الفزعه يالربع ! غرفة تبديل الملابس الخاصه في مشغلي العمليات في مصنع اليوريا B

الكاتب : The invisible | المشاهدات : 1,987 | الردود : 18 | ‏21 مارس 2010
  1. The invisible

    The invisible بـترولـي جـديـد

    10
    0
    0
    مساكم الله بالخير .
    موضوعي اليوم ترددت قبل لا أنزله في المنتدى لكن مثل ما يقولون طفح الكيل والسالفه إمصخت ونبي الفزعه من الإخوه في النقابه بما إن الإخوان المعنيين في الشركه يومهم بسنه !
    الموضوع بخصوص غرفة تبديل الملابس الخاصه في مشغلي العمليات في مصنع اليوريا B
    الغرفه وفرتها الشركه مشكوره قبل جم سنه وجهزتها بالكامل من خزائن لجميع الموظفين وتكييف كامل ودورات مياه (أعزكم الله) وموقع الغرفه للّي ما يعرف مكانها خلف مبنى الهندسه مقابل مصنع اليوريا B وبتشوفون الصور المرفقه في نهاية الموضوع .
    زبدة الكلام الغرفه تعاني من الإهمال الغير معقول من صيانه وتنظيف من سنين (يا فرحه ما تمت) وصارت مرتع لعمال شركات المقاول يسرحون ويمرحون فيها على هواهم واللي بيشوف الصور راح تنسد نفسه وما راح يتخيل إن هالمكان في شركه محترمه مثل ال PIC وإهي من أكثر الشركات إلتزاما بالسلامه والصحه المهنيه وسلامة العاملين ( كل سنه ناخذ شهاده ) على هالأمور .
    دورات المياه (أجلكم الله) تالفه بالكاااااااااااااااااااامل من سنين مضت وغرفة الخزائن مليئه بالقاذورات والغبار كأنها مهجوره والأدهى تعرض خزائن الموظفين للكسر والتخريب وسرقة متعلقاتهم الشخصيه وأدوات السلامه الشخصيه بالكامل ما يمديك تحط شي الا تلاقيه مبيوق في نهاية الشفت !! عسى ما شر ؟؟
    اشتكينا 100 مره عند المسؤولين لكن لا حياة لمن تنادي للأسف محد يسمع لنا والكل مطنش وأعتقد هالأمور من حق كل موظف إنه يلاقى مكان آمن يخلي فيه متعلقاته الشخصيه وأدوات السلامه اللي الشركه تطالبنا بالإلتزام فيها في أوقات العمل لكن حتى معدات السلامه إنباقت وقمنا نشتري على حسابنا جواتي (حشى السامع) والخوذه نطرها طراره من ربعنا تخيلوا حتى ال (Gloves) ما سلم منهم يبوقونه مو سالفه هذي !!
    وأزيدكم من الشعر بيت الغرفه صارت مرتع للفيران (فيران بحجم الديناصورات من العصر الجوراسي) واذا حذفت عليه شي ما ينحاش بالعكس يخزّك لين يكسر عينك !!
    اللي أبي أطلبه من الشباب في النقابه يتابعون هالموضوع واللي يهمه هالأمر يراسلني وانا مستعد أساعده وأشرح له طلباتنا وشنو ممكن نسوي على شان نحافظ عالمكان ونؤمن مكان مناسب يليق في الإخوان مشغلي العمليات في مصانع اليوريا . واتمنى بعد هالموضوع يزورونا قسم الأمن والسلامه والبيئه ويشوفون الوضع ويقيمونه لأنه فعلا الوضع سيء لأبعد الحدود وأترككم مع الصور !!


    الغرفه من الخارج ..
    [​IMG]

    باب الغرفه المكسور ..

    [​IMG]

    القاذورات !!

    [​IMG]

    آثار السرقه على خزائن المشغلين !!

    [​IMG]

    زاويه أخرى من الغرفه ..

    [​IMG]

    دورات المياه ..

    [​IMG]

    آثار التخريب ..

    [​IMG]

    الشركه ركبت الجهاز على الباب من سنتين لكن ما شغلته لغاية اليوم !!

    [​IMG]
     
  2. المتمكن

    المتمكن بـترولـي خـاص أعضاء الشرف

    1,350
    0
    0
    اتمنى من الاخ الفاضل ان يتقدم بكتاب رسمى للنقابه وهذا واجب وحق للجميع
    والله ما اقدر اعلق على الموضوع ولا على الصور
    لكن للاسف نقطه سودا فى تاريخ شركتنا ولابد من وضع حد للمهزله وللصور اللى تشرف صورة شركتنا
    اتمنى من الاخ الفاضل ان يبعث كتاب رسمى لمتابعة الموضوع على وجه السرعه
     
  3. The invisible

    The invisible بـترولـي جـديـد

    10
    0
    0


    بشوف أول شي ردود الفعل على الموضوع اللي طرحته واذا ما لقيت أي تجاوب راح أتوجه بكتاب للإخوان في النقابه وأدري فيهم ما يقصرون دوم بالشوفه .
    أشكر تفاعلك يالمتمكن ما نتحرمش
     
  4. الوزير

    الوزير بـترولـي نشيط جدا

    166
    5
    18
    الشرهه علي اللي يسوون أودت كل يوم وينهم عن هالمسخرة وإلا الظاهر الأودت كلام فاضي ومش حالك
     
  5. فيصل العجمي

    فيصل العجمي مؤسس المنتدى أعضاء الشرف

    6,420
    1
    36
    للأسف ان يكون هذا وضع مكان تبديل الموظفين
    والمكان الذين يضعون فيه اغراضهم الشخصيه

    ولكن العتب مو على الاداره

    العتب على النقابه
     
  6. Workers

    Workers إدارة المنتدى

    7,767
    30
    48
    ذكر
    الكويت
    [​IMG]

    ترا هالجهاز مركبينه علشان يصورونه بعد التركيب ويعني شوفو يا ادارة ترا الوضع تحت السيطرة
    هالشركة شغل هياط واعلام مو طبيعي .. واللي يبي يسنع الوضع يكحل عيونه في هالصور .. وتكفي وزيادة
    وصاحب الموضوع الله يعطيك العافية وبارك الله فيك وماقصرت ..
    ونصيحة لا تكتب اسمك في اي كتاب رسمي ..
     
  7. The invisible

    The invisible بـترولـي جـديـد

    10
    0
    0

    إنت من صجك أي AUDIT أي بطيخ !! والله يا في ناس يطلبون منك ITEMS حق تقريرهم وهم قاعدين في البيت يدق علينا تلفون ويقول لك عندي AUDIT بس مالي خلق أيي شوف لي شي أكتبه في التقرير !
     
  8. The invisible

    The invisible بـترولـي جـديـد

    10
    0
    0

    النقابه نعتب عليها إذا كان الموضوع وصل لها وما تفاعلوا معاه لكن أؤكد لك إن الموضوع لم يطرح على النقابه من قبل لأن أصلا محد تكلم فيه إلا آنا عند المسؤولين وأثرت الموضوع كذا مره لكن مافي أي تجاوب !
    أعتقد موضوع مثل هذا خاصه السرقه اللي تمت من إختصاص قسم الأمن والسلامه وأعتب على المسؤولين في هالقسم على برودهم وصدقني لو إن أغراضهم اللي انباقت جان يابوا شركة بلاك ووتر تحرس أغراضهم بس شنقول .. نتمنى يكون صوتنا وصل للإخوان ونبي نشوف تحركاتهم بخصوص هالموضوع ولو إني أدري إن الشق عود ويوم الشركه بسنه والله يعين !
     
  9. The invisible

    The invisible بـترولـي جـديـد

    10
    0
    0
     
  10. بوعبدالعزيز.كوم

    بوعبدالعزيز.كوم بـترولـي نشيط جدا

    483
    4
    18
    طالب علم
    دولة الكويت
    أنا أقول يا سلام على ام الـ Safety Audit خوش تدقيق عندنا :) وخابصين العالم تدقيق وتدقيق و Unsafe Condition

    مثل ما قال أخوي الوزير (شغل مش حالك)
     
  11. عامل كويتى

    عامل كويتى بـترولـي نشيط

    111
    0
    0
    فزعه وموضوع الفزعه توقعتها عن الخصخصه والمطالبه بوقوف النقابه النايمه
    وتحلم بفرحة الفوز القديم الى الان
    والله اخر شى اتوقعه انه تكتب عن حمامات وكبتات ومصيرنا ومصير اولادنا تنساه بالفزعه تلك
    ياعمال يا ابطال الخصخصه قادمه الينا واتركوا الحمامات والكبتات على صوب
    نبى نعرف شنو مصير نا ولا نرضى بالقانون الذى دبر بليل على قولة ضمير الامه
    لكم الله ياعمال
     
  12. The invisible

    The invisible بـترولـي جـديـد

    10
    0
    0
    عفوا أخوي دام إن الموضوع ما عجبك يوم قريته جان صرت أحسن منا وما تعبت نفسك بهالرد اللي ماله داعي ؟
    آنا ما طلبت منك الفزعه طلبتها من إخواني في النقابه واللي لهم صله مباشره في الموضوع هذا أول شي وثاني شي إذا إنت شايف الموضوع ما يهمك لا من قريب ولا بعيد ترى يهم 100 مشغل يستعملون هالغرفه وأرجو إن محد يستهزيء في أي موضوع يطرح في المنتدى لأن المنتدى للجميع لا لك ولا لي والسموحه اذا ضايقناك عزيزي .
     
  13. عامل كويتى

    عامل كويتى بـترولـي نشيط

    111
    0
    0
    عفوا أخوي دام إن الموضوع ما عجبك يوم قريته جان صرت أحسن منا وما تعبت نفسك بهالرد اللي ماله داعي ؟
    ردا على سؤالك تذكر ان اسم المنتدى هو القطاع النفطى تكتب موضوع تقبل كل الردود بكل اريحيه
    واسال ال 100 موظف اى الاهم عندهم كبتات والا قانون الخصخصه وايضا هنا تجد الاجابه
    كنت اتمنى يكون ردك لى فيه نوع من الواقعيه
    وتوافقنى اللرأى بما كتبت
    وبالمناسبه نسجل موقف للاخ جاسم العتيبى وهذا لا يكفى ايضا
     
  14. Workers

    Workers إدارة المنتدى

    7,767
    30
    48
    ذكر
    الكويت

    للامانه اخوي عامل كويتى انت قاعد تقلل من اهمية طرح الاخ صاحب الموضوع وتخرجنا من صلب الموضوع وهالشي مخالف
    عندك موضوع الخصخصة شارك فيه واهتم فيه بارك الله فيك .. واتمنى بعد هالرد تكون الردود في صلب الموضوع حتى ماتحذف ..

     
  15. العيـن

    العيـن بـترولـي جـديـد

    41
    0
    0
    هل حصل أي تقدم في الموضوع؟
     
  16. أصيل

    أصيل بـترولـي جـديـد

    6
    0
    0
    بصراحه شى يفشل !!

    بصراحه شى يفشل اللى شفته عن غرفه تبديل الملابس !أبى أسئل سؤال منو الشخص المسئول عن خدمات موظفى الشركه وليش هذا التسيب الصارخ الذى اندل على شى انما يدل على اللامبالاه فى هذه الشركه وعدم اهتمام من يعنى لهم هذا الامر وهم قسم الخدمات الذى هو دوره الاهتمام بامور العاملين ولكن الذى نراه هو العكس لو يقوم أى موظف بزياره المكتب الرئيسى أو نادى بوبيان ليرى بأم عينيه مدى المحاباه لكبار موظفى الشركه وأعطائهم صوره للشركه بأنها جنه الله فى أرضه حتى ينالوا أستحسان القياديين فى الشركه ولكن مع الأسف الشديد من رأى هذا المنظر من وجه الشركه لرأى مدى التسيب فى هذه الشركه الغراء فى ظل قياده بعض المسئولين العظام؟؟؟:mad::(
     
  17. زيـنـه

    زيـنـه بـترولـي نشيط جدا

    162
    0
    0
    رايي .. قدموا شكوى للمسؤول عن هالمرفق (ان كان مدير للمصانع او الامن و السلامه او الاداريه (الخدمات))
    و اذا ما تم اتخاذ اجراء .. قدموا الشكوى للاداره العليا .
    و اذا ما تم اتخاذ اجراء .. استعينوا بالنقابه على هالشي .

    هذا من ضمن بيئة العمل .. و لابد الشركة مسؤوله عن الاهتمام بهالمرفق و الحرص على اغراض العاملين .
     
  18. The invisible

    The invisible بـترولـي جـديـد

    10
    0
    0
    والله صار تقدم طفيف (الكلام موجه للأخ اللي نكه العين) طلعوا الخزاين وهدموا دورات المياه عزكم الله للتجديد وهالكلام من 3 أسابيع وتالي وقف الشغل ما ندري ليش وبيني وبينك محد سائل من المعنيين وانا تعبت خلاص تعبت وانا أشتكي :)
    الإخت زينه رايج على العين والراس وكل اللي ذكرتيه سويناه ما خلينا باب ما طقيناه لكن محد معبرنا .. مشكورين عالمشاركه والردود فيكم الخير والله :)
     
  19. النداوي

    النداوي بـترولـي نشيط

    136
    2
    18
    وين مسؤولين القسم شدعوه لي الحين ماشافو الموضوع .. شكلهم ماراح يضبطون الغرفة إلا إذا سلموها حق تاجر يعني إذا تخصصت الشركة.....
     
جاري تحميل الصفحة...
مواضيع مشابهة
  1. الكايد
    الردود:
    11
    المشاهدات:
    747

مشاركة هذه الصفحة