الزواج من الاجنبية ، ايجابيات وسلبيات!!

صراحه موضوعك حلو ويستاهل النقاش

بالنسبه لي صراحه تييلي مرات هالفكره اني اتزوج غربيه ( مجرد فكره مو اكثر )

ومثل ما حضرتك قلت الزواج من الكويتيه ( غالبا ) يتطلب مبالغ ماليه مو سهله , وفعلاً الزواج هالايام يبيله بحدود 15 دينار مو اقل

ابو صاحبي مزوج عياله 2 بيوم واحد , والله العرس والمتطلبات من الألف إلى الياء مكلفه 60 الف دينار !!!

والاهالي ( الله يسامحهم ) مو كلهم طبعا , هالايام يشجعون بناتهم على الدراسه بطريقه غلط ( بس عشان لا تنطر المصرف من ريلها ) والبعض يقولون ( الزوج ما منه امان ) درسي وخلي شهادتج ومعاشج بيدج اضمن لج وتشيلين نفسج بنفسج

ومن اول يوم البنت تطلب شقه او بيت بروحها , اوكي من حقج تطلبين لج سكن بروحج

بس هل انتي تقدرين تقومين بـ حق هالبيت؟؟ ولا بتخلين كل شي على الخدامه؟؟

ولا الاهم ان الناس يقولون زوج ( فلانه ) حط لها بيت بروحها !!؟ ومهنتج تاكلين وتمشين ايدج بالطوفه؟؟

والاميره ما ترضى بأي سياره , يا تشتريلي السياره اللي بخاطري ولا ترا بزعل ... وتصير انت البخيل وما تحبني :/

وهم ما الوم البنات لمه يقولون ماكو رياييل لان هم للاسف ما قمنا نشوف الرياييل اللي الواحد يشد فيهم الظهر ( عشان نوازي بين الكفتين لول )

ومثل ما قلت الزواج من الغربيه صعب , خصوصا في تربية العيال

وفعلاً هذا السبب يخليك تضحي وتشيل احلى قرض وتتزوج الكويتيه بس عشان عيالك

لان مو سهله تشوف عيالك يميلون لـ عادات وتقاليد غير اسلاميه وغير عربيه

يا حلوي وبنتي تكلم رفيجها وتطلع وتروح وياه واهي مقتنعه ان هالشغله مو غلط

اشكرك على الموضوع حبيب ألبي

 

روح تزوج اجنبية منو قاضبك

والله يستر عليك

 

و اشفيهم بنات الديرة البنات اللي برة شيزيدون علينا .... على الاقل باجر لي اشتهى ولدك يصير ضابط ما راح يوافقون عليه بسبة ان الام مو كويتية ... بعض الرياييل يتزوجون من برة و تسوي روحها مسكينة من تضمن الجنسية تشيخ عليه

 

مو معناته لما نسمع بالمشاكل الي حواينا يصير هالشي عقدة عندنا لا في الزين و في الشين و اكيد اهلك بيسألون عن البنت ما راح يخطبون اي بنت و السلام و راح يهتمون لشروطك و لا يخلو بيت من المشاكل يعني بتفهمني ان اللي برة بتعيشك بنعيم كلامك يحر بط مرارتي احتر لما اشوف هاللي ماخذ فلبينية و لا اللي ماخذ صومالية و لا مادري من وين و بعدين يبلشونك نبي كرت زيارة حق ولد عمي و لا حق امي شلك بالطلايب بس جذي انت بتساعد على تفشي العنوسة

 

السلام عليكم
النبي صلى الله عليه وسلم رغَّبنا بذات الدين من المسلمات ، والزواج هو رعاية لحق الله وحق الزوج والزوجه، وحفظ لبيتك وعرضك ومالك ، وتربية لأولادك ، فكيف يأمن من يتزوج أجنبيه ( الاغلبيه منهم الاجنبيات ) على تربية أبنائه وبناته على الدين والطاعة ، وهو تارك لهم بين يدي تلك الأم التي لا نعرف كيف كانت تربيتها اصلا وبعيده عن عاداتنا وتقاليدنا ويمكن ان تكون تكفر بالله تعالى .

لذا وإن قلنا بجواز التزوج من كتابية إلا أنه غير محبَّذٍ ولا يُنصح به ، لما يترتب عليه من عواقب ، فعلى الإنسان المسلم العاقل أن يتخيّر لنطفته أين يضعها . وأن ينظر نظراً مستقبلياً لحال أولاده ودينهم ، وألا يعميه عن النظر الواعي شهوة جارفة ، أو مصلحة دنيوية عاجلة أو جمال ظاهري خادع ، فإنما الجمال جمال الدين والأخلاق .

ابي افيدك بنقطه .. ترى الحمدلله وبفضل من الله عندنا بنات بالكويت ما يهم عندهم المهر كثر الرجل الصالح وفيه عوائل كثير يزوجون بناتهم بدون مهر الاهم عندهم الدين والاستقامه ..
ولو ترك المسلم مثل هذه الزيجات ابتغاء الأفضل لدينه ودين أبنائه فإن الله تعالى يعوِّضه خيراً ، إذ أن " من ترك شيئاً لله عوّضه الله خيراً منه " كما أخبر بذلك رسولنا .. صلى الله عليه وسلم . والله الموفق والهادي إلى سواء السبيل .

 

المشكلة الكل على باله ان اذا تزوج اجنبية بيرتاح

اهوا بيرتاح ماديا بس نفسيا ما اعتقد

وبعدين اذا سالفة سالفة فلوس ومهر صراحة ما عنده سالفة حده الموضوع سخيف اذا قصده عشان الفلوس

المهم ان الحكومة الله يعزها احسن من غيرها تعطيه مساعدة اللي اهيا المهر

احسن من بره اللي ماراح يشوف ولا فلس

عالعموم اذا الواحد جب له وحده بالاتفاق كل شي يصير

والحين الموضة لا عرس ولا بطيخ بعد شنو تبون

اخذها وسو لها استقبال عادي وسافر وياها وناستك من وناستها وخلاص

بس المبالغة صراحة هذه ما ادري ليش


وانت لما تتفق مع بنت الحلال اللي تحبها راح تلقى اللي يريحك

بس الغريبة وين وين تشوف عيالك اذا تطلقتو واهيا اللي تربي وانت هم لام تصرف بعد

 

اهم لو يعدلون قانون الاحوال الشخصيه بالكويت تلقون الرياييل مايفكرون بالاجنبيه لان قانون الاحوال الشخصيه للاسف كله مع المره ويظلم الريال

 

ما يسوى على الواحد يقول رايه

يا جماعه مجرد راي

بالاول وبالاخير ماراح ناخذ الا كويتيه

صج ما يعجبها العجب بس هم تظل الكويتيه افضل من غيرها

 

بالنسبه لي كفكره اجنبيه ولكن كتطبيق كويتيه اهيا الافضل
انته تشوف الاجنبيه ما لها طلبات وخرابيط ولكن زعلها طقتك بالطوفه وخذت اليهال وراحت ديرتها وانته اه من بطني واه من ظهري
الكويتيه صج انه لو نقول العرس مكلف بس ياخي هالتكلفه بس لها لأ لك انته بعد العرس لك ولها ولهلك وحق واهلها ياخي قط ما وراك ودونك كلها ليله بالعمر استانس فيها وتاخذ بنت ديرتك تعرف شنو تبي ترد البيت مرتب غداك جاهز البيت مبخر عيالك مرتبين دارسين
اما الاجنبيه ما لها الا الجنسيه كبدايه وبعدها كل شوي اهلي وما راح تشوف فيها الي تبيه من عاداتك وتقاليدك
صح انها مو مكلفه لكن متعبه

وكيفك لكن بالاخير نصيبك مكتوب لك سواء كويتيه ولا اجنبيه فكرت ولا ما فكرت نصيبك موجود واتنمنى لك كل خير

 

اسمع هالسالفه وبعدين عيد النظر بجملتك لول

اكو واحد تزوج بنت خاله

وطبعا هالبنت ما شاء الله الكل يمدح فيها

وبيوم الدخله الولد يحصل احلى طراق لمه تقوله زوجته ( انا مابيك , انا عندي واحد احبه ويحبني ) !!

الريال : ليش وافقتي لمه خطبتج؟ ليش ما رفضتي؟

البنت : ............... سكوت !!

صار الصبح والريال ياخذ زوجته يوديها بيت اهلها وعقب التحقيقات بين الاهل اكتشفوا ان الابو غاصب بنته عشان ياخذ اهو المهر وباجي الخرده

بتقولي مو كل الاهالي جذي , وانا وياك صح مو كلهم جذي , وهم مو كل الاهالي كفو ويستاهلون

الحين الريال مبتلش لا من قرضه ولا من المهر , وطلع اصله طيب ما رضى يدخل خاله محاكم عشان فلوس ويصيرون علج بحلوج العالم

هذا الريال قط ما وراه ودونه , بالله الحين شنو استفاد

ماقول الا الله يعين الريال والمره لان محد فيهم قادر يكمل الثاني

 

انا ما ادري ليش اتفكرون بالأجنبيه اكثر من بنت الديره وانت اذا بتروح تخطب ما تخطب والسلام فيه شروط انت اتحطها وفي ناس ترضي بالشروط بس تكون شروط معقوله وصدقني ما في مثل بنات الديره وفكر بالعادات والتقاليد إلي احنا انعيشها غير عن عادات الأجانب ومهما قلت اغير عاداتها تر ما راح تقدر لأن الأجانب لهم عيشه معينه ونمط معين ماشين عليه ومو معقوله انت راح اتغير هذا النمط بسهوله وبو طبيع ما يغير طبعه واذا ازعلت الأجنبيه والله انها اطقك بالطوفه وتاخذ اليهال وتنحاش او تخلي اليهال وبروحها تنحاش عشتو مشتاقه حق البوي فرند مالها والله ما اقول إلا مالت عليج وعلى البوي فرند مالج

بصراحه حريتني على فكرتك والله اني اكتب وفي حجي نسيته من حرتي يا اخي اخذ بنت الديره والحين مو الكل يسوي عرس واذا تقصد التكاليف تر اهل المعرس اهم إلي يزيدون على نفسهم مو العروس لأن العرس عليك مو عليها وانت إلي تتحكم بالتكاليف مو المره لا تحط عذر الفلوس وبالنسبه للمهر الحكومه تعطيك 4000 آلاف دينار وانت اتزيد اشوي مو وايد

نصيحه مني لا تجيب فكرة الزواج بالأجنبيه في بالك والله راح يرزقك ببنت الحلال ان شاء الله اتصونها واتصونك وما تكلفك اي شي
شرط تكون بنت الديــــــــــــــــــــــــــــــــــــــــــــــــــــــــــــــــــره انزين

حبيت اسأل المهور جم وصلت واتصدق انا كان مهري 1000دينار ولما ابو زوجي ياب 2000 ابوي رد الألف وانا عصبت خخخخخخخخخخخخخخخخخخخخخخخخخخ ترا مو كل العوايل تطلب مهور كبيره في عوايل يهمها الريال مو المهر يعني تشتري ريال مو جيبه ا ويكون تفكيرها انها تستر بناتها عند واحد يستحق ان ياخذ بنتهم اوكي

 

أخوي أجنبيه و بشده بعد,,,,,,

هذولا ربعي متزوجين كويتيات والله اغلبهم عالحديده ,,,,

بس ينطرون المعاش متى ينزل......

أخوي الكبير سافر لندن قبل 11 سنه دراسه ويوم رد ولا معاه ذيج الشقرا ( شمحووووووووووووطه) هه,,,

واهلي سووله سالفه بالبيت ليش؟ وشحقى؟ وانت خبل؟ ......إلخ.


كاهو الحين عايش احسن عيشه... الحمد لله
وعياله متربين احسن تربيه لله الحمدوالشكر,,,

وكل سنتين يروحون عند اهلها بلندن شهر ...

ايام الثانويه كانت تشرحلي انجليزي....

واقولك شغله سبحان الله اهي اللي كانت السبب في اني اكمل هندسه عندهم بلندن ( خذت اوراقي وسجلتني و من غير اختبار ايلتز بعد,,,,,

بيني وبينك انا هم قاعد افكر نفس التفكير ...

الكويتيه بس كلا طلبات عالفاضي وترا ذبحتونا بنتي تدرس.... وبنتي تدرس...

وبالنهايه البنت حاطه قوطي رووب مادري شنو على راسها صاير جنه سنام بعيييير ,,,,,,

يلا يبا لا مثل ما قلت أجنبيه وبشده,,, هه


وبالنهايه هذا كله حظ ونصيب!!!

 

الله يسامحك يا عبدالله انت طيحتنا مره وحده تر بنات الكويت منهم الزين والشين نفس الأجانب وتر مو كل البنات حاطين قوطي روب ومو كل وحده تطلب يعني الأجنبيه ما تطلب ابد كون صريح والتربيه تر بنات الكويت يربون عيالهم صح وتربيه دينيه تر مو كل إلي تشوفه بره يدل على ان بنات الكويت مو زينين تر بنت البلد احسن والله

وانا اعرف واحد متزوج من بره وجاب ثلاث عيال كانت تعيش حياه ما احلمت فيها ابد بس بالأخير انحاشت وهدت اليهال وانقلعت

بس بنت الديره تتمسك بعيالها وما تهدم بيتها ابد