هوشتي مع الوزير اليوم

الكاتب : خميس الخامس عشر | المشاهدات : 3,203 | الردود : 35 | ‏23 نوفمبر 2010
  1. خميس الخامس عشر

    خميس الخامس عشر بـترولـي خـاص أعضاء الشرف

    اليوم سالفتنا سالفة .. عمياء على قولتهم ..

    دق على واحد قالي انت خميس .. خفت وقلت لة اي منو انت رقمك يخرع ، قالي تعال الدور 14 في المؤسسة ..معاك مكتب معالي الوزير .. يالهوي انا شسويت

    المهم كنت ارقل بس بعتها احس حاشني مرض بساقي مو قادر امشي ... مرة اضحك بالأصنصير ومره ازبط النسفة والغترة .. وخاش كلونيا جكسن في جيبي مو للشرب عشان لما احب خشم الوزير مايقول معفن بتسبح فيها قبل لا ادش علية .. فتح الأصنصير وشفت باخرة على مدخل مكتبة عبالي نقلوا الناقلات لمكتب الوزير اثاريها مجسم عجاف من مسؤول بالناقلات .. مشروع تثبيت يعني ..

    تصدقون اليوم من الصبح اني اشرب قهوة فرنسية بمكتب وزير النفط.. ادري اكثركم بيقول جذاب .. سألوه وبتعرفون ..

    رشفة قهوة مع معالي الوزير ..يابييييييييي قهوة احلا ستاربكس ومن قهوة الجنادرية المعفنه اللي ريحتها سلوم .. قهوة مع ريحة بخور .. اصلي مو بوجنطة اللي اذانا بدوانية الربع محبوب الهندي يبيع خشب بايقة من حديقة مهران ..

    أول ما ادخل مكتبة فية جلسة على على اليسار لونها ابيض .. وحلوة من حلاة الوزير ..

    قمت اهذر معاه وانا اتدفى بحرارة ( فنجان الأهوة ) مرتبك !! شلون اكلم وزيييييييييييييير النفط مرة وحده..

    قلنا ماعليه خل نبيعها اليوم فاليوم خمر وغداً أمر ..

    أنا :- صبحك الله بالخير يابوعبدالله؟؟

    الوزير :- ياهلا ثرزداي ذا ففتينث ( ثقافة انجليزية تعرفون برستيج وزير )..

    أنا :- شلونك ياطويل العمر ..

    الوزير :- أنا بخير طالما موظفيني بخير ..

    أنا :- بحلقت عيوني وبغيت اشرق بالقهوة ورفعت ظهري عن الغنفة البيضاء مثل بياض قلب الوزير .. ومن قالك ان احنا بخير طال عمرك.. احنا رايحين وطي ... لك الله معاشاتنا مانزلوها سلاطين المالية ليما الحين من بعد العيد .. على النعمة محد سوى لها رن ليما الحين .. ياطويل العمر ربعك هلكوا .. بيشحتون

    الوزير :- لا يا ففتينث مو صحيح أنا قايل لبوحمد عطوا الناس معاشاتهم بعد العيد مباشرة .. مالك علي حلف ..ومأكد علية ..قالي اوكي

    أنا :- وإنت صدقتة طال عمرك .. إحنا عندما مافيات في القطاع .. وعندنا جاثوم اسمة قيادات انتهت مدة صلاحيتها وقامت تحوشنا بالتسمم وطلع براسهم قرون من طول اعمارهم بالقطاع ادري ماراح تصدق بس في واحد طلع له منقار وعصعص من كثر ماهو قيادي واعتقد بيطلع له ريش دير بالك منه تراه يعض ويصيبك بتسمم مثل الحية.. اقسم بالله ياشيخ انتهى عمرهم الإفتراضي وبعضهم صار مجرد هياكل عظمية منحوتة بجبال مكاتبهم ومايطلعون من المكتب الا بزنس ترب .. طافوا 30 سنة واهم قاعدين على قلوبنا بس تبي الصج .. مو كلهم فيه ناس زي العسل تلقاهم حبايب ومحبوبين .. وفي ناس فعل اليهود على غزة ارحم منهم تكفى .. ليش مددت .. الناس تنفست لما سمعوا انتهت مدتهم القانونية وانت رجعت قعدتهم على قلوبنا .. لاتقولي مو بيدك .. لاتقص علي ماراح اصدقك .. والربع يتحلطمون كل يوم .. بديوانية الصيادين يقول البحر نشف من السمج .. واحنا شهر 12 ماشفنا مطر .. وامورنا مو موفقه .. من حسد هذيل البشر .. تدري بوصفهم لك.. أول شي تعرف كشكول المدرسة !! شلون ماتعرفه صج اصير غبي أنا بعض المرات !! وزيرنا دارس اكيد كان كاتب اسمه على طابع كشكولة وصفة ..


    هذيل حافرين اساميهم مو طابعينها بس على مكاتبهم واقل مكتب بست آلاف على قولة ديوانية المارينا.. تصدق انهم من عصر ملكة سبأ عندنا واسألهم واحد منهم حاط صورتها على يسار مكتبة يعني يمون عليها !!

    ياطويل العمر هذيل طافوا 30 سنة وقرن واهم بالقطاع بعضهم محسوب على عدس وبعضهم محسوب على نائب الكرهبا وبعضهم محسوب على الغرفة وبعضهم محسوب .. استحي اقول بس خزني خزة قمت وقلت محسوب عليك طال عمرك وشفايفي ترجف مابغت تطلع الكلمة تعرفون خايف..

    ياطويل العمر الحضري اللي ماعندة واسطة وكفاءة شسوي !! والبدوي اللي يشتغل بقريد 8 وربعه عبالهم الوليد بن طلال بينهم قاعد لأنه يشتغل بالقطاع وخلص الجامعه من جامعة الكويت والله .. والشيعي المهندس اللي من بيته لدوامه ولايعرف غير اهل بيته الا خدامته ميري وشاغول .. ليش ماتعطيهم فرصه .. سمعت اللي يقول عطوا سداح فرصة .. أظن انه المتنبي اللي انت تحبة وتردد اشعارة ..وكلهم فلتة بالانقلش بس مايعرفون نورة العلبان عشان تلمعهم بجريدة الوطن مالت خالك الشيخ على الخليفة ( تعرفه ) ولا يمونون على الواوان عشان يضبطهم عند الفهد ..

    قالي تصدق انك فتحت عيني عليهم .. قلت لا لا انت مفتح باللبن وحطيت الزنكي وشلعت الشويب بلمح البصر لاتقولي ماعرف .. انت جددت لهم سنة وانت عندك اسماء بكشف خالص مخلص منها بس يمكن قصوا عليك بكلمة ارباح والا نظام ..

    قالي خير انشالله وعد اني لأشوف .. قلتله مو وعد ومن اطلع تنسى ترا بطرشلك مسج على خطك الذهبي ابو اربعات ..

    قالي الحين بنادي بو سالم وبويوسف يعطونا الأكل خلنا نتريق وبعدين تمنى..

    صوته هادي حييييييييييييل ونادى اثنين واحد مدلقم والثاني ضعيف طويل .. خقيت قلت بقطوني من الدريشة هذيل ربعه اللي اسمع عنهم يطقون .. قال بكل أدب جم عطونا الريوق ..

    ودخلوا علينا جدر يطبخ ويطلع منه بخار ورفع غطاء الجدر والا اشوف باجة كراعين .. صراحة نقدت قلت له مافيه سفن اب مع ليمون .. شنو هالسالفه ياطويل العمر ... قالي هذيل كراعين القيادات اللي شلتها اول مابلغتهم صابتهم سكتة قلبية قلت خل نستفيد منهم ونسويهم باجة مثل ما استفادوا من القطاع اللي ظبط ولده ببعثة واللي حط نسيبة واللي رقى بنت اختة وحطها تيم ليدر.. و سمعت ان الوزير بحط له غرفة يم مكتبة جنها مو له عشان من تاكل باجة الوزير وتنام نومة اهل الكهف ..

    قالي اكل من باجة الوزير واتمنى ..

    قلت له اتمنى لك طولة العمر وتبقي معانا ..

    قالي بل تمنى ياففتينث ..

    قلتله ابي قريد على الطاير لصاحبي خاس لحمة واهو يطالب بقريد..

    كما اتمني منك ان يحصل كل واحد على قريد بدون واسطة ..

    قالي طلبك مجاب ياففتينث ..

    والا ابن الستين بسبعين يدق عند راسي .. طلع المنبة قعدني من حلمي ..

    دق التيلفون نفس الرقم اللي يخرع وقالي من سمح لك تحلم بعيال الحمايل يالهيس .. قلت له حلم والله حلم وراس امي وابوي حلم .. قالي لاتحلم بعيال الحمايل ولا انك تكلم فراش الوزير مرة ثانية قلت له ابشر ولا يهمك ..

    وزيرنا الوسيم مو كلهم فيهم ناس تستحق تقعد ويتغير مسماها وهذي سنة الحياة .. ممكن تحقق لي حلمنا الكبير بالنسبة لنا و الصغير بالنسبة لك بدون باجة اتسمم من بعدها ..

    قالي انطر وشوف ..

    قلت له عطني بوسة .. على خشمك طبعاً وبست خشم الوزير ودشيت تكرمون الحمام اغسل وأبدأ رحلة الألف ميل للدوام ..
     
  2. aL- raSy

    aL- raSy إدارة المنتدى

    2,714
    0
    36
    كل هذا طلع حلم.. !!

    و انا داش فازعلك و بغيت ادق على الشباب بـ (جبد)..

    اهم شي انك كليت من الباجه يا بو.... :) سعود..
    و عوافي على قلبك..
     
  3. غيوم

    غيوم بـترولـي خـاص أعضاء الشرف

    7,298
    1
    0
    فيفتينث

    شكلك مو متغطي عدل و مكثر اشوي بالعشى البارح
     
  4. خميس الخامس عشر

    خميس الخامس عشر بـترولـي خـاص أعضاء الشرف

    اششش لا يسمعونك القيادين يعرفون اني باكلهم بعد مايطبخهم طباخ الوزير ...
     
  5. خميس الخامس عشر

    خميس الخامس عشر بـترولـي خـاص أعضاء الشرف

    شفت يالراسي هذي اللي بتفتن علي .. فكينا زين انا استبيعت .. مو جرئ !!
     
  6. أبرك الساعات

    أبرك الساعات بـترولـي جـديـد

    49
    0
    0
    يا اخ خميس الخامس عشر بكل صراحه انا من اشد المعجبين فيك.....وكان ودنا تجيب طاري المهندسين...لأنك اضافه جميله لمطالبنا
     
  7. إعلامي قديم

    إعلامي قديم بـترولـي نشيط جدا

    195
    0
    0
    ههههههههههههههههههههههههههههه

    عجيب والله الحلم بس ما كملت وقلت عن أبناء القطاع ساكنين في بيوت الشركة المتهالكة

    ما كملت الحلم وقلت المستشفى اللي قاعدين يتهاوشون التجار عليه ولا ألحين مو راسي على أي شركة

    وشكرا لك أخوي خميس
     
  8. خميس الخامس عشر

    خميس الخامس عشر بـترولـي خـاص أعضاء الشرف

    حاضرين ياهندسة..
     
  9. غيوم

    غيوم بـترولـي خـاص أعضاء الشرف

    7,298
    1
    0
    تدري بحلمك كله ما شفت هوشه ... ذكرتني بمسرحية شاهد مشفش حاقه لم كان عادل أمام قدام القاضي

    فيفتينث تذكر هالمشهد ;)

    ممكن أسال سؤال في سؤال :rolleyes:

    ما هو معني الذي تحته خط


    تحلم بعيال الحمايل يالهيس
     
  10. خميس الخامس عشر

    خميس الخامس عشر بـترولـي خـاص أعضاء الشرف

    مافي شئ مخطط..

    انا علمي مو ادبي ماعرف بالنحو يمكن قصدج اعراب فاعل ومفعول به مجرور من رقبته
     
  11. خميس الخامس عشر

    خميس الخامس عشر بـترولـي خـاص أعضاء الشرف

    الله يا اعلامي يدري .. ويعرف كل شي وعنده من زليقة الوايرات منتخب اولمبي ..

    يوصلون له بس مو عشان مصلحة العمال لا.. قصدهم خبيث يطقون فلان والا علان..
     
  12. دا انت احلام سعادتك اوامر ( قول مصري مأثور )
     
  13. خميس الخامس عشر

    خميس الخامس عشر بـترولـي خـاص أعضاء الشرف

    اخيرا يابوعمر .. علقت على موضوع ..

    كنت شاك فيك صراحة ..

    بس شكلك عارف الغمندة من اولها لآخرها ..

    سلم على .....

    وقوله بيت شعر حلو يحبة و يردده بالسيارة والطيارة..:rolleyes:

    نفسي تروم اموراً لست ادركها - مادمت احذر ما يأتي به القدر

    ليس ارتحالك في كسب الغنى سفراً- لكن مقامك في ضر هو السفر ..
     
  14. بوعبدالعزيز.كوم

    بوعبدالعزيز.كوم بـترولـي نشيط جدا

    483
    4
    18
    طالب علم
    دولة الكويت
    الله يرضى لي عليك لا تحلم مرة ثانية بعيال العوايل والحمايل :)

    مادري يا خميس خشيت لي شوي من الباجة تراني مدمن باجة وكراعين القيادات النفطية المعشعشة (طعمها معتق جدا)
     
  15. الرحا

    الرحا بـترولـي نشيط جدا

    491
    0
    16
    تم قصف مشاركتي بالمدافع الثقيله
    سامحك الله يامشرف
    الحلم في الوزراء مسموح
    وفي كيم ممنوع
     
  16. SonMubarak989

    SonMubarak989 بـترولـي خـاص أعضاء الشرف

    2,062
    98
    48
    كل هذا طلع حلم
    بصراحه انا احسدك على احلامك صج لقالوا الناس في الاحلام مقامات
    ناس تحلم بوزير وناس بعزرائيل اللي يمه :)
    اخوي خميس مادري بما انك حلمت بوزير اكيد بتحلم بقيادي ثاني
    نبي تسوي لنا حلقات ممكن
     
  17. أبوضاري

    أبوضاري بـترولـي جـديـد

    43
    0
    0
    احلام سعيده

    تكفا يالحبيب ابيك تحلم بالمسلسل التركي بو 120 حلقه بس الابطال يكونون نفس الاشخاص الذي تكلمت عنهم
    تعجبني وشكرا
     
  18. almostishar

    almostishar بـترولـي مميز

    567
    5
    18
    ماشاء الله عليك تحمل اسلوب سهل متسلسل فى الكتابه ..
    ماشاء الله وهذا انت علمي اشلون لو ادبى ..
    من سأل بخصوص معنى الهيس ..
    الهيس ..أسم من أسماء الأسد
    والناس تقول الهيس الاربد ..اى الاسد الكسول
    تمنياتي لك بمزيد من الابداع والتألق ..
     
  19. خميس الخامس عشر

    خميس الخامس عشر بـترولـي خـاص أعضاء الشرف



    لو ادبي ماشفتني معاك بالقطاع .. لأن اول طلب بالوظائف ثانوية علمي ونسبة كذا وكذا وابشرك علمي ومتفوق بس المكتوب على الجبين لازم تشوفة العين .. وقلبي على ولدي وقلب ولدي على حجر ..

    ومشكور على ردك على غيوم ..

    أنا أسد !! الله عبالي سبني طلع مدحني ..
     
  20. bozzkoc

    bozzkoc بـترولـي نـشـيط

    126
    1
    18
    أخصائى أمراض معدية بالمستشفى
    Kuwait
    اشكثر قرقرت بالحلم عاد

    هههههههههههههههههههههههه
     
جاري تحميل الصفحة...
مواضيع مشابهة
  1. وبعدين
    الردود:
    0
    المشاهدات:
    249
  2. كاتب
    الردود:
    7
    المشاهدات:
    3,797
  3. المحرر النفطي
    الردود:
    4
    المشاهدات:
    6,656
  4. المحرر النفطي
    الردود:
    6
    المشاهدات:
    6,639
  5. المحرر النفطي
    الردود:
    2
    المشاهدات:
    9,207

مشاركة هذه الصفحة