن راحتك. مثل مستحضرات تجميل حق السيدات يوفرونها بالغرفة والفرش يكون راقي مهتمين فيه بشكل كبير. غالباً يوفرون مو بس حوض واحد، أحواااض! جاكوزي وسونا، مطاعم فاخرة، سيارات ليموزين، نوادي صحية غالية.[/frame]

    [frame="2 70"][​IMG][​IMG][​IMG][​IMG][​IMG] خمس نجوم – دلع و ولع! كل شي خيالي فوق الأربع نجوم تحصله هني. مو بس يهتمون بالخدمة والأثاث، حتى البنيان لازم يكون روعة وشي مميز. دام انت عندهم المفروض ما تحرك صبعك أصلا إلا اللهم يوم تبي تشيل فيه كرت الفيزا عشان تدفع. مو غريبة إذا يكون عندهم ملاعب تنس وملعب غولف ووجبات الكافيار وياجي الخرابيط اللي نسمع عنها بالأساطير الأغريقية واليونانية.[/frame]


    زين بالكويت شلون يصير التقييم عندنا؟

    عندنا التقييم يكون عن طريق لجان حكومية تتبع وزارة التجارة، اللجنة الدائمة لتقييم الفنادق. السالفة عندنا مرتبة الحمد لله مو ضايعه بالهوا وبدوا يهتمون فيها قبل خمس سنوات بس، سنة 2005. إذا في شركة بتفتح فندق تروح حق اللجنة عشان تزورهم وتجيك عليهم وتعطيهم التقييم حسب اللوائح والأساسيات المعتمدة باللجنة، والمفروض دورياً يجيكون عالفندق بعد افتتاحه عشان يتأكدون انه ملازم (لا ضابط ،،، لا اتقشمر ) حق التقييم اللي عطوه.


    واللي اكثر من خمس نجوم؟

    بشكل عام عالمياً الحين التقييم المنتشر يكون من نجمة إلى خمس نجوم، بس مثل ما سمعنا فندق برج العرب بدبي معطي روحه 7 نجوم! وهم فندق Town House Galleria بميلان. بس هالتقييم منهم ولهم، ماكو شي اسمه 7 نجوم، رسمياً أهم خمس نجوم بس معطين روحهم سبع نجوم بالكلام. انا ادري ومتأكد انهم أقوى من الفنادق الخمس نجوم العادية، بس هم ما نقدر نقول كلمن سوى شي يديد يقدر يألف تقييم حق روحه.

    وبالأخير اقول في مشروع اسمه (World Hotel Rating) راح يبدي خلال هالسنة بخصوص توحيد تقييم المشاريع الفندقية في أنحاء العالم وتحديد الأساسيات المعتمدة في التقييم، صج البداية تجريبية بس بادرة خير ان شاء الله عشان نفتك من هاللخبطة.

    المصادر:
    Wikipedia – Hotel Ratings
    Associated Content -What Do Hotel Star Ratings Mean?
    Canoe -Navigating the hotel star system
     
  2. نفط الكويت

    نفط الكويت بـترولـي نشيط جدا

    183
    0
    0
  3. يادنيا

    يادنيا بـترولـي مميز

    مشكور على المعلومات
     
  4. PARADISEY

    PARADISEY بـترولـي نشيط

    142
    0
    0
    Guesse
    Kuwait
    العفو يالغالي، هذا من ذوقك.



    العفو يالغالي.
     
جاري تحميل الصفحة...

مشاركة هذه الصفحة