شــــــــــــــــــــــــركة Koc

الكاتب : kandar | المشاهدات : 6,992 | الردود : 8 | ‏3 يوليو 2008
  1. kandar

    kandar بـترولـي جـديـد

    36
    0
    0
    السلام عليكم ورحمة الله وبركاته ..........................

    يعطيكم العافية يا شباب على المنتدى الرائع

    حبيت أستفسر عن شركة Koc هاذي الشركة الكل يبي يتوظف فيها و اذا قلت أبي أتوظف بالقطاع النفطي تضع شركة Koc في المقدمة، انا مهندس ميكانك حديث التخرج حبيت أستفسر من حظرتكم عن شركة Koc فإليكم الإسئلة :

    1- ما الذي تجعل شركة Koc هي الافضل دائما ؟؟
    2- حبيت أستفسر عن معاشات الشركة ويكون بشئ من التفصيل ؟؟ موضحا البونسات والبدلات و على قولتهم المزايا اللي يتمتع بها موظفوا الشركة من تلفونات وسيارات وبيوت وغيرها انتم اعلم بها ؟؟
    3- حبيت أستفسر عن المراتب والدرجات اللي يتطور فيها المهندس ؟؟
    4- ما قصة الوسطات في شركة Koc والعنصرية ؟؟
    5- ما هي شروط القبول في هذه الشركة ؟؟ وهل يشترط اللغة والواسطة ؟؟
    6- ما هي الاماكن اللذي يستطيع ان يتوظف بها المهندس الميكانك ؟؟ يعني الأحمدي و ......و......... الخ
    7- ما هي عدد ساعات الدوام الرسمي ؟؟
    8- هل الشغل متعب الى درجة ان الشخص يرد بيتة وينام ويقعد الصبح ويدوام ؟؟ يعني يومة كلة دوام بدوام ؟؟ وهل اغلب وقتة بالدوام شغل ؟؟
    9- وأخيرا أي معلومة مهمة لم تخطر ببالي أن أسأل عنها أخبروني عنها ولكم جزيل الشكر

    ودمتم في رعاية الله وحفظة
     
  2. Ahmad Alenezi

    Ahmad Alenezi بـترولـي نشيط

    53
    0
    0
    السلام عليكم و يا هلا و يا مرحبا يا اخي العزيز......

    اول شي الف مبروك علي التخرج و منها للأعلى يا رب

    ثاني شي و لا تفهمني غلط الاسأله كثيره و صعب الواحد يرد عليها كلها لكن بنفيدك في بعض الامور ان شاء الله....
    شركه نفط الكويت تعتبر هي الشركه الام و فيها مميزات انت تعرفها مثل السياره والبيت والامور اللي انت ذكرتها .....الخ
    بالنسبه للمعاش يفرق اذا انت عزوبي ولا متزوج و تقدر تروح مبنى الشركه في الاحمدي و تستفسر منهم عن الراتب وبالتفصيل بعد

    بالنسبه لساعات العمل الطبيعيه من 7 الى 3 لكن اذا كنت شفتات فتفرق معاك 12 ساعه صبح وثاني يوم 12 ساعه ليل و يومين اوف
    و هذا يعتمد على المكان والقسم اللي انت فيه.......

    بالنسبه للاماكن اللي ممكن تنقبل فيها فهي كثيره ممكن يكون عمليات الغاز و ممكن عمليات الانتاج او الصيانه او الووتر هاندلينغ
    او التفتيش والتاكل يعني الاقسام كثيره و هم يختارون حسب الحاجه او الشاغر اللي هم يبونه....

    واسمحلي على الاختصار والله يوفقك يارب,,,
     
  3. kandar

    kandar بـترولـي جـديـد

    36
    0
    0
    بارك الله فيك اخوي احمد ويعطيك العافية

    وسؤال بسيط ، حبيت استفسر عن الاماكن اللي ممكن يشتغل فيه المهندس (اي المناطق) ابي اشوفهم ابعاد ولا اقراب ؟؟؟
     
  4. HUMMER

    HUMMER بـترولـي خـاص

    تشتغل ببرقان اللي اهيا الاحمدي وتكون ( برقان والمقوع )

    والروضتين + المناقيش وطبعا هذا يكون تدوير بين المناطق الثلاث لجميع الموظفين
     
  5. بدل فاقد

    بدل فاقد بـترولـي جـديـد

    24
    0
    0
    أخي الكريم

    أتمنى تبذل كل الجهد لتتوظف في شركة النفط لأنها تستوعب المهندسين والمبدعين وأفكارهم أكثر من أي مكان حكومي

    وأسئلتك ماشاء الله يبيلها مجلد كامل للرد :)

    بس أنصحك تقعد مع أكثر من مهندس وتاخذ وتعطي معاهم حتى تتضح الصورة لك

    والشركة كلها مزايا مع بعض العيوب التي توجد في كل مكان

    نصائحي لك :

    1- أي شخص يتفلسف ويقول شغل وتعب وظلم وتعسف ومعاش ناقص
    رد عليه ببساطة ان الوزارات ماتحتاج واسطة عشان ادشها ليش ماتستقيل وتروح وزارة ؟
    في ظلم وتعسف وتجاوزات ولكن الله حسيبهم والحمدلله ان المعاش يغني الموظف عن اذلال نفسه لاحد المسؤولين عشان يكسف حوافز وسفرات وغيرها

    2- اي شخص يحاول يوصلك أن في عمل متعب وترد البيت وتنام فقهو قد يكون صادق ولكن:
    أعلم ان الشغل والتعب أفضل من اني احطك في مكتب 8 ساعات واقولك لاتسوي شي
    لان التواجد بدون عمل يوقف الساعه وتمر عليك الدقيقه كأنها ساعه
    وأن الشغل يعلم ويكسبك خبرة في مجال عملك حتى لو كان متعب ويولد الابداعات اللي تكون عندك

    وفي نقطة مهمهة يغفل عنها الكثير من الموظفين

    في الوزارة اذا المسؤول يحبك او يقرب لك او عندك واسطه عليه راح يريحك ويشيل الشغل منك ويعطيه غيرك ويخليك تنام في بيتكم
    لأن النتيجة في النهاية ماكو فرق بين اللي اشتغل واللي ما اشتغل

    في الشركة العكس اذا حبك المسؤول وكنت من قبيلته اوحزبه يعطيك الشغل ويحط الشغل كله على راسك وياخذ المهمات من غيرك ويحطها على راسك وتلقى نفسك مشغول في كل دقيقة وماعندك وقت حتى تشرب شاي,,,, ليش ؟

    لان الشغل في الشركة يفتحلك كل المميزات وهي:
    1- اوفر تايم مايوقف ,, طبعا شغلك المبرر ومحد يقدر يتكلم
    2-تتعلم اكثر والعلم والخبره تخليك تفرق عن غيرك بعدين ,, عشان جذي تشوف موظفين 15 سنه موظف ومايعرف شي لانه ماعنده واسطه وماتكلم وطلب شغل لانه مسكين عقليته ماكانت تفهم هالنقطة وكان ياخذها بمعيار وزاري,, يتفاخر بالديوانية ان دوامه راحه وتزريق
    3- الشغل يبرزك في عيون جميع المسؤولين وينادونك كبار القوم تحضر اجتماعات معاهم
    4- يعطونك سفرات تحت مبرر انك فاهم في هذا المجال واشتغلت فيه مدة كافية
    5-يعطيك انسنتف وهو مكافئة تشجيعية ومحد من زملائك يقدر يشتكي لانهم يشوفونك تشتغل
    6- اخر السنه يعطيك تقييم قوي ويستند على الاوفرتايم كأنه تكليف زايد ,, وهو بالاصل تشريف ,, قدامك ورقة واكتب عدد الساعات والمسؤول يشخط- وطبعا التقييم الزين اخر السنه يرفع معاشك فوق عكس الوزارة

    باختصار الشركة تعطيك معاشين ,, معاش يمشي للكل ومعاش ثاني يمشي للي يشتغلون ويتكلمون او يشتغلون وعندهم واسطه
    طبعا ماينفي ان في ناس مرتاحه وياخذون هالمميزات بس صدقني المسؤول يتعب اذا راح يمررها لموظف مايشتغل

    فاحرص على انك تطلب الشغل وتقاتل عشان تاخذه وتسوي وتعمل وفوق هذا تتكلم

    والقاعدة بالنهاية ان اللي لسانه طويل في الحق وعلى حقائق محد يقدرله خصوصا اذا كان المسؤول ظالم
     
  6. المنصور

    المنصور بـترولـي خـاص أعضاء الشرف

    مرحبا فيك اخوي وحياك الله

    شركات القطاع النفطي هي شركات تابعة لمؤسسة البترول الكويتية (أي مملوكه لها) ومؤسسة البترول الكويتية مملوكه بالكامل للحكومة الكويتية ، الناس ماتعرف غير KOC لأنها الأقدم ولأنها كانت تعطي اعلى رواتب فـ علشان جذي اذا اي شخص نوى انه يتوظف بالقطاع النفطي فـ راح يحط في باله هالشركة لكن للعلم ياخوي ان الآن مؤسسة البترول الكويتية وجميع شركاتها التابعه على نفس سلم الدرجات والرواتب يعني كلنا نفس الشي.

    وبالنسبة لأسئلتك.. راح احاول ارد عليها

    1- الشركة مو دائمًا الافضل لأن كل شركة في القطاع النفطي لها اختصاصها لكن نظرة الناس القديمة تقول ان الكي او سي احسن شي وفي ناس ماتعرف إلا هالشركة ويجهلون الشركات الباقيه.

    2- الراتب حسب الدرجه اللي راح تتعين عليها ، اما البونس فهو على حسب شغلك اذا انت تستاهله او لأ ، والسيارات للدرجات 16 وفوق أو لبعض الوظائف اللي تحتم وجود سيارة عند الموظف ، والبيوت فهي بالدور وحسب وقت تقديمك وحالتك ودرجتك الوظيفية.

    3- مافهمت هالنقطة.

    4- الواسطات والعنصرية في كل مكان.

    5- شروط القبول.. معدل التخرج واجتياز اختبار التخصص واختبار اللغه الانجليزية واعتقد في اختبار للمهندسين والمقابله الشخصية.

    6- مهندس الميكانك ياخذونه بكل مكان واذا كان في الاسيت اعتقد يصير عليه تدوير خلال فترة زمنيه معينه يعني مره في شمال الكويت ومره في الجنوب ومره غرب الكويت.

    7- عدد ساعات الدوام الرسمي 8 ساعات لنظام العمل الصباحي و12 ساعه لنظام عمل الشفتات.

    8- الشغل يكون حسب الوظيفه والمكان وهل الشغل متركز عليك ولا موزع عليك وعلى غيرك لكن في مبالغه من اللي يقول ان الواحد يطلع من الدوام وينام من التعب لي اليوم الثاني ويروح الدوام مره ثانيه ، والشغل ياخوي مثل البحر.. مره مد ومره جزر.

    9- لما يخطر في بالك اي سؤال.. تفضل وطرحه واحنا له ان شاء الله.​

    وماعدى السهو والخطأ
     
  7. مساعد مراقب حسابات

    مساعد مراقب حسابات بـترولـي نشيط جدا

    171
    0
    0
    مساعد مراقب حسابات
    الكويت العربية المتحده
    الربع ما قصروا

    بس كل اللي اقولة لك اخوي مبروك على التخرج والله يوفقك ان شاء الله في خدمة وطنك .
     
  8. kandar

    kandar بـترولـي جـديـد

    36
    0
    0
    بارك الله فيكم ويعطيكم العافية
     
  9. bader2020s

    bader2020s بـترولـي جـديـد

    7
    0
    0
    مميزات قريد 15

    :confused:اذا ممكن اعرف مميزات قريد 15 وجم سنة يبيلك لين توصل 16
     

مشاركة هذه الصفحة