الا متى هذا الخنوع والرضوخ لمهزله التأمين

الكاتب : مزااجي | المشاهدات : 1,600 | الردود : 17 | ‏29 يوليو 2010
  1. مزااجي

    مزااجي بـترولـي نشيط

    64
    0
    0
    من منطلق المثل الشهير بغيناها طرب وصارت نشب

    انا واحد من الناس ماستفدت اي شي من شركه الخليج للنصب والاحتيال قصدي للتامين

    راجعت زوجتي عياده النسائ والولاده في مستشفى السلام وطلبت منها الدكتوره

    مجموعه تحاليل مرتبطه ارتباط واضح وصريح بمتابعه الحاله

    تفاجأت برد المختبر ان التحاليل مو مشموله بالتامين طيب كيف الدكتوره تقدر تشخص الحاله

    كيف تصرفلها ادويه وكيف تعرف المشكله يا اخوان هل يعقل هذا؟؟؟؟؟؟

    دقيت طالب الفزعه بشركه التامين ردت علي وحده اسمها غدير اسماعيل

    وقلت لها السالفه قالت ايه صح مو مشموله التحاليل قلت لها ممكن سؤال

    قالت تفضل قلت لو انتي راجعتي الدكتور لاي سبب كان ممكن انه يعرف شنو مشكلتك من غير تحليل

    الا اذا كان ساحر مثلا ؟؟؟؟؟؟ ماردت علي قالت هذا الموجود عندنا بالوثيقه

    وياقلبي لاتحزن......

    الحاله الثانيه لي انا شخصيا رحت لعياده نيو سمايل للاسنان بالسالميه

    وفتحولي ملف باستقبال حافل وترحيب ولع الجو طبعا الضحكه عندي من الاذن للاذن

    قلت هذي والله العياده السنعه

    المهم دخلت عند الدكتور لبناني الجنسيه تصدقون يا اخوان حطمني ماخلا شي بحلجي صح

    95 % من ضروسي يبيلها شغل مع اني ماني شايف فيهم اي شي اللهم عندي كسر بضرس

    ويبيله تصليح بس ماخلاني اكمل طلبي يحاول بكل جهده يصنع بحلجي مشكله

    المهم بعد الاشعه قالي اسنانك الاماميه يبيلها تصليح من جديد والطواحن يبيلهم تعديل والقواطع غلط

    وعندك التهاب داخل مخ جذور اسنانك يبيله علاج قلتله طيب كم تكلفه هذا كله قالي 1600 دينار

    قلتله انا جاي على التامين قال مومشكله راح احاول اضبطلك اهم شغلات عندك ب 750 دينار

    شوفو ياناس الوقاحه والله ماتجرأوو وسوو جذي معانا الا انها لعبه وبوقه ومصخره وان صحتنا في

    اخر اخر اخر اولوياتهم والله ان المؤسسه متخاذله معهم ووزاره الصحه نايمه لاحسيب ولارقيب

    وياقلبي لاتحزن
     
  2. workerq8

    workerq8 بـترولـي مميز

    613
    6
    18
    اذا وصلك ايميل على بريدك الاكتروني بخصوص تجديد العقد مع التأمين السنة القادمة لا تجدد وخلك على مستشفي الشركة ويا قلبي لا تحزن
     
  3. المحنك

    المحنك بـترولـي جـديـد

    25
    0
    0
    اخوي مزاجي يليت تشرح لنا تجربتك بنيو سمايل التامين شنو غطا شنو ماغطا



    والله وقاحه يقولك اضبطك بـ750 داش بنجرجي ولا عياده
     
  4. feed gas

    feed gas بـترولـي خـاص

    صج بغيناااااااااااااااااها طرب وصارت نشب يا عل تنشب شوكه ما تطلع من حلوج المسعولين الى ودونا بداهيه وقاعدين يط
    العونا نتبهدل قولو امييين
     
  5. Eng.Vampire

    Eng.Vampire بـترولـي خـاص

    أخوي أول شي ما تشوفون شر .... بالنسبة لموضوع الزوجة الحامل ترى جميع التحاليل الي يطلبها طبيب النساء والحمل مشمولة بالتأمين وهالكلام متأكد منه 100٪ لان انا مودي زوجتي قبل أسبوعين لنفس المستشفى السلام وسوت تحاليل بالمختبر طلبها الطبيب والأمور مشت عادية ولا دفعت شي ....

    وأزيدك من الشعر بيت حتى الفيتامينات والمقويات للحامل مشمولة بالتأمين ورحت الصيدلية وصرفتهم ولا دفعت شي

    أتوقع موظفة التأمين التبس عليها الموضوع وأنت حاول تتأكد من هالموضوع وسلامتكم
     
  6. مزااجي

    مزااجي بـترولـي نشيط

    64
    0
    0
    اكيد ياخوي ماراح اجدد بس من باب الحرص على اموال هالبلد الطيب اللي قاعده توزع هباءا منثورا

    ومن باب النصح والتوضيح قلت سالفتي لكم واللي المفروض فيه احد قلبه حي من هالمسؤولين

    يحط حد لهذي المهزله تحياتي لك
     
  7. مزااجي

    مزااجي بـترولـي نشيط

    64
    0
    0


    وش اقولك يالمحنك انا واحد مافهمت من اللي راح يسويه اي شي

    وكل واحد ابخص بحلجه اللي اعرفه عندي ضرس واحد مكسور يبيله تصليح بس

    الاخ دخلني في التهابات وتضبيط لثه ومش عارف ايش

    تحياتي لك
     
  8. مزااجي

    مزااجي بـترولـي نشيط

    64
    0
    0
    ماعندي اي ذره شك في كل كلمه قلتها

    لاكن عندي مجموعه التحاليل اللي طلبتها الدكتوره واذا حاب تأكد مستعد ادز لك صوره منها على الخاص

    تحياتي لك
     
  9. مزااجي

    مزااجي بـترولـي نشيط

    64
    0
    0
    ومنا على قولت فؤاد الهاشم للمسؤولين اللي متسدحين بالمكاتب وياقلبي لاتحزن

    تحياتي لك
     
  10. فيصل العجمي

    فيصل العجمي مؤسس المنتدى أعضاء الشرف

    6,420
    1
    36
    ياجماعه ياليت اللي تصادفه مثل هذي المشاكل يكتبها في المنتدى وبالمره يوصلها لنقابته او لمستشفى الاحمدي اعتقد فيه قسم خاص بالتأمين ويشرح شكواه لهم
     
  11. Winchester

    Winchester المـراقب الـعـام

    الله يكون بالعون بس يا جماعه لازم شكواكم توصل للمسؤولين بالشركة او النقابة لا تسكتون
     
  12. زهرة التوليب

    زهرة التوليب بـترولـي خـاص

    والله مصخره صرنا لعبه حق شركة التأمين والمستشفيات الخاصه
    كل واحد يقول شي !!!

    واذا التأمين ما يشمل التحاليل والفيتامين ووما يغطي تكلفة علاج بعض الحالات بالله ليش مشتركين فيه !!!

    يعني الدكتور اللي قال علاجك يحتاج 1600 وبقدرة قادر صار 750 دينار على اي اساس افتى !!!

    يبيلهم واحد يوقفهم عند حدهم لان السالفه صارت نصب في نصب


    انا اقول اي شخص يودي زوجته حامل ويطلبون منه تحليل ويطلع مو من ضمن التأمين يروح مستشفى حكومي يسوي هالتحاليل وياخذها معاه يراجع فيها بالخاص ولا يدفع لهم ولا فلس
     
  13. mtm

    mtm بـترولـي نشيط جدا

    419
    0
    0
    انا اقول كل ما تدشون المستشفى وتسألونهم عن علاجكم وتقولون ترى اذا في شي مو بالتأمين مراح اعالج عندكم

    صدقوني راح يغيرون ويهببون عشان ما يخسرونك

    لانه كرت التأمين عندهم كنز ولازم يصفروووونه
     
  14. مزااجي

    مزااجي بـترولـي نشيط

    64
    0
    0
    اي مسؤولين تكلم عنهم النايمين ولا المنسدحين ولا اللي اذا جيتهم تشتكي يقولون لك هذي شروط التامين ؟
     
  15. مزااجي

    مزااجي بـترولـي نشيط

    64
    0
    0
    والخافي اعظم انا بعد هالموقفين وقفت ماعاد رحت لاي مستشفى او عياده خاصه وياقلبي لاتحزن
     
  16. مزااجي

    مزااجي بـترولـي نشيط

    64
    0
    0
    واذا صار علاجي مايشمل التامين شنو اسوي ؟؟؟؟
     
  17. speed-way

    speed-way بـترولـي نشيط جدا

    مو المشكله ان جميع شركات التامين رفضت المناقصه ما عدا الخليج ولا بشروط لانهم يدرون ان المناقصه ماراح تحقق لهم اي ربح
    عشان جذيه حطو الشروط هذه مع الاتفاق مع المستشفيات
    الله يسامحهم
     
  18. Online

    Online بـترولـي نشيط جدا

    374
    0
    16

    ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    عفوا انت من صجك
    :eek::eek::eek::eek::eek::eek::eek::eek:
    كلام كبير ياجماعة
    اذا هذا الكلام صحيح
    لا طبنا ولا غدا الشر
     
جاري تحميل الصفحة...

مشاركة هذه الصفحة