قلب من حجر ( قصة حب حقيقية عشتها )

الكاتب : nash | المشاهدات : 6,003 | الردود : 6 | ‏5 يوليو 2010
  1. nash

    nash بـترولـي نشيط جدا

    236
    0
    0
    بسم الله الرحمن الرحيم


    قلب من حجر ( قصة حب حقيقية عشتها )


    ]ككل شاب درس و توظف و حصل اول معاش فكرت اني اخذ لي وحده تكون رفيقة لي بدربي اهتم فيها و بدورها تهتم تبدالنبي الاهتمام , طبعا اقترح علي الوالد جم وحده لكن كنت دايم اقول ابي وحده اشوفها بنفسي و قلبي ينجذب لها و ابوي واقف بعد اصرار مني .

    كنت اقول حق ابوي اني ما ابها تكون عند واحد ثاني من قبل لاني ما اخذ فضلة احد , مرت الايام و كان في بيت دوم كنت امر عليه و انا بطريجي لدوامي من غير ما التفت له الى ان شفتها بره كانت واقفة سبحان الله جذبتي بشكل رهيب عورت قلبي و صار اللي ما كنت اومن فيه الحب من اول نظرة فلحقتها كانت برونزية و ماشية مع واحد كبير بالسن يحليله كان كرشة طاق بالسكان :D .

    قلت حق ابوي عنها و قالي انه يعرف اهل هالبيت خوش ناس و معروفين و علاقته فيهم قوية فطلبت منه يكلمهم هني الوالد طالعني و قالي بس هذي مو مثل اللي انت تبي قلت له عادي مادام انت تعرف اهل البيت و تقول انهم من اصل طيب اكيد اهيا خوش وحده و ما يعيبها شي :) .

    بالفعل الوالد كلم صاحبة و وافق على طول و قاله لو اهيا ذبيحة ما عشتك ... اول ايامنا كنا لحد الحين ما نعرف بعض ويعني كان لازم علي اتعرف على اطباعها كانت جميلة و تلفت الانظار وين ما راحت و ملامحها الناعمة تخفي قوة كبيرة و جرأة و ثبات بعد مدة قصيرة حب الاول نظرة تحول الى عشق و عرفت اني اصلا ما اقدر اعيش من غيرها و مستعد اسوي اي شي عشان نكون مع بعض و ما كنت ابخل عليها بأي شي كنت اهتم فيها بشكل كبير لدرجة انه كل جماعتي لاحظوا هالشي و كانوا ينكتوت على هالشي :D.

    مرت عليكم ايام لما الواحد يضحك وايد او يستانس بشكل كبير يقول ان شاء الله خير سبحان الله ما في سعادة تستمر للابد و لازم نمر بالحياة بمطبات تختبر قوتنا و صبرنا تعبت علي بالبداية ما كنت احس بتعبها بالعكس كنت اضغط عليها اكثر و اكثر الى انه بيوم حسيت انه فيها شي مو طبيعي و حرارتها مرتفعة بشكل كبير ؟! قلت بنفسي اروح الدوام و بعد الدوام يصير خير لكن ما صار خير فجأة تعبت اكثر و قمت و شلتها و وديتها عند خبير هندي و قالي لازم تخليها عشان نسوي فحوصاتنا :confused:.

    بعدين يالي اتصال هزني يوم قالي انه قلبها تعبان و محتاجة عملية عاجلة و بالفعل دفعت له 2400 دينار اتعاب العملية بعد ما راعاني لانه يعرف ولد عمي و الحمد لله انفرجت الغمة لكنها ما ضلت نفس قبل و تغرت علي راح عزمها و ثبتها و صارت وايد تحن علي مع انها قبل ما كنت اسمع صوتها , اكيد مو منها مني انا اللي نسيت اني اهتم فيها بعد ما انشغلت بالعمل و السفر و الطلعات و اهمالي سبب هالشي لانها كانت قبل مدلله و ما تعاني من اي مشاكل او ضغوط مثل اللي حملتها اياه :(.

    طاحت علي مرة ثانية و وديتها عند خبير ثاني لبناني جنسيته كندية و قالي انا راح اعالجها بس لازم تفهم انها ما راح ترد مثل قبل ,,, و من بعد هالعملية صارت من سيء الى اسوء و لأن المصائب ما اتيي فرادا تعرضت لحادث فقدت من خلاله عينها اليمين :(.

    هني طلب مني ابوي و بكل بساطة اني اتخلى عنها و اخليها تروح بحال سبيلها رفضت و قلت له لو شيصير ما اخليها شلون اخليها و اهيا اللي تحملتني يوم كنت شاب طايش و لما كبرت و كبرت معاي اخليها ضل ابوي يزن علي و يقولي اخذ لك وحده يديدة تهتم فيك و تدلعك لانه هذي خلاص راحت عليها , كلام ابوي اثر فيني و بصراحة اقتنعت فيه و قررت اني خلاص اتخلى عنها و اخليها تشوف نصيبها مع واحد ثاني هذا اذا كان لها نصيب , صار بينا لقاء اخير رحت اكلمها و اشرح لها ظروفي و ادري انه مستحيل تتفهم و بعد لقاء طويل بستها و تم الفراق و من يومها و انا كل ما اذكر سيارتي البورش كريرا اعرف انه قلبي من حجر :D
     
  2. Balloons Shop

    Balloons Shop بـترولـي نشيط جدا

    415
    0
    0
    visiter
    Kuwait
    شي طيب قلبك تولع بكريرا

    كنت مجهز لك كلام لكن ربي نجاك :)
     
  3. nash

    nash بـترولـي نشيط جدا

    236
    0
    0



    هههههه شكلك اندمجت بالقصة و هذا اللي كنت ابيه :D

    بوضح جم شغلة ....

    مرضت بالقلب = طقت مكينتها

    الخبير الهندي = الميكانيكي

    صارت عمية = صطابها الامامي انكسر

    يوم تخلى عنها = باعها و شرى سيارة ثانية

    و يضل قلبي مع الكريرا مهما تغيرت السيارات :D
     
  4. مطيري برازي

    مطيري برازي بـترولـي جـديـد

    49
    0
    0
    يجيب الله مطر
    الكويت
    مادمر القصه إلا اخرها عموما الله يعطيك العافيه
     
  5. كويتيه ماركه

    كويتيه ماركه بـترولـي خـاص أعضاء الشرف

    لووووووووووول اندمجت بالقصه حدي

    يعطيك العافيه :)
     
  6. nash

    nash بـترولـي نشيط جدا

    236
    0
    0
    وجه نظر احترمها : )

    بس بيني و بينك ما احب اكتب قصص عاطفية عشان جذي اخفيت كلامي عن الكريرا بشكل عاطفي و بالاخير بيت القصة انها نوعا ما كوميدية :)
     
  7. nash

    nash بـترولـي نشيط جدا

    236
    0
    0
    الله يعافيج اختي .
     
جاري تحميل الصفحة...

مشاركة هذه الصفحة