ما لها الا عيايزها

الكاتب : om 3zooz | المشاهدات : 530 | الردود : 9 | ‏29 نوفمبر 2008
  1. om 3zooz

    om 3zooz بـترولـي نشيط جدا

    262
    0
    0
    engineerah
    q8
    منقول من جريدة القبس : بقلم الكاتبه ضحوك بنوان البنوان

    يعل حوبتنا ما اتعدى كل من حاسنا، يعلهم ما يربحون إن شاء الله، عسى من حاس دنينتا ينحاس بدنياه طالبينك يا كريم، يالله تنصر كل مظلوم على كل ظالم فاسد سارق بصام نهاب بواق ذكرا كان أم انثى يالله يا كريم، يعلّ حوبتنا ما اتّعداهم، وعساه ما يربح كل من تلف هالديرة الطيبة، ولا يتهنّى كل من عفس هالدانة قولوا آمين، يعل من منع الفرح عن أهل الكويت الحوسه اللّي تحوسه، يعل كل من عفس منهج دراسي راقي ومنع ثقافة إمسنعة ونخر مثل السوسه في قلوبنا ونعبها وياب لنا الضغط يعلّه الحساب العظيم يارب العالمين، وعسى من نهبنا النهيبة إن شاء الله، ويعل كل من شهد زور بتجنيس يشوف الحوبة بدنياه، وعسى تسيب اعصاب كل من ترس ديرتنا عمالة سائبة، ويعل كل من فرق سني عن شيعي الفرقا اللّي تشيله، وعسى كل من خسبق لنا مشروع عدل يتخسبق في مشيته إن شاء الله.
    الشكوى لله ما بقى لنا الا الدعاء ما اخذوه منا، ادعوا، ادعوا ليل نهار عسى الله يعدل اوضاعنا وياخذ لنا حقنا وحق هالأرض الطيبة تراه سميع مجيب، والله إن لنا حوبة يالكويتيين تهد جبال عسى إن شاء الله حوبتنا ما اتعدى الظالم ياكريم.
    اعفسوها، اتلفوها، مصخوها كلمن تيرّع! لا باركت فيهم، محنا عارفين شنبدّي؟ عوير وزوير وإلاّ انجابل عماة عين نائب أو ضعف وزير؟! راح الضمير موليه؟ همجية بهمجيّة! يا ويلكم من الله، الكويت ما تستاهل هاللّي قاعد يصير فيها، والله حرام! لويتنا لوية! ما قمنا نعرف منهو طقاقنا! هذي حالة عاد! ادعوا.. ما لنا إلاّ الدعاوي وربكم رب كريم ما يقصر... يعل الله يزول كل ظالم قولوا آمين.
    ما غير هذا مشفوح فرحان بالمكرفون، وإلا ذاك مينون قاعد بس حق الفزعة، وهذا اللّي ما يعرف كوعه من بوعه يالله ولبه يرزز اربوعه، وذاك قطّع لنا الديرة تقطيع ما هو فاهم الفرق بين التشريح والتشريع، وهذا اللّي في بلاعيمنا نشب ما طخ لين قبض ونهب، وذاك اللّي ما غير يبوق لاقي له حرامي مثله يفج له البوك.
    هذا غير اللّي قاعد على قلوبنا حاط دوبه دوبنا يبي يعلمنا السنع عشتو فقيه يمنع ويحرم! وإلاّ اللّي ما مهنته إلا يبصّم، وكلهم صاروا علماء وأدباء وفي البورصة والسياسة خبراء! ولو نقول لواحدهم اكتب لنا حرف والله ما عرف الهاء من التاء!... خسبقوا الديرة يعلهم ما يربحون إن شاء الله.
    طارت الفلوس وطار البرميل ووراه السهم وراح التعليم وضاعت القيم، وحرّموا الفن وتلفوا الأدب ومنعوا العلم، جلييلين الحيا بياعيين الذمم، والمصيبة إنه زايده قلة الادب! أبد لا خليتوا لنا لا موروث ولا عرفنا لنا مستقبل! خلاص ما بقى بالكويت شي ما نهبتوه، قضت الديرة عفستوها! مسحتوها! ايدنا على قلوبنا ما ندري اشنبنصبح عليه باجر! ما نعرف شنهي النهاية ولا متى أصلا هالنهاية؟ الكويت صارت تقرش فاضيه خاليه! فرغتوها من كل شي حلو، لا ناسها هم ناسها لا سنعها هو سنعها! بس بس عيزنا! مااااااصارت، طلعت روح روح هالديرة! من انتوا واشتبون فينا؟ يعلكم ما تربحون إن شاء الله!.
    * * *
    • المقال الوارد أعلاه مرفوع عنه القلم ومخصص بالطلب لتبريد قلوب الكثيرين وأهمهم الجدات المبروكات عسى الله لا يخلينا منهم إن شاء الله، يرجى من الجميع ولما تقتضيه المصلحة العامة للبلاد تعميم «الدعاوي» الواردة فيه على كل عجوز كويتية «مصلصله» فدعاؤهن بإذن الله مستجاب..
     
  2. q8security

    q8security بـترولـي خـاص أعضاء الشرف

    بل بل شهالدعاوي

    خخخخخخخخخخخ
     
  3. جونم جقرم

    جونم جقرم بـترولـي خـاص أعضاء الشرف

    8,202
    0
    0
    منــدوب نفطـي (: ---> 66698897
    خـيـمـة فـُـوق طـِـعـسـ
    كـــــــــــاك وكـــــــــاك وفوقهم بعد كـــــــــاك
     
  4. dehen_3ood

    dehen_3ood بـترولـي خـاص أعضاء الشرف

    يعل تييهم من وليٍ حكيم​
     
  5. om 3zooz

    om 3zooz بـترولـي نشيط جدا

    262
    0
    0
    engineerah
    q8
    ثانكيو يا اخوان ويا اخوات على المرور :)
     
  6. ABDULLAH

    ABDULLAH قــلــم بــتــرولــي أعضاء الشرف

    10,727
    1
    36
    موظف في ش نفط الكويت
    وطن النهار - الكويت موطني
    إذا ينصلح حال الديرة بعد هذا الدعاء ،

    آمييييييين

    و الله يحفظ عيايز الديرة

    شكرا أم عزوز

    و بإنتظار اللي حاسوا الديرة يخافون من حوبة المحتاسين
     
  7. Workers

    Workers إدارة المنتدى

    7,767
    30
    48
    ذكر
    الكويت
    آمين :)
     
  8. رحال

    رحال بـترولـي مميز

    586
    0
    0
    لها ولأمهاتنا طولة العمر انشاء الله ... هم بركة المكان وفنر البيت ...

    غمزه: عيل من "فلان" بوسنسون !!! لي طويل العمر .... قالوا لكل زمان رجال ودولة !!! مو لكل زمان سناسين وطبالة(كليك)
     
  9. om 3zooz

    om 3zooz بـترولـي نشيط جدا

    262
    0
    0
    engineerah
    q8
    رحال انا ما افهم غمزاتك كلش توني صغيره على السياسه p:
    شكرا على مرورك الطيب
     
  10. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    هههههههههههههههه عجيب هالدعاء .
    عاد الوالده دعوتها وحده بوحده بس المشكلة ما ترضى تدعي على احد تقول حرام اخر واحد دعت عليه صدام و بعد ما فطس خلاص ما عندها احد تدعي عليه : ) .
     

مشاركة هذه الصفحة