شلون تعرف ان ال Koc شركة منحطه؟؟

الكاتب : حسافه يالنفط | المشاهدات : 6,279 | الردود : 45 | ‏18 ابريل 2011
  1. حسافه يالنفط

    حسافه يالنفط بـترولـي جـديـد

    48
    0
    0
    السلام عليكم ورحمة الله وبركاته

    شباب اعذروني عالاسلوب لكن والله الي يسمع عن شركة نفط الكويت ويشوف الي فيها يكره اليوم الي صار فيه مهندس والله الشركه من انحطاط لي انحطاط لي انحطاط لي زنقه زنقه :)

    المهم اتمنى ان يطلع واحد من الناس او المسؤلين المنحطين (البعض) ويصير ريال ويقول ايي انا الي قلت هالحجي او سويت جذي لان بيصير ريال وبيكبر بعين القراء

    راح اذكر لكم قصص عن المسنوى الخايس الي تعيشه الشركه ولكم الحكم:

    1. بنت والله يوفقها الاخت كانت (سكرتيره) وكملت دراستها العصر ويابت بكالريوس اداره اعمال ورفعت درجتها وعدلت مسماها للحين ماكو شي صح؟؟
    لكن الاخت امضبطه تيم ليدرها الي ما يحب الواسطات والي لي حاجيته بشي يصك الشرف على مخك الاخ راح ودابج لها بنفسه اهوا الي يركض بالاوراق وحط مسماها (مهندسه ....) عشان لاتعرفون القسم وطبعا الحين الاخت مهندسه ولا باجر بتصير تيم ليدر على مهندسين.. والله مالت على الرياييل بس والاداره الي وافقت وصج لي قالوا ما اييوب راس الشنبات الا الحريم (هذا اذا كان ....).

    2. هندي خرب ام الشركه واسال حق الفراش الي يصب شاي وقوله (فلان) شلونه؟ يقولك غبي ومايعرف حتى يسوي مشروع صغير مسكوه اكبر المشاريع بالشمال وعفس ام الدنيا وبالنهايه اخذ شغله كويتي ومشاه على احسن من ما كان، ودوه الغرب عفس الانتاج والمشاريع وحرق الغاز وموت الضبان بالبر وعطوا مشروعه حق كويتي ومشى الامور، ودوه الجنوب ولا عاد اهناك الاخ حرق المبنى مال العمال ومشروعه للحين كلا خرطبه ولويه... المهم
    الاخ حط له (واسطه) تدرون ليش؟ لان المانيجر الغبي الي معتمد عليه والي يكتب له تقارير يبيه عنده والمانيجر لوح من غير هالهندي فحولوا كود واحد ونزلوا مسماه الوظيفي بس عشان خاطر المانيجر الغبي الي يبي هالهندي يشتغل عنده كخدمه الطالب !!!!!! والله عيب عالشنباااااات الي هندي يهددكم عشان معاشه شويه

    3. وحده الله يستر عليها الاخت يالها عرض انها تروح من قسم لي قسم ورفضت قلنا وياها الحق، ياها عرض تروح غرب الكويت ورفضت (لعذر طبي) وهم بديلتها وافقت انها تقعد اهناك ولكن بعد 3 أسابيع فقططططط اييلها عرض لي شمال الكويت وتبدل مع وحده بنت توها رايحه الشمال !!!
    والاخت طبعا حاطه واسطه فقالت ايي انا بروح الشمال عااااااادي !!!!!! وبتروح والبنت الي اهناك انظلمت؟؟؟
    وين النقابه ووين القوانين الي حاطينها للتدوير؟؟؟ ولا الظاهر القوانين ما تطبق الا عالمساكين؟؟؟

    4. سالفه السيارات الا مهندس عادي درجته 12 اتكون عنده سياره بقسم والسينيير الي درجته 16 ماعنده سياره؟؟؟ ليش؟ عشان المانيجر المحترم يعرف ابو المهندس وعشان يبي يضبطه؟؟ والله عيب ناس ما تخاف الله



    ابي واحد بس يقولي ان كلامي غلط او ان الشركه مو كلها ماشيه عالواسطات والبركه، لكن حوبة الناس الي انظلموا ربكم ما راح يخليها والله لا يوفق الي خرب على انسان يستحق مكان والواسطه خاته ينظلم وما ياخذها
     
  2. محمد النفطي

    محمد النفطي بـترولـي نشيط

    50
    0
    0
    ياعزيزي عندنا وعندك خير .


    وهالشي موجود بكل مكان مو بس بشركة نفط الكويت

    انا معاك شركة نفط الكويت فيها ظلم وفيها فساد .

    والمثل اللي يقول اذا حبتك عيني ماضامك الدهر هالمثل ينطبق على الشركة .

    اذا تعرف تيم ليدر اعتبر نفسك انته موظف محظوظ كورسات خارجية قريدات التقييم ماراح يزعلك .

    هذا غير سوالف تجي متاخر او تطلع مبجر .


    بس تعال اذا ماتعرف احد والله قطك بفريق مايخاف الله ولا ينظر لك هني الله يعينك القانون يتطبق عليك بحذافيره .

    والطااااااااامة الكبيرة اذا ماتعرف احد وطحت تحت ايد تيم ليدر مو مشتهييك هني عاد اخذ سكري ضغط شيب يطلع وانته توك شباب .


    حبيبي من راقب الناس مات هما سو شغلك وخلك ساكت لان هالشي ماراح يدوووم


    راح يجي يوم وتغير فريقكك او التيم ليدر مالك يروح حق فريق ثاني ( تدوير ) .

    لاننا بصراحة وبكل ثقة احنا الموظفين لما نشوف الظلم مانقدر نسوي شي خصوصا اذا كان الظلم من التيم ليدر او المانجر .


    الشركة خلت بينا مقامات وخلت التيم ليدر والمانجر مثل المدرس والموظفين مثل الطلبة .

    تروح تشتكي تشيل وتحط تبجي تهدد تكسر ماراح تنفعك الشركة لانه شكوتك او كلامك ضد المدرس اللي اهم( التيم ليدر والمانجر ) .


    خلاصة كلامي من راقب الناس مات هما ونام مظلوم ولا تنام ظالم وانطر الفرج

    اما انه التيم ليدر او المانجر يتغير او انته غير فريقكك شوفلك فريق ثاني قدم نقل

    ولو انه اغلب الفرق نفس الستايل :)
     
  3. king_salem

    king_salem بـترولـي نشيط جدا

    217
    16
    18
    الاخ جديد توك داش ملعب الشركة ... اصبر لين تغــبر جم سنة وتنتفض وينفضونك بعدين تعال دش نشوف اخبارك وجديدك أما حاليا ارجو أن تصفــط على السير لمدة لا تقل عن خمس سنوات ونشوف غبرتك شلون قايلة حينها .
     
  4. مضاوى

    مضاوى بـترولـي جـديـد

    36
    0
    0
    صباح الخير اخوانى وخواتى اعتقد كلام الاخوان فية كثير من الاشياء الصحيحة وفى بعد اشياء اكثر وأغرب عادى الواسطة فوق كل شى لعلمك انا جامعية وقريدى يستحق سيارة وما عطونى لان على قولتك التيم ليدر مو مشتهى :( وازيدك بعد عندنا وحده من البنات عقد معطينها سيارة ومكتب وسكرتيرة واذا بغت تطلع اجازه يدوزولها سايق للبيت يرجع السياره طبعا هذا اذا كانت بتسافر بس اذا كانت قاعده بالديره السياره تظل عندها واحتجينا وقلنا وتكلمنا طبعا حلوا مشكلتنا بس بطريقة حلوة تبى تعرفها ( اولا عشان يريحونا من الحنة واللوية حولوها من عقد الى موظفة بالشركة وعطوها قريدين عشان محد يزعل طبعا غير السياره والسكرتيره لا ونسبة على المعاش وكل مره ديوتى بره مع المسئولين اللى مضبطينها مسكينة ما عطوها شئ :cool: لا وكانت قبل تمر تسلم على البنات فى القسم الحين رافعة خشمها عليهم واذا بغوا منها شئ يكلمون السكرتيرة طبعا بعد ما تحقق معاهم شنو يبون وما تخليك تكلمها اول شئ تبلغها شنو تبى بعدين يردون عليك اذا كان موضوعك مستاهل او لا وانت زعلان على الهندى مال المنجر اخوى مثل ما قال اخونا خليك تغبر شوى وبعدين نشوف يا انك تبيعها وتسوى مثلى اذا بغيت شى تنشب ببلاعيمهم لما تاخذه او انك تتعقد وتكره اليوم اللى أشتغلت بالشركة وانا افضل الاول لان راح يحسبولك الف حساب ويسمونك فلان لغوه

    وشد حيلك :D
     
  5. مـ ح مد

    مـ ح مد بـترولـي جـديـد

    36
    0
    0
    كل شي ينقال في هالشركه صحيح وفيه قسم اللـــــه يكون بعونهم اللي هو ( الأي تي ) عندهم ناس ما تخاف الله والمصيبه اجانب ( اقصد مو كويتيين ) ومسؤولين عن موظفين كويتيين والمفروض الموظف الكويتي ياخذ قريد والاخ الاجنبي قاعد يطشر الموظف المستحق للقريد ( خوفا على كرسيه لا ياخذه الموظف الكويتي ) والمسؤوولين اللي فووق ساكتين وما خفي أعظم
     
  6. المنصور

    المنصور بـترولـي خـاص أعضاء الشرف

    كما هو معروف ان اي موظف على الدرجة 16 يمنح سيارة من الشركة

    وتنسحب سيارته اذا عليه مخالفات -لكن مو اي مخالفة-



    شلون اللي شهادته ادارية.. يتعدل وضعه على مهندس؟

    الشركة فيها قوانين ولوائح والسالفة مو سايحه على بعضها

    ولا شنو مهنة فريق عمل التقييم الوظيفي؟

    وشنو فايدة الوصف الوظيفي اللي فيه المهام والمؤهلات المطلوبة للوظيفة نفسها؟
     
  7. الكويتي

    الكويتي بـترولـي نشيط جدا

    154
    0
    0
    كل موظف يديد يقوول هل كلام و لما يصير من الحيتان يصير مثلهم
    يالله ان شاءالله تكبر و تصير تيم ليدر و بنشوف
    لانه هذي سياسه كل الموظفين بالبترول لما يكون صغير يكون شريف و لما يكبر يصير ..... لا تعليق
    و الشريف فيهم ....... لا تعليق
    وسلامتكم :)
     
  8. Safety First

    Safety First بـترولـي خـاص أعضاء الشرف

    السلام عليكم

    من ناحية في تسيب في لكن تخصص بكالوريوس ادارة تصير مهندسة ؟؟

    موطعن فيك اخوي لكن حدث العاقل بما يعقل

    موفق
     
  9. Lag

    Lag بـترولـي نشيط

    94
    0
    0
    شهادة ادارة اعمال وياخذ مسمى مهندس

    والله ماعتقد احد يغامر ويمشيها

    هذي فيها فصل اكثر من 10 موظفين
     
  10. Al-Hammadi

    Al-Hammadi بـترولـي نشيط

    148
    0
    16
    على حسب ما سمعت الحاله موجوده في ( برقان ) والمسمى Planning Engineer
    وتدخل المنطقة بسياراتها الخاصه
     
  11. محمد الحرمل

    محمد الحرمل بـترولـي نشيط جدا

    209
    0
    0
  12. zeeroo

    zeeroo بـترولـي نشيط

    134
    0
    0
    عجبني تعليقك صراحة يدل على معانات كبيرة في قلبك (( ويقولك الإبداع يخرج من رحم المعاناة))

    يا شباب ما نبي تحلطم

    خلنا نقلب الطاولة وعطونا حلول كل واحد يعطينا حل ونتشارك الأفكار لأن هذا الي ينتج التحلطم ما يجيب إلى الضغط والسكر

    وردا على الأخ صاحب الموضوع أقولك إذا أنت قدها روح أشتك عليها وشتك على المسؤول وقبل هذا صور أي كتاب رسمي طالع من عندها وفيه قنوات واجد تقدر تجيب عاليها واطيها بس لا تقعد إتولول بدون فايدة على قولت king_salem تصفط على جنب ولا خل السكن مولع ​
     
  13. dejavu

    dejavu بـترولـي نشيط

    66
    0
    0
    الشركة افضالها علينا كلنا

    السلام عليكم

    الاخ كاتب الموضوع ادري من حر ما في قلبك قاعد تتكلم لكن انا اضم صووتي للاخ زيرووو, اما بالنسبة لانحطاط الشركة فانا اخالفك الراي لانه الشركة افضالها علينا كلناو لكن الانحطاط بالمسؤولين الي قاعد يدورون هذه الشركة الفساد تفشى فيهم و اكل الجسم بأكمله بالضبط مثل السرطان الخبيث ماله علاج الا انه اييلك وزير شريف و ينفضهم نفض لكن هذا ما يحصل الا بقدرت قادر , ارضى بالموجود و تحسب ربك و الي بياخذ حق مو حقه بالاخره بياخذه حقه
     
  14. Names

    Names بـترولـي نشيط جدا

    160
    0
    0
    في قسمين في الشركة فيهم خربطه وفريق تقييم الوظائف مو راضي يصحح الموضوع مع اني قدمت شكوى في النقابة وتابعتها مع السيد/ فهد العتيبي و السيد/ جمعه مالك

    فريق عمل التخطيط (مهندس تخطيط)

    فريق عمل الصحه والسلامه والبيئة (مهندس بيئة)


    اي جامعي (محاسب/ ادارة/ جيولوجي/ اعلام/ الخ) يقدر يصير مهندس تخطيط لان الوصف الوظيفي ما اشترط الا شهاده جامعية

    ونفس الكلام مهندس بيئه .. ممكن لحامل شهادة علوم بيئة يصير مهندس بيئة


    فالاخت اللى تكلمت عنها مهندسة تخطيط وشهادتها ادارة :):):)


    بس للعلم ترا مجرد انك تشتغل في القطاع النفطي فانت في نعمه واحمد ربك عليها ... الظلم موجود في كل مكان


    الموضوع الثاني .. هالمانجر مابي اكفر فيه لاني عرفت الهندي

    الموضوع الثالث .. خلها تشتكي وصدقني ما راح يقصرون اذا لها حق تآخذه


    الموضوع الرابع ... سيارات الفريق تكون للدرجة 15 اما الدرجة 16 وفوق يصرفون له سيارة خلال شهرين من توقيعه تكون له ومالها علاقة بالفريق (هذي المدة المعقوله)

     
  15. ماجستير

    ماجستير بـترولـي جـديـد

    37
    0
    0
    Code of Conduct

    السلام عليكم



    بصراحة عورتوا قلبي ....... واخيرا طفح الكيل
    وما دار بينكم كله صحيح.... وما خفى كان اعظم
    في اقسام وايد عندها مشاكل ومشاكل جايدة وممكن اخلاقية
    صحيح الشركة لها افضال وايدة علينا ولكن وجود بعض المرضى يخليك تكره تجي الدوام وانت عارف بالظلم اللي قاعد يمارس ولا من مجيب الا ربك سبحانه وتعالى

    الله لا يطيحك يايد مسؤول ويستغل صلاحيته وتدخل امور شخصانية بينك وبينه .. ويلعن ابو خيرك وخصوصا اذا مديرك ما يقدر يسويلك شي !!

    بتقولون اشتك ........ مع احترامي مو كل خطوة او شكوى تكون لصالحك ، و لا تنسى ان بينهم ( المسؤولين ) مصالح
    يعني شيلني واشيلك :)
    _______________________________________________

    ارد واقول : عندما يعطونك الضوء الخضر توكل واعمل على اراحة الموظفين واخذ شكاويهم بجدية والاستماع الحقيقي لهم وليس حفظ المواضيع بالأدراج ....الدنيا دوارة ....فتوكل واعمل تدوير ... وترقية اناس على اساس الكفاءة وليس المحسوبية.

    وهل انت واثق بان الأمور كلها بتكون بدرجك وداخل محيطك ؟!!!!


    سؤال اخير : ما هو دور Code of Conduct بالشركة؟؟؟؟!!!
     
  16. Eng.q8

    Eng.q8 بـترولـي نشيط

    91
    0
    6
    السلام عليكم جميعا ..........

    بالنسبه لكلام الاخ العزيز ( حسافه يالنفط ) اقسم بالله العظيم وهذا قسم احاسب عليه يوم الحساب ان فيه شخصين عندنا بالقسم صاروا مهندسين واهم

    ماعندهم شهادة هندسه لا وواحد منهم صار سينيار بتقول شلون وفيه قوانيين والله والله والله مثل مااقولكم بتقولون شلون روحوا اسألوا جمعه مالك ليش وشنو

    السر انا طبعا ماني جديد بالشركه ولاني قديم بص صارلي 15 سنه. واتحدي مو اي واحد يقول مو صحيح اتحدي رئيس مجلس الاداره ( الزنكي)
     
  17. Gannas2011

    Gannas2011 بـترولـي جـديـد

    1
    0
    0
    أخونا العزيز تصحيح بسيط على النقطه الرابعه اللي ذكرتها بخصوص سياره الفريق،ترى مو شرط درجه 15 بس ياخذون السياره، ولد عمي درجته 15 و نسيبي درجته 14 و الأثنين يشتغلون بنفس القسم ، تصدق ان نسيبي اللي درجته أقل عنده السياره و الفقير ولد العم ما عنده سياره!
    و الشي اللي مينن و لد عمي ان تقييمه و التزامه بشهادة الجميع وايد أحسن من النسيب :D
    و الله لو ما كان نسيبي كنت حطيت اسمه و اسم قسمهفي المنتدى و شهرت فيه و فضحته :D
    السالفه باختصار على مشتهات رئيس القسم، لا درجه و لا التزام و لا هم يحزنون
    شركتنا ما فيها قانون، فيها عرف، و العرف تفصال على ذوق المسؤول، و المسؤول للأسف ماعنده ذوق
     
  18. Names

    Names بـترولـي نشيط جدا

    160
    0
    0
    صح كلامك

    اقصد ان سيارات القسم للدرجة 15 وتحت .. اما 16 وفوق لهم السيارة كميزة وظيفية

    وتوزيع السيارات يكون بيد التيم ليدر ومرات يصير فيها محاباه مع الاسف
     
  19. Wisdom

    Wisdom بـترولـي جـديـد

    1
    0
    0
    السلام عليكم ...

    انا بس حبيت اعلق على بعض النقاط اللي انذكرت من غير ترتيب لانه مالي خلق ارتب :)

    ما نقول الواسطة مو موجودة بس نوصل لمرحلة و نقعد نقذف الناس و نطعن بالشرف هذا شي مرفووووووووووووض جملة و تفصيلا

    انا عندي شهادة هندسة على فكرة عشان لحد يقول انه دفاعي منتفع منه بس كلمة حق تنقال ... دام للحين السيستم يقبل انه البنت يتعدل مسماها خله يتعدل و اذا وصلنا للوقت اللي ينشال منها مسمى المهندس راح ينشال ... ليش وايد مكبرين سالفة اهيا ولا شي !!!

    و على حسب الردود واحد ما ادري من وين و ذكر القسم ... و لنفرض الريال راكض ... رحتوا و طعنتوا برجل (و هم على فكرة ما اشتغل معاه و لا عنده) ,,, بالله سؤال ,, كل واحد فيكم ما وده برئيس فريق يكون معاه و يدور على مصلحته؟؟ و يحاول اهوا من نفسه يرفع لك الدرجة من غير ما تطلب؟؟ و يطلب تعديل وضعك من غير ما تروح تمسح جووووووووخ؟؟؟؟

    اللي صريح مع نفسه يرد على عمره عالسؤال !!!!

    و اذا شغلكم عالتخطيط .. فهالسالفة موجودة بالتخطيط من ايام ما كان مجموعة بالاحمدي بس وقبل لا يصير في فرق بالمناطق
    هل هذا معناته نطعن بشرف الامة اللي بمجموعة التخطيط ؟؟؟؟ و في منهم ليسوا مهندسين !!!!

    طبيعة العمل ما تحتاج مخ مهندس ... لا يكون احنا المهندسين انعرف بكل شي يحتاج له التخطيط ؟؟؟ على قولت بو عدنان (خاتم النبي سليمان امعلق به)

    التخطيط (وايضا على فكرة انا ما اشتغل هناك) طبيعة عملهم فيها ادارة اعمال و هندسة و اقتصاد و علوم و الخ الخ الخ

    يقدر كل واحد فيكم يدق على الHR و يطلب ال job description و يقعد يقرا فيه

    و نفس الشي للسيارة .. طبيعة العمل ايضا تلعب دور

    حمدوا ربكم انا اقول و بلا طعن بالناس و كما تدين تدان .. تدور الدوائر و الطعن يوصل لكم ...

    احنا نبي ناس فاهمة تمسك .. مهندسين او غيرهم .. نبي ناس فاهمة اتمشي الشغل باحتراف ...

    التواضع زين ترا

    مع السلامة
     
  20. حسافه يالنفط

    حسافه يالنفط بـترولـي جـديـد

    48
    0
    0
    لا طلع العموم جذي؟؟؟ بس انا الي فهمته ان افسد شركة الخدمات البتروليه ووراها ال Koc
     
جاري تحميل الصفحة...

مشاركة هذه الصفحة