توب توب يا بحر ( شنو معناتها )

الكاتب : Winchester | المشاهدات : 1,433 | الردود : 16 | ‏15 يوليو 2008
  1. Winchester

    Winchester المـراقب الـعـام

    أغلبكم يعرف أغنية البحر المشهوره :

    توب توب يابحر .. توب توب يابحر .. أربعه والخامس ظهــر

    تـوب تـوب يابحـر .. تـوب تـوب يابحـر .. هـات عيالنـا من البحــر

    تـوب تـوب يابحــر .. تــوب تــوب يابحـر

    ماتخـاف من الله يابحــر .. ماتخـاف من الله يابحـــر

    يانواخذهـم لاتـصلب عليهـم .. يانواخذهــم لاتصلب عليهـم

    ترى حبال الغوص قطعـت إيديهــم

    تـوب تـوب يابحــر .. تــوب تــوب يابحــر

    ياليتني فوق الدقـل حمـامــه .. ياليتني فوق الدقـل حمـامــه

    أبشـر ياغــواص بالسـلامــه .. أبشـر ياغــواص بالسـلامـــه

    ياليتني إدهينـه وأدهـن إيديهـم .. ياليتني إدهينـه وأدهـن إيديهـم

    وياليتني خيمـه وأظـلـل عليهـم .. وياليتني خيمـه وأظـلـل عـليهــم


    هـذي الأغنيـه يغنونهـا حريم لأول قبل موعـد القفـال بحوالي ثلاثة أو أربعة أسابيع
    يعني ( شهـــر ) .. يعتبر يوم القفـال يوم مهـم جداََ خاصة عند الأهـالي اللي لهم عيال ورياييل
    داشين الغـوص ينتظرون ردتهم الديرة على أحر من الجمـــر ..
    يبدون الحريم والبنات يغنون هالأغنيه مثل ماذكرت قبل موعد القفال بشرط يكون عقب المغــرب ..
    بحيث يتجمعون صوب السـِيف .. وتشرف على الغناء إمراءه قويـه ونشيطه تتحمل المسؤوليه
    عن جميع النساء .. أما الحريم الباقي يبدون بجمع الحطب وسعف النخل ويستخدمونهـا لأشعـال
    النـار .. وبعدهـا يوقفون على هيئة دائريه متحركـه وينشدون بعض الأناشيد والأهـازيج اللي أهمهـا
    توب توب يابحــر ..،،

    ( القصد من هـالأغنيــــه )

    تخويف البحـر وتأديبـه وتهـديده !! لأنه السبب في فـراق أهلهم الذي طـال عنهـم
    أيام وليالي .. وفي إعتقادهـم إن بجيتهم للبحر وتخويفه بيرجع أهلهم لهـم !!
    سالمين غانمين بالولو والخيـــر محمليــن ..
    ( سبب حملهم سعف النخيـل المشتعــل )
    سبب طريـف ويدعو للغرابه والإستغراب !! هالسبب يخليهم يطلعون
    اللي في صدورهم وقلوبهم من مشاعر جياشه وعاطفه وفراق وغيره .. حيث إعتادوا على
    ضرب البحر وحرقه وكيه بالنـار ( يجوونـه ) .. علشان يحس باللوعه والفراق اللي يحسون فيه !!


    ( ماسألتوا نفسكم !! شسالفه القطوووه !! )
    هالقطوه الله يسلمكم يلبسونهـا قطعه من مشموم تتعلق على رقبتهـا
    وتقوم وحده من الحريم بشرط تكون شجاعه وقويه ..
    بثقب أذن القطـه وتحط في أذنهـا خـرز.. وبعض الحريم يغطسون القطووه في البحر
    عدة مرات والقصد تنجيس البحر بهـا !!.. وبعدهـا تقوم المره القويه بشد أذن القطه
    بشده فتصرخ من الألـــم ( ميـــــاو ...ميـــــاو ..ميــاو ) فترد النساء أجمع بالقول
    ( يـاو .. يـاو .. يــاو ) يعني جاؤا جاؤا !! والطرف الآخر من النساء يقومون بحرق البحر بالسعف علشان يحس بالألم اللي يحسون فيه .. والبعض الآخر يحذف ويلقي الحجارة :الحصـا : عليه
    أو يصبون فيه عشرج ( حـلول ) كي يصاب بالأسهــال !!
    ويرجع أهلهم ساليمن غانمين بالولو محملين
    والحين عقب ماعرفتوا هالسالفـه علموا إخوانكم وعيالكم بأسلوب مبسط
    وخفيـف .. ولاتنسون تراثنـا وسوالف أهلنـا لأوليـــــــــن


    أتمنى لكم الإستفاده من تراثنــا العريق وإللي لنا الفخر إن نذكره


    منقول

     
  2. كل الشكر لك

    وتسلم ايدك على النقل الاكثر من رائع

    وانا الصراحه توني اعرف معناها منك

    يسلموووووو
     
  3. جونم جقرم

    جونم جقرم بـترولـي خـاص أعضاء الشرف

    8,202
    0
    0
    منــدوب نفطـي (: ---> 66698897
    خـيـمـة فـُـوق طـِـعـسـ
    لاهنت علي النقل والمعلومات

    وهووب هووب يا بحر هووب هووب :D
     
  4. HUMMER

    HUMMER بـترولـي خـاص

    مشكور عالنقل الجميل وماتقصر
     
  5. غيوم

    غيوم بـترولـي خـاص أعضاء الشرف

    7,298
    1
    0
  6. dehen_3ood

    dehen_3ood بـترولـي خـاص أعضاء الشرف

    أحب سوالف قبل ..
    عن التراث وعبق الماضي الجميل
    كثر من هالنقل يا مراقبنا الكريم
    وتسلم على هالاختيارات الخنينة :)

    يا مال العافية ....
     
  7. المنصور

    المنصور بـترولـي خـاص أعضاء الشرف

    موضوع رائع بكل معنى الكلمة

    بصراحه هالمعلومة كانت غايبه عني

    شكرًا لك اخوي
     
  8. الجوهرة

    الجوهرة بـترولـي خـاص أعضاء الشرف

    3,136
    1
    0
    يعطيك ألف عافية
    [​IMG]

    تحياتي لك

    الجوهرة
     
  9. زهرة التوليب

    زهرة التوليب بـترولـي خـاص

    بشده فتصرخ من الألـــم ( ميـــــاو ...ميـــــاو ..ميــاو ) فترد النساء أجمع بالقول
    ( يـاو .. يـاو .. يــاو ) يعني جاؤا جاؤا !! والطرف الآخر من النساء يقومون بحرق البحر بالسعف علشان يحس بالألم اللي يحسون فيه .. والبعض الآخر يحذف ويلقي الحجارة :الحصـا : عليه
    أو يصبون فيه عشرج ( حـلول ) كي يصاب بالأسهــال

    لووووووووووووووووووووووووووووووووووووووول

    عليهم طقوس عجيبه

    والله اجدادا كان لهم طقوس وعادات لازالت متوارثه
    مع انها خرافات بس صارت عاده عند البعض


    الف شكر على المعلومات
    لا خلا ولا عدم
     
  10. Winchester

    Winchester المـراقب الـعـام

    مشكووورين على الردود الجميله


    يعطيكم العافية جميعا
     
  11. Export_Doc's

    Export_Doc's بـترولـي خـاص أعضاء الشرف

    2,561
    0
    0
    اوووو يا مااااال يسلموووووس على الداتا
     
  12. Workers

    Workers إدارة المنتدى

    7,767
    30
    48
    ذكر
    الكويت
    السلام عليكم ورحمة الله وبركاتة

    قواك الله يامراقبنا معلومات جميلة

    والله ضحكت كثير من هالسالفة

    ولوبيدهم ودهم البحر يتبخر وينشف بح مافيه ماي

    الحريم عجب العجاب :D

    كل الشكر لك يامراقبنا الكريم
     
  13. مواق

    مواق بـترولـي مميز

    501
    0
    0
    شكرا جزيلا لك على النقل .. ولكن كلمات الاغنية اغلبها محرفة او كاتب كلماتها غير كويتي .ولايفهم اللهجة الكويتية القديمة .

    لايوجد معنا لكلمة ظهر باللهجة الكويتية لغير ظهر الانسان .. وكلمة هات عيالنا تقال للاولاد وليس الرجال .

    كلمة قطعت لاتقال للرجال فالكويتيين الاوائل دقيقين وحذرين باللغة العربية لغة القرآن .


    بيت الشعر هذا أصلا غير موجود بالاغنية !؟.
     
  14. Workers

    Workers إدارة المنتدى

    7,767
    30
    48
    ذكر
    الكويت
    الله يعطيك العافية يامواق بس ياليت بالمره تقول لنا الصح شنو بدل التحليل اللغوي

    يعني تقول لنا اللي كان يقولونه بالضبط شنو اذا هذ الكلام محرف اكيد فيه كلام غير محرف

    جاري انتظار الغير محرف ..وشكراً يامواق على المساعدة
     
  15. ABDULLAH

    ABDULLAH قــلــم بــتــرولــي أعضاء الشرف

    10,727
    1
    36
    موظف في ش نفط الكويت
    وطن النهار - الكويت موطني
    شكرا على الموضوع يا مشرفنا ، و جميل معرفة أصول الأشياء و المواريث الشعبية
     
  16. Workers

    Workers إدارة المنتدى

    7,767
    30
    48
    ذكر
    الكويت
    توب توب يابحر

     
    آخر تعديل بواسطة المشرف: ‏16 فبراير 2015
  17. الفصول الأربعة

    الفصول الأربعة بـترولـي نشيط جدا

    437
    0
    0
    أسمحوا لي أقول أنها أربعه والخامس شهر
    يعني رحلتهم في البحر بإربع أشهر والخامس شهر إذا تأخروا.
    طبعا موعد رحلتهم بالصيف بعد السرايات.هذا كلام الوالده الله يحفظها لإن الجد من أهل البحر.
     
جاري تحميل الصفحة...

مشاركة هذه الصفحة