منوعات Mix حلوة ومفيدة 14.11.2011...!!!

الكاتب : PARADISEY | المشاهدات : 1,824 | الردود : 2 | ‏14 نوفمبر 2011
  1. PARADISEY

    PARADISEY بـترولـي نشيط

    142
    0
    0
    Guesse
    Kuwait


    مـــنـــوعـــات

    خلاص يبه خلوها طبقات وفكّونا

    هذي صورة من مجلة أمريكية شهرية إسمها (Popular Science) من عدد أغسطس 1920 يتوقعون فيه أمريكا شلون بتصير سنة 1950.
    الصورة أول ما شفتها تذكرت مقطع ديوانية الچذابين وسعد الفرج .

    [​IMG]

    مادري إذا أحد فهم العنوان غلط وعباله نتكلم عن الطبقات الاجتماعية، انا اقوله لا يبه لا يروح بالك بعيد هالشي خالصين منه من زمان
    قصدي “ناس فوق ناس! بيتك بيت جارك بيت جار جارك جار جارك، بيسووون الكويــــــــــت إإإمــــــْـــــــــــيـــــــــَــــــة طبقة!”
    عيل مستغربين ليش العمارات بحولي تنبني طوابير عمارة ورا الثانية وكل عمارة حدها 10 مصافط تحت؟
    ولا عمارات بنيد القار؟
    ولا العمارات السكنية بالجابرية؟
    ولا المهبولة؟
    وغيره وغيره؟
    ومستغربين ليش بالجرايد ملينا واحنا نقرا البلدية تقول القوانين تمنع هالشي؟ ليش منو يعطي التراخيص حق هالعمارات؟
    و وزير ورا وزير وكلهم على نفس الشريط ما يتغير؟
    أنا اقول “كـــــــــــــل شــــــــــــي فــكّــــــــرت فيه الحـــكـــومــــة!”
    الخطة -يا جماعة الخير- بس يبون نقتنع إن الحل الوحيد حق زحمة الشوارع، وندرة المصافط، وترخيص الأراضي السكنية من شركات النفط لبدء المشاريع السكنية، كله بس بحل الطبقـــات!
    “الكويت كلها بتصـــيــر جسور طقّة وحده! سيارات ممنــــوع، ما تمشي!”
    زين يمكن واحد يقول الحين: آمنّا بالله، هذي الخطة هذي الخطة، زين يالله شناطرين؟
    عاد اقوم انا أرد عليه واقول: الظاهر بس شوي مستحين من الشعب، الخطة شوي قوية عليهم
    عيل مرة وحده تخيّل تصير العناوين بالديرة “القادسية، الطابق الثاني، قطعة …” مو هيْـنه!
    غيروا نظام أرقام التلفونات زادوه رقم واختبصنا، هالمرة نصير طبقات!!!
    فأنا أحب من هذا الموضوع، ومن هذه اللحظة، أن أبدي استعدادي لتقبل خطة الطبقات
    وأقول إيدي على ايدكم يا جماعة وان شاء الله ما نقصر وياكم،
    والشعب الكويتي ان شاء الله هم يشد حيله ويداوم مثل الناس في سبيل تحقيق هذا الحلم كتعبير عن مساندته لخطط التنمية في البلاد
    “نــبـيـــهـــا طـــبــــقـــــــات:)



    ملاحظة أخيرة/
    المجلة اللي تكلمنا عنها ما تعلمت من غلطها، شكلهم يحبون يعيشون المستقبل الخيالي بدال اليوم الواقعي، شوفوا صورة لغلاف عدد حديث من مجلتهم:

    [​IMG]
    مقارنة بين عددين لنفس المجلة

    المصدر


    _______________________________________________________________



    هُنا كانت اليابان: صور مروعة من القمر الصناعي قبل وبعد الزلزال...!!!


    [​IMG]

    لازالت الأحداث تتصاعد بوتيرة مقلقة جداً في اليابان كل لحظة، مع أنباء عن وجود أكثر من 10,000 قتيل في مقاطعة مياجي وحدها، وتأكيد حدوث تسرب نووي ونزوح أكثر من ربع مليون شخص!


    مدينة سينداي:

    [​IMG]

    [​IMG]

    [​IMG]

    [​IMG]

    [​IMG]



    شبه جزيرة أوشيكا:

    [​IMG]

    [​IMG]


    مدينة إيشونوماكي:

    [​IMG]


    مدينة ميناميسوما:

    [​IMG]

    [​IMG]

    [​IMG]


    مفاعل فوكوشيما النووي:

    [​IMG]


    لا أظن أن هناك وصفاً أبلغ لوصف تلك الصور من قوله تعالى: “”حَتَّى إِذَا أَخَذَتِ الْأَرْضُ زُخْرُفَهَا وَازَّيَّنَتْ وَظَنَّ أَهْلُهَا أَنَّهُمْ قَادِرُونَ عَلَيْهَا أَتَاهَا أَمْرُنَا لَيْلًا أَوْ نَهَارًا فَجَعَلْنَاهَا حَصِيدًا كَأَنْ لَمْ تَغْنَ بِالْأَمْسِ” (سورة يونس – 24)، فبرغم كل هذا التطور التكنولوجي الهائل وبرغم استعدادات اليابان لهذه الكوارث لكن ما هي إلا لحظات زُلزلت فيها الأرض فأصبحت “حَصِيدًا كَأَنْ لَمْ تَغْنَ بِالْأَمْسِ”!!

    فسبحان من بيده ملكوت كل شيء وهو على كل شيء قدير!

    [rainbow]يمكنكم مشاهدة هذه الصور بطريقة تفاعلية من خلال: ABC News أو NY Times[/rainbow]


    هل تظنوا أن اليابان قادر على التعافي من تلك الكارثة؟ أم أن اسم اليابان سيختفي من عالم التكنولوجيا والصناعة، ولو على الأقل في المستقبل المنظور؟


    منقول من عالم الإبداع


    _______________________________________________________________


    بحيرة كاملة بلعتها الأرض

    [​IMG]
    شلال تكوّن من البحيرة بسبب الحادث

    فيديو عن بحيرة كبيرة بولاية لويزيانا بأمريكا إسمها بحيرة بينيور -- Lake Peigneur كانوا يحفرون فيها، صار غلط بعمليات الحفر والبحيرة كلها انسحبت تحت الأرض!
    البحيرة كانت عذبة الماي يوصل عمقها إلى 10 أقدام أو 3 أمتار، العمق مو كبير بس كانت كبيرة وراح تشوفونها بالفيديو، كافي شكلها وكانت مشهورة حق رياضات الماي بالمنطقة. بيوم 20 نوفمبر 1980 صار غلط بعمليات الحفر بين شركة نفطية (تكساكو -- Texaco) وشركة تجمع ملح من منجم أملاح تحت البحيرة (Diamond Crystal Salt Company)، وماي البحيرة كله انسحب مثل ما قلت تحت الأرض.



    بالأخير الحين مكان البحيرة مو ناشف، بس تغيرت جيولوجية السطح وحوالينه. البحيرة متصلة بأنهار صغيرة بس مايها مالح فالحين تغيرت طبيعة البحيرة عن قبل.
    الغلط صار براس شركة تيكساكو ودفعوا تعويضات بعد الحادثة حق شركة الملح بقيمة 32 مليون دولار ودفعوا 12,8 مليون دولار حق الحدائق المجاورة اللي تأثرت من الحادث.

    المصدر: Wikipedia -- Lake Peigneur

    تقدرون تشوفون البحيرة في موقع خرايط قوقل على هذا الرابط.

    المصدر



    _______________________________________________________________



    أمريكا مو الدولة (الأولى) عالمياً

    سيطرة أمريكا سياسياً في العالم اليوم مو يعني اهي الأفضل.
    شوفوا ترتيب أمريكا في مجالات مختلفة مقارنة مع باجي الدول (تعليم، انتشار الفساد، الخدمات الصحية، الديمقراطية …الخ).

    [​IMG]


    المصادر: بموقع النقل



    _______________________________________________________________



    أحلى طريقة علشان تقعدون/تصحوون عيالكم من النوم، ما تقدر ما تبتسم :)




    _______________________________________________________________


    فيديو: مقلب الشامبو اللانهائي

    والله فطست من الضحك وانا بالدوام الكل قاعد يطالعني لوووووول
    أحلى شي راعي المقلب شلون يضحك مستانس :D





    _______________________________________________________________



    صور جسور طبيعية تنمو من جذور الأشجار


    في أحد المناطق بشمال شرق الهند الجسور عندهم ما تنبني، الجسور تنمو من جذور الشجر!
    مدينة تشيرابونجي - Cherrapunji في الهند مشهورة بأحد أكثر المناطق أمطاراً في العالم، بتلال المدينة ينمو نوع من شجر المطاط الهندي اسمه Ficus elastica يتميز بجذور قوية ومتداخلة بطريقة عجيبة. الجو دافي ورطب معظم أوقات السنة والظاهر مثالي حق هالشجرة من جذي تشوفها كثيفة حيل بالمنطقة.
    الغريب في الشجرة انها تطلّع جذور ثانوية (ثانوية ولا ابتدائي؟ ) من اغصانها المرتفعه، وهالأغصان الثانوية تصعد فوق الحواجز الصخرية والمرتفعات والأنهار عشان ترتبط مع التربة أو الأغصان في الجهة الثانية.
    يسكن بهالمنطقة قبيلة محلية يسمونها War-Khasis انتبهوا لخاصية الشجرة هذي وقاموا يستغلونها، متى ما احتاجوا يبنون جسر بمكان راحوا وزرعوا الشجرة وينطرونها تكبر عشان يسوون طريج مختصر عشان يوجهون الجذور بجهة معينة تلقاهم يقصون بندق الشجره بالجهة المطلوبه والجذور تبدي تتكون من جهة الشق وتروووووووووووووووح على طول تشوف شغلها.
    طول الجسر يوصل 30 متر، ويبيله 10 إلى 15 سنة علما يمسك عدل ويقدرون يستخدمونه بس قوة الجسر تسمح له يشيل 50 شخص وهو مرتاح، كلما تكبر الشجرة كلما الجذور تصير أقوى وتتماسك أكثر، بعض الجسور الموجودة اليوم عمرها يوصل 500 سنة
    أحد أشهر هالجسور في المنطقة اللي يصير جسرين فوق بعض (أول صورة تحت)، من كثر ما شافوا الناس مهتمين بالظاهرة أهل المنطقة بدوا يهتمون بالجسور اللي عندهم أكثر وقاموا يشتغلون على جسر يديد المفروض يكون جاهز خلال القرن الحالي أو اللي بعده أنا أقول ان شاء الله ان شاء الله ان شاء الله يا رب يخلص مشروع السكة الحديدية عندنا بالكويت قبل لا يخلص جسرهم
    صور الجسور:

    [​IMG]

    [​IMG]

    [​IMG]

    [​IMG]

    [​IMG]

    [​IMG]

    [​IMG]


    من الصور مبين الناس يتدخلون بتوجيه وربط الجذور عشان يساعدون بعملية تثبيت الجسر، يعني الظاهر العملية مو طبيعية 100% بس تظل عجيبه.
    هذا فيديو للجسر اللي قاعدين يشتغلون عليه وتقدرون تلاحظون فيه هالنقطة بوضوح:



    أحلى شي آخر المقطع:
    المصدر/ AtlasObscura.com



    _______________________________________________________________



    ليش يقولون عن أمريكا دولة “العم سام”؟


    [​IMG]

    ويسمون الأمريكيين عيال العم سام؟
    العم سام هذا رمز وطني وتجسيد شخصي للولايات المتحدة الأمريكية وبالخصوص الحكومة الأمريكية الله يخسها، يحطونه واحد شيبه معصب حده، بشرته بيضه وشعره أبيض وعنده قفل، لبسه يشبه شكل وألوان العلم الأمريكي خاصة الكبوس العبيط.
    قليل منتبهين الرسمة الأصلية فيها خدعة بصرية مسوينها بطريقة أي جهة وأي زاوية تطالع الرسمة راح تشوف الشايب يطالعك ويأشر عليك (شوفوا الصورة عاليسار).
    وقليل أكثر يعرفون عن قصة الرسمة، يقولووووووون ترجع لشخص حقيقي اسمه ساموئيل ويلسون – Samuel Wilson، مقاول في مدينة تروي في نيويورك، كان يشتغل بمصنع لتغليف وتعليب المواد الغذائية والكل كان يناديه في الدوام “العم سام”. ساموئيل كان مقاول فرعي لشخص اسمه إلبرت أندرسون – Elbert Anderson، عاد يوم يخلصون البضايع ويجهزونها للشحن كانوا يطبعون عليهم الأحرف “E.A – U.S.” ولما سئلوا أحد عمال المصنع عن معنى الأحرف ابتلش (الظاهر ما كان مشهور استخدام الاختصار US للإشارة إلى الولايات المتحدة) وما حب يبين انه ما يعرف ولا يقول الأحرف اختصار لـ Elbert Anderson and Uncle Sam. باجي العمال كلهم خذوا التعلوقه وقزروها على العم سام فقير، يقولون بعدين وايد من العمال دشوا الجيش ونشروا هالقصة.
    هذي صورة سمّول :

    [​IMG]

    القصة عليها بعض علامات الاستفهام وفي ناس ينكرونها جملة وتفصيلاً بعد مقارنتها ببعض النقاط التاريخية، بس الغالب محد يختلف ان الاسم خذوه من اختصار US اللي انتشر عالأسلحة والمعدات والمنشورات والصحف أيامها.
    يقولون يرجع أول استخدام لهذا المسمى والتجسيد إلى حرب سنة 1812 بين الجيش الأمريكي والقوات البريطانية في الإعلانات والنشرات اللي تشجع عالمشاركة في الحرب ومساعدة القوات الأمريكية، وانتشر أكثر واكثر أثناء الحرب الأهلية إلى أيام الحرب العالمية الثانية ولي يومنا هذا نشوف أثره موجود. قبله كانوا يستخدمون شخصية ثانية بإسم Brother jonathan – الأخ جوناثان، شكله وايد يشابه العم سام بس طاح سوقه مثل ما قلت أثناء الحرب الأهلية وطلع لنا العم سام لمطابقة مسماه بإسم اختصار الولايات المتحدة US مثل ما قلت.
    هذي رسمة كاريكاتيرية قديمة يبين فيها الأخ جوناثان ويعني الحريم هذيل وحده منهم كندا والثانية بريطانيا:

    [​IMG]

    وهم في تجسيد للدولة الأمريكية بشخصية نسائية يسمونها كولومبيا واستخدامها كان شبه نادر ما انتشر وايد:

    [​IMG]


    فكرة تجسيد دولة بشخصية مرسومة اشتهرت عبر التاريخ في الحروب وهذي أمثلة:


    [​IMG]

    هذا أشهر إعلان للتجنيد البريطاني أثناء الحرب العالمية الأولى مرسوم فيه اللورد كيتشنر وزير الدفاع البريطاني أيامها.


    [​IMG]

    شخصية جون بول – John Bull هي استخدموه البريطانيين أثناء الحرب العالمية الأولى.


    [​IMG]

    من المنشورات المطبوعة في المجلات اليهودية الأمريكية للتجنيد، الملاعين شافوا لهم فرصة زينة عشان يبينون بالساحة السياسية ويتحركون منها لاحتلال الدولة الفلسطينية.
    الصورة ترمز لبنت صهيون أو اليهود، مكتوب: “Your Old New Land must have you! Join the Jewish regiment” مالت عليهم!


    [​IMG]

    دعاية تجنيد الجيش الأبيض الروسي سنة 1919م، مكتوب: “كاهو كُميل اللي سمعنا عنه بالأساطير! ”
    وبترجمة ثانية: “”Why aren’t you in the army?”"


    [​IMG]

    الجيش الأحمر الروسي 1920م، مكتوب: “Have you volunteered?”


    [​IMG]

    الاتحاد السوفييتي سنة 1927م، مكتوب: “You, if you are not yet a member of the cooperative – sign up immediately!”


    [​IMG]

    منشور للتجنيد في الثورة الشعبية في البرازيل سنة 1932م، مكتوب: “You have a duty to fulfill. Ask your conscience!”


    [​IMG]

    الحركة التكاملية البرازيلية لسنة 1937، مكتوب: “Brazil needs you! Without Integralism there is no Nationalism”


    [​IMG]

    منشور فرنسي للقوات النازية Waffen-SS انطبع سنة 1944م، مكتوب: “You Too! Your comrades await in the French Division of the Waffen-SS”


    [​IMG]

    حتى لجنة خدمة غابات الولايات المتحدة استخدموا نفس الفكرة سنة 1985 بشخصية Smokey Bear.
    The “Only You” refers to his famous quotation, “Only You Can Prevent Forest Fires”

    المصادر هنا


    _______________________________________________________________


    شنو يعني “أبرا كادابرا”؟

    [​IMG]

    هالكلمة اللي يستخدمونها بالكارتونات والأفلام كلما طلع واحد يعني يبي يسوي حركات سحرية شسالفتها بالضبط؟
    تذكرون بكارتون رحلة عنابة الساحر الشرير (اسمه وردان حسب ما أذكر) كل شوي يخطف الأميرة ويروح بآلة الزمن؟ هالساحر بكللللل شي يسويه كان يقول “أبرا كادابرا”، حتى لو يخلونه يسوي باچه هم بيقولها. أيامها كنت أقعد أفكر ودي أقولها واشوف القلم يشخبط بالدفتر يحل الواجب من روحه بس وين يا حظي وييييين! بس يالله طحسنا وخلصنا، فقارى الطلاب هالأيام ياكلونها وبيزيدون عليهم اليوم الدراسي
    باللغة العبرية الكلمة أبرا كادابرا – Abracadabra معناها “He has created as he has spoken” – أو بالكويتي “سوى اللي قاله” كتعبير عن قوة الكلمات في تأثيرها، يذكرونها تحت الفعل daber اللي تشير إلى ترتيب الخطابات والكلام.
    تاريخياً الكلمة كانوا يعتبرونها تعويذة لها مزايا علاجية إذا كتبوها على الأحجار والتمائم بغرض طرد الشر والمرض عن صاحب التميمة. يقولون يرجع أصل الكلمة إلى حوالي 1690م والبعض ينسبها كإسم لآلهة مزعومة والعياذ بالله. وبعدها بفترة صاروا يستخدمونها حق تحضير الخدع وتبهير العروض السحرية.
    أحد القصص اللي تشير حق منشأ الكلمة يقولون في القرن الثاني كان في واحد اسمه سيرينوس سامونكس - Serenus Sammonicus يشتغل دكتور حق ملك كارسيلا في روما. الدكتور هذا اهو اللي قال هالكلمة لها قوى سحرية في علاج مرضى الملاريا. أيامها كانوا يسمون الملاريا مرض “غضب نجمة الكلب” بسبب انتشاره في الفترة اللي تعقب اختفاء نجم الكلب مع ضوء الشمس. طبعا كان ينتشر بسبب كثرة الأراضي الرطبة والبعوض بأطراف روما، عاد قاموا الرومانيين يبنون بيوتهم ومعابدهم في المرتفعات ويتوسلون بآلهة الحمى فيبرس - Febris عشان العلاج. طبعاً ما يحتاج اقول الكلمة ما سوّت شي أصلاً والمرض زاد بسبب الفيضانات اللي نشرت البعوض أكثر في قلب روما، بعدها بدت روما تحتضر تدريجياً.
    يعني الظاهر الكلمة واحد ألّفها من راسه على بو ان صوتها غريب وأكشن. بعدين عشان يبَهرون الموضوع أكثر قاموا يكتبونها على شكل مثلث على الحجر أو الورق ابتداءاً من الكلمة كاملة وبعدين يشيلون الحرف الأخير في السطر اليديد، يعني بهالطريقة:

    [rainbow]A – B – R – A – C – A – D – A – B – R – A
    A – B – R – A – C – A – D – A – B – R
    A – B – R – A – C – A – D – A – B
    A – B – R – A – C – A – D – A
    A – B – R – A – C – A – D
    A – B – R – A – C – A
    A – B – R – A – C
    A – B – R – A
    A – B – R
    A – B
    A[/rainbow]


    طبعاً أنا قاعد أحط هالكلام لأني متأكد هذا كله تأليف وخرابيط بحته مالها أي واقعية ولا ربط بأي سحر حقيقي والعياذ بالله، بالنهاية كل شي بايد رب العالمين سبحانه. من جذي هالأيام نشوف الكلمة دارجة مع الحلول السريعة والعروض السحرية والأفلام لا أكثر ولا أقل.
    نفس الكلام بالضبط شفته عن عبارة “هوكَس بوكَس” – Hocus Pocus بس هذي عاد مالها لا قصة ولا شي ولا لها معنى حتى وتاريخياً محد يدري شسالفتها. من جذي الحين بالانجليزي يقولون عن أي شي سخيف “Hocus Pocus”.

    المصادر: 1 - 2 - 3 - 4 - 5



     
    آخر تعديل بواسطة المشرف: ‏16 فبراير 2015
  2. يادنيا

    يادنيا بـترولـي مميز

    منوعات حلوه و ممتعه :)

    شكرا
     
  3. PARADISEY

    PARADISEY بـترولـي نشيط

    142
    0
    0
    Guesse
    Kuwait

    العفو يالغالي.
     
جاري تحميل الصفحة...

مشاركة هذه الصفحة