تلعب كوووووورة

الكاتب : شركة من صادها عشى عيالة | المشاهدات : 1,083 | الردود : 16 | ‏8 نوفمبر 2009
  1. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    في كلية العلوم الاجتماعية يدور هذا الحوار ...


    عوض : يا ولد لا تنسى اليوم حاجزين الملعب الساعة 4 .

    مبارك : ( تعلو وجهه الدهشة ) الساعة 4 شهر سبعة ليه ضبان ... انت ناوي تذبحنا .

    عوض : وش اسويلك ما حصلت حجز الا الساعة 4 .

    مبارك : المهم فريقنا جاهز و لا كالعادة ناقصين و ندور لاعب منا و لا منا .

    عوض : لا ان شاء الله كاملين ما بنا نقص .

    مبارك : تكفى ترى بنباري شباب اتراك يشتغلون حلاقين و يلعبون ما نبا نتمصخر اليوم .

    عوض : ( ينتفض) يا ولد شبلاك انت فريقنا ما عليه كلام بس خوفك من النكبات اللي تجي من الدفاع .

    يرن نقال عوض ( وش جااااه حبيبي مشى و خلاني ما بين ) المتصل شاهين افضل لاعب بالفريق .

    شاهين : مساء الخير يا عسل .

    عوض : اخس يا الاسلوب مساء النور شوووف اليوم بتعلب لا تقعد تعذر و تقولي مشغول .

    شاهين : انت عندك الحاسة السادسة و انا ما ادري ... بالمتخصر لو تنقز و توقع اليوم ما اقدر العب عندي شغل ضروري

    عوض : و الله الشره مو بعليك علي انا اللي ادق عليك يا المروح شكلك مواعد ؟!!

    شاهين : لا يا اخوي لا تروح بذاك الظن تراني مشغول جدا .

    عوض : جدا و لا الرياض انت ما منك فايدة ( يسكر النقال )

    مبارك : وين اللي يقول فريقة كامل وش نسوي الحين .

    عوض : المباراة الساعة اربع و الحين الساعة الساعة 2 ما عاد يمدي اجيب ناس من برة .

    مبارك : وش رايك نكلم صاحبنا رضا اللي معنا بالكلاس تراه يلعب بنادي العربي و فنان ؟

    عوض : يا اخوي ذا الرضا ما اهضمه احسه متعنصر و كلامة طائفي .

    مبارك : الله يهداك و انا قايلك بخليه يصلي فينا جماعة اهم شي يلعب باصات و ما يتبقط باللعب ( يتفلسف ) .

    عوض : خلاص انت دق عليه .

    مبارك : لا انا بروح اكلمه قبل شوي شفته بالمكتبه .

    يتفق كل من مبارك و رضا على الذهاب بسيارة عوض الى الملعب لانه رضا ما يدل مكان الملعب و بيني وبينكم ما يدل المنطقة بكبرها لانه بيلعبون بالصباحية .

    يركب كل من عوض و مبارك و رضا بسيارة عوض و هي لاند كروزر ابيض و يروحون بيت رضا بالدسمة عشان ياخذ لبسة و يدور هالحديث .

    رضا : شنو مو كويتي ليش ما تدل بالدسمة ( يقولها كغشمرة )

    عوض : لا تنسى انك تضيع اول ما تعدي صباح السالم ( رضا دابلن كبدة ... يعني غاثة )

    مبارك : ( يرقع السالفة ) خلاص كل واحد فيكم يدلي الثاني الاماكن اللي ما يدلها .

    ينزل رضا بسرعة و يبدل ملابسة و ياخذ معاه ذاك اللابجين اللي يلق تقول لابجين ميسي .

    عوض : بكم ماخذ هالجوتي ؟

    رضا : هذا لابجين كريستيانو رونالدو ماخذه بــ 60 دينار .

    عوض : 60 دينار ليه هو يلعب من كيفة .

    مبارك : ( ابتلش فيهم ) يا ولد ذا ماركة ما يتقطع بسرعة .

    رضا : شفك انت هذا خفيف لدرجة انك تحس نفسك حافي .

    عوض : يا الربع نبي لعب طقة وحده ما نبي واحد يتبقط بالملعب .

    رضا : ( ساكت ناطر الترجمة )

    مبارك : ( فيه ضحكه بس غامتها ) لا تخاف محد راح يتفلسف باللعب .

    رضا : اييي اصلا انا ما احب اللي يعلج بالكرة .

    يستمر الشباب بالسير بخط السريع متجهييين الى الصباحية ( خو مشوار من الدسمة لي الصباحية لي الحين ما وصلوا ) و يتحدثون بامور جانبية على ما يوصلوون ...

    عوض : مبارك تهقى الشيعة صافين مع الحكومة ضد التكتل الشعبي .

    مبارك : و الله مدري لكن كلامهم بالجرايد ما يطمن .

    رضا : ( يستمع و هو ساكت )

    عوض : يا اخي ماني عارف هم كذا راح يوقفون اي استجواب .

    رضا : صراحة محنا عارفين احنا وين رايحين .

    عوض : رايحيين الصباحية ( لي الحين رضا دابلن كبده ) ههههههههه

    رضا : ( يتغضى عن قطة عوض ) و الله احنا بنعمة و خير اللي العضو يتكلم عن اكبر المسؤولين و ما يحصله شي ترى هذي نعمة .

    مبارك : يا الربع تهقوون يقدرون اعضاء مجلس الامة ينسون الفروق اللي بينهم ... ترى في فرق بين بدوي و حضري و شيعي و سني لا نقص على بعض .

    رضا : شوف انا ما اقولك ما في فرق امبلى في بعض الفروق بين عادات البدو و الحضر و بعض الفروق بين عقائد الشيعة و السنة لكن مع هذا يتعايشون مع بعض اخوان و الكل يكمل الثاني .

    عوض : تبي الصراحة انا ما اشوفهم متعاونين و كلن يتكلم عن الثاني .

    رضا : شوف احنا دايما نتناجر و نقرق و لما تصير الصجية نشيل بعض .

    عوض : مو صحيح .

    رضا : حرب الجهرا دليل على توحد الكويتين بدو و حضر دافعوا عن ارضهم و من العجائب انه في ناس من جيش الكويت كانوا يقاتلون ناس من نفس قبيلتهم في جيش الاخوان .

    مبارك : صدقت

    رضا : غزو الكويت وحدنا كلنا و حربنا مرة ثانية و تناسينا خلافاتنا و اختلافاتنا حتى اللي من اصل شمالي ( عراقي ) حارب و قاتل دفاعا عن ارضه الكويت .

    عوض : ( حس براحة لرضا )

    رضا : لي صار عدوان على ارضي راح اوقف و اقاتل مع ربعي .

    مبارك : منهو ربعك .

    رضا : انتوا .

    يصل الشباب الى ملعب الهيئة في الصباحية قطعة 3 و تبدى المباراة و يفوز فريق عوض على الاتراك ( الحلاقين ) و تكون جميع الاهداف من باصات لعبها رضا .

    بعد المباراة ...

    عوض : رضا

    رضا : هلا عوض ....

    عوض : اللعب ذا منك و لا من اللي انت لابسة .

    رضا : المباراة الياية بعطيك اياه و بشوف لعبك .

    مبارك : رضا تراك معزوم على عرس اخي الاسبوع الجاي .

    رضا : اي شرط اشارك معاكم بالدحة

    عوض : كان ودنا لكن الدحة عند العنوز بس وعد نعطيك سيف تشارك معنى بالعرضة .

    مبارك : بس يا اخوك لا تهور و تطعن خويك باللغط ( يضحك )

    رضا : نشوفك الاسبوع الياي :)

    مهما اختلفنا بالاصل و المذهب نضل اخوان نعيش بهالارض :)
     
  2. انوار

    انوار موقوف

    2,241
    0
    0
    اقص بصل و اغسل صحون
    أول لفة يمين
    قصة ممتعة و مشوقة تمنيت تكون اطول من جذي و ان شاء الله ناخذ العبرة منها
     
  3. reznama

    reznama بـترولـي مميز

    فعلا نتمنى نكون كلنا إيد وحده ونشيل هالأرض الطيبه .. !! :rolleyes:

    مانبيها تكون قصه عابره وبس .. لابد إن إنطبقها بحذافيرها .. ;)

    ..

    عيل تقول رضا : ( ساكت ناطر الترجمة ) هااا ..!!! ههههه

    أتوقع رضا بروحه يبيله قاموس ترجمه هههههه

    ..

    ونشكر عيال منطقة الأحمدي اللي باين إنك تشبّعت من لهجتهم .. وبصراحه أتقنتها بالشكل المطلووووب .. وهذي شطارة الكاتب المحترف ..

    ..

    بانتظار جديدك السياسي الكوميدي .. :rolleyes:

    تحياتي

    ..
     
  4. Mr.Harbi

    Mr.Harbi بـترولـي جـديـد

    42
    0
    0
    Kuwait
    كـ العاده قصص رائعه

    تُشكر حبيب ألبي
     
  5. bdraan

    bdraan بـترولـي نشيط جدا

    216
    0
    0
    يعطيك العافيه
    قصه رائعه
     
  6. speed-way

    speed-way بـترولـي نشيط جدا

    فعلا قصة جميلة
    يعطيك العافية
     
  7. aL- raSy

    aL- raSy إدارة المنتدى

    2,714
    0
    36
    قصه جميله من شخص اجمل..

    و اكثر ما عجبني في القصه شخصية اللاعب رضا الحبوب الطيوب الحلو ابو عيون قريئه.. :)

    سؤال برئ جدا / هل سيكون رضا بهذا الدور ( الملائكي ) لو لم يكن الاخ ( شركه ) هو كاتب او ناقل الموضوع!! ؟؟

    لو ( الكل ) مثل شخصية رضا لما وجدت فكرة هذه القصه..

    كل الشكر للمتميّز بهذه المواضيع، المميّز بلا شك شركه..
     
  8. المحترف33

    المحترف33 بـترولـي مميز

    676
    0
    0
    رائع ياشركه ضحكتني

    بس حلاتها كملتها وراح رضا العرس

    ومعاه هبان ~~ياسلام بدال لا يرقصون العرضه

    يشربوكون بالصفقه اتوقع العرس يكون احلا

    ~~~ننتظر جديدك
     
  9. جونم جقرم

    جونم جقرم بـترولـي خـاص أعضاء الشرف

    8,202
    0
    0
    منــدوب نفطـي (: ---> 66698897
    خـيـمـة فـُـوق طـِـعـسـ
    كـــاك

    أما سالفـة يتبقــط أو بمعنـي ثـاني لا يتهيـــشـف باللعــب هـذي مـوال ثـاني :D

    لاهنت صديقـي شركـة علي القـصـة الأكثـر مـن رائعـة بمعنـاها وحوارهـا

    المـره الجـاية نبـي المشـوار مهـب للصبـاحية نبيـه لأم الهيمـان عشان تحـلي القصــة ههههه :D
     
  10. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    مشكورة اختي على المدح و اعجابج بالقصة اما بالنسبة حق طول القصة انا تعمدت تكون قصيرة عشان تكون مناسبة للمنتدى :).
     
  11. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    تعلمت بعض اللهجات البدوية ( القبائل يختلفون في نطق بعض الكلمات و الاحرف ) مثل ما قلتي من حياتي بالاحمدي سابقا و حاليا شغلي بالكي او سي .

    ان شاء الله في قصص ياية بالطريج
    .
     
  12. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    تسلم اخوي و مشكور على قرائتك للقصة :)
     
  13. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي

    يعافيك اخوي و مشكور على قرائتك للقصة و الرد :)
     
  14. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي

    الله يعافيك :) صراحة حسيت انها اعجبتك من كلمة فعلا :D .

    مشكور على قرائتك للقصة
    .
     
  15. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    القصة اللي كتبتها موجود بالمواقع في الكثير من مناطق الكويت شباب يتجمعون و يلعبون كرة من غير ما يمهم الاصل و لا المذهب .

    العنصرية موجودة لكن سبحان الله اللي لاحظته انه تقل بين اوساط الشباب الصغار و تزيد عند الكبار ؟!!
     
  16. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    و الله يا اخوك مالي كبد على الهبان من اسمعه اروح في خرايطها :D
     
  17. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    لا انا اقول يلعبون بالخفجي احسن :D

    لا هنت يا خوي :)
     

مشاركة هذه الصفحة