البيضة و الدجاجة ايهما اول ؟

الكاتب : الخوارزمي | المشاهدات : 688 | الردود : 3 | ‏21 يناير 2010
  1. الخوارزمي

    الخوارزمي بـترولـي نشيط

    75
    0
    0
    تذكرون في لغز قديم دايما كان يتكرر ( منو الاول البيضة و لا الدياية ) تذكرت هاللغز و انا افكر شنو سبب تخلف الكويت عن ركب الحضارة الحكومة و لا الشعب .

    عندما تراجع اي وزارة تلاحظ التسيب في اركان الوزارة و تلقى موظف ما يداوم و لا واحد طالع اجازة و مسكر درجة اللي فيه معاملات الناس هذا غير الطبيات المرضية الوهمية و الواسطات اللي تصير عيني عينك و لما يطلع قرار بوضع البصمة لضبط الحضور و الغياب تثور ثائرة الموظفين و يعارضونها اشد معارضة و كأنهم يقولون كيفنا مانبي نداوم هني منو المسؤول البيضة و لا الدياية اسف اقصد الحكومة و لا الموظف .

    نيي حق التعليم و نشوف الطالب ما يدرس و يغش و اللي يضبط المدرس خصوصي عشان الدرجات و الطالب اللي ابوه يطوف الوزن الزايد للمدرس عشان ينجح ولده هذا غير اللي يختصرون الطريج و يشترون الامتحان , تلفون يوصل للدكتور عشان يرفع طالب لدرجة الايه و اهوا ما يستاهل حتى النجاح , الاف الطلبه يتجهون للدراسة الوهمية في الاردن و الفلبين و الهند و باكستان و حتى لو يسمعون انه بالمريخ يفتحون جامعة دوامها و امتحاناتها فلاتي سجلوا فيها و ياخذون شهادات من غير اي علم و يصيرون محامين و مهندسين و محققين بغير وجه حق , الطالب بالكويت ياخذ مكافأه و هو يدرس هذا غير طالب الطب يستلم معاش و الدوله تبعث اي طالب معدله مرتفع للخارج لا و اذا ماله خلق يسافر دخلوه بعثه داخلية بعد كل هذا منو المسؤول الحكومة و لا المواطن .

    عندنا دستور و مجلس يحل و يربط و بدال ما ننتخب ناس فاهمين يشرعون لنا قوانين تساهم بتقدم البلد و يؤدون دورهم الرقابي بدال هذا كله ننتخب مخلصين معاملات عشان يسووون معاملات بالوزارات اللي اهيا متعطله اصلا بسببنا ( على اساس انه الموظفين بقطاعات الدولة من المواطنين و لو كل واحد اشتغل بضمير ماكو شي بيتعطل ) و بدال ما نحط معايير و اسس لشغر الوظائف نتسابق على دوانية زيد و لا عبيد عشان نتوظف و مرات تكون وظيفة ما نستحقها ناخذها من شخص احق فيها و قس على ذلك دورات الضباط و الشركات النفطية و المناصب الكبيرة .

    الخلاصة احنا الحكومة و الحكومة احنا لانهم بالاول و الاخير اهم مواطنين كويتين من مخرجات هذا الشعب و اذا اشتغل الشعب بشكل صحيح و درس الطالب بذمة و ضمير راح ينتج الشعب و نحصل على حكومة سنعة و بالاخير تبين لي انه ما نقدر نحدد هل البيضة قبل الدياية و لا الدياية قبل البيضة .
     
  2. reznama

    reznama بـترولـي مميز

    بالنسبه حق سالفة الإنتخاب

    مرّه صار كلام بين زميلاتي وزملائي إن ماراح ينتخبون المرشح ( .......... ) ..!!

    يوم سألت عن السبب .. وإلا يقولون : " لا يبه هذا ما تمشي عنده واسطه .. يحب النظام وايد .. وااااااايد شاد حيله " ..!!

    (( الله يالدنياااا .. ألحين اللي يمشي بالنظام صاروا ما يبونه .. واللي يطمر فوق الناس صاروا يبونه ..! ))

    يا سلام

    آنا أقول يالخوارزمي إن البيضه والديايه أثنينهم (( الأول ))

    إختلط الحابل بالنابل

    تحياتي

    ..
     
  3. جابر

    جابر قــلــم بــتــرولــي أعضاء الشرف

    السمجه لما تخيس ...تخيس من رأسها ,,,
    ورأس البلد هى الحكومه ممثله بالوزراء ...
    وعليه ....المسئوليه تقع عليهم وحدهم ..واللى مافيه شدّه على الشغل وتحمل الضغوط . لايقبل المنصب ...
    مو يتعهد أمام سمو الأمير ..ويلقى القسم ...ويأخذ المنصب... وبعدين يحط الف عذر وعذر علشان ماينتج أى شى ...
     
  4. aL- raSy

    aL- raSy إدارة المنتدى

    2,714
    0
    36
    المسأله واضحه جدا كوضوح الشمس، و كل الطرق تؤدي إلى روما ( الحكومه )..
     

مشاركة هذه الصفحة