عالم الحيوان (قصة من تأليفي )

الكاتب : nash | المشاهدات : 880 | الردود : 6 | ‏16 يوليو 2010
  1. nash

    nash بـترولـي نشيط جدا

    236
    0
    0
    بسم الله الرحمن الرحيم


    عالم الحيوان



    في احد مناطق الكويت كان هناك شخص يلقب بالذيب و ذلك لشراسته و ذكائه و معرفته للطرق الملتوية في تخليص الامور الصعبة يعني يزيد رصيدة بالنصب على خلق الله من خلال تجارته و تلقاه يحصل على ترقية ما يستحقها و لي يا (جا ) الصيف صيف على حساب الحكومة بأسم العلاج بالخارج هذا غير انه يستفيد من وظيفته ( يبوق ) و بما انه ذيب ما يسلم منه حتى القريب منه .

    تزوج هالذيب و كان زواجة بعد ان سوى بحث كامل عن املاك ابو زوجته و عرف شيملك و شنو ما يملك طبعا مع معرفته بحالة والد زوجته الصحية و اعتبر زواجه مشروع تجاري عشان يزيد رصيدة و يوسع تجارته لكن ربك ما يطق بعصى هالرجل اكتشف بعد زواجه عرف انه صعب ينجب ابناء و يحتاج للعلاج عشان يقدر ينجب ابناء يعني هالمرة علاجة بالخارج صار صج بعد ما كان ياخذها لعب من قبل .

    و مع كل بلاويه الله رزقة بولد و هالشي فاجأ الكثير من اللي يعرفونه لانهم يدرون بفعايلة لكن الرحمن كانت له حكمة راح نعرفها بعد ما اقولكم سالفته ... كبر ولده و دخل الابتدائي و كان هالذيب يعلمه شلون يظلم الناس و ياخذ شي مو من حقه سواء بالقوة او الحيلة مثلا يوم كان صغير ( ولده ) كان يعطيه فلوس و يطلب منه انه يعطي هالفلوس حق ولد جيرانهم على اساس يشتري منه القاري لكن اللي ما تعرفونه انه المبلغ اللي كان يعطيه اياه ما يوصل ربع قيمة القاري و الياهل يوافق بعد ان يوهمة بأنه هذي قيمة القاري (بيني و بينكم ولد جيرانهم كان صيدة ) و طبعا بعد ما يعرف جارهم انه الولد انقص عليه كان الذيب يرد عليه بانه القاري صار بالمزرعة و ولدك باع و ولدي شرى : ) .

    ولده كان ما يدرس لانه اصلا ابوه كان لاهي عنه لكن بكل سنه كان ينجح لانه ابوه يضبطه من بره المدرسة و يرفع درجاته من خلال معارفة او حتى بالدفع و هالشي كان الولد يدري عنه ... حتى انه بالثانوية كان يحط مدرسينه خصوصي عشان ينجحونه لا و يعطونه علامات عالية و استمر يعلم ولده الحيلة و الكذب الى ان وصل مرحلة الثانوية فلاحظ انه ولده تغير و قام يحب القراية و يهتم بمطالعة الجرايد و حتى قام ينجح من غير غش لا و فوق هذا الله وفجة و صار من الشباب المتدين .

    برابعة ثانوية هالولد تغير بشكل عجيب و شد حيلة و حب انه يطلع من الاوائل لكن تعود على الغش من صغره و اعتمادة على شرى الامتحانات ضرة و ما ساعده بانه يكون متفوق مع اصراره الكبير على عدم الاستمرار بالغش و هني قام يتدخل ابوه و يقوله لا تصير ردي و خلك ذيب حاول تضبط المدرسين و اذا ما تعرف انا اضبطهم لك و اييب لك الامتحان لي عندك رفض الولد و استمر على طريجة .

    اثناء الامتحانات النهائية ياله ابوه و معاه ظرف و قاله انه داخل هالظرف امتحان الفيزيا و الرياضيات و الكيميا دبرهم طبعا بذكائه و حيلته مع شوية فلوس ... صعق الاب انه ولده يرفض اخذ الامتحانات ( الدين الصحيح ) لانه يخاف من الله فجنن جنون ابوه و قام يسبه و يلعنه و يوصفة بأقبح الاوصاف و يقوله انه ذيب لكن يتأسف انه ياب خروف ... الابن ما رد الاسائه احتراما لابوه .

    تخرج بمعدل عادي و هني حاول ابوه انه يغير من اطباع ولده و قام يغرية بالتوسط للدخول الى احدى الكليات العسكرية و الولد يرفض لانه معدله ما يتعدى 52 و هالشي مثل ما قلت لكم مو ذنبه ذنب ابوه اللي علمه طول هالفترة على الخش و يوم رفض الغش و شرى الامتحانات كان وصل لمرحلة انه مستواه التعليمي ضعيف حيل ... ما طولها عليكم ما دخل اي كلية عسكرية و راح درس دورات خاصة بعد ان رفض انه يدرس من مال ابوه لانه يعرف انه مال ابو مال حرام .

    الذيب ( الاب ) جن جنونه لانه الفلوس اللي جمعها و حياة الحيلة اللي عاشها قاعد يشوفها جدامه ما تفيدة و ولده الوحيد يرفض انه حتى ياكل من مال ابوه (مو اقولكم الدين الصحيح ) تخرج الولد و توظف على ديوان الموظفين و كان مثال للشاب الرائع حتى انه اخذ قرض و درس على حسابة في احد الكليات دراسة صجية مو دراسة ذهاب و اياب اللي قاعدين شباب هاليومين يسونها .

    تخرج و على شهادته اليدية حصل ترقية و بعد مده سدد قرضة لا و فوق كل كانت عنده بقالة صغيرة يترزق الله منها تزوج و اخذ له بيت و سكن بدور و دور اجره عشان يسدد جزء من القرض اللي اخذه عشان يشتري البيت بعد تدرون متدين و ماله الا بيت التمويل لانه ما يبي الحرام ... المراد ابوه مرض من القهر لانه يشوف ولده مو قاعد يتمتع بملايينه .

    يا شباب لا تملون الحين بقولكم النهاية و انت يا فالح بسك ترى حرقت الراس و انت غانم كلم المصري خل اييب لي سفن ( يكمل قصته ) الولد ما كان عاق لأ بالعكس كان دايم يزور ابوه و يبوس راسه و دايم ينحصه انه يرد اموال الناس و يطهر فلوس و كان ابوه يغلط عليه و يسبه و كانت عنده جمله دايما يرددها ( انت خروف طلع من ظهر ذيب ) و في احد الايام و كانت تصادف العشر الاواخر صار نقاش بين الولد و ابوه .

    الاب : انت مستانس على بيت الحكومة اللي انت عايش فيه ؟
    الولد : الحمد لله انا مرتاح بهالبيت و جراني طيبين .
    الاب : سمعت انك فاتح بقالة يعني مسوي نفسك تاجر
    الولد : يبه المال الحلال ربي يبارك فيه و يزيده .
    الاب : انت ليش مو راضي تاخذ مني و لا فلس ليش ما تخليني اخذ لك بيت كبير و بدال هالبقالة اللي عندك تيي (تجي ) تدير الشركة و هالحلال كله لك .
    الولد : حد الله بيني و بين الحرام
    الاب : بفهم انت ليش غبي انت تتوقع لو اني طيب مثلك كنت راح احصل هالحلال و لا الناس تهابني انا سموني الذيب لانه اللي ابي احصله طيب و لا غصب انت تدري انه يدك ما كان يملك شي و انا اللي بنيت كل هذا و صرت معروف بالديرة و انت محد درى عنك .
    الولد : يبى الحرام ما يدوم و لو دام ترى وراك حساب يوم القيامة و احب اقولك انه الذيب حيوان و انا افضل اني اكون انسان ... يبه لو كل الناس صاروا مثلك الطيب راح يختفي و الشر يعم و القوي ياكل الضعيف و بجذي يتحول عالمنا الى عالم الحيوان .
    الاب : ودي اعرف شنو اللي غيرك و انا اللي ربيتك عشان تكون ذيب .
    الولد : تذكر ولد خاله الوالده بو عبد الرحمن اللي اخذت بيته بنص سعرة بعد ما خليت زوجته توقع على جيكات و بعديت هددتهها فيها ؟ّ
    الاب : ايه .
    الولد : بعد ما باعت البيت و تشردت اهيا و عيالها و قعدوا بشقة يتلي المدرسة بعد الهده و دموعها تنزل و تقولي عسى حوبة اليتيم ما تعداك انت و ابوك و هالكلام دار جدام كل الطلبة اللي ناطرين اهلهم بالهدة ما ادري شنو اللي اثر فيني اكثر دموعها و لا نظرة الشباب لي ؟! يمكن اهيا غلطت لانه انا مالي ذنب لكن لا تلوم المقهور لانه عدم القدرة على رد الظلم تذبح المظلوم اكثر من الظلم نفسه .

    بعدها ترك ابوه و طلع من البيت و عاش حياته النظيفة اهوا و عياله و بتعد عن طريج ابوه لما عرف انه ماله اي امل يتغير .

    يسأله فالح : انزين انت شعرفك بهالسالفة منو قالك عنها .

    انا عبد الرحمن اللي الذيب اخذ بيته من غير وجه حق تصدقون و لا ما تصدقون اني دعيت عليه بليلة القدر و ربي رجع لي حقي بعد 15 سنه بنفس الليلة لانه ولده بعد ما توفى ابوه عطاني البيت بعد ورثه و رجع اموال الناس و اهوا اللي قالي كل اللي صار مع ابوه و طلب مني اني اسامحه عسى الله يغفر الله .



    الحين سؤال منو يبي يكون ذيب و منو يبي يكون انسان :D
     
  2. ziena

    ziena طبيبة أعضاء الشرف

    746
    0
    0
    جزاكم الله كل خير علي القصة الواقعية

    بالفعل انها قصة واقعية نعيشها الان

    الكبير ياكل الصغير

    واللي له ظهر ماينضرب علي بطنه

    وهناك امثلة حياتية كثير

    ولكن

    الله فوق كل معتدي والله للمظلوم خير مؤيدي

    حسبنا الله ونعم الوكيل
     
  3. nash

    nash بـترولـي نشيط جدا

    236
    0
    0
    اكبر دليل على انه الظالم له يوم هو صدام اللي بطش بشعبة 35 سنه و بالاخير لقوه ذليل بحفرة و ابناءه ماتوا و اهوا مو قادر يدافع عنهم تماما مثل ما كان يفعل مع ضحاياه
     
  4. ABDULLAH

    ABDULLAH قــلــم بــتــرولــي أعضاء الشرف

    10,727
    1
    36
    موظف في ش نفط الكويت
    وطن النهار - الكويت موطني
    يا سلام عليك يا ناش ، قصة حلوة و فيها موعظة و الشاطر اللي يستفيد

    جزاك الله خير
     
  5. يادنيا

    يادنيا بـترولـي مميز

    مشكور على القصه يا مألف المنتدى :)
     
  6. nash

    nash بـترولـي نشيط جدا

    236
    0
    0
    تسلم يا اخوي عبد الله : ) مشكور على قرائتك القصة و التعليق عليها و ان شاء الله كلنا نتعظ و نبتعد عن الظلم و الحيلة :)
     
  7. nash

    nash بـترولـي نشيط جدا

    236
    0
    0
    العفو اخوي و ان شاء الله راح انزل قصة مسموعة عشان الناس ما تمل من القراءه : )
     
جاري تحميل الصفحة...

مشاركة هذه الصفحة