يومي مع شباب الـ 300 !!

الكاتب : رحال | المشاهدات : 754 | الردود : 15 | ‏23 ديسمبر 2008
  1. رحال

    رحال بـترولـي مميز

    586
    0
    0
    [​IMG]


    السلام عليكم يا كرام ،،،


    كان يا مكان في وقتنا الحاضر وليس بسالف الذكر والأوان !! اتصل علي رفيجي وأصر إني أحضر لمقهى ( شيشه ) علماً بأنني ما أدخنها ... ولكن كان اصراره لحضوري بسبب تجمع كل الربع !!! وإنها فرصة ما تتعوض ويالله وشدعوه وطالبك ولا تخلي وبنشوف مباراة فريق مادري منو ضد فريق هم مادري منو المهم اللي أعرفه انهم فرق أوروبية ( لأن مالي شغل بالكرة ) !!!

    المهم لبيت النداء وما هي الا نصف ساعة وحضرت للمقهى المنشود ... والا فعلاً تفاجأت بحضور غالبية الشباب ومن بينهم أصدقاء صارلي دهر ما شفتهم .... وكان الترحيب حار جداً مع شوية ( تشره ) من نظام إنت وينك وآنا أرد عليه شدعوه انت مقطع تلفوني عاد ... ومن هالكلام اللي يحسسك بأن الدنيا بخير والكل يفقد الثاني حتى لو طال الإنشغال ...

    كانت الكراسي نظام القهوة الشعبية اللي تكون مساحتها تسع لجلوس أربعة أشخاص اذا كانوا من الوزن المتوسط وليس الثقيل جداً !!! عموماً كان هناك تلفزيون ذو شاشه عملاقة موضوع بوسط المقهى ولكن كانت الرؤيا شبه معدومه ليس من نقاوة التلفزيون ولكن من دخان الشيشه المتطاير من كل ناحية !!!! يعني جو صحي من الدرجة الأولى واللي ينصح فيه الدكاترة حييييييييييييل !!!!

    بدأت المباراة بين الفريقين اللي ما اعرفهم للحين ... والشباب كانوا يتحدثون عن ( شفت فلان اللي اهو اللاعب شروه فريق فلنتان ) وجنه الشباب ماكلين مع هاللاعب طرشي ... حييييل مطيحين الميانة معاه ومع مدرب الفريق والقائمين على الفريق والأندية المجاورة لها أيضاً ... وآنا مثل الأطرش بالزفه ... بس قاعد أشرب الشاي مع رشات بسيطه من النعناع المذوي !!!!

    كان هناك نوع من التشويش للموضوع !!! وحين التفت كان هناك تلفزيون آخر بنفس المقهى ولكن كان يعرض فيلم ( 300 ) وكان هناك زمرة من الشباب المتابعين للفيلم بشكل مو طبيعي ... والشي كان باين على وجوههم ونظرة عيونهم ... يعني الحبايب ( مندمجين ) لأبعد مدى ... فكنت أرد على المباراة لمه اسمع الشباب يصارخون لتضييع هدف أو هجمه وبعدين أرد ألتفت على ( المندمجين ) !!!

    المضحك في المسألة إن الجرسون جاب عصير حق واحد فيهم فسكرعليهم الشاشه فصرخوا عليه صرخة وحده ( وخر يالتعبان ) !!! يالله يعني شنو هالإندماج ماني قادر أعرفه ولا أعتقد إني راح أوصله !!! انتهى الشوط الأول من المباراة وكانت هناك فترة استراحه لللاعبين ولتعليقات ربعي بعد تلك الاستراحة ولكن بثواني قليلة بدأ التحليل الرياضي المتداول بين الربع ... شفته الـ ..... شلون ضيعها ومن هالأمور .. ولو كان امباصي هذاك جان حطها قول ( اممممم والله ينفعون يدربون الأزرق يمكن انرد أمجاده ) !!!


    مع ذلك الفاصل انتهى فيلم ( 300 ) وكان جمهوره ( المندمجين ) متشبعين حتى النخاع من الفيلم ... وما هي إلا لحظات إلا وبدأ أحدهم بإطلاق كلمة كانت موجودة بحوار الفيلم وهي حين يسأل الملك جيشه ما هي صنعتكم فيردوا عليه جيشه رد رجل واحد " آووووووووووووووه آوووووووووه آوووووووووووه " وكان ذلك الشخص يوجهها لربعه وهم يردون عليه بنفس وتيرة الفيلم كما لو كانوا هم من أدوا العرض بذلك الفيلم !!!!! بطلت عيني عليهم وركزت ... هذوله شنو قاعدين يسوون !!! فقلت لصاحبي اللي كان قاعد يمي ... شوف شوف لا يطوفك الشباب اللي اهناك شنو قاعدين يسوون !!! ضحك صاحبي ضحكة استهزاء وقالي اييي عادي ... قلتله شنو العادي بالموضوع !!! قالي هذوله شباب الـ ( 300 ) معروفين بالقهوه ملقبين نفسهم جذي طاف يا عمي !!!!!

    سكت وقلت لنفسي .... شنو اللي قاعد يصير ووين وصلنا !!! معقوله في شباب كل واحد فيهم يمشي على زنده التيس ( وانتوا بكرامه ) ومستواهم جذي !!! ليت صوتكم كان موحد لنصرة قضية والا لإثبات موقف أو رأي !!

    غمزه: وا عزاه عليج يا ديرتي ... شفت حال شبابج وضعت بحيرتي ... ليتهم يتوحدون عشانج وتصير الوحدة بالزين كلمتهم وكلمتي ... يا شباب الـ ( 300 ) وش خليتوا للغربتي(كليك)
     
    آخر تعديل بواسطة المشرف: ‏23 ديسمبر 2008
  2. dehen_3ood

    dehen_3ood بـترولـي خـاص أعضاء الشرف

    لا تروح بعيد أخي الكريم " رحال "

    إنت شفت شباب الـ 300 .. زين ما طاحت عينك على شباب الـ مادري شوصفهم فيه !!

    لي شفتهم بتحسر على شباب الديرة ويتقول واعزاه عليج يا ديرتي ميلون مره !!

    تراجي وسلاسل وخواتم وقصات شعر غريبة والأدهى والأمر من هذا كله كحل للعين خاص لهذا القروب

    ومكانهم معروف في أحد المطاعم إللي على البحر .. وأعمارهم ما تعدت العشرين !!

    هذيل شباب المستقبل !! حماة الوطن !!

    من تشره عليه؟ عليهم وعلى أهاليهم ؟؟ ولا المدراس وتعليمهم ؟؟ ولا الفضائيات وتقليد الغرب ؟؟ من تشره عليه ؟؟

    ما نقول إلا الله يهدي هالجيل وينور بصيرته ..
     
  3. اطفائي محترق

    اطفائي محترق بـترولـي خـاص

    1,187
    0
    0
    اشب الضيان
    الشعيبه
    عزيزي رحال اشكرك على هالموضوووع الرائع

    والغمزه الحلوه


    بذكر لك سالفه صارت معااااي


    في يوم من الايام زارني احد الاصدقاء من احدى الدول الخليجيه

    المهم طلعنا نتعشى بمطعم بالسالميه ... وللأسف بوقتها كان زحمة المسيره (( مسيرة هلا فبراير ))


    المهم انه صاحبنا شاف الاشكال اللي اتوقع انه الزميله دهن عود تقصدهم (( الجنس الثالث)) اعزكم الله

    فألتفت علي وقاااالي ... اذا هذولا هم شباب الوطن عزة الله انه الكويت اذا جاءها غزوو الله لايقوله راحت منا ومنكم,, الله يحفظكم وبس

    قلت له هذولا مو محسوبين من ضمن الشعب ... هذولا تكملة عدد ... وعالات علينا ..


    خلها على ربكـ
    وتقبل مروووري
     
  4. غيوم

    غيوم بـترولـي خـاص أعضاء الشرف

    7,298
    1
    0
    حسافة عليج يا كويت

    وين شبابنا أيام الغزو

    لو مو هالشباب و مقاومتهم و دفاعهم عن الكويت جان ماردت

    ما أقول إلا الله يستر من الأجيال القادم إذا تستمروا على هالحال

    تحياتي لك يا سيد الحرف

    على هالموضوع ألي يحز بالخاطر
     
  5. dehen_3ood

    dehen_3ood بـترولـي خـاص أعضاء الشرف


    لا يا أخي الكريم ما قصدت الجنس الثالث أعزكم الله

    أنا قصدت فئة ظهرت بالفترة الأخيرة وتكلم عنهم الشيخ محمد العوضي

    أشباه لعبدة الشيطان .. لهم طقوس خاصة فيهم .. هم ابتدعوها ..

    اشكالهم مريبه والأسف كلهم صغار بالسن يعني بسرعة بتأثرون بالغير وبالغرب ..
     
  6. جونم جقرم

    جونم جقرم بـترولـي خـاص أعضاء الشرف

    8,202
    0
    0
    منــدوب نفطـي (: ---> 66698897
    خـيـمـة فـُـوق طـِـعـسـ
    عســا اللـه يكفيــنـا شـر الأشكـال هـذي والطبـــائـع المصطنعـة والمقلـــدة

    لاهنت عزيزي رحـال علي القصـة
     
  7. براق

    براق بـترولـي نشيط

    117
    0
    0
    وربي صدقت رحال اهتمام الشباب الوقت الحالي مباريات اوربيه وكشخه ولبسي احسن من لبس فلان ومن هالكلام اللى ما يودي ولا يجيب لاسف انهم الاغلبيه صارت اكبر اهتماماتهم المظاهر واكثرهم كاشخ بقروض الله يزين الامور



    وتقبل مروري
     
  8. نجديه وملامحي حايليه..

    نجديه وملامحي حايليه.. بـترولـي خـاص

    1,033
    0
    0
    .. رحال ..


    مساءك ورد ..


    هذي الدنيا وهذي حالتها ..


    للأسف كل مالنا نتخلف أكثر و أكثر ..


    صرنا إمعه ..


    يعني مع الخيل ياشقرا ..


    بس يظل في أمل ..


    الله يهدي خلقه أجمعين ..
     
  9. ط£ظ…ظٹط±ط© ظ†ط¬ط¯

    ط£ظ…ظٹط±ط© ظ†ط¬ط¯ بـترولـي نشيط جدا

    476
    0
    0
    الله يصلح حال شبابنا أجمعين


    مشكور عالقصه المؤسفه



    تقبل مروري
     
  10. رحال

    رحال بـترولـي مميز

    586
    0
    0
    الحسافه مو علي الكويت .. الحسافه على اللي قاعدين يخربون اسم هالبيت ...

    ونفس ما تفضلتوا اخواني وخواتي الشق عود لكن ربي سبحانه هو الهادي ...

    احترامي لكل من شارك وأبدى رأيه بالموضوع الذي فعلاً أصبح متفشي ونحن نقف مكتوفين الأيدي ...

    أشكركم ...
     
  11. om 3zooz

    om 3zooz بـترولـي نشيط جدا

    262
    0
    0
    engineerah
    q8
    مشكور اخوي والله يهدي الجميع .. الرياييل انقلبوا حريم والحريم انقلبوا بويات والي يقول لي عبدة شيطاااان !!! يالله ياكريم تهديهم ويرجعون لفطرتهم السليمه وتحمي عيالنا من هالاشكال ,,, الي ضحكني بالموضوع كله شسالفة فلم 300 حدهم مندمجين وحالتهم حاله شسالفه لايكون بس فلم ممنوع من الديره والا ما يحصلونه dvd !!!
     
  12. ABDULLAH

    ABDULLAH قــلــم بــتــرولــي أعضاء الشرف

    10,727
    1
    36
    موظف في ش نفط الكويت
    وطن النهار - الكويت موطني
    إذا غابت أو غيبت القدوة الصالحة يتبع الشباب كل ساقط و لاقط
    و أسأل الله أن يصلح الحال
     
  13. المنجنيقي

    المنجنيقي بـترولـي خـاص

    1,966
    0
    36
    "" اللهم رد شباب وشابات المسلمين إلى رشدهم ردا جميلا وأحفضهم من شر العابثين وأصلحهم وأصلح دينهم ""

    الــــلـــــهــــــــم آمـــــــيـــــــــن

    كل الشكر لأخي صاحب القلم الذهبي "" رحـــــال ""

    بس ياجماعه الدنيا للحين بخير ولو خليت خربت , وهالنوعيه من الشباب شوي وعسى الله لا يزيدهم ويهديهم ولا ياخذهم أريح لنا ولأهاليهم ، ولا تنسون ترى في شباب ينحطون على الجرح "" شروى الموجودين"" وهم قدها وقدود وإن أحتاجتهم الكويت تلقاهم يفدونها بالغالي والنفيس "" أنا واحد منهم وأنتوا لا شك منهم "" عالعموم الله يحفظ لنا الكويت وشعبها وشبابها ,,

    وتقبل مروري يا صاحب القلم الذهبي ومشاركتي ....
     
  14. رحال

    رحال بـترولـي مميز

    586
    0
    0
    شكري وامتناني موصول لجميع المشاركين بهذا الموضوع ...

    لكم ودي مسبوق باحترامي ...
     
  15. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    احتمال تقصدين الـــ ( ايمو ) اللي لهم قصات شعر معينه و ملابس خاصة فيهم انا اعتقد و الله اعلم انه افضل حق للايمو و الجنس الثالث و البويات هو انه نقطع عنهم المصروف و نقلل من الرفاهية اللي اهم فيها عشان ينشغلون بحياتهم اكثر من التقليد الناتج عن الفراغ و اذا ما نفع انتوالهم لشط بالخيزرانه لين يعقلون .

    بالنسبة لمضوعك اخوي رحال فيه اكثر من جانب من ناحيتي اعتقد انشغال الشباب بمتابعة الرياضة ما منه ضرر بل بالعكس هذي تعتبر هوايه جيده تبعدهم عن هوايات اخرى فيها ضرر , اما الربع اللي متأثرين بالمحاربين 300 فاعتقد لو يتأثرون بمحاربين المسلمين وايد ابرك : )

    بشكل عام موضوع حلو و سردك للاحداث كان ممتاز لدرجة ما مليت و انا اقرى الموضوع : )
     
  16. رحال

    رحال بـترولـي مميز

    586
    0
    0
    سيدي الكريم / شركة من صادها ...

    أشكرك يا " استاذ "

    أحببت مرورك وتعليقك ...

    شرف لي يا " استاذ "

    احترامي
     
جاري تحميل الصفحة...

مشاركة هذه الصفحة