وين اتوظف؟!

الكاتب : عاندني الحظ | المشاهدات : 4,800 | الردود : 19 | ‏20 ديسمبر 2008
  1. عاندني الحظ

    عاندني الحظ بـترولـي نشيط جدا

    207
    0
    16
    السلام عليكم ...

    باختصار غلطت غلطة عمري وتخصصت هندسة كيميائيه وبعد ما تخرجت اكتشفت الطامه الكبرى ان محد يبي يوظفني...
    لا اتقولون قدمي على ال Kpc

    لان راح يقبلوني بالمصافي اللي بالاحمدي ومعناتها كل يوم بسافر للاحمدي و ارد ...وشنو يعني اداوم من 7 لي 3 اشدعوه بخترع الذره ...

    عفيه منو يعرف اماكن تبي تخصصي وفوق هذا يبون بنات ليش ان ديوان الخدمه يقول كل الطلبات اللي يت على تخصصي يبون شباب :(

    يعني شنو يبون شباب ...الحين حتى الشرطه فيها بنات ...
     
  2. Wataniya

    Wataniya بـترولـي نشيط

    تزوجي وصيري ربة منزل
     
  3. عاندني الحظ

    عاندني الحظ بـترولـي نشيط جدا

    207
    0
    16
    :eek:

    تضحك على معاناتي؟:mad:<--- حلوه معاناتي ..مايخالف اخذنا الطرب :p

    وغير ربة منزل شنو في مجال اتوظف ؟:confused:
     
  4. Wataniya

    Wataniya بـترولـي نشيط

    للهندسة الكيميائية تطبيقات في عدة مجالات :

    1-البرتوكيماويات و البترول ( القطاع النفطي )
    2-عملية تحليه المياه (الهيئة العامة للزراعة والثروة السمكية)
    3-البيئة ( الهيئة العامة للبيئة )
    4-الطعام ( البلدية)
    5-الصيدله (وزارة الصحة)
    6-معالجة النفايات ( وزارة الاشغال)
     
  5. عاندني الحظ

    عاندني الحظ بـترولـي نشيط جدا

    207
    0
    16
    هذا الموضوع كنت كاتبته قبل سنه حق انسانه كانت تبي تتخصص نفس تخصصي :)

    اخليكم مع الموضوع ....

    مجالات عمل خريج الهندسة الكيميائية

    مهام المهندس الكيميائي:


    الاشراف على تشغيل المعدات والمصانع الكيميائية.
    تطوير العمليات والمعدات الخاصة بالصناعات الكيميائية.
    تصميم وتخطيط وحساب كفاءة ووضع ومواصفات معدات المصانع الكيميائية.
    متابعة تشغيل المصانع والمعدات الكيميائية.
    تسويق المنتجات والادارة الصناعية.
    ويمكن للمهندس الكيميائي الالتحاق بالجهات التالية:
    مصافي النفط(مؤسسة البترول الكويتية)kpc
    مصانع البتروكيماويات(شركة صناعة البتروكيماويات البترولية)pic
    وحدات تحلية المياه(وزارة الكهرباء والماء)
    مجلس حماية البيئة
    معهد الكويت للأبحاث العلمية
    وحدات معالجة واعادة استخدام المياة(وزارة الاشغال العامة)
    وزارة التجارة والصناعة(المقاييس والمعايير)
    التدريس(جامعة الكويت+الهيئة العامه للتعليم التطبيقي)
    الصناعات الدوائية
    المختبرات التابعة لوزارة الاشغال العامه
    مركز تنمية مصادر المياة(وزارة الكهرباء والماء)
    تسويق المنتجات البترولية
    الصناعات البترولية
    الصناعات الغذائية والمرطبات
    صناعات المواد المتطايرة كالمبيدات وملطفات الجو
    الصناعات البلاستيكية
    التخطيط الصناعي والبيئي
    وزارة الدفاع(الغازات السامه وتحضير المتفجرات)
    وزارة الداخلية(قسم السموم+ومحطات التبريد)
    مصانع اعادة تكرير الزيوت المستعملة
    شركات الاسمنت والطابوق الجيري
    مطاحن الدقيق الكويتية
    تقييم المشاريع الهندسية والفنية(البنوك وصندوق التنمية الاقتصادي)
    المصانع الصغيرة المتعددة للقطاع الخاص


    ________________________________

    اللي حبيت اوصله ان الحجي شي والواقع شي ثاني ....
     
  6. Wataniya

    Wataniya بـترولـي نشيط

    الله يعينج اذا كل هالامكان ومو محصله وظيفه للحين

    بس انشاله بتحصلين الوظيفه المناسبة
     
  7. عاندني الحظ

    عاندني الحظ بـترولـي نشيط جدا

    207
    0
    16
    thanx
     
  8. NokiaCity

    NokiaCity بـترولـي نشيط جدا

    الله يهداج الحين سويتي الطريج للأحمدي سفر ؟؟؟؟؟ ياكبرها عند الله صراحه يب الكويت صغيره و الاحمدي ترا مو بالبعد اللي الكل متصورها واحلى ما فيها قظبي خط الملك فهد الصبح يكون فاظي لأن عكس السير توصلين بدقايق .. عيل شتقولين على اللي متوظفين بالخفجي هذا اهو اللي يسمونه طريج سفر ..

    ومن ناحية الدوام من 7-3 عادي يعتبر زيادة ساعه على الأماكن الثانية ما راح تفرق وايد


    وبالأخير مثل ما قالج الاخ اذا كل هالاوبشنز متوفرة لج تتوظفين عندهم السؤال ليش تشكين قلة الاماكن اللي توظف تخصصج؟
     
  9. الدوسري

    الدوسري بـترولـي نشيط جدا

    248
    0
    0
    هههههههههههههههههههههه الحين الاحمدي صار سفر هههههههههههه

    عيل لو تشوفين حالة واحد من الربع شتقولين دوامه من الجهراء الى مصفاة الشعيبه يعني مو ماكل هوى هههههههه يبا احمدي ربج دوامج 8 ساعات وكله نص ساعه وانتي بدوامج الي يسمعج يقول بتمشين كل التعب عالسياره بس
     
    آخر تعديل بواسطة المشرف: ‏20 ديسمبر 2008
  10. brilliant

    brilliant المـراقب الـعـام

    8,477
    0
    0
    Engineer
    Kuwait
    كل الي ذكرتيه فوق صحيح وظيفي عليها (بالنسبه للقطاع النفطي)
    وزارة النفط الشويخ

    KPC الشويخ
    التسويق العالمي
    ادارة المخاطر
    التدقيق الداخلي
    التخطيط

    KNPC
    المصافي الشعيبه وعبدالله والاحمدي (التخطيط - هندسة التصنيع - العمليات (العمليات ماعتقد فيه بنات ) - التآكل )
    PIMS (مصفاة الاحمدي)
    STOT (مصفاة الاحمدي)
    المبنى الرئيسي في الاحمدي (التخطيط - المشاريع)
    التسويق المحلي (مستودع صبحان - مستودع الاحمدي)

    KOC
    العمليات - المشاريع - التآكل

    PIC
    العمليات - التسويق العالمي - المشاريع

    KAFCO
    المستودعات في المطار

    KOGC
    العمليات والمشاريع الوفره او الخفجي

    هذا الي في بالي الحين للمهندس الكيميائي وفي غيرهم كثير

    واتمنى لج التوفيق يا باش مهندسه
     
  11. طموحة

    طموحة بـترولـي نشيط

    130
    0
    0
    التدريس(جامعة الكويت+الهيئة العامه للتعليم التطبيقي

    انا اخوي تخصصة هندسة كيميائية و الحمد لله قدم على الجامعة و صار معيد عندهم

    انا اللي اعرفة ان الجامعة يبونكم و تخصص نادر .. شدي حيلج و قدمي مرة ثانية

    موفقة ان شاء الله
     
  12. عاندني الحظ

    عاندني الحظ بـترولـي نشيط جدا

    207
    0
    16
    انزين ليش معصب؟:confused:

    انا بنظري ان الاحمدي بعيده عن بيتنا وعن منطقتي ومستغربه انك تشرحلي الطريج اللي يودي للاحمدي وانت مو

    عارف وين انا ساكنه:p

    ثالثا من 7 لي 3 مو مثل من 8 لي 2 بالوزارة يعني فرق ساعتين اسوي فيهم النون وما يعلمون ...نص يومي دواااااام

    انا مو صبي عشان اكرف ...الكرف خليته لكم

    واذا على الاوبشنز اللي ينكتب شي والواقع شي ...للعلم فقط ...
     
  13. عاندني الحظ

    عاندني الحظ بـترولـي نشيط جدا

    207
    0
    16
    لا الاحمدي مو سفر ....بس يبيلي اصلي الفير واشغل سيارتي وادعي اوصل ع ال7

    مادري انتو اتدوسون على جم ؟

    لا ولاحظ لي رحت اهناك اتلاقي عسكريين احلى شعووور :)

    ويع زين :p
     
  14. عاندني الحظ

    عاندني الحظ بـترولـي نشيط جدا

    207
    0
    16
    اخوي انا قتلك اللي ينكتب شي والواقع شي ثاني ...انا راجعت ديوان الخدمه ولقيت الطلبات كالآتي

    1 مهندس كيميائي ذكر لوزارة الدفاع
    1 مهندس كيميائي ذكر لهيئة التطبيقي
    17 مهندس كيميائي لوزارة الكهرباء والماء هم يبون ذكور

    شفت من بين كل اللي كتبته بس هالشي يناسبني

    وزارة النفط الشويخ

    KPC الشويخ
    التسويق العالمي
    ادارة المخاطر
    التدقيق الداخلي
    التخطيط
    بس اللي اعرفه ان اللي يتعين اهناك يبيله واصطه محترمه ليش ان الشويخ مكانها وايد زين ...
     
  15. عاندني الحظ

    عاندني الحظ بـترولـي نشيط جدا

    207
    0
    16

    اي صح كلامج ناويه اقدم ع الجامعه بس توه ما بطلو باب التسجيل ...حتى انا اختي مهندسة كمبيوتر وتعينت بالجامعه
    ومشكووووووووووووره وايد حبيبتي :)
     
  16. Wataniya

    Wataniya بـترولـي نشيط

    [quote بس اللي اعرفه ان اللي يتعين اهناك يبيله واصطه محترمه ليش ان الشويخ مكانها وايد زين ...[/quote]



    والله انا استغرب اللي يتكلم عن الواسطه

    انا دخلت النفط والحمدلله بدون واسطة احد وكثير من الناس نفس حالتي

    انتي قدمي وواسطتج رب العالمين انشاله
     
  17. عاندني الحظ

    عاندني الحظ بـترولـي نشيط جدا

    207
    0
    16


    والله انا استغرب اللي يتكلم عن الواسطه

    انا دخلت النفط والحمدلله بدون واسطة احد وكثير من الناس نفس حالتي

    انتي قدمي وواسطتج رب العالمين انشاله[/QUOTE]


    اخوي اذا تذكر انا قتلك لي رحت المقابله بتشرط واقولهم ابي الشويخ لان الاحمدي لو يعطوني بالشهر 5000 (مهر عروس) ما راح اوافق

    بس انا شغلي مصافي نفط وهذيلا بالاحمدي بيوظفوني بالشويخ على اي اساس؟؟لازم واسطه عرفت؟وما اصير مهندس كيميائي جنه اصير مهندس بس شي ثاني ...مادري اللي شرحلي ذيج المره شنو قالي
     
  18. NokiaCity

    NokiaCity بـترولـي نشيط جدا

    ههههههههههههههه وين معصب الله يهداج يتروالج:p

    الطريج اللي وصفته خط الملك فهد هذا ماله شغل بمكان سكنج هذا اهو الطريج الرئيسي اللي يطلع عالاحمدي الا اذا كان بيتكم بالسعودية مثلا هذا شي ثاني:p

    ثالثا خلاص يبا لا تتوظفين بالنفط محد غصبج بس جان زين كنتي موجوده بفتره الاعلان اللي طاف و شفتي الوضع شلون الكل يتمنى وظيفه بالنفط و انه ينقبل .

    الله يوفقج وتلاقين المكان اللي بخاطرج فيه


    تحياتي
     
  19. عاندني الحظ

    عاندني الحظ بـترولـي نشيط جدا

    207
    0
    16
    مادري قلت هذا يداوم من 7 لي 3 اكيد بيحط حرة دوامه فيني :D

    بس اللي انا مستغربته اشدراك ان بين منطقتي والسعوديه شارع؟؟:D بلشت احس انك ساحر:p

    واذا على النفط ييبولي واسطه حق الشويخ واتوظف عندكم:p...والله انا خوش موظفه ومنضبطه ومالي شغل باحد وحتى اذا مراقب ظلمني اقوله مشكور عمي ...اتحداكم عندكم احد مثلي <---مو صج طبعا

    و يسلموووووو اخوي ما قصرت على هالدعاوي الحلوه ....
     
  20. المنصور

    المنصور بـترولـي خـاص أعضاء الشرف


    قال الله تعالى

    بسم الله الرحمن الرحيم

    " وَفِي السَّمَاء رِزْقُكُمْ وَمَا تُوعَدُونَ "

    سورة الذاريات - الآية 22
     
جاري تحميل الصفحة...

مشاركة هذه الصفحة