محتار بين الاطفاء .. و تكملة الدراسة

الكاتب : WWW | المشاهدات : 2,222 | الردود : 12 | ‏31 أغسطس 2009
  1. WWW

    WWW بـترولـي جـديـد

    11
    0
    0
    السلام عليكم ورحمة الله وبركاته


    اولا مبارك عليكم ماتبقى من الشهر .. ولو انهـا متأخره شوي

    :p

    ثانيا وهو زبدة الموضوع ... انا محتار بين كذا شغله .. واتمنى من الاعضاء الافاضل ان يتكرمون و يفيدوني بخبرتهم .. انا محتار بين شغلتين .. اطفاء ايكويت .. او اني اكمل دراسه بالتكنلوجيا تخصص دبلوم هندسةبترول انتاج وتصدير او دبولم هندسةبترول استكشاف وتطوير ... مع العلم ان كلهم حاصلين لي .. واني متوهق اختار شنو .. وشنو مميزات كل شغله عن الثانيه ... وشنو الاحسن حق واحد عمره 21 سنه .. ادري العمر ماله شغل بالموضوع .. بس حبيت اذكره .. لانه عمر واحد معاه شهادة الدبلوم .. و انا للحين شهادة ثانويه

    اتمنى من اخواني الاعضاء مايبخلون علي بالنصايح .. لاني بجد بحاجتها
     
  2. Eng.ee6aalii

    Eng.ee6aalii بـترولـي جـديـد

    26
    0
    0
    اقول لا هذا ولا هذا اذا قادر اتدرس برره روح بره واييبلك شهااده.. احسن من تاخذ الدبلوم بعدين مالك خلق اتكمل.. او اطفااء بايكويت صح معاش حلو ومميزات الشركة قويه بس صدقني اتشوف تمر سنيين ناس حالهم تغيروا انته على حالك.. بشهادتك تقدر اتدش وين تبيي للعلم التكنلوجيا الدراسه فيها سنتين ونص اذا بدييت صح وماخذ مواد وايد ابكل كورس اول اتخلصها اب 3 سنيين...فزييدلك سنه واخذ البكالريوس ..والله ياخوي ما حبيت اكسر ابرغباتك بس هذا نصييحه من اخوو جرب كل شي لا يهمك عمرك ياما ناس اعمارهم 30 وخذو بكالريوس وناس من اعمارهم 21 ليما وصلو 30 اشتغلو واستانسو بالفلوس وللحين عالدبلوم اتهقا منو مستانس الحيين..؟ صاحب البكالريوس يشتغل ويصير اعلى منهم واهو ابدياته واهم صارلهم سنين يشتغلون وهذا لكل الاخوان اللي عندهم دبلوم انا اقول كملوا واموفقييييين انشالله
     
  3. reznama

    reznama بـترولـي مميز

    صباح الخير :)

    أحب أقولك ... لااااحق على الوظيفه ..

    جذي وإلا جذي راح تتوظف ..

    بس شهادتك سلاحك

    وأقولها لك عن تجربه ..

    آنا إشتغلت وكنت بعمرك ويمكن أقل بسنه ..

    وكنت ممتازه في عملي .. فوق ما تتصور .. بس مع هذا محّد قدّرني وكله امكسرين مياديفي لأن ماكان عندي شهاده قويه ..

    كنت دبلوم ..

    بس ماشاءلله .. مع تكملة الدراسه .. إتصير عندك ثقه بالنفس .. وتوصل حق اللي تبيه بسهاله ..

    وماتعطي فرصه حق أي أحد يتكلم عن شهادتك ..

    فا من رأيي الشخصي إنك إتكمل دراستك .. لااحق على الوظيفه

    باجر اللي أصغر منك يديرونك وإنت قاعد بمكانك تبلع قهر " الله لا يقوله "

    وبالنهايه القرار لك .. وحبيت أقدّم لك وجهة نظري هذي .. لأني مرّيت بهذي التجربه ..

    وبالتوفيق إن شاءلله

    ولمن تتخرج من دراستك عاد بشّرنا خلنا نفرح معاك :)

    ..
     
  4. AHMAD ALI

    AHMAD ALI بـترولـي مميز

    523
    0
    16
    ذكر
    Admin
    KUW
    اذا توظفت مبجر

    احتمال يصير فيك نفس ما صار وياي

    انا اشتغلت وعمري 20 وعقب جم شهر حسيت بقيمة الشهاده

    وصارلي سنتين اشتغل الصبح وادرس العصر

    يعني يوميا دوام ودراسه !!!

    اختصر الدرب والوقت وكمل دراستك ولاحق على الوظيفه

    الله يوفقك
     
  5. مشغل سياسي

    مشغل سياسي بـترولـي مميز

    568
    0
    16
    ذكر
    kuwait
    انا اييد كلام الاخوان كمل دراستك احسن لك توك صغير والمستقبل قدامك وعسى الله يوفقك
     
  6. WWW

    WWW بـترولـي جـديـد

    11
    0
    0
    بجد مشكورين جميعا .. بصراحه غيرتوا نظرتي للأمور كلها .. أنا كنت ابي ادرس وبخاطري اكمل دراسه و مو بس اوقف ع الدبلوم وباني أمآل وأحلام مثل اي شخص يفكر بالدراسه .. بس لما افكر بالواقع اتردد شوي.. ان وظيفة المطافي مضمونه بالنسبه لي .. وسألت اكثر من شخص عنها ومدحوا المعاش وقالو المستقبل فيها حلو .. وخفت اني لما ادرس لا سمح الله ماكمل دراسه .. او يصير ظرف وضيع ع نفسي الوظيفه ...

    بس الحين اشوف اني ادرس احسن .. وحتى لو ماصار الي الي بخاطري وماخلصت دراسه ... ع الاقل اني جربت .. مو بعدين اقول ليتي درست وكملت .. بالعربي اجرب عشان ماتحسف بعدين ... وشاكر مروركم جميعاا ومشكورين ع النصايح الي صارت حافز كبير لي اني ادرس
     
  7. WWW

    WWW بـترولـي جـديـد

    11
    0
    0
    دام صرتوا حافز لي الله يعينكم ع اسألتي ... الحين شالفرق بين دبلوم هندسة بترول انتاج وتصدير .. والاستكشاف وتطوير .. وشنو التخصص الاحسن والي مستقبله افضل ... واذا في تخصصات احسن منهم شنو اهم .. مع العلم اني طالب علمي نسبتي فوق الـ70 ..
     
  8. Eng.ee6aalii

    Eng.ee6aalii بـترولـي جـديـد

    26
    0
    0
    حسب علمي انه واحد من هالتخصصات ما تقدر اتكمل فييه والله اعلم اسأل انا سمعت والله من كذا واحد انه دبلوم هندسه بترول في تخصص من هذول ولا جامعه تقبلك لي بغيت اتكمل
     
  9. WWW

    WWW بـترولـي جـديـد

    11
    0
    0
    مشكور ع المعلومه .. بسأل فيها :)
     
  10. Bos3ayd

    Bos3ayd بـترولـي مميز

    523
    4
    18
    تبي نصيحة اخو ؟ :) انا خريج كلية الدراسات التكنلوجية تخصص بترول انتاج وتصدير عمري 22 سنة و الحمدلله توني متعين في شركة نفط الخليج ، دوامي صباحي و الامور كلها ماشيه لله الحمد و الف واحد و واحد يحسدني على الوظيفة عيني عينك ، بس تبي تعرف شغله ؟ تدري يوم اني وقعت العقد وتوظفت ماكنت مساتنس ؟ وجني ضارب الوظيفة بالطوفه ، الموضوع والي صار انه الله ماقدرني اني اكمل الدراسه بره ، وصدقني انا حتى ماكملت شهر بالشركة و ليلحين قاعد اتحسف على الفرص الي ضاعت مني وماكملت الدراسه فيها و ناوي اني انشالله ايمع لي مبلغ من وظيفتي الحالية واطلع اكمل دراستي بأي جامعه من الجامعات الامريكية ولا البريطانيه.

    صدقني المعاش و الوظيفة مو كل شي، اهم شي انت شنو تبي توصل له ، شنو حاط اب بالك ، ومثل ما قالولك الشباب اذا على الوظيفة مردك راح تتوظف واذا على المزايا و الراحه انا اقولك المطافي اريح لكن اذا بتحسبها من الناحية المادية، راح اقولك انه اذا كنت بالبترول عادي كل صيف انت مصيف بالديره الي اب بالك وبدون لا تشيل هم المصاريف :)

    مثل ماقتلك توكل على الله و كمل دراستك واهم شي انت شنو حاط اب بالك ، اذا كنت حاط اببالك انه باجر راح ينادونك المهندس و لا السينيور الفلاني ، ولا الابريتور \ الهلبر الفلاني :) طبعا شتان مابين الثرا و الثريا مثل مايقولون :) ولا يهونون الشباب الي معاهم دبلوم او اقل حاليا لاني انا ساسا واحد منهم :) وهذا مستقبلك وانت ابخص اخوي .

    تحياتي لك و بالتوفيق للجميع :)
     
  11. Bos3ayd

    Bos3ayd بـترولـي مميز

    523
    4
    18

    مافي فرق كبير بين الانتاج و الاستكشاف الا جم ماده تخصصية تاخذها بالكلية :) ، و اذا انت محاتي على الفرق من ناحية الوظيفة ، مافيه فرق هذا يتعين اوبريتور و هذا اوبريتور بس احتمال تكون بدائرة ثانيه يعني ك أنتاج وتصدير احتمال تكون مشغل بالسنتر ، اما الاستكشاف احتمال تكون بالويل سيرفيلينس الي اهو تقريبا نفس دائرة الخدمات بالبترول :) والوظيفتين مايفرق المعاش بينهم.

    اذا تبي تخصص كل مكان يقبلونك فيه روح تخصص قوى محركة ، قسم الميكانيكا :) لكن اذا انت حاب البترول خلك انتاج وتصدير اريح لك :)

    وبالتوفيق
     
  12. المنصور

    المنصور بـترولـي خـاص أعضاء الشرف

    اعتقد ان الاخوان كفوا ووفوا

    جزاكم الله خير
     
  13. WWW

    WWW بـترولـي جـديـد

    11
    0
    0
    اشكركم جميعا .. ماقصرتو .. وأخص بالذكر اخوي بو سعيد .. لان قبل انا ماعندي فكره شنو هالتخصصين ... وسجلت فيهم ع اساس ان مجالهم القطاع النفطي .. والله يوفقك يا بو سعيد وعقبال ما تبشرنا بالبكالريوس بأذن الله
     
جاري تحميل الصفحة...

مشاركة هذه الصفحة