أنا ومابعدي الطوفان !!

الكاتب : رحال | المشاهدات : 457 | الردود : 2 | ‏10 ديسمبر 2008
  1. رحال

    رحال بـترولـي مميز

    586
    0
    0
    السلام عليكم يا كرام ،،،

    سمعت وسمعنا كلنا إن في برنامج راح ينعرض بهالشهر المعين ... وفجأة يطلع قرار ثاني يلغي عرض هالبرنامج !!! وبعده بساعات تتوزع المسجات بأن " بوفلان " مو عاجبه هالقرار وراح يكون له تعليق بجرايد اليوم التالي ....

    الصفحة الأولى من جريدة معنية بالموضوع بالبونط العريض " كفانا حماقات " !!! أووووف قوية حدها الكلمة قوية ... ولكن يا ترى ليش ... آها اليوم الخبر بفلوس باجر تلاقيه يتوزع عند "آغا" راعي البقالة مع باجي ردود الخرده ... ويطلع إن " بوفلان " ما قال هالكلام إلا عشان يبي يضرب أولاً قرار صاحب السالفه الأساسي إللي اهو صاحب البرنامج !!!! وبالدرجة الثانية لأن " بوفلان " هم عنده نفس البرنامج بطريقة ثانية "أهبط" و " أدنى " من درجة البرنامج اللي كان مفروض ينعرض !!!! طيب والناس !!! طقهم ... (بدون تعليق) !!!

    عموماً ... نفس ما قال سعيد صالح بمسرحيته التي مازالت تمتعني (مدرسة المشاغبين) مع حديثه للفنان / أحمد زكي "رحمه الله " في مقطع اللي كان يرويله إن اهو ويه أمه يقعودن ويحشون بخلق الله وبالخاتمه يقولون ( دع الخلق للخالق ) !!! مالنا شغل بسالفة " بوفلان " وخرابيطه ... وخلونا بموضوعنا !!!!

    طرح مقترح لإلغاء قرار حالي مطبق بالشركة !!!! المشكلة إن القرار والاقتراح من نفس الشخص اللي صدر القرار منه بالدرجة الأولى !! ما عليه تحملوني شوي ... راح أقولكم السالفه بس أبي أقولكم شغله إني كنت أحد المشاركين بالاجتماع الذي كان بصدده وضع هذا القرار التعسفي واللي للحين أذكر يوم قالوله الحاضرين يا بوفلان تره هالقرار راح يعفس وايد شغلات لا عالبال ولا بالخاطر !! كان رده بسيط جداً " اللي مو عاجبه يطلق من القطاع (اللي اهو قطاع ابوه) " عموماً ... مشىى القرار بسلاسه ولكن بمشادات بين المسؤول وموظفه بتطبيقه !!! أوكي ... خلاص بقوله " قرار تجزئة الإجازات السنوية " !!!!

    حبايبي ... اي أبشركم بعد اسبوع في اجتماع بالمطبخ (اللي اهو مركز الأم) المؤسسة مع إداريين الشركات التابعة لها بمناقشة أمور كثيرة ومن ضمن الأجندة هاهاهاهاهاهاهاهاها " إلغاء قرار التجزئة " ليش !!! لما فيه من تعطيل للانتاجية خصوصاً بالشركات الانتاجية يا حلاتنا والله وقبل لمه قمنا نقول هالكلام بالاجتماع الحبيب بوراس يقول اللي مو عاجبه يمشي !!!!

    انزين باب الأسئلة مفتوح !!! شنو الاستفادة من وضع القرار في الدرجة الأولى وصرف الآلاف لإنشائه ووضعه وتطبيقه بالنظام الآلي !!! شنو الاستفادة بعد هاللويه هذه كلها وبعدين إلغائه !!!! يعني لا طبنه ولا غدى الشر !!! قرار يضرب نفس القرار وإنت يالمسكين انطر الربيع !!!!

    غمزه: شرايك بالاجتماع !!! الصراحه كان اجتماع ماراثوني !!!! ها ... والله خوش مفردة خل استخدمها بالشركة يمكن أقدر أشيخ على اللي اجتمع وياهم !!! بوفلان لو نقاست بالمفردات ... جان مسكت الكرسي آنا قبلك(كليك)
     
  2. المشاكس

    المشاكس بـترولـي خـاص أعضاء الشرف

    998
    1
    0
    تبي الصراحه مافهمت شي .... حط القرار وشال القرار ..... شنو تبي بالضبط يا رحال علشان نعرف نرد عليك ....؟؟؟؟
     
  3. رحال

    رحال بـترولـي مميز

    586
    0
    0
    هلا بالمشاكس ....

    اذا انت بالشركة راح تعرف شنو أقصد !!!!

    سامع عن قرار تجزئة الاجازة والا لأ !!!
     
جاري تحميل الصفحة...

مشاركة هذه الصفحة