استفسارت وايد ..منو يجاوبني عليها ؟؟ لأني فعلا بحيرة ومليت من وظيفتي :(

الكاتب : ساره ستايل | المشاهدات : 1,838 | الردود : 20 | ‏5 ابريل 2009
  1. ساره ستايل

    ساره ستايل بـترولـي جـديـد

    8
    0
    0
    السلام عليكم

    انا جامعية وخبرتي 6 سنوات
    خريجة جامعة الكويت - علم اجتماع - علوم اجتماعية
    معلمة للمرحلة الموسطه
    عندي شهادات حمدالله بلكمبيوتر واهمها الرخصة الدولية لقيادة الحاسوب

    وافكر اني انقل خدماتي من التربية للقطاع النفطي

    لا تقولون ما يصير وتخصصج مو مطلوب.. كل شي بلواسطه للأسف يمشي

    لأن الوضع بالتربية من ردي الى أردى
    اللي يشتغل واللي ما يشتغل واحد

    والعقول متحجرة .. وماكو اي تقبل لأي افكار ابداعيه يديده هدفها الاساسي
    رقي التعليم وتطوير المناهج والانشطة التعليمية التربوية

    كله كبت وطمس للمواهب اللي مثلي للأسف
    وغصبا على الواحد يطبق افكار مالها اي هدف ولا اي داعي
    غير انها رسميات وشكليات واساسيات فقط

    طفح الكيل .. وبطلع منهم خلاص.. ادعولي بالتوفيق تكفوووووووون

    بس ودي اعرف اجوبه هالاسئلة :

    1- شنو افضل مكان للعمل بالقطاع النفطي ؟ من كل النواحي

    2- اذا توفقت انشالله وتوظفت .. على اي درجة اتعين ؟؟؟
    علما بأني الحين الدرجه الرابعه
    لأن نظام الترقيات والعلاوات بالتربيه نظام فاااااااشل وسيئ جدا جدا جدا

    3- العلاوات .. شنو اللي يستحقها الجامعي اللي له نفس خبرتي ؟
    احنا بالتربيه كل سنه معاشنا يزيد 10 دك فقططططططططط :eek:
    حمدالله

    4- جم يصير راتبي ؟
    انا توا يوصل راتبي 920 دك عقب 6 سنوات خبره :confused:
    بس ما استلمه كامل طبعا .. يتقصص للتأمينات وغيرهم ..


    5- العلاقات العامه بمؤسسة البترول .. شنو اختصاصات موظفينهم ؟
    لأني وايد حابه هالقسم -- بس ماني عارفه شنو مهام موظفينهم



    ولكم مني الفففففففففف شكر وتقدير على سعة صدركم :)
     
  2. wal3li

    wal3li بـترولـي نشيط

    116
    0
    0
    اول شي يبيلج واسطه قشره وبالنسبه لتخصصج علم اجتماع - علوم اجتماعية يكون مكانج على ما اعتقد بالتدريب البترولي بالعلاقات العامه او سكرتاريه والراتب راح يعجبك :) والله يوفقج
     
  3. سالم الخالدي

    سالم الخالدي رئيس اللجنة الإعلامية فريق الإعلام

    5,139
    1
    38
    مشغل غرفة تحكم - مصفاة ميناء عبدالله
    الكويت
    مثل ما تفضل الأخ

    هناك العديد من الأماكن الادارية في المؤسسة والشركات التابعة لها

    لكن لازم تحطين في الحسبان ان عدد الساعات أكثر من دوام المدرسة

    ومكان العمل بعيد عن الديرة

    وبالنسبة للدرجة فعندنا نظام الدرجات الى أعلى وليس كالوزرات

    وتعيينك عادة على الدرجة 12

    لكن مميزات القطاع النفطي أفضل من الوزراة من حيث المادة


    ففي القطاع النفطي هناك ما يسمى بمشاركة النجاح وهو قيمة مالية سنوية تحددها المؤسسة على حسب الربح
    أما راتب أساسي أو اثنان أو ثلاثة على حسب الربح

    وفي القطاع النفطي تذاكر سنوية للموظفة وأفراد أسرتها للزوج والأولاد

    وهناك ما يسمى بالمكافأة السنوية تعطى للمتميزين من الموظفين

    وأما عن الاجازة السنوية فللموظفة 40 يوما كل سنة تحدد على حسب حاجة العمل وتوافر الموظفين وتنسيق الموظفين فيما بينهم
    فضلا عن الدورات الداخلية والخارجية للموظفة

    وأما بالنسبة للراتب اذا تعينتي على الدرجة 12 فالراتب بمعدل 1350 دينار كويتي

    وأما بالنسبة للزيادة السنوية ما بين 35 الى 50 دينار على حسب جهدك خلال السنة و حسب راتبك الأساسي
    هذا باختصار مميزات القطاع النفطي


    أتمنى لكي التوفيق والفائدة
     
    آخر تعديل: ‏5 ابريل 2009
  4. خليج النفط

    خليج النفط بـترولـي نشيط جدا

    179
    0
    0
    بالتوفيق وانشاء الله نشوفج زميلة لنا .
     
  5. المنصور

    المنصور بـترولـي خـاص أعضاء الشرف

    ان شاء الله ان الشباب كفوا ووفوا

    ولكن استوقفتني جملة وهي

    "وافكر اني انقل خدماتي من التربية للقطاع النفطي"

    ما يصير تنقلين خدماتج من اي وزارة الى القطاع النفطي لأن هذا القطاع مستقل عن القطاع الحكومي مع انه مملوك للدولة

    واللي عليج انج تسوينه انج تقدمين على اعلان التوظيف لذوي الخبرة علشان يحسبون خدمتج في الوزارة

    وإذا تم قبولج.. تقدمين استقالتج من الوزارة

    وموفقه خير
     
  6. ساره ستايل

    ساره ستايل بـترولـي جـديـد

    8
    0
    0
    مشكووووووووورو وماقصرت عالرد اخوي

    وجان زين كلامك يصير صج واتوظف بالتدريب البترولي بالاحمدي :)

    لأني رحتله كذا يوم وماشالله المكان هادي ومرتب

    لا خلا ولا عدم :)
     
  7. ساره ستايل

    ساره ستايل بـترولـي جـديـد

    8
    0
    0
    ماشالله عليك اخوي
    كفيت ووفيت بالشرح الوااااااااااااافي
    تسلم ايدك
    واسمحلي بالتعقيب عليك رد بعد اذنك :


    بلعكس اخوي
    صج ان دوام المدرسات لي الساعه 1 وثلث

    بس شغلنا يستدعي العمل خارج اطار المدرسه
    يعني وانا في البيت عندي شغل :
    تصحيح دفاتر الطالبات
    اعداد الاختبارات
    تصحيح الاختبارات
    رصد الدرجات وعلى فترات متكرره بالسنه الدراسيه الوحده
    الاعداد للانشطه المدرسيه من برامج اذاعه و مسابقات ونماذج دروس واجتماعات وورش عمل
    واعداد انشطه متنوعه
    وزيد على ذلك .. اذا سويت هالامور وانا متزوجه والزوج موجود بلبيت
    بتلوووووووع جبده صج صج من هالشغل اللي ما يخلص


    ف المدرسه تشتغل 24 ساعه -وهالشغل جسدي ونفسي

    يعني ساعات العمل اكثر من عمل الموظفه بلبترول اللي دوامها ينتهي الساعه 3 العصر


    ممكن المشكله فقط ابطول الطريج
    بس اكو ميزه وحده : اني راح اكون عكس زحمة الناس الصبح
    الناس اغلبها داشه العاصمه
    وطريج العكس فاضي
    لذلك اعتبرها ميزه لأني جربت دوام داخل وخارج الديره


    اتصدق ان مهنة التعليم تعتبر من المهن الشاقة
    غير التعب بالتدريس والشرح والتصحيح
    التعب النفسي ( واهوا اكثر من التعب السابق )
    بس مع ذلك .. الرواتب والعلاوات غيرررررررر منصفه للتعب والجهد الكبير المبذول بالمقابل



    للأسف مو موجود عندنا بالتربية ..ما تنعطى هالمكافأت الا للي عندهم سنوات خبرة كبيرة
    بغض النظر عن الانجازات التربوية
    و طبعااااااااا ( ان حبتك عيني ) اكييييييييد لهم المكافآت واهما ما سووا ولا انجاز يذكر :mad:
    بس اللي يتعب ويجتهد من بداية مشوارة التعليمي للأسف نفسي ..
    ماله الا تكسر المجاديف والاحباطات
    شوف عيني والله .. ناس ما اتسوي شي
    ولا انجازات
    بالنهايه اشوف اساميهم بلجريده نازله مع المشمولين بمكافأة الاعمال الممتازة !!!



    هذا اللي نفتقره بالتربية
    هالدورات تدري حق منو ؟؟
    حق وكيلات المدارس فما فوق
    اما اللي بقمة الطاقه والشباب..
    اللي محتاجين هالدورات
    واللي اهما فعلا بيفيدون الحقل التعليمي اذا تخرجوا من هالدورات
    مالهم شي كلللللللش ..
    واذا طالبنا .. بس تكون مطالباتنا حبر على ورق

    ماشالله عليكم بلعافيه
    انا معاشي 920 مع ان توهم يفكرون ( التربية) بإدراج علاوة للمعلمين اسمها علاوة مهنه شاقه
    تدري جم ؟؟؟؟
    من ال40 الى 60 دك !!!!!!!!
    هذا تقديرهم لتعب وشقاء المعلم للأسف


    هذي النقطه وايد اتحرني بالتربية
    تخيل اللي يشتغل واللي ما يشتغل واااااااااااااااااحد
    انا وغيري من المدرسات كلنا زيادتنا السنويه 10 دك
    مع اني من النوع المجتهد والنشيط واللي عندي ابداعات وابتكارات وايد للطالبات والمعلمات
    بس بالنهاية
    زيادتي السنوية .. وزيادة اللي ما سوت ولا شي.. نفسي بالضبط

    ف هذا الللي يقمت الطاقه .. ويخلي المعلم ينحاش من هالمهنه
    بالرغم من حبه لها
    الا ان كل شي محبط


    كل الشكر والتقدير لك اخوي على مداخلتك اللي صح اضافة لي الكثير من المعلومات
    اللي كنت احتاجها

    جزاك الله خير
    وربي يوفقك يارب ومنها للأعلى :)
     
  8. ساره ستايل

    ساره ستايل بـترولـي جـديـد

    8
    0
    0
    انشالله

    الخيرة فيما اختاره الله

    مشكور اخوي عالرد :)
     
  9. ساره ستايل

    ساره ستايل بـترولـي جـديـد

    8
    0
    0

    مداخلتك جدا مفيده
    لأني ما كنت عارفه هالطريقه كلش

    انشااااااااااااااااااااااااااااالله يقبلونيو اقدم استقالتي من التربية قووووووووووول آآآمين :)

    مشكورة اخوي وماقصرت عالتنبيه المهم
    :)
    ما تدري متى اينزلون اعلانات التوظيف لذوي الخبرة ؟؟

    اختي من فتره قالت لي بشهر 4 ؟
    اهيا تشتغل بلبترول
    بس مادري ليش ليلحين ما نزل الاعلان بلجرايد !!
     
  10. wal3li

    wal3li بـترولـي نشيط

    116
    0
    0
    دائما دشي موقع الشركه يحطون اعلانات



    بس اذا تبين الصح لازم تعرفين احد في مبنى الشركه اللى في الاحمدي قسم التوظيف واهو يقولج متى وشلون
     
  11. brilliant

    brilliant المـراقب الـعـام

    8,477
    0
    0
    Engineer
    Kuwait
    ماعتقد ياخذونج في ذوي الخبره لان هالتوظيف يبون ناس متخصصه في مجال معين

    الافظل والاسهل تقدمين على حديثي التخرج اذا نزل اعلان وتجهزين استثناء العمر من الوزير اذا كنتي فوق 27 سنه

    بيتم تعيينج ان شاء الله على قريد 11

    بعد ما تباشرين العمل طالبي بتعديل قريدج الى 12 بحجة ان عندج خبره ومشتغله بالتدريس مدة 6 سنوات وتتم عادة عن طريق نائب العضو المنتدب للمكان الي انتي فيه ويوافق عليها وعلى طول يرقونج

    واتمنى لج التوفيق
     
  12. ساره ستايل

    ساره ستايل بـترولـي جـديـد

    8
    0
    0
    اولا مشكوووووووووووور عالرد اللي يبشر بلخير :)

    اشوااااااا
    انا عمري 28 سنه يعني بإذن الله انشالله يصير اللي قلت لي عنه :)

    ونااااااااااسه لما قلت يرقونج :D
    لاني محرومه منهالترقيات 6 سنوات وانا استحقها
    وغيري 20 سنه لا انجاز ولا شي .. وترقيات بلهبل :mad:

    مادري شبيصير فيني اذا صج صج تعينت وترقيت :) :)

    يااااارب يتحقق لي هالشي يارب

    ومشكور اخوي مره ثانيه ما قصرت
     
  13. ]printer

    ]printer بـترولـي نشيط جدا

    180
    0
    0
    accountant
    الكويت
    اميييييييييييين ياربي تترقين وتمسكيين المكان اللي تبينه امييييين وانا بعد اترقى ويااااااااااااااااااااااااااااااج امييييييييييييييييييييييييين
    انا ماعندي واسطة واسطتي ربي العالمين انشالله


    توكلت في رزقي على الله خالقي وأيقنت أن الله لا شك رازقي

    وما يك من رزق فليس يفوتني ولو كان في قاع البحار العوامق

    سيأتي به الله العظيم بفضله ولو لم يكن مني اللسان بناطق

    ففي أي شيء تذهب حسرة وقد قسم الرحمن رزق الخلائق

     
  14. ساره ستايل

    ساره ستايل بـترولـي جـديـد

    8
    0
    0
    مشكووووور :)

    انا يوميا ادش اجيك

    انا اخوي اهناك بالشركه بالاحمدي
    وعنده خبر موصيته وموصيه زوجته اتذكره بعد

    يسلمووووو :cool:
     
  15. ساره ستايل

    ساره ستايل بـترولـي جـديـد

    8
    0
    0
    آآآآآآآآآآآآآآآممممممممممممييييييييييييييييييييييييييييننننن

    يارب تتوظف يارب وتتسهل امورك واموري وامور كل اللي نفس حالتنا :)
     
  16. swan

    swan بـترولـي جـديـد

    47
    0
    0
    واي سارة

    ىنا عاد سؤالي لج انتي

    شلون تحملتي كل هاذا بالتربية؟

    آنا توني اول سنه ولايعه جبد جبدي من التدريس

    اللي يبدع يحطون عليه ويكسرون مياديفه والله ظلم حسبي الله عليهم

    تدرين الحين ما قام يهمني المعاش!!! أبي افتك ماني عارفه

    يعني الخارج منها مولود وماكو إلا حل واحد علشان اطلع من التربية ( أقدم استقالتي )

    انزين النفط ياخذوني؟ توني متخرجة 2008 وخبرتي بس سنة بالتدريس

    وعندي شهادة التوفل والاي سي دي ال وباخذ دورة محاسبة او ادارة اعمال بس اطول 3 شهور يمكن


    يطلون بويهي؟

    والله لو احصل شغل غير هالتدريس جان من امس مستقيله
    عالعموم موفقة حبوبه والله يسهل لج ويسخر لج عيال الحلال
     
  17. كبد نمله

    كبد نمله بـترولـي جـديـد

    25
    0
    0
    ياحبكم للفلوس يالحريم :)

    انا عندي لكم اقتراح كل وحده تقعد في بيتها ورجلها يصرف عليها :)

    خلو الشوارفسكي والقوتشي مو وقته .. الزمن تغير ياساتر
     
  18. swan

    swan بـترولـي جـديـد

    47
    0
    0
    كبد نمله ..... منو مايحب لفلوس؟؟؟ ;)

    والله خوش قرار .. لو الدولة تقتص نص معاش الريل وتحوله اوتوماتيكيا على حساب المرة جان حريم لكويت كلهم بالبيت واولهم آنا بلا عوار راس

    والله صج الشغل حلو .. بس البيت احلى مع وجود هواية

    وبعدين راحت خلاص موضة لشوارفسكي :)
     
  19. نفطي حر

    نفطي حر بـترولـي جـديـد

    14
    0
    0

    ماشاء الله اختج في البترول واخوج في النفط
    يعني اي استفسار اعتقد الاجابه ستكون متوفره بالنسبه لج

    اظن ان موضوعج كان لأجل التنفيس عن واقع عملي تتعايشينه بشكل يومي
    انا شخصيا ما الومج

    لكن ثقي كل الثقه ... ان ماذكريته عن معاناتج في نظام العمل والتحفيز والتطوير والابتكار وبيئة العمل وثقافة العمل
    لا يعدو سوى نسخة مكررة لما يدور في القطاع النفطي
    ولكي أكون اكثر تفصيلا ... في قطاعات الدولة كلها

    لذلك .. تذكر مقولتنا الشهيرة .."خلك على مينونك"

    للأسف .. النظام الاداري في الدولة .. لا ينقصه سوى قراءة الفاتحة عليه

    وقولوا آمين رحمكم الله
     
  20. swan

    swan بـترولـي جـديـد

    47
    0
    0
    اخي العزيز من لم يجرب التدريس فلا يمكن له ان يحكم عليه

    اصعب مهنه بعد عمال المناجم لأ المدرس (بالنسبة لتخصصي الاساسي (لغة عربية)

    معلم
    مربي(يؤدب الطالب )---> تخيل عندك 25 ولد بالبيت لازم تركز معاهم )
    فنان(يبدع في اساليب جذب الطالب)
    اخصائي نفسي(يدرس نفسية الطالب ويحل مشاكله)
    مفكر (ومحلل للفكر والمواضيع)
    مؤلف (المنشورات والدروس والمواضيع كالتعبير والاملاء والتمارين ))
    مذيع(البرامج الاذاعية المدرسية)
    ممثل(الشرح المعبر)
    حارس (المناوبات)
    مدقق ( الدرجات والشهادات)
    بورتر( الاوراق والتصوير والقيم الاسبوعية)

    كل المهن تتجمع بمهنه واحده وهي التدريس ومنها مالم اذكر

    وفوق هاذا وذاك ايون اولياء الامور ويقولون شدو حيلكم مع عيالنا ... ونقول لهم ونعيد(ايد وحده ماتصفق)

    عزيزي هذه المهنه بها من الخفايا ما يجهله الاغلبية ولكم الظاهر

    تلاحظون ان وزارة التربية ماتشبع من التوظيف؟ لأن الاعداد في تناقص .. والبقاء للعاجز عن الحصول على وظيفه اخرى او لليائس من حياته وليس له هدف سوى ان يكون شمعه تحترق لتضيء لغيرها وتذوب

    والمعاش يغور بصراحه على هالتعب

    غير جذي اكو ناس تقول الاجازة ما الاجازه

    ارد عليهم انتو بالقطاعات الاخرى لكم رصيد من الاجازات تاخذونها متى اردتم

    احنا الاجازة بالحسرة لا والشغل تراكمي ونصير بسباق مع الزمن

    وعطلة الصيف مانبيها دامها جذي .. الواحد بين فترة والثانية يحس بالوهن

    انك تكون مسءؤل عن شغلك شي هين بس انك تكون مسؤل عن مستقبل اشخاص شي صعب

    هاذا غير انتقام الادارة بسبب هاليوم الغياب والتكليفات اللي اتيي على الراس

    بعد هاذا وذاك .. اللي كاتبه ربك راح يكون من نصيبك

    واتمنى ان التدريس مايكون نصيب .. تمني فقط والحمد الله على كل حال

    قرقت ادري
     

مشاركة هذه الصفحة