النقابه والكادر اللي يبونا ننساه

الكاتب : مهدي الشمري | المشاهدات : 1,107 | الردود : 12 | ‏17 أغسطس 2008
  1. مهدي الشمري

    مهدي الشمري بـترولـي جـديـد

    10
    0
    0
    السلام عليكم

    الله يعطيكم العافيه يا شباب

    اشوف نقابتنا شاده حيلها بسالفة التحقيق مع امين السر!!!!

    اظن امين السر عنده ولد عمه بمجلس الامه قاعد يتابع موضوعه واظن انه سلطه اكبر من الشركه والنقابه... فا يا ليت نقابتنا تلتفت لمشاكلنا..ولا تبون تسوون زوبعه من لا شيء علشان تنسونا سالفة الكادر؟؟

    انا بصراحه افضل ان النقابه تحرك على موضوع الكادر لا يروح علينا حتى لو ترفع قضايا بالمحاكم لان قرار المحاكم محد يقدر يرده لا وزير ولا غيره.

    فا شدو حيلكم بمشاكل الموظفين المصيريه وخلوكم من المشاكل الفرديه تقدرون تحلونها بدون صرف هالمبالغ على التصاريح علشان امين السر... ترا فلوسنا هذي.

    ردو على سالفة الكادر...اشوف تبون تنصلون منه وقمتو تسولفون بسالفة الاتفاقيه وعقبها سالفة امين السر اللي اثنينهم مالهم شغل فينا الاتفاقيه خلصت من زمان وحفظت سلم رواتبنا وثبتت الرواتب ولا تقدر الشركه تلاعب فيها اللي بالخفجي وهم سالفة امين السر خاصه فيه اذا تبون تحركون فيها تحركو فيها كأشخاص مو كنقابه لأن اظن يقدر يمثل نفسه بما انه امين سر النقابه.

    أما سالفة إستغفال الموظفين بالخفجي وأكلتو حقوقهم بالتعاون مع الشركه فا اسمحولنا شبعنا كلام ونبي افعال.

    ما استحيتو يوم جيتو تباركون على زياده تسمونها خمس دنانير؟؟

    انتو نقابتنا كان المفروض منكم انكم انتو اللي ترفضونها من البدايه ولا ترضون لنا بالفتات....طبعا اهل الوفره بالنقابه ما عندهم مشكله من هالناحيه ولا اهل المكتب الرئيسي لان مطبق عليهم نظام العمل الكويتي.... وين الخفجي بالحسبه كلها؟؟؟

    النقابات السابقه كلها كانت افضل بكثير وكان لها انجازات ممتازه بأزمنه قياسيه.

    بصراحه كنت اقول عسا تكرهو شيئا وهو خير لكم وقلت يمكن هالنقابه يطلع منها انجاز...لكن لي اليوم كل شي تبيه الشركه قاعد تبصم عليه النقابه الحاليه وتأيده...واذا صار شي ضدها من الشركه قالو عايض وفيصل.

    اذا كان عايض وفيصل عندهم القدره على انهم يسوون شغلات كبيره النقابه ما تقدر عليها فا الاولى اني اكون مع اللي يقدر يجيبلي حقي...ما اصف مع واحد يرضالي بالمهانه.

    بخصوص عايض وفيصل مو دفاع عندهم لكني اعرفهم كأشخاص وزملاء واشتغلت معاهم بالعمل وبالنقابه وابخصهم.

    ان كانت النقابه متفرغه بتصفية حسابات ولمصالح شخصيه على حساب الموظفين فا اسمحولي ما ارضى بترقيات لأعضاء مجلس النقابه او ميزات على حساب حقوقي عند الشركه.

    تبون مصالحكم الشخصيه اخذوها مو غلط دامها لااااا تضر بمصالح الموظفين ولا تساوم عليها.

    واظن شباب الخفجي اللي دعموكم علشان توصلون حق هالمكان بالجمبزه عرفو انهم كانو غلطانين.

    لكن الطيور على أشكالها تقع.

    ولا تسوون من امين السر بطل قومي...يعني ان الشركه تكمم افواهكم.

    ان كانت الشركه تنظر لكم بلا مبالاه وتجرأة انها تحقق مع الموظفين فا هذا من ضعف النقابه صراحه.

    في أدوات قانونيه استخدمها.

    ولا ما تعرفونها؟؟او ما تدرون عنها يمكن!!!

    الله يخلف علينا بس. الشركه كانت معارضه الاتفاقيه واشوف الحين النقابه تبصملهم بعد..

    الله يستر علينا وعليكم


    كان رأي وكتبته للإطلاع مو للمناقشه لان كلكم عارفين البير وغطاه .
     
  2. عبدالله النيباري

    عبدالله النيباري بـترولـي نشيط

    142
    0
    0
    وإن كان رب العمل لا يريد التعاون مع النقابه فللنقابه الحق باللجوء للوسائل القانونيه المشروعه حسب القانون وبأي وسيلة تراها النقابه مناسبه.

    شرايك بهذا الراي ؟ اخوي مهدي
     
  3. جابر

    جابر قــلــم بــتــرولــي أعضاء الشرف

    يعطيك العافيه يالشمرى
     
  4. مهدي الشمري

    مهدي الشمري بـترولـي جـديـد

    10
    0
    0

    كلامك صحيح

    لكن شنو الوسائل القانونيه المشروعه؟؟

    التشهير برب العمل او كشف اسرار العمل مو من الوسائل القانونيه لانها امور يعاقب عليها القانون

    لكن في اكثر من وسيله والنقابه ليلحين تستخدم وسيله وحده الا وهي الاعلام

    الاعلام يكون لإثارة الرأي العام في مسأله تهم الرأي العام او المسؤولين لكن مو بأمور عاديه روتينيه بالعمل.

    وزارة الشؤون والجهات القانونيه بالدوله والمسؤولين ان كان عندهم ضمير.

    بالاخير القضاء ولو اني افضل القضاء يكون اول شي لان الشركه جربناها مليون مره ما منها فايده ولا راح يطلع منها شي في صالح الموظف.

    حالها حال الموظف لما يبي يتظلم يتجه لمسؤوله المباشر وبعدها مسؤول مسؤوله الى ان تصل إلى القضاء.

    لكن في قانون واجب التطبيق اهو قانون العمل في قطاع النفط التابعه له كل شركات النفط
    وطبعا قانون القطاع النفطي تابع لقانون القطاع الأهلي (الخاص).

    في شغله اسمها سياسة الشركه او قانون خاص بالشركه لتنظيم العمل في الشركه او المنشأه هم يعتبر قانون واجب التطبيق من الطرفين رب العمل والموظف. لكن اذا كان رب العمل حاط قانون للشركه او سياسه معينه وما يطبقها اهو نفسه فا هذي مشكله.

    عموما القضاء ما يعترف بسياسة الشركه اذا كانت تتعارض مع قانون العمل في القطاع النفطي او الاهلي.

    مثلا قضية الخصم الخاص للشركه... طبعا بما ان الكويتي في الخفجي يستلم علاوة اجتماعيه في الخفجي زوجيه واطفال وطبعا علاوه لا تكاد تذكر الزوجه 100 ريال = 8 دنانير والاطفال اظن على 80 ريال ومحدد عدل الاطفال.

    طيب الشركه قالت لا ما يصير تستلمون علاوتين اجتماعيه زوجيه واطفال. وبمزاجيه قاعده تخصم من الزوجيه والاطفال اللي تمشيها لنا الحكومه مخالفه القانون كله لان الزوجيه والاطفال مالها شغل فيها الشركه لانها تصرف من الدوله عن طريق الشركه.

    القضاء حكم لنا فيها بحيث نقدر نتمتع بالميزه من الجهتين كحق ميزه مشتركه.

    الحكم هذا بروحه يثبت ان الموظف بالخفجي يحق له انه يستلم اي ميزه بالشركه مكرره من الخفجي والمكتب الرئيسي. ان كانت تصرف او موجوده.

    اذكر كنا نخاطب رئيس مجلس الاداره للشركه مباشره..وكان يرد علينا كرئيس مجلس اداره. لكن العنجهيه والكبر طغا عليهم الظاهر مو مصدقين نفسهم مجلس ادارة شركه نفطيه.. نزلو قرار ان اللي يخاطبنا الجهه القانونيه بالشركه ممثله بمدير الدائره القانونيه... طبعا كنقابه استمرينا نراسل الشركه بممثلها القانوني رئيس مجلس ادارة الشركه...لكن الشركه ترد علينا عن طريق مدير الدائره القانونيه. وعطوه الصلاحيات المطلقه بالتصرف وإصدار القوانين.

    طبعا علشان يرضي معزبينه قام يماطل ويستغل القانون مع انهم فاشلين صراحه بالقانون كإداره..ودايما يخسرون اذا واجهو النقابه قانونيا بالمحاكم وغيرها.

    فا افضل ان الموظفين بغض النظر عن النقابه ولو اني افضل النقابه تسويها... انها ترفع قضيه شامله بكل حقوقنا مو قضايا فرديه..خلها تقعد بالمحاكم خمس سنين بس بالنهايه وحسب القانون من صالحنا ان شاء الله.. وقتها راح تدفع الشركه كل حقوقنا بأثر رجعي إن شاء الله.

    واهم شي اهو تعديل الوضع علشان الكويتي بالخفجي يعرف شنو اللي له وشنو اللي عليه بدال ما القرعى ترعى.

    مربع الرد هذا صغير أحس كأني طولت وانا اكتب :\

    اشوفكم على خير واتمنى اكون افدتكم بشيء

    سلام
     
  5. العوضي

    العوضي بـترولـي خـاص

    1,054
    3
    0
    وإن كان رب العمل لا يريد التعاون مع النقابه ويماطل بعدة طرق فللنقابه الحق باللجوء للوسائل القانونيه المشروعه حسب القانون النقابات الصادر من وزارة الشئون والتوجة الى القضاء الكويتي .
     
  6. على الدنيا السلام يا نفط

    على الدنيا السلام يا نفط بـترولـي نشيط جدا

    328
    0
    0
  7. Abdullah35

    Abdullah35 بـترولـي جـديـد

    8
    0
    0
    انا معاه بالنقطه 100 %
    لكن ما نقدر نزعل اهل الوفرا رااااااح يعارضون :)
     
  8. KGOC2007

    KGOC2007 بـترولـي جـديـد

    47
    0
    0
    هالنقابة ما عندها الا سالفة طلال الكندري اذونا بالجرايد والايملات ترى موضوع طلال مايهمنا احنا نبي انجازات مو انوقف قضايانا ومطالبتنا على موظف تحول للتحقيق ما ادري شنو .
     
    آخر تعديل بواسطة المشرف: ‏18 أغسطس 2008
  9. hdlan

    hdlan بـترولـي نشيط

    95
    0
    0
    شلون ما يهمنا امر الكندري ليش حولوه للتحقيق مو علشان صرح مع مصالحنا بعدين كل اللي صار بالجرايد من صالحنا لان النقابات والاعضاء اللي تكلمو عن موضوع الاحاله تكلمو في نفس التصريحات عن مصالح العمال وتعنت الشركه
     
  10. الوليد

    الوليد بـترولـي نشيط جدا

    424
    0
    0
    ان شاء الله يوافقون علي زياده الخفجي
     
  11. محمد حطاب العنزي

    محمد حطاب العنزي بـترولـي نشيط

    انا قاعد اراقب ا لموققع من اول ما تعينت واتمنى صحة المعلومات والارتقاء بمستوى الحديث
     
  12. Eng.Vampire

    Eng.Vampire بـترولـي خـاص

    للأسف النقابة تعمل تقريبا لصالح موظفي الخفجي فقط ....مع ان الشركة عبارة عن المكتب الرئيسي والوفرة والخفجي .... وكل جهة فيها مشاكل ومطالب نتمنى من الاخوان في النقابة الالتفات لهذه النقطة
     
  13. جابر

    جابر قــلــم بــتــرولــي أعضاء الشرف

    والله مقدرين وضعكم ...لكن هم أنتم قدروا ...:eek:

    أتمنى أن الكلام اللى قلته صحيح ...عن التركيز على قضايا الخفجى ..وأن كنت ما أعتقد إنه دقيق..

    لازم تكون فيه أولويات واضحه للنقابه ..
    وصحة عقود العمل فى الخفجى ومرجعيتها لقانون العمل الكويتى..اولويه مابعدها أولويه ..
    اما بقية المطالبات ، حنا وانتم سوا
     
جاري تحميل الصفحة...

مشاركة هذه الصفحة