التأمين الصحي و الفلته اللي وافق على شروطهم!! قصه حقيقيه!

الكاتب : فتحي | المشاهدات : 1,342 | الردود : 10 | ‏11 ابريل 2011
  1. فتحي

    فتحي بـترولـي جـديـد

    48
    0
    0
    السلام عليكم يعطيكم العافيه أخواني وخواتي اعضاء المنتدى . بصراحه ودي اعرف منو التعبان اللي تعاقد ووافق على بنود وشروط شركة التأمين .. اللي من المفروض ان شركتنا الموقره اهي اللي تملي شروطها مو شركة التأمين . واللي مبين من شروطهم ان هالتعاقد كان مجرد تنفيع لشخص من الناس ونجح هالتنفيع المهم مالكم بالطويله . من شهرين الاهل الله يقومهم بالسلامه بدو يعانون من الآم في القلب مصحوبة باختناق وتنميل باليد اليسرى ( اذا حد عن افاده بنوع المرض الله يجزاه خير ويوصينا على دكتور زين ) رحت لاحد المستشفيات اللي مشموله بالتامين طبعا . وطلب الدكتور عمل تخطيط للقلب بس مع التخطيط مابين شئ .. بعدين طلب الدكتور سونار للقلب واختنا بالله شركة التأمين لككت بالمووضوع شوي بس هداهم الله ووافقو .. هم مابين شئ معاهم .. طبعا الاكيد ان الدكتور راح يطلب تحاليل معينه عشان يعرف شنو المشكله . المهم خذيت التحاليل لمكتب التامين .. ووصلت النتيجه بعد معاناه . يعني لو الواحد بيموت كان مات وشبع موت وللحين الموافقه او الرفض ماوصلت . تفاجأت بالرفض من شركة التأمين بحجة ان المريضه بعد السونار والتخطيط مابين فيها شئ فـ يقولون الاخوه بشركة التامين ان التحاليل مالها داعي .. بعطيكم مثال على هالتحاليل : اللي هي الغدة والسكر وبلاوي وايد والله ماعرفها
    طيب يا أخوان . الحمار يكرم القراء وهو حمار لو يشوف التقرير راح يوافق . لان المريضه تعاني من شئ بس للحين مابين شنو هالشئ فلابد من التحاليل .. انا الى الان ماعرف سبب الرفض السخيف هذا
    بعد شد وجذب مع شركة التامين . رضخت للامر الواقع وسويت التحاليل ع حسابي واللي طبعا كلفت 90 دينار
    هم بعد مابين شئ في التحاليل والله المستعان
    امس بالليل تعبو الاهل وطاحو بالبيت وكانت نفس المشكله
    فرحت للمستشفى والدكتور كتب لها دخول والسبب اضطراب في دقات القلب مع حالة اختناق وكالعادة رفضت شركة التأمين الدخول .. ودخلتها ع حسابي
    اليوم بعد الفحوصات امر الدكتور لها بجهاز عالقلب لمدة 24 ساعه واسمه هولتر على ماعتقد لان فيه اشتباه بكهربا زايده بالقلب وكتب لها خروج اهي مع الجهاز ونراجع باجر ورحت اشوف الفاتوره الا 222 دينار لان اخذت مغذي ومسكنات وتخطيط ومن هالحجي
    المهم رحت لشركة التأمين ورفضو انهم يتحملو تكاليف العلاج بعد بحجة اني انا مدخلها على حسابي فملزوم اتحمل بكافة المصاريف .. حتى لو كانت مشموله بالتأمين .. هذا بس لأانهم رفضو دخولها الجناح .. باخر هالقصه ارجو انكم تدعون للمريضه بالشفاء


    طبعا انا ودي أدعي على اللي وافق على هالشروط السخيفه واللي حتى المسطول مايوقع عليها لانها ظالمه ظالمه بحق العاملين بشركات البترول .
    ومن هالمنتدى الكريم
    اطالب الموظفين أولا ثم النقابه ثانيا اللي لولا هالموظفين ماوصلو للنقابه ان تتم وقفة جاده ومحاسبه أو تغيير هالشروط المجحفه بحقنا نحن موظفي شركة البترول .. وارجو كم رجاء ياناس والله ترى هالوضع ماينسكت عنه جد ترى خلاص وصل فيهم التلاعب لحد صحة الناس ؟ ياخي مافيها لعب ترى . الزيادات ممكن نعديها تجاوزات أخرى ممكن تعديها لكن توصل الى الصحه واحنا للحين ساكتين فقط نكتب في هالمنتدى اللي ماأتوقع احد من النقابه أو المسئولين انهم ينظرون له لانهم لو ينظرون له كان شفنا تفاعل منهم لكن لاحياة لمن تنادي
    في نهاية الموضوع ودي اعتذر عن الاطاله لكن بصراحه جد الوضع مايبشر بالخير وحدي مقهووور من هالعبث في صحة العالم
    وشكرا على قرائتكم للموضوع واتمنى التفاعل منكم
     
  2. فيصل العجمي

    فيصل العجمي مؤسس المنتدى أعضاء الشرف

    6,420
    1
    36
    السلام عليكم ورحمة الله وبركاته

    في البداية الله يشافي مرضاكم ومرضى المسلمين اخوي فتحي

    وللاسف شركة التأمين هذي صارت نقمه على الموظفين بدال ماتكون سبيل لتخفيف العبئ عن الموظفين وعن مستشفى الأحمدي

    واتمنى تكون هناك وقفه جاده من اتحاد البترول بهذا الخصوص .

    في النهاية تأكد ان الكل يقرأ المنتدى اخوي فتحي لكن يبدوا ان هناك ناس مستفيدين وعاجبهم الوضع وساكتين
     
  3. فهد شموه

    فهد شموه المـراقب الـعـام

    2,712
    24
    38
    ذكر
    Production Engineering Mechanics
    ☀Q8 دار الفخــر والعــز☀
    يجب تحديث بنود عقد التأمين الصحي

    الله يشافي مرضاكم ومرضى المسلمين اخوي فتحي

    والتأمين الصحي شكله بيتحوّل ويصير "تقنين صحي" من كثر المشاكل اللي قاعده تحصل دون اتخاذ أي إجراء يذكر من قبل المسؤولين عليه... أشاطركم الرأي آملين أن يتم التعامل مع حالتكم على وجه السرعة... فأرواح الناس ليست لُعبة

    ولاّ وين راح شعار ال
    H S E

    ؟؟؟

    H... stands for HEALTH


    وحرف ال H أتش هنا في هذا الشعار المستخدم لدينا في الشركة معناه "الصحة" و وضع في أول الحروف الثلاثة والخاصة بالصحة والسلامة والبيئة, لما له من دلالة على أولوية الإهتمام.

    عجباً !!!

    :rolleyes:
     
  4. فتحي

    فتحي بـترولـي جـديـد

    48
    0
    0
    الله يجزاكم خير ,, وبصراحه الوضع ماينسكت عنه .. يعني حتى التجديد للسنه هذي .. ماندري هل هو نفس الشروط أو لا عشان نعرف نجدد معاهم أول لا لان بصراحه اذا نفس الشروط الموضوع راح يتصعد .. يعني الا ننطر أحد من اهلنا يموت أو يصير فيه شئ عشان نتخذ الاجراءات , لابد من الجميع الوقفه ضد هذا التعسف من شركة التأمين وانا مستعد أكون في وجه المدفع مع اي شخص مسئول وشكرا على ردودكم
     
  5. aL- raSy

    aL- raSy إدارة المنتدى

    2,714
    0
    36
    ما تشوفون شر ان شاء الله اخوي فتحي..

    اذا ما جددت هالسنه.. لا تجدد.. و اعتقد انتهت مدة التسجيل..
    واضح ان ما تغيّر شي.. على طمام المرحوم..
     
  6. بيض عيون

    بيض عيون بـترولـي جـديـد

    43
    0
    0
    الله يشافى مريضكم..
    انا شخصيا خرجنى المستشفى من غرفة العمليات و القسطرة راكبة برجلى لان التامين وافق على نص العملية و رفض النص الثانى بدون ابلاغي!!
    و اللى مو مصدق يبعث لى على الخاص و انا اراوية الوثايق
     
  7. Workers

    Workers إدارة المنتدى

    7,767
    30
    48
    ذكر
    الكويت
    وعليكم السلام .. الله يشفي مريضكم ويقومه بالسلامة ..
    اللي مايحسب حساب لارواح الناس عسى الله ياخذ روحه ويفك الناس شره
    الله لايوفق من تسبب بايذاء الموظفين وعائلاتهم وزهد في حياتهم وعرضها للخطر
    ناس لاتخاف من الله ولاتستحي من خلقه .. عليكم بالدعاء على القائمين بالتأمين الصحي من مؤسسة البترول وشركة التأمين
    لو لكم اهميه عندهم ماوضعوا الشوك والعقبات في طريق علاج احبابكم وانفسكم ..
     
  8. فتحي

    فتحي بـترولـي جـديـد

    48
    0
    0
    الله يجزاكم خير على الدعاء والله يشافي مرضانا ومرضى المسلمين ان شاء الله

    لكن ياجماعه لابد لنا من وقفه شوفو لنا حل عن طريق النقابه أو اي طريقه لان اللي قاعد يصير حراام والله خساره يستفيدون وحنا نبتلش
     
  9. Winchester

    Winchester المـراقب الـعـام

    ما تشوفون شر ان شاء الله اخوي العزيز



    والصراحه النقابات نايمه بالعسل ولا مهتمه بامووور التامين اللي كثرت الشكاوي عليه
     
  10. الفار إلى الله

    الفار إلى الله بـترولـي جـديـد

    22
    0
    0
    الله يشافى مريضكم

    لا بأس طهور إن شاء الله

    يا أخوان يجب عقد جمعية عمومية غير عادية لبحث موضوع النقابة ومحاسبتها.
    على ما يواجهة العاملين فى القطاع النفطي
    ولوضع النقاط على الحروف
     
  11. برميل نفطي

    برميل نفطي بـترولـي نشيط

    55
    0
    0
    مع أني مو مسجل بالتأمين وملفي على مستشفى الشركة ، لكن وربي تضايقت من اللي قاعد يصير مع الناس ...... وين قاعدين شركة التأمين معالجين الناس صدقة ولا ماخذين مكانها مقابل مادي ....... أنا أقترح أتحاد العاملين بالقطاع النفطي يحط رقم فاكس شكاوي للعاملين بالقطاع ضد شركة التأمين ويشوفون فيها حل حتى لو يصعدون المطالبات بالجرايد أو حتى يوصلونها للوزير ، وإذا شركة التأمين تلعب بصحة الموظفين على كيفها أنا أقترح إلغاء التعاقد معها والتوقيع دايركت مع عدد 3 أو 4 مستشفيات خاصة لعلاج الموظفين ......وخدماتهم مستغنين عنها إذا مو هامتهم صحة الناس .
     
جاري تحميل الصفحة...

مشاركة هذه الصفحة