ليش الكل ساكت عن موضوع مواقف السيارات !!

الكاتب : The invisible | المشاهدات : 1,497 | الردود : 10 | ‏22 مارس 2010
  1. The invisible

    The invisible بـترولـي جـديـد

    10
    0
    0
    صباح الخير شباب . أدري أزعجتكم من شاركت وانا أتحلطم وأتشكى بس ما يخالف تحملوني :)
    موضوعي اليوم بخصوص مواقف السيارات والصمت الرهيب اللي يلف كل شخص يستعمل هالمواقف !
    عاد هالمره كلامي موجه للنقابه لأن الكثير منهم يستعمل نفس المواقف وأشوف ما لهم حس بالمره !
    يرضيكم اللي قاعد يصير في هالمواقف ؟
    أول مشكله مشكلة النظافه ! المواقف فيها وصخ أعزكم الله يبي له شهر يشيلون وينظفون فيه حتى حاوية قمامه ما في المكان الواحد يقط فيه المخلفات أتحداكم تصفطون سيارتكم وما تشوفون بطول باربيكان وفريز وقواطي بيبسي يم كل عمود ! هذا غير أكياس ماكدونالدز وهارديز محذفين يمين ويسار !
    غرفة الحراس القديمه اللي بقدرة قادر كلهم صاروا سوّاق باصات (عليهم بالعافيه خوش شباب) مهجوره وتصلح للتعاطي هههههه !!
    لوحات النقابه (القائمتين) الفايزه والخسرانه اللي ما شالوها للحين وكانت ساده المدخل وعلى فكره 3 أشخاص بنشرت سياراتهم من ورا هاللوحات لأنها طاحت بفعل الرياح القويه وتكسرت قواعدها وخذ مسامير على طول المدخل وكانوا الضحايا من موظفين الشفتات لا تشوفونهم وتعابير ويوههم لما يطلعون من الدوام بعد (يوم شاق) يبون يروحون بيوتهم يرتاحون يلاقون سياييرهم مبنشره ! والله حرام !
    وبعدين شسالفة أمن المنشآت وموظفين البترول الوطنيه وكريمينكو ومادري منو كل يوم يصفطون عندنا ! تبون تعرفون شلون يدشون ؟ يدشون عكس السير من المخرج ومحد يكلمهم والشرهه على قسم الأمن والسلامه اللي كلمنا مسؤولهم على شان يحط حاجز (مطبه One Way) عالمخرج نفس اللي ينحط في كل مواقف محترمه على شان محد يدش عكس السير وقال لنا بالحرف الواحد (أبشر أبشر) هالكلام من 6 شهور ولا شفنا شي !
    وبعدين أبسط الأمور الإضاءه يا ناس حرام شنو إحنا لما نداوم زام الليل أو نطلع من زام العصر ما نخلي رصيف ما نشوته واحنا ماشين والا بطول مكسره والا وصخ ندوس عليه ليش هالتعذيب ! شنو الشركه حالفه عالموظفين إنهم يعانون ؟ اللي يداومون صباحي يمكن مو حاسين في هالشي لأن الدنيا نور مو محتاجين إضاءه !
    شوفوا مواقف البترول الوطنيه نظيفه ماشاء الله وإضاءه تحت كل مظله وفوق هذا كشافات مثل الملاعب على السور وكلهم يشتغلون بمؤقت (Timer) من تظلم الدنيا يشتغلون أوتوماتيك ليش شركتنا عيزانه توفر هالشي حقنا ؟؟
    يلا يا نقابه همتكم معانا ولا تلوعون جبدي بسالفة إكتب كتاب وإكتب مذكره هالأمور بسيطه بس يبي لها تجاوب منكم وخلونا نشوف همتكم ندري فيكم ما تقصرون.
     
  2. Workers

    Workers إدارة المنتدى

    7,767
    30
    48
    ذكر
    الكويت
    صباح الخير ياهلا بالحبيب وابرك الساعات نشوف مثل هالمشاركات المفيدة

    اكيد فيه فرق بين شركتنا وبين البترول الوطنية
    شركتنا مخصخصة وخالصة وبايعينها واحنا معاها ... والبترول الوطنية باقيه لذلك تشوف الاهتمام موجود عندهم
    مسألة وقت !!
     
  3. المنجنيقي

    المنجنيقي بـترولـي خـاص

    1,966
    0
    36
    الله يعينكم

    وهذا دور النقابه .. وأنت سويت إللي عليك .. سواء بالموضوع هذا أو الموضوع السابق
     
  4. بترولى12

    بترولى12 بـترولـي جـديـد

    10
    0
    0
    فعلا المواقف سيئة جدا

    واتوقع انها منسية من الادارة لانهم ماشفوها على وضعها المزرى
     
  5. عامل كويتى

    عامل كويتى بـترولـي نشيط

    111
    0
    0
    الخصخصه قادمه ومنو يفكر فى مواقف مظلمه فيها انواع القاذورات
    حلو منك تنبيه الاخوان والنقابه
    الحر على الابواب وراح تشوف حتى البنغالى واهل التكاسى الجواله يصفطون فى المواقف
    ووقتها يحلونها
    :d:d
     
  6. Workers

    Workers إدارة المنتدى

    7,767
    30
    48
    ذكر
    الكويت

    اشوفهم من يومين عالجو المشكلة اقصد عكس السير
    بوابة الدخول مفتوحه على طول .. !!! يعني مافي داعي احد يدخل عكس السير !!
    ياخي حتى حلول المشاكل بالمقلوب !

    انا بس ودي افهم ربعنا شنو سالفتهم اذا جاء الواحد يصفط سيارته ليش يوقف عند الباب في اول المواقف :confused:
    ليش تضيّق على الناس ؟! بطلو ياشباب الكسل والمواقف كافيه وزيادة كل واحد يصفط سيارته في الموقف المخصص لها .
    مو ناقصين المواقف بروحها تسد النفس !
     
  7. زيـنـه

    زيـنـه بـترولـي نشيط جدا

    162
    0
    0
    السلام عليكم

    باتكلم عن مواقف المكتب الرئيسي

    كله كوم .. و اللي يصفطون في اماكن غيرهم (و المسمى الوظيفي مو مالهم) و يسون روحهم ان الامور عاديه و ماصر شي بكوم .

    يعني تيي الصبح تبي موقفك .. صافطين فيه .. يعني وين تروح ؟
    تصفط محل غيرك ؟؟ --> فيها نوع من قلة الادب و الاحترام .

    و هم فيها خوف لا شافوا التايتل كبير .. مدير و الا رئيس فريق و الا الاداره العليا ما يسفطون .. يعني هذول نخاف منهم و الثانين عادي و كيفهم ؟

    و يعترضون لا يا صاحب الموقف و سد عليه بالعرض و ما يطلع الا فوق الساعه 4 (من باب النحاسه)... بصراحه ما ينلام على ردة الفعل .

    اتمنى من اللي يسون هالحركة .. ايوزون منها .. لان احترام الغير و عدم التعدي على ملكيتهم واجب .

    و سلامتكم و تعيشون .
     
  8. Workers

    Workers إدارة المنتدى

    7,767
    30
    48
    ذكر
    الكويت
    وعليكم السلام ياهلا بالأخت الفاضلة زينه

    فعلاً فيه مشكلة بمواقف المكتب الرئيسي مافيه مواقف للزوار كافية وباقي المواقف كلها
    للموظفين كل واحد له موقف خاص وهالشي تمام ومع الأسف اللي قاعد يحصل لما يكون فيه
    دورة للموظفين اللي بالشعيبة يكون فيه عفسة بالنسبة للمواقف مايحصلون موقف ومجبورين
    يوقفون في اي مكان فاضي .. ياليت يشوفون لنا حل للمشكلة .. لأن سالفة صاحب الموقف يسكر
    عليه حتى نهاية الدوام هذا مشكلة ثانية لأنه واقف خطأ وممكن احد يدعم سيارته ..

    الحمدلله عندنا تقريباً انحلت المشكلة وناطرين باقي الملاحظات إن شاء الله ينتهون منها قريباً
    والفال لكم ..
    واتوقع لو يتركون المواقف بدون اسماء يكون افضل لأن التقييد فيها صعب ..
    واللي يحصل موقف فاضي يوقف فيه بدل ما اشوف موقفي الخاص فيه واحد واقف وما اقدر اوقف في مكان ثاني !!
    هذي وجهة نظري ..


    =============================

    [​IMG]

    [​IMG]


    الله يعطيهم العافية ماقصرو الجماعة صار لنا اسبوع والشغل تمام
    محد يقدر يدش إلا بكرت الدوام وعكس السير ماينفع الحين ..
    المواقف صارت تمام ومافيه زحمة نفس قبل الكل كان يشاركنا ومسوين زحمة ..
    وإن شاء الله يكملون الشغل ويضبطون الإنارة والحفر اللي كسرت سياراتنا ..

    شكراً لكل من كان له صلة بالموضوع وقام بالإجراءات اللازمة لتعديل الوضع ..
    وخاصة صاحب الموضوع ربي يعطيه العافية ..
     
  9. الوزير

    الوزير بـترولـي نشيط جدا

    166
    5
    18
    الله يعطيهم العافية ماقصروا
     
  10. زيـنـه

    زيـنـه بـترولـي نشيط جدا

    162
    0
    0
    السلام

    في المواقف اللي يم البوابه على يمينها دووووم فاضيه .. بس ما منها فايده اذا الباب الخلفي او الجانبي للمبنى دوم مسكر !

    اما هالسالفه فلا تخاف ان احد يدعم سيارته لانها سيارة الشركه و مو هامته اذا اندعمت .

    صعب كل سينير له حق موقف باسمه .. بس ربع الشعيبه و الزوار و اللي مو سينيريه و السكرتاريه المفروض يحترمون المسميات لانها محدوده و قرب الباب الرئيسي .. و مو لهم هالاماكن
    يعني المسأله مسأله احترام و اخلاق لا اكثر و لا اقل.


    و ان شاء الله تنحل هالامور و تتنظم سالفة المواقف لك و لنا !
     
  11. Workers

    Workers إدارة المنتدى

    7,767
    30
    48
    ذكر
    الكويت
    اللي بالشعيبة مالهم مواقف حتى لو سينير يه ..
    خلوها مفتوحة .. لأن اشوف احيانا مواقف فاضية ومحد يوقف فيها لأنها حق مسئولين ومو مداومين ..
    اما إجازة أو ... شغل خارج الشركة
     
جاري تحميل الصفحة...

مشاركة هذه الصفحة