بس انا ابوي شهيد !!

الكاتب : شركة من صادها عشى عيالة | المشاهدات : 1,002 | الردود : 11 | ‏2 ديسمبر 2009
  1. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    بسم الله الرحمن الرحيم

    صالة كبيرة بها الكثير من الناس جميعهم من الرجال ينتظرون دورهم للتحقيق في مدى انتمائهم لوطنهم بعضهم متهم و البعض الاخر مظلوم و الكثير منهم عاشو بهالبلد سنوات طوال من بينهم يجلس شاب بنهاية الثلاثينات من العمر شكله لا يختلف عن ان رجل كويتي حنطي البشرة يرتدي دشداشة كحلية و شماغ ابيض كانت على وجهه نظرة لا يمكن تفسيرها هل هي نظرة حزن ام ضحك على سخرية القدر او هو الذل اللي وضعته به هذه اللجنة .

    يسمع اسمه فلان الفلاني .

    المستجوب : شنو جنسيتك .

    الرجل: ما عندي جنسية انا بدون .

    المستجوب : يعني شلون انت وين ياي .

    الرجل : انا حالي كحال كل اهل الكويت اللي ياي من نجد و اللي ياي من ايران و اللي من العراق و في بعد من الهند و زنجبار.

    المستجوب : انا ما طلبت منك تقولي تاريخ الكويت ... انت عراقي صح .

    الرجل : و الله انا انولدت بهالارض و ابوي و يدي بس اعتقد اجدادي من العراق .

    المستجوب : اها يعني انت عراقي .

    الرجل : لا و الله ما عندنا اي صلة بالعراق غير اصلنا و هالاصل ما نتبرى منه لكن انا كويتي .

    المستجوب : على اي اساس تقول انك كويتي .

    الرجل : ما ادري بس ابوي استشهد بحرب 73 بلواء اليرموك .

    المستجوب : و كل واحد مات بحرب 67 و 73 نعطيه جنسية شنو اهيا فوضة !!؟

    الرجل : لأ بس اذا اللي يفدي وطنه بدمه ما يستحق الجنسية منو يستحقها ؟!!

    المستجوب : الحين ابوك ما كان ياخذ معاش من الجيش يعني مو كافي انه الجيش يعطيه فلوس ... ابوك ما قاتل ابلاش قاتل بفلوس .

    الرجل : ( استشاط غضبا و يفكر ان يمد يده على المستجوب ) هاااا .

    المستجوب : من قال ها سمع و الحين لو سمحت انت امام خيارين اما تكشف عن جنسيتك او بيضل عليك قيد امني و ما تقدر تطلع ليسن و لا شهادة ميلاد و لا تتزوج و لا تشتغل .

    يعطي الشاب ظهره للمستجوب و فيه غصه و يعاني من قهر الرجال ....

    بعدها بيوم قام الشاب بحسبة بسيطه و من بعدها .

    المستوجب : هلا امر ياي تكشف عن جنسيتك .

    الرجل: لا بس عندي طلب .

    المستجوب : شتبي .

    الرجل : ابوي خدم سنتين قبل ما يستشد و انا يايب لك 20 الف دينار .

    المستجوب : شنو تبي ترشيني .

    الرجل : لا ابيك تاخذ 20 الف بس ترد لي ابوي .... تقدر !!؟

    المستجوب : يسكت

    الرجل : شنو مصيبة اكبر من انه تبهدلون واحد مثلي عاش يتييم لانه ابوي حب هالارض و فداها بنفسه و بالاخير تفكرون اذا اهوا و عيالة اللي عاشوا يتاما يستحقون الجنسية و لا لا .

    ملاحظة : الـ 20 الف دينار اخذها الشاب من صديق له الله مرهي عليه عطاه الفلوس و اقترح عليه هالفكرة و لا هالشاب ما عنده فلوس يدفع ايجار بيته و مهدد هو و امه ( زوجة الشهيد ) بالطرد من البيت .

    ( سيعلم اللذين ظلموا اي منقلب ينقلبون ) صدق الله العظيم
     
  2. انوار

    انوار موقوف

    2,241
    0
    0
    اقص بصل و اغسل صحون
    أول لفة يمين
    ( سيعلم اللذين ظلموا اي منقلب ينقلبون ) صدق الله العظيم[/COLOR][/SIZE][/QUOTE]



    اخوي تصحيح : ظلموا و ليس ضلموا ..........


    تعليقي على القصة الله يكون في عون هالفئة و ان شاء الله ياخذ الجنسية اللي يستاهلها صج مو كل من هب و دب .


    مشكور وايد على القصة التي تبسط فكرة الموضوع ... و بانتظار القصة اللي وعدتنا فيها في المنتدى العام شكلها

    للحين قاعدة تنطبخ لووول ما خلص الغاز:p
     
  3. WaRiO

    WaRiO بـترولـي مميز

    مشكور على القصه الي تشرح واقع كبير يعاني منه بعض اخواننا من فئة البدون


    بس وين راحوا التراكمه :)

    موفق
     
  4. المنجنيقي

    المنجنيقي بـترولـي خـاص

    1,966
    0
    36
    أول شي مشكور اخوي شركه على ما نقلته أو ما كتبته

    الله يكون بعون بعض هالفئه

    لأنهم انظلموا

    وصدقني لو الحكومه تبي تعدل وضعهم كان من زمان سوت هالشي

    ونتمنى من الحكومه الدواء العاجل لبعض هذه الفئه المستحقين
     
  5. ABDULLAH

    ABDULLAH قــلــم بــتــرولــي أعضاء الشرف

    10,727
    1
    36
    موظف في ش نفط الكويت
    وطن النهار - الكويت موطني
    ما ادري ليش تذكرت بند الخدمات الجليلة و بعض التناقضات فيه !

    اما صاحب القصة و اللي مثله الله يعينهم على بلواهم


     
  6. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي


    اخوي تصحيح : ظلموا و ليس ضلموا ..........


    تعليقي على القصة الله يكون في عون هالفئة و ان شاء الله ياخذ الجنسية اللي يستاهلها صج مو كل من هب و دب .


    مشكور وايد على القصة التي تبسط فكرة الموضوع ... و بانتظار القصة اللي وعدتنا فيها في المنتدى العام شكلها

    للحين قاعدة تنطبخ لووول ما خلص الغاز:p
    [/QUOTE]

    مشكورة اختي على التصحيح و انا بدز رسالة لاحد المشرفين عشان يعدل الخطأ الاملائي الفادح اللي طحت فيه ...

    الله يكون بعونه و احنا بعد وسيلة انه نخفف من معاناتهم لما نضغط على نوابنا عشان يعالجون هالظلم الواقع على البدون ...

    اما بالنسبة للقصة تقريبا خلصتها بس اهيا طويلة نوعا ما ...
     
  7. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    و النعم بالتراكمة بس ما ادري اذا فيهم من البدون ؟!!
     
  8. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي

    اذا التضحية بالنفس ما تعتبر من الخدمات الجليلة فالله لا يوفج جليله و لا خدماتها .

    اخوي عبد الله طلب تدخل الموضوع و تغير حرف ض الى حرف ظ في الاية الكريمة .
     
  9. reznama

    reznama بـترولـي مميز

    الله يفك عوقهم ..

    واللي يستحق الجنسيه إن شاءلله تــُفرج عليه قريبا ..

    وشكرا

    ..
     
  10. Bent_Abooha

    Bent_Abooha بـترولـي نشيط جدا

    اسرة و ابناء الشهداء لاازم يكون لهم معامله خاصه بس مع الاسف الي يتجنس هالايام مطرب اوو ممثل وممثله مالهم بالاعمال الجليله شيء بس تكفخ وتكمش بالشعر
     
  11. بن زريق

    بن زريق بـترولـي مميز

    804
    0
    0
    والله انى معاكم بالكلام اللى قلتوه .......................اللحين عرفت ليش بعض البدون يدخلون للتمثيل لانها اسرع شى لاخذ الجنسيه ..الله واكبر رجل يضحى بحياته من اجل الكويت لايستحق جنسيه واحد يغنى ويرقص ياخذ جنسيه عجبىىىىىىىىىىىىىىىى
     
  12. silver cover

    silver cover بـترولـي خـاص أعضاء الشرف

    الله يرحمن برحمنة... لان اخطاء بعض المسئولين فى طريقة الاستجواب استفزازية.او فى السياسة الداخلية ... لو ان عندنا خطة مستقبلية ...كان فكرا ياوضاع هولاء الفئة ...فمنهم من هو جامعى ومنهم من هو متخرج من الثانوية بنسبة عالية ... فهولا الناس لا يريدون الا الامان و العيشة الهنية... فممكن تعبية الشواغر من هم بدلا من المدرسين المصريين و السوريين ... ومنهم من مجالة هندسة وطب ومحاماة... ممكن ينفعون البلد.... ومنهم من والدة عمل بالسلك العسكرى وضحاء واستشهد من اجل الكويت ... الرجاء من الحكومة الرشيدة رفع مستوى الاشخاص الذين يقابلون ويسجلون ويحقيقون مع هولاء الفئة ...لان فى كل بقاع الدنيا فية حق اللجوء وحق الخدمة وحق المولد وحق الاعمال الجليلة... الرجاء النظر الى الموضوع بشكل افضل و لخدمة المجتمع
     
جاري تحميل الصفحة...

مشاركة هذه الصفحة