زيادة مقطوعة من 100 إلى 150 للخاص والحكومة

الكاتب : cosmic girl | المشاهدات : 4,189 | الردود : 16 | ‏21 فبراير 2010
  1. cosmic girl

    cosmic girl بـترولـي نشيط

    139
    0
    0
    السلام عليكم ،،، منقول

    الكلفة مليار وربع المليار وتشمل الكويتيين بـ «الخاص».. والحكومة تشترط لتنفيذها موافقة مجلس الأمة على تغييرات جذرية بضوابط التعيين في الجهات الحكومية
    تقرير زيادة الرواتب شبه جاهز
    الأحد 21 فبراير 2010 - الأنباء





    ضرورة الربط بين زيادة الراتب الاساسي وأولوية التعيين بالاحتياجات وقيمة الوظيفة.. وعدم توحيد تعيين الخريجين على الدرجة الرابعة واستحداث الدرجتين الثالثة والخامسة لعلاج البطالة المقنّعة
    مريم بندق
    كشفت مصادر حكومية رفيعة عن ان الجهات المختصة اوشكت على الانتهاء من تقرير زيادة رواتب الكويتيين في الحكومة والقطاع الخاص والذي يتضمن تصورات آنية واخرى مستقبلية.

    وقالت المصادر في تصريحات خاصة لـ «الأنباء» ان الميزانية المطلوبة لاقرار التصورات الانية تبلغ ملياراً وربع المليار دينار لصرف زيادة مقطوعة لا تضاف الى الراتب الاساسي وتتراوح بين 100و150 دينارا لـ 140 ألف كويتي.
    وحددت المصادر التصورات المستقبلية التي سترفعها الحكومة الى مجلس الامة للموافقة عليها حيث يرتبط تنفيذ التصورات الآنية بهذه الموافقة لاعتماد زيادة الراتب واعطاء اولوية التوظيف في الحكومة بالاحتياج الى التخصص ونوعية المؤهل وقيمة الوظيفة ونسبة التضخم. وتابعت المصادر قائلة: بمعنى اعطاء خريجي النفط والبترول الذين تحتاجهم البلاد على سبيل المثال الاولوية في التعيين مع اقرار زيادة في رواتبهم الاساسية مقارنة بخريجي التخصصات الاخرى كالجغرافيا مثلا.

    واشارت المصادر الى انه من اهم ضوابط التصورات المستقبلية ايضا عدم توحيد تعيين الخريجين على الدرجة الرابعة مشيرة الى اقتراح تعيين الخريجين في التخصصات النادرة التي تحتاجها الكويت على الدرجة الثالثة مقابل الابقاء على الدرجة الرابعة لبعض التخصصات واستحداث الدرجة الخامسة لتعيين بعض خريجي الجامعة في تخصصات اخرى لا تحتاجها الحكومة وتشكل بطالة مقنعة الآن.
     
  2. koc-76

    koc-76 بـترولـي مميز

    591
    0
    0
    لموظفي الحكومه والقطاع الخاص - احنا المغضوب علينا قطاع نفطي مالنا شي
     
  3. innovator

    innovator بـترولـي جـديـد

    1
    0
    0
    لا واللي يبط جبدي انا حاسدينا
    على شنو على دوامنا اللي من 7-3 ولا على شنو بالظبط مادري
    صج النفط مغضوب علينا
    احنا البطة السودة
    شوفو ديوان المحاسبة واحنا يا خلاف من ردي لي اردى
     
  4. cosmic girl

    cosmic girl بـترولـي نشيط

    139
    0
    0
    تنويــــــــه بسيط:-


    الشركات النفطية تعد من القطاع الخاص المملوك للدولة، وكون الدولة هي المالكة لأسهم الشركات النفطية ورأس مالها فهذا لا يجعلها جهة حكومية وإنما تعتبر من شركات القطاع الخاص المقيدة بالسجل التجاري ويسري عليها ما يسري على كافة شركات القطاع الخاص إلا ما يستثنى صراحة

    وطالما لم يتم استثناء سركات القطاع النفطي فيفترض أن تشملهم الزيادة المزمع إقرارها

    هذا طبعا في حال إقرارها
     
  5. Q8_oil

    Q8_oil بـترولـي خـاص

    1,387
    0
    0
    أخوي إسمحلي بس أتوقع كلامك غلط عشان لو كنه قطاع خاص جان مشى لنا دعم العمالة
     
  6. cosmic girl

    cosmic girl بـترولـي نشيط

    139
    0
    0

    دعم العمالة ما يمشي حق الشركات المملوكة للدولة، مو لأنها مو قطاع خاص بس لأنها مملوكة للدولة، مثل شركة النقل العام ومطاحن الدقيق.

    وعلى فكرة هذا غلط المفروض دعم العمالة الوطنية ينزل حق شركات القطاع النفطي. لأن العمالة الوطنية تعرف بأنها العمالة الكويتية التي تخضع لقانون العمل الأهلي وشركات القطاع النفطي تخضع لقانون العمل الأهلي والنفطي وما تخضع حق قانون الخدمة المدنية وبالتالي المفروض ينزل لنا دعم العمالة ،، لكن عادي من الحقوق المهضومة للقطاع النفطي الكويتي.
     
  7. AD-01

    AD-01 بـترولـي خـاص

    1,040
    2
    38
    العفو اختي

    كلامج جميل ولذيذ بس في استفسار بما انج ضليعة بالامور القانونية

    دعم العماله عباره عن (العلاوة الاجتماعية + علاوة الاطفال+ الزيادات اللي تم منحها للعاملين مثل 120 غلاء المعيشه + 50 دينار الزيادة الاولى)

    اذا كان الموظف بالنفط يستلم عناصر دعم العمالة .. شنو المقصود بانها لازم تصرفله ؟؟ هل قصدج تنعطى مرتين نفس ماكان الوضع في شركة ايكويت ؟! ... هذا استفساري الاول


    استفساري الثاني .. انتى تكرمتي وقلتي ان القطاع النفطي يندرج تحت القطاع الخاص كونه خاضع لقانون العمل في القطاع الاهلي .. كلام جميل

    المتعارف عليه ان القطاع الحكومي هو اللى يخضع لديوان الخدمة المدنية والقطاع الخاص هو اللى يخضع لبرنامج هيكلة القوى العاملة والقطاع النفطي هو اللى يخضع لقرارات مجلس ادارة المؤسسة التابع للمجلس الاعلى للبترول

    استفساري حول كلامج .. هل هذا التقسيم صحيح والا القطاع النفطي يتبع هيكلة القوى العاملة ؟؟ احب اصحح معلوماتي ;)
    (رايق)
     
  8. cosmic girl

    cosmic girl بـترولـي نشيط

    139
    0
    0

    أول شي أحب اعتذر عن التأخير في الرد بس ما كان عندي وقت كلش ادش المنتدى

    بالنسبة للاستفسار الاول: انا اقصد بدعم العمالة الوطنية مبلغ الـ 190 لغير المتزوج و 250 للمتزوج على ما اعتقد الي ينصرف حق كل الكويتيين الي يشتغلون بالقطاع الخاص، وللاسف حرموا منه الكويتيين العاملين بشركات النفط على اساس انه هذه الشركات مملوكة للدولة وتصرف للكويتيين فيها مزايا عديدة، مع انه في وايد شركات معاشاتهم ومزاياهم اقوى من القطاع النفطي ومع ذلك يصرف لكافة العاملين الكويتيين فيها دعم العمالة لانه دعم العمالة تم اقراره لتشجيع العمالة الوطنية (الكويتية) للعمل في القطاع الخاص.
    وبالتالي في وايد كويتيين ياخذون دعم العمالة على الرغم من انه شركاتهم تصرف لهم علاوة اجتماعية والزيادات الي تقرها الحكومة بين فترة وفترة، والمفروض هالشي يسري علينا بس تركيبة القطاع النفطي في الكويت شوي معقدة يعني شركات وبنفس الوقت يفرضون عليهم اجراءات الحكومة كله هذا لانهم مملوكين للدولة و شغلهم متعلق بالثروة البترولية ومجلسنا الموقر يشكك بالقيادات النفطية ، وبسبب هالتشكيك صار عندنا لخبطة بالتركيبة القانونية لوضع الشركات، يعني الشركات النفطية شركات تجارية مسجلة بالسجل التجاري وبالوقت نفسه تخضع لقانون المناقصات الي المفروض بس حق الوزارات والهيئات الحكومية، وبنفس الوقت ديوان المحاسبة ما يراقب ولا شركة بالكويت ما عدا الشركات النفطية، ولسبب بسيط انه اموال هذه الشركات تعد مال عام مملوك للدولة.


    أما بالنسبة للاستفسار الثاني:

    القطاع النفطي يخضع لمؤسسة البترول الكويتية، باعتبارها المالكة لكافة الشركات النفطية، ومن هني تبدا اللخبطة انه اهما شركات المفروض لهم استقلالية تامة في ممارسة انشطتهم بس تم اخضاعهم للمجلس الاعلى للبترول.

    عالعموم، الشركات النفطية تخضع لمؤسسة البترول الكويتية باعتبارها بمثابة الشركة الام المالكة لكافة الشركات النفطية، وهذا لا يغير من طبيعة الشركات من حيث كونها شركات تجارية يفترض ان تخضع فقط لقانون العمل الاهلي والنفطي ولوائحها الداخلية.

    اتمنى اني اكون قدرت اجاوب على سؤالك، وعلى فكرة كافة الشركات النفطية العالمية تستغرب الوضع القانوني للشركات النفطية الكويتية بسبب نظامها المختلط، ودايما يتعاملون معانا بحذر بسبب تدخل جهات عليا بانشطتها التعاقدية.

    اشكر لك المتابعة وسامحنا مرة الثانية عالتأخير
     
  9. خلداني

    خلداني بـترولـي نشيط

    مشكوره اختي على الموضوع

    انزين ليش ساكتين على هذا الوضع . اكيد فيه تنفيع
     
  10. cosmic girl

    cosmic girl بـترولـي نشيط

    139
    0
    0


    والله ياريت النقابة يتحركون بهالموضوع ،، لانه حرام نشتغل شغل القطاع الخاص ويتحسفون يعطونا كل المزايا

    الحمدلله على كل حال ،، احسن من غيرنا
     
  11. AD-01

    AD-01 بـترولـي خـاص

    1,040
    2
    38


    بيني وبينج انا ناسي هالموضوع بكبره ولما رديت عليج اخر مره كنت متأثر ب(نجرة) خفيفة مع واحد من المشرفين وكنت (اليف) :D


    احب اتكلم بوضوح اكثر من اسلوبي اللى بالرد اللي فات ...


    باختصار ... اختى انتى مضيعه وطاقة الرصيف وكلامج عكس الواقع .. :eek:

    اول شي : الكلام اللي بالاحمر :

    انا وضحتلج معني دعم العماله بالرد فوق اتمنى تقرين كلامي عدل ، دعم العماله فيه كذا شغله مو بس ال190 او 270 ..

    وانتى تقولين ان العلاوة الاجتماعية للاعزب 190 والمتزوج 270 ما تنصرف للنفط ؟!! طبعا هالكلام مو صحيح !! :confused:

    تنصرف وانتى قاعده تستلمين 190 دينار وتزيد معاج مع كل درجة والمتزوج يبدي من 270 وقاعده تزيد معاه

    ثاني شي : الكلام اللى بالادعم :

    احنا خاضعين لقانون المناقصات !!! .. منو قالج هالمعلومه ؟!!

    ديوان المحاسبة عنده رقابة مسبقة ورقابة لاحقة .. النفط يخضع للرقابة اللاحقة يعني بعد ما تطير الطيور برزاقها :)

    وسالفة الشركات العالمية خايفه منا ومن التعامل معانا مو علشان نظام شركاتنا التعاقدي .. بالعكس نظامنا عالمي ومتعارف عليه وتعتبر العقود في القطاع النفطي من اقوى العقود لكن مشكلتنا بمجلس الامة والتجار :)

    باجي الرد ماتشجعت اقراه الصراحة

    مشكوره على وقت الكتابة :)
     
  12. سالم الخالدي

    سالم الخالدي رئيس اللجنة الإعلامية فريق الإعلام

    5,139
    1
    38
    مشغل غرفة تحكم - مصفاة ميناء عبدالله
    الكويت
    أتوقع الموضوع مو بالسهولة انه يمر عالحكومة ....

    لكن الأمل كبير في الله

    الديون أرهقت ظهور المواطنين
     
  13. cosmic girl

    cosmic girl بـترولـي نشيط

    139
    0
    0




    اعتقد انه انت الي سألت انا ما غصبت تقرا يا اخوي العزيز،، واتمنى انه الانسان يفهم قبل لا يهاجم مو بس يكتب!!

    بس بقولك شي دامك مو عارف اذا احنا نخضع للمناقصات او لا! قول ما اعرف ليش تكابر ترى مافيها شي اذا الانسان يقول ما ادري !! كافة العقود النفطية الي فوق الخمس ملايين تروح لجنة المناقصات المركزية - وال 190 الي الشركة تعطيك اياها مالها شغل بدعم العمالة الي ينصرف من برنامج اعادة هيكلة القوى العاملة!! شكوووووووو انا اتكلم عن دعم العمالة الي ينصرف للقطاع الخاص وانت تتكلم عن المزايا الي تصرفها الشركة!!!!!!
     
  14. AD-01

    AD-01 بـترولـي خـاص

    1,040
    2
    38
    بطوف الكلام الحلو اللى قلتيه عني اول شي مو لشي غير اني صايم ومابي (ابيعها فيج) :D

    خل ادش حبه حبه معاج .. للفائده العامه لج وللشباب

    اول شي شركات القطاع النفطي مو خاضعه لقانون المناقصات المركزية 37/1964 والمادة (2) تشهد :) ..

    من باب التنظيم الاداري فقط اصدر المجلس الاعلى للبترول قرار رقم 1/2005 يقسم شرائح العقود .. تحت المليون عند الشركة / فوق المليون لين 5 ملايين عند الشركة + المؤسسة/ اكثر من 5 ملايين عند الشركة +المؤسسة + لجنة المناقصات .. يعني لو عندي مشروع فوق الخمس ملايين وانا رئيس شركة او وزير(مو مشتهي) اوديه للمناقصات ما يلزمي لاني القانون يعفيني .. للعلم لجنة المناقصات في القطاع الحكومي لازم يروحلها اي عقد اذا زاد عن 5000 دينار


    نرجع لدعم العمالة .. في فكرة مو واضحه عند سعادتج .. الحكومة من باب تشجيع الكويتيين على العمل في القطاع الخاص سوت برنامج دعم العماله .. وهو باختصار الشركة الخاصه تمنح راتب بدون علاوات وفي المقابل الدولة تتكفل بالعلاوات الاساسية مثل العلاوة الاجتماعية و علاوة الاولاد واي علاوة شامله للكويتيين مثل غلاء المعيشة 120 دينار و 50 دينار اللى عطوها للكل

    فال 190 او 270 هذى اسمها علاوة اجتماعية ياخذونها العاملين في القطاع الخاص من الدولة علشان يصير معاشهم حالهم من حال الحكومة.. والقطاع النفطي يعطيج اياها من ضمن راتبج .. فهل كيف تقولين ان النفط ما يستلمون هذى العلاوة اللى اسمها بالقطاع الخاص دعم العمالة .. طاالعي راتبج وراح تلاقينها موجوده

    اذا اخذتيها .. راح تكونين اخذتيها مرتين وهذا ما يجوز .. اتمنى تكون الصورة واضحه يا باش قانونية;)

    ما اتوقع راح تلقين احد يشرحلج بهالتبسيط :D ... واتمنى اذا عندج معلومات تقولينها وانتى متأكده انها صحيحة بدال التأليف و الكلام اللي يخربط الناس ;)..
     
  15. ABDULLAH

    ABDULLAH قــلــم بــتــرولــي أعضاء الشرف

    10,727
    1
    36
    موظف في ش نفط الكويت
    وطن النهار - الكويت موطني
    تسلمين يا كوسمك قيرل على الموضوع

    و إن شاء الله التجار ما يزيدون الأسعار على الريحة !
     
  16. عبدالله العوضي

    عبدالله العوضي بـترولـي نشيط جدا

    217
    0
    0
    فني
    الكويت
    بعد تبين حقكم دعم العماله اذا تبين دعم العماله لازم يشيلون من راتبج الي بلنفط العلاوه والمميزات بعدين اخذي دعم العماله يا جماعه انتو ليش فاهمين الموضوع بلي تبونه دعم العماله حق الموظفين اصحاب العقود وراتبهم بلعقد شوي مو وايد ومافيه علاوات والحكومه تعوض العلاوات عن طريق دعم العماله انا راضي اكون بلقطاع النفطي وعلى نفس رواتبكم ولا اني اكون بلقطاع الخاص واستلم دعم عماله ويتجدد العقد كل 5 سنين او مايتجدد وراتب الشركة الي بلقطاع الخاص مو ثابت ممكن ينزل وممكن يصعد واذا بتقولين انتو مظلومين حرام عليج هلكلام رواتب القطاع النفطي من احسن الرواتب ومليون من يتمنى يروح القطاع النفطي بس الي ماعنده واسطه مايقدر وانتي تيين وتقولين ماعندنه مميزات القطاع الخاص شوفي رواتب القطاع الخاص ورواتب القطاع النفطي وحكمي بعدين تستحقون دعم العماله ولالا ليش يعني تبون دعم عماله فوق راتبكم عشان اداومون من 7 لين 3 وايد قطاع خاص يداومون من 7 لين 3 وفي منهم يداوم دوامين بليوم ويكون بعلمج لو يشيلون دعم العماله ماراح تلقين ولا كويتي يداوم قطاع خاص وانتي ماتستلمون دعم عماله وكل من يتمنى يدش القطاع النفطي ولا عشان انتو اداومون بلقطاع النفطي تبون بعد غير مميزاتكم مميزات مايصير هذا طمع وارضي بلي الله قسمه لج وحمدي ربج انتي وكل واحد بلقطاع النفطي لانه مليون من يتمنى ايي بمكانكم واسف اذا ضايقتكم بلكلام بس هذا الكلام الصح :D
     
  17. santafe

    santafe بـترولـي مميز

    717
    3
    18
    مشكورين على هذه المعلومات الجميلة بس في كويتيين يشتغلون في الشركات النفطية مثل حفر الآبار شنو وضعهم ليش بعضهم راوتبهم قليلة بينما شركات اخري تدفع رواتب عالية علما بان نفس الوظيفة
     
جاري تحميل الصفحة...

مشاركة هذه الصفحة