يعقوب الردي ( قصة من تأليفي )

الكاتب : شركة من صادها عشى عيالة | المشاهدات : 1,347 | الردود : 22 | ‏2 سبتمبر 2008
  1. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    بسم الله الرحمن الرحيم

    دوانية بمشرف توجد بها جميع وسائل الترفية من نظام سينمائي زائد جهاز العرض ( البروجكتر ) معلق بالأعلى و لا ننسى الرسيفر الذي يحوي على جميع القنوات الرياضية زائد قنوات الأفلام و في الزاوية هناك بليستشين 3 و اكس بوكس .

    يتجم ابناء من عائلة صغيرة كل يوم سبت لكي يتواصلوا مع بعضهم البعض رواد الدوانية تتراوح أعمارهم بين 17 و 32 .

    الساعة الان تشير الى السابعة مساء ينادي احمد ابن عمة خالد صاحب الديوانية : متى تبدى مباراة ميلان و الانتر .

    خالد : الساعة 9

    في هذه الأثناء يدخل ابن عمتهم يعقوب و يبادر بالسلام على كل من احمد و خالد ... يعقوب شاب صاحب بشرة برونزية مميزة و ملامحه حادة و له فك بارز قليلا ذو طول فارع يصل الى 185 و جسمه رياضي يضيف اليه شعرة الأسود الناعم الكثير من الجاذبية يبلغ من العمر 27 عام أما احمد شاب بشرته بيضاء مع القليل من الحمرة تكسو خديه تقطعهما غمازتان .

    تقوم والدة خالد بمناداته فذهب لها و يدور حوار بين يعقوب و ابن خالة احمد حيث انه لم يرى بعضهما من زمن طويل يبادر يعقوب بصوت خشن.

    يعقوب: و الله كبرت و صرت ريال

    يسكت احمدخجلا و يكمل يعقوب

    يعقوب : هاه تخرجت و لا لي الحين أذكرك دريس و تمشي يم الطوفه !!!

    احمد : ( يستجمع قواه ) اي الحمد لله تخرجت و انقبلت بالهندسة

    يعقوب : ما شاء الله يا الله شد حيلك ترى الهندسة يبيلها مجابل مو عبالك داش علوم اجتماعية امتحاناتك صح و غلط .

    احمد: ان شاء الله عشان اقدر ارد و لو جزء بسيط من جزى هالبلد علي و اساهم في تطويره و تنميته .

    يعقوب : ( يبتسم ابتسامة صفراء ) احمدو شنو انت قاعد تكملني و لا تكتب موضوع تعبير .

    احمد : ( لا يرد على يعقوب و يواصل حديثة عن تنمية البلد )


    ينظر يعقوب الى احمد بعينية العسلتين الحادتين و يسأل ... انزين فرضنا انك تخرجت و ياتك فرصة لي عندك عشان تستفيد من وظيفتك تقتنصها !!؟

    احمد : ( يجاوب بانفعال و صوت واثق ) اذا كان هالشي منافي للقوانين و يضر البلد شي اكيد ما راح اقتنصها و اعتبرها خيانة مو فرصة .

    يعقوب : انت عايش بعالم خيالي راح تصحى منه لما تكبر و تشوف الدنيا ... تعتقد هالمسؤولين و التجار شلون وصلوا بالاخلاق و المبادئ !!!

    احمد : ( يرد بكل ثقة ) مالي شغل فيهم

    يعقوب : احمد شرايك نطلع نقز بالسيارة على ما ايوون الشباب

    احمد : اوكي

    يسبق يعقوب احمد بالصعود الى سيارته لكزس ال اس 460 ذات لون لؤلؤي مميز ثم يصعد احمد و يضل محدقا بالشاشة اللتي تنقل عبر الكاميرا الخلفية صورة لما هو خلف السيارة يقطع يعقوب اعجاب احمد بسيارته و يبادره
    يعقوب : تعتقد شلون شريت هالسيارة

    احمد : قرض ؟؟؟

    يعقوب : ( يقولها بتعالي )) كااش

    احمد تعلو نظرة الاستغراب وجهه خصوصا انه يعلم بحالة زوج عمته المادية حيث انه لا يملك الا معاش التقاعد اما يعقوب فهو موظف بوزارة التجارة لا يملك غير راتبه و ليس لدية مصدر دخل أخر .

    يعقوب : لو انا ضليت مثلك متمسك بالمبادئ و الاخلاق جان تلقاني الحين اسوق مكسيما لا و مطلوبة بعد .

    احمد : شلون يعني

    يعقوب : يوم توظفت بوزارة التجارة كنت انسان جاد بعملي و حاب اني اوصل بمجهودي و ما كنت أغيب و لا يوم و بنفس الوقت متقن شغلي في اصدار التراخيص طبعا بعد كل هذا ما كنت اسمع كلمة مشكور و مشيت على هالحال ما ابي غير جزى ربي الا ان في يوم رفضت معاملة حق تاجر عود ساعتها انقلوني الى منطقة بعيدة و جمدوني في ادارة حماية المستهلك عاد شوف اوتي ما يضرب و تلفزيون ما فيه صوت و من هالسوالف.

    احمد : اوكي ليش ما حاولت توصل صوتك حق عضو منطقتك .

    يعقوب : ( ينظر بعصبية لاحمد و يقول ) عضو منطقتي ما يرد على احد لانه ناجح بفلوسة حاولت اكلم اعضاء من خارج منطقتي بس محد لقاني بال لاني ما اتبع اي تيار و لاني من قبيلة .

    يتم هذا الحوار بين يعقوب و احمد و هما يسيران في شارع الخليج بكل هدوء و سلاسة يحاول يعقوب استمالة فتاه على يمينه تقود سيارة بي ام زد 4 سوداء .
    يبادر يعقوب : شوفها بعد عمري مجكنمة تسوق مجكنمة .يكمل يعقوب حديثه و اهوا يقوم باللحاق بها .
    يعقوب : ايام الجامعة ابن التاجر اللي شلعني من مكاني كان معاي ... كان ياخذ الامتياز بإسم عايلته او بواسطات ابوه و ما يقصر بالهدايا انا ما انكر انه ذكي لكن مستواه ما يعطيه ياخذ الاول على الدفعة و يتفوق علي بالظلم وانا اللي كنت معقد ادرس ما يقارب 8 ساعات متواصلة يوم الامتحان هذا غير الايام العادية حشاك كنت خبل !!!
    هنا يقوم يعقوب بمسايرة صاحبة البي ام و يبتسم لها محاولا لفت انتباهها مستغلا وسامته .
    يعقوب : تهقى ايب راسها و لا لا ... بشوف هالملوكة تحب البرونزي و لا لا .

    تنظر له الفتاه و تعجب به على الفور فتبادرة بأبتسامة خجولة .

    يصرخ يعقوب : ابوي انتي اروح لج فدوة و ارجع بتكسي
    تصل الفتاه عند مدخل مجمع الفنار فيقوم يعقوب بالوقوف على جانب سيارتها غير عابه انه يقوم بأعاقة الطريق.
    احمد : ( تزداد ضربات قلبة و يشعر بأضطراب ) يعقوب انت مسكر الشارع وراك.

    يعقوب : شفيك يا حظي مستحي أكثر من البنت ... انا مستعد عشان هالمجكنمة اسكر خط السريع .

    يشير يعقوب للفتاه ان تنزل نافذة السيارة

    يعقوب : ترى انا لاحقج بس عشان اسألج السيارة للبيع ( يقولها و اهوا مبتسم )

    الفتاه : ( تتكلم بصوت خافت يكاد لا يسمع ) لا مو للبيع .

    يعقوب : تدرين انه السيارة مفصلة عليج

    احمد : ( وجهه يحمر و لا ينظر الا للامام ) يعقوب انت مسكر طريج شارع في سيارة

    يعقوب : ( لا يفهم ما يقوله احمد) يا معود برقمها و امشي لا يصير فيك شي و ابتلش .
    الفتاه بيضاء كالقطن عينها متوسطتين الحجم لكن جميلتين و لديها انف صغير و شفتين متوسطتين الحجم الشفة السفلى اغلظ من الشفة العليا .
    بعقوب : سجلي رقمي ست ألاف .... يكمل باقي الرقم و يطلب منها الاتصال بالحال لكي يحصل على رقمها .
    يكمل طريقة راجعا لشارع الخليج العربي ..يعقوب : اي عاد اقولك تخرجت و قطوني وزارة التجارة اما ولد التاجر و الحسب و النسب كانت وظيفته تنطرة في الهيئة العامة للاستثمار .

    احمد : ليش رقمتها اهيا عاجبتك .

    يعقوب : اي حلييوه اللي اكلمها وايد احلى منها و هذي بحطها سبير

    يشير يعقوب الى احد المجمعات و يقول : تعتقد انه صاحب المجمع بناه بالمبادئ و الاخلاق ... شايف هالمبادئ ما تبين حتى غرفة كيربي .

    يعقوب : شوف انا طلعت معاك عشان اعطيك فكرة عن العالم الحقيقي اللي احنا نعيش فيه مو اللي قريت عنه بالكتب بخليك تشوف الدنيا على حقيقتها .

    يعقوب : تعتقد اللي ماسكين مناصب هذيل كلهم شهادات و خبرة و كفاءة ... طل !!! هذيل مجموعة من المتنفذين اللي دمهم ازرق ينتمون لعائلات معينة ذات اصول مادية ضخمة .

    احمد : انت شنو اللي غيرك

    يصلان لجانب ابراج الكويت

    احمد : انت وين رايح ؟ لا يكون تبي ترقم وحده ثانية

    يعقوب : ( يتلفت ) ودي بس ما اشوف شي حلو ... شوف اللي على اليسار جنها سيدورف لا و تبتسم بعد .

    يعقوب : بوديك اكبر مسرح بالكويت الدولة تصرف عليه ملايين الملاين و دايما مسرحياته بايخة و مملة و كل الممثلين اللي فيه اعمارهم فوق 32 اعتقد و على فكرة ما في ممثلات حلوات .

    احمد : اي مسرح

    يعقوب : بوريك اياه بس اول خل امر سوق شرق نتعشى ... باخذ صمونه من سب وي .

    اثناء يسأل يعقوب احمد تبي تشوف المسرح ؟؟؟ هذا اهوا على ايدك اليسار .

    احمد : اهاا مجلس الامة

    يعقوب : صفقات مناقصات تجنيس توظيف كله بحسابة .

    احمد : شنو اللي تبي توصل له ؟

    يعقوب : ابيك ما تصير مثلي تصحى متأخر ابيك من مرحلة الجامعة تضبط الدكتارة عشان ما تتعب نفسك بالدراسة و غيرك ياخذها باردة مبردة و تضبط بنات فلوس عشان تقزرها عليهم و لما تتوظف تنطر اي فرصة عشان تقدر تستفيد ؟

    احمد : كل هذا سويته عشان الوظيفة و ليش اضلموك و عطو ابن التاجر اول على الدفعة ؟؟؟
    يعقوب : لا مو بس هذا ... اللي كسر ظهري الحب

    أحمد: زين أنت تحب !!؟

    يعقوب: ( ينظر له و هو مبتسم ) أي نعم حب دام 6 سنين من شفتها اول كورس لي بالجامعة و قلبي تعلق فيها ايامها كانت المحاضرات مختلطة قبل ما يبطبقون منع الاختلاط , كنت أتابع كل حركاتها .

    احمد : ( يقاطعه ) شنو كنت تراقبها !!؟

    يعقوب : أي كنت أتابع كل حركاتها شلون تتصرف طريقة كلامها ضحكتها حتى لما كنت امشي بالأسكوير و المحها أتعمد أمر يمها عشان أشوفها و اسمع شنو تقول .


    أحمد : بنات ماوراهم غير عوار القلب .

    يعقوب : ( يضحك بصوت عالي ) يا أنت يا الخبرة ضبطنا

    أحمد : طل ما أعرف غير الوالدة .

    يعقوب : ( يكمل وصفة للفتاة ) بشرتها بيضة و لون عيونها ما تقدر تعرف أهوا شنو من الالوان اخضر لا ؟ ازرق هم لا؟

    احمد : رمادي

    يعقوب : ( يكمل و هو سرحان في عالم ثاني ) أي رمادي شعرها اسوووود من سوادة يميل للازرق تحت الشمس و لمعته تكسر العين .

    احمد: ما عندها اخت صغيرة ( يقولها و اهوا يضحك )

    يعقوب : ( سرحان بجمال حبيبته ) لاهي ضعيفة و لا متروسة و الطول حلو عيونها كبار و خشمها صغير و حاد

    احمد : احمد على هالوصف اهيا و مونيكا بلوتجي ديز ديز ... انزين قولي شلون اطباعها
    يعقوب : دمها خفيف و دلوعة لكن بوقت الصجية تشوفها حازمة و قوية .

    احمد : شلون

    يعقوب : شوف مرة يت المحاضرة متأخرة عند دكتور معروف انه سمعته تعبانه و يدور بنات المهم في ذاك اليوم أهوا حب يستغل تأخيرها و يتحرش فيها جدام الكل .

    أحمد : ( يطالع يعقوب بإستغراب ) معقولة دكتور يتحرش بالطالبات

    يعقوب : مو أقولك أنت طيب و على نياتك ... قالها على جمالج لو تغيبين اسجلج حضور طبعا أهيا ساكتة لين قالها الحلوات يقعدون جدام و الجياكر ورى تدري شنو سوت ؟؟؟

    احمد: ( يحرك رأسه نافيا )

    يعقوب : عطته ظهرها و اهو يتكلم يتكلم و سحبت من المادة.

    أحمد : أنزين حبكم من طرف واحد

    يعقوب : لا ثاني كورس حاولت أتعرف عليه و بكل مره تصدني بشكل ذرب كنت اقعد يمها بالأمتحانات و أساعدها في حالة احتاجتني و لين في يوم طلبت منها نوتتها على أساس انه طايفتني جم محاضرة طبعا كله كلك هني حطيت رقمي بالنوته مع ملاحظة صغيرة ( عجبني جمالج لكني حبيت شخصيتج )

    أحمد : يعني هذي بداية خيانة مبادئك يوم تقعد تغششها بالأمتحانات

    يعقوب : عشانها كنت مستعد اسوي أي شي ان شاء الله لو يفصلوني من الجامعة ز

    يعقوب : ( ياخذ نفس عميق ) مع الوقت حبينا بعض بعد ما شافت اهتمامي فيها , ايام ندرس مع بعض بالساعات على التلفون بعدين تطورنا قمنا ندرس بكفي هذا غير إني كنت أتعمد أخذ نفس المواد اللي تأخذها لدرجة إني أخرت تخرجي عشان لا اخليها بروحها كورس , لما كانت تمرض اسهر معاها بالليل حتى بالصيف ما اسافر االا بالوقت اللي تكون فيه اهيا مسافرة عشان لا أغيب عنها و لا يوم .

    أحمد : شنو صار بعدين

    يعقوب : ( يضحك بطريقة هستيرية ) ماكو ولد التاجر اللي اخذ مكاني و حطوه اول الدفعة تزوجها

    أحمد : شنو

    يعقوب : هذا اللي صار بعد التخرج تقدم لها لأنه الكل حاط عينه عليها و يدري انها ثقيلة أما جمالها فهاذي حكاية ثانيه تروح لها حليمة فدوه .

    احمد : شلون واقفت

    يعقوب : كانت اذكى مني فضلت الفلوس و النفوذ و السلطة على الحب و الجمال و العشرة الحلوة .

    احمد : و انا اقول شفيك مشفوح تمشي و ترقم اثاري قلبك محترق .

    يقاطعة يعقوب : احمدوو شوف اللي على يمينك حلوة


    يقوم بالاقتراب منها أكثر ...
    يعقوب : لا ما تنفع متروسة ما احب هالنوع .

    احمد : يعني انت يوم رفضت معاملة التاجر رفضتها عشان تنتقم من ولده ليش اخذ اللي تحبها مو لانه المعاملة مخالفة

    يعقوب : لا هالحجي قبل ما ياخذها

    احمد : ( يفكر مده بعدين يتكلم ) طلبتك

    يعقوب : أفا عليك عطيتك

    احمد : ابيك توديني المقبرة

    يعقوب : نعم !!!

    احمد : انت نصحتني الحين دوري انا انصحك ممكن ؟

    يعقوب : هالطلعة ما ادري شلون صايرة .... ( يوافق على الذهاب بعد الحاح احمد )

    احمد : انت وين رايح ؟

    يعقوب : بوديك مقبرة شرق ؟

    احمد : لا ابي مقبرة صليبيخات

    يعقوب : أهو مبين يوم اسود من اوله

    احمد: و رجاء بس خز بالبنات حاس انه رقبتك بتنمصع من مكانها

    يعقوب : حاضر عمي

    بعد فترة من الصمت اثناء الذهاب الى مقبرة الصليبخات

    يعقوب : ( يقوب يتكلم بقلب ميت ) امر تبي مقبرة السنه و لا الشيعة

    أحمد : ( يبتسم حتى تظهر غمازتيه ) تدري شنو انقهر لما اعرف انه في شهداء ماتوا بمعركه وحده و مكان واحد و فرقوهم بين مقبرة السنة و الشيعة .

    يعقوب : ( بدى يتأثر ) كلامك عدل انت تقصد شهداء بيت القرين .

    احمد : أنت مو قلبك ميت و شجاع ابيك تطمر معاي لي داخل المقبرة

    يعقوب : صج ما تعرف ... لا انا بعدي الحارس مبلغ و يدخلنا


    بعد ما دخلوا المقبرة و راحوا يتمشون فيها و يلاحظون الوحشة و الغربة فيها خاصة بالليل .
    أحمد : أنت تشوف في فرق بين الفقير و الغني بين الوزير و المواطن بين المتنفذ و اللي على قد حاله .

    يعقوب : أي كلامك عدل لكن الوزير و التاجر و صاحب النفوذ لعب بايده و ريوله و عاش حياته

    احمد : شكثر عاش 40 سنة 60 سنة يمكن 80 سنة لكن بالأخر وين مكانه و شلون راح يقابل ربه

    يعقوب : ( ينزل راسه و يبلع ريجة و يمنع دموعه من النزول )

    أحمد : قولي منو يفيد الضالم و اكل مال اليتيم و المرتشي و الكاذب و المنافق لي دخل حفرة عرضها متر و طولها مترين

    احمد: راجع نفسك جم مرة ضلمت جم مرة اخذت رشوة جم بنت لعبت عليها .

    يعقوب: ( عينيه تتلألأ من اثر الدموع )

    أحمد: انت ردي انهرت بسرعة بسبة بنت و ما قدرت تمشي بطريج الخير تدري ليش لانه صعب و معظمنا ما يمشي فيه مو لانه ما يدله لاا لانه كلنا نعرف انه طريج صعب و متعب و محتاج صبر و أيمان .

    أحمد : نصيحة هالسنة فكر تروح الحج لكن قبلها اد الواجبات اللي عليك و راضي كل انسان ظلمته و رجع كل فلس حرام اخذته.

    يعقوب : ( حاس بالانكسار ) انا كنت أعتقد انك صغير و على نياتك ما تعرف شي بالدنيا لكن اشوف نفسي الحين صغير جدامك .

    احمد : ( يمازح يعقوب عشان يهديه ) ما ودك نحرك مو حلو جذي ياين مقبرة تال اللي تقول مواعدين ينيه و ابيك تدق على اللي رقمتها قبل شوي .

    يعقوب : ( يمسك التلفون ) الظاهر عندها انتظار

    احمد : ممكن توديني البيت


    بعد نصف ساعة
    احمد : دق عليها مرة ثانية

    يعقوب : ( يتصل ) هم عندها انتظار

    أحمد : ( يمسك ايد يعقوب ) مثل ما انت تلعب اهم يلعبون و هذا اخر شي تتعلمه مني .
     
  2. CatwomaN

    CatwomaN بـترولـي خـاص

    1,566
    0
    0
    Q8
    شركه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


    [​IMG][​IMG][​IMG][​IMG][​IMG][​IMG][​IMG]


    امممممم .. متأكد انت اللي كاتبها ؟؟؟؟

    ماشالله عليييك !! اندمجت و قمت اضحك و اتحلطم و عجبني بو بشره ابرونزيه .. لوووول بس بعدين طاح من عيني لووووول


    مشكووووووووووور و يعطيييييييك الف عافيه .. و لو أنا منك ايمع جم قصه و انزلهم ابكتاب .. غيرك مو احسن منك :rolleyes:

    حط العنوان .. اعيال الكويت ;)[​IMG]




     
  3. تايتنك

    تايتنك بـترولـي خـاص

    1,239
    0
    0
    عكست قليل مايدور في مجتمعنا وامثال احمد كثيريين واتمني يزيدون وشكرا علي القصة متعوب عليها فعلا مثل ماقالت القطوة انتة فعلا مشروع كاتب وبالتوفيق.
     
  4. MisS_BrOnZ

    MisS_BrOnZ بـترولـي نشيط جدا

    378
    0
    0
    عاطله عن السمع والبصر والنطق أيضا
    Lovely KuWaiT
    احداث متداخله وحوار شبابي سلسل ممتع ويشد القارئ

    .. وان كانت فكره يعقوب تتماشى مع واقع اليم نعيشه ..لكن ايمان احمد وثقته برب العالمين .. تطغى على ملذات الدنيا بكل اتساعها ..

    فعلا استمتعت وانا اقرى القصه .. كل الشكر لك اخي الفاضل على الحكمه المبتغاه من وراء هذه السطور الجميله

    تقبل مروري :)
     
  5. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    هيااااااااا اعجبتج القصة :D

    بعد هالمدح ودي اغني طاير من الفرحة طاير :p اما سالفة ابو بشرة برونزية فانا تعمدت احط شكل الشاب اللي يعجب فيه معظم بنات الديرة .

    مشكورة على تعليقج وايد اسعدني : )
     
  6. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي

    تسلم اخوي على هالمدح و اعتقد اللي شخصيته نفس احمد يتعب بالدنيا و ينصدم فيها لكن جزاه بالاخرة .

    مشكور على قرائتك للقصة و لو انها شوي طويلة على منتدى .
     
  7. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    كثير من الناس لما يكونون بصحتهم و عافيتهم تغرهم الدنيا و يركضون وراها ناسين كل المباديء و الاخلاق.

    يسعدني انها اعجبتج و تسلمين على هالتعليق الحلو :)
     
  8. عبدالحميد دشتي

    عبدالحميد دشتي بـترولـي مميز

    782
    0
    0
    ايوااااااااااااااااااااااا

    عاشوااااااااااااااااا

    جكج جكج جكج جكج جكج جكج جكج جكج جكج جكج جكج

    والله عندك موهبه يالملعون :D

    الصراحه اندمجت و الحبكه مدروسه والسيناريو يموت من الضحك :D
     
  9. CatwomaN

    CatwomaN بـترولـي خـاص

    1,566
    0
    0
    Q8



    [​IMG]

    ترا صج مو مجامله ... فكر اتنزل كتااااب كله قصص من هل نوووع و شوووف شلوووون راح ينجح و أنا ابي نسخه اموقعه بليييز :)

     
  10. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    هيا هيا هيا هيا اطلع اطلع اوه اوه دشتي لا تشيشني ترى انا على طريف :D

    بعد عمري دشتي مشكور على هالمدح و اهم شي انه القصة عجبتك :)
     
  11. الجنتل

    الجنتل بـترولـي جـديـد

    35
    0
    0
    صراحه قصة كووول اي هذي المواهب مو بعض الناس مكياج ومش عارف ايش :d
     
  12. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    مشكورة على هالثقة و ريايج على عيني و راسي ... هواية كتابة القصص القصيرة عندي من ايام الثانوية لكن اخر مرة كتبت فيها قبل ما ادش المنتدى يوم عمري 17 سنه يعني قبل 10 سنين .

    مسألة الكتاب اعقتد هذه خطورة جريئة و اعتبرها مغامرة خصوصا اني مبتدأ.

    هذا رابط قصتين لي كتبتهم للمنتدى يمكن تحبين تطلعين عليهم .


    صورة شيماء
    http://www.q8ow.com/vb/showthread.php?t=9621

    قصة حب حقيقية عشتها
    http://www.q8ow.com/vb/showthread.php?t=13580
     
  13. جونم جقرم

    جونم جقرم بـترولـي خـاص أعضاء الشرف

    8,202
    0
    0
    منــدوب نفطـي (: ---> 66698897
    خـيـمـة فـُـوق طـِـعـسـ
    مرحبا صديقي شركة

    تبغي الصدق فعلا قصة واقعية رائعة مليئة بالحكم

    والي عجبني دقة الوصف بين الجمل

    وكذلك نوعية الكتابة تفرض نفسها عليك وأنت تقرأها

    ماشالله عليك عزالله عيني عليك باردة

    وأرجو أنك لا تحرمنا من ها المواضيع المكتوبة شخصيا لكي نتمتع فيها



    [​IMG]
     
  14. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    الحمد لله انها اعجبتك ... فديت بعض الناس انا :D

    حياك الله
     
  15. CatwomaN

    CatwomaN بـترولـي خـاص

    1,566
    0
    0
    Q8


    [​IMG]


    [​IMG]

     
  16. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي
    تسلم اخوي جونم على هالمدح و الله ونستوني :D ان شاء الله في بعد قصص يايه بالطريج : )
     
  17. جونم جقرم

    جونم جقرم بـترولـي خـاص أعضاء الشرف

    8,202
    0
    0
    منــدوب نفطـي (: ---> 66698897
    خـيـمـة فـُـوق طـِـعـسـ


    شركة في سؤال يقرقع بقلبي :D

    راعية البي أم دقت علي يعقوب ولا ننطر الحلقة الجاية :D:D:p
     
  18. شركة من صادها عشى عيالة

    شركة من صادها عشى عيالة بـترولـي خـاص

    2,288
    0
    0
    موظف بشركة واسطة الكويت koc
    دولة الاحمدي

    امبلا دقت عليه و حلفت له انها كانت تكلم اختها مده طويلة لانها مسويه حادث و تعورت قذلتها :p
     
  19. reznama

    reznama بـترولـي مميز

    صح .. كما تدين تدان .. !!

    ماله داعي أكتب تعليق .. لأنك عارف تعليقي من خلال ردودي على القصص اللي قرأتها مسبقا ..

    تحياتي

    ..
     
  20. PIANO

    PIANO بـترولـي مميز

    803
    0
    16
    عضو مجلس الشعب
    sweet KUWAIT
    برافو يا شركة

    قصة تحاكي الواقع بشكل جميل ...


    بس كله بكوم و ( سيدورف ) بكوم !!! هههههههه

    اشوه مو ندا ! هههههههههههه


    يعطيك الف عافيه
     

مشاركة هذه الصفحة