خلنا نتذكر ايام قبل

الكاتب : frfosha | المشاهدات : 595 | الردود : 8 | ‏19 يونيو 2008
  1. frfosha

    frfosha بـترولـي مميز

    753
    0
    0
    يا جماعه حبيت اذكرهم بلعب قبل ومدارسنا قبل واكلنا قبل وكلماتنا قبل يعني شخبر كاوكاو بو نجوم وشخبار اللبن المثلث وشوربة الروضه مالت العدس وشخبار كاوكاو بو جسوم وحلاو بو بقره اللللللللللله وتذكرون المقصي والتيل والعنبر والمحيبس والعكوز تذكرون كلمات قبل المتداوله ويمكن ما زالت موجوده حتى يومنا بس للاسف البعض ما يستخدمها ويعلم عياله على ابو انه الام مثقفه ومن الجيل اليديد وما تبي تكبر روحها والابو كذلك تذكرون لبياله ام نقطه تذكرون السكربيل تذكرون الروشنه والفريه وغيرها من اشياء يا زين ذيج الايام ويا حلاتها ( ترى انا بعدي صغيرونه بس معاي عيوز بالبيت اهي اللي تفطني على هالكلام ;) يا جماعه علمو عيالكم على تراثنا حاولو قد ما تقدرون تعلمون هالجيل اليديد اللي ما يعرف غير فرايديز ولينوتغر وفد ريكرز علموهم على كلامنا القديم وعلى سوالفنا القديمه والله يعورني قلبي من هالجيل اليديد لما يقولي شنو هالكلمه لفلانيه يا زين كلامنا ويا زين تاريخنا وللاسف حتى المدارس ما قامت تعلمهم هالاشياء جنهم بمسحون الهويه والتيخ الكويتي قولولهم عن الغزو وايام الغزو وقولوهم عن سنين الطفحه وسنة الهدامه لا يحاول البعض مسح لهويه الكويتيه من هالديره الطيبه وفيكم البركه
     
  2. ABDULLAH

    ABDULLAH قــلــم بــتــرولــي أعضاء الشرف

    10,727
    1
    36
    موظف في ش نفط الكويت
    وطن النهار - الكويت موطني
    ثقافة الحين صارت هاي و باي و كووول و شكل خارجي جميل فقط ، و من جهل البعض إعتقادهم ومنهجهم بالبعد عن كل ما يتعلق بالقديم و بالمحلي و يظنون أن تقليد الأجانب و الغرب و التفسخ من الهوية الكويتية الأصيلة و الإسلامية و العربية هو سبيل التقدم
    و قمنا نشوف مظاهر عجيبة و غريبة و سلاسل و لباس داخلي فرجة للآخرين و
    تكشف و تعري مبتذل بدلا من الستر و الحشمة الرزينة ،
    ضيعنا مشيتنا و هويتنا ،

    طبعا هذا الكلام عند البعض لا الكل ، لكن الظاهرة واضحة وضوح الشمس


    الغرب يملكون العلم و الثقافة و التقدم ، فلماذا لا نأخذ منهم المفيد و نترك السلبيات التي لا تنفع ؟
    شكرا فرفوشة على الموضوع و الظاهر طلعتي من جيلي :)
    سامحوني على الحدة في الكتابة في هذه المواضيع لأن قلبي على أبناء و بنات بلدي
     
    آخر تعديل: ‏19 يونيو 2008
  3. ABDULLAH

    ABDULLAH قــلــم بــتــرولــي أعضاء الشرف

    10,727
    1
    36
    موظف في ش نفط الكويت
    وطن النهار - الكويت موطني
    [​IMG]

    تصوري لفريج قديم و فيه على اليسار دكان و المسجد جدام و بيوت طين
     
  4. Blue angel

    Blue angel بـترولـي خـاص

    الله يخليلج العيوز و يطول بعمرها يا رب ، ذكرتيني بحليب الكاكاو المثلث اللي كانوا بعطونا اياه بالروضه حلوووووو مو الحين تحسين انه تقليد ، يعطيج العافيه حبيبتي :)
     
  5. computer department

    computer department بـترولـي مميز

    725
    0
    0
    مهندسه كمبيوتر
    ديره الخير ( الكــويت )
    :) ايام زمان عمرها ما تنعاد

    مشكوره على الموضوع الحلوووو
    :)
     
  6. الغالية

    الغالية بـترولـي خـاص

    1,035
    0
    0
    الله يخلي لكم العيوز ويطول بعمرها

    وياحلو الكلام القديم :)
     
  7. kotc

    kotc بـترولـي نشيط

    133
    0
    0
    لعز ابو هريدي‏

    عفوا مكرر ...
     
  8. kotc

    kotc بـترولـي نشيط

    133
    0
    0
    للكبار فقط .. :D

    تذكرون المسجل السوده مالت استاد الانجليزي لي دش علينا فيها قمة الوناسه اليوم ليسيننج يعني مافي اسئله ورووووح سكشن فايف ترررررن تررررررن سكشن فايف.....هاي سوبر فالكون ههههههههه.

    تذكرون تيلفون بوقرص اللي يخيب ثناك وانت تتصل وياااااااويلك يطلع الرقم مشغول لان مافي ريدايل والله يعينك لي بغيت تدق مكالمه حق خدامتكم تلاقي اصابيعك اتعربك.....صج كانت معاناة بالعيشه

    تذكرون لما كنا نصور فوري عند مصور الجمعية وطبعا غصبن عليك الخلفيه زرقه مو بكيفك ولازم تمشط شعرك بالمشط اللي عنده كله شعر ووصاخه وبعدين يقصلك الصورة بالآله اللي عنده ام ذراع والاطراف مشرشره يعني يكون حركه.


    تذكرون لما اييلك واحد مليق من العايله اكبر منك ويقولك تبي اسويلك ساعه وانت تمدله ايدك ويقوم يعضك ذيج العضه اللي توارص منها.

    تذكرون ايام حصة الموسيقى قبل كان الدرس لمدة سنه عباره عن تــــــــــافــــــــــــاتيــــــــــي فـــــــــــي تاتي والصفقه بصبعين بس ..... صج كان منهج صعب.

    تذكرون لين شفت واحد عنده سيارة مرسيدس كان يحوشك فضول الا تبي تعرف شنو اكو بالصيدليه اللي ورى بالسياره ونقعد انطلطل بالسياره واخر شي يطلع ( بلاستر وباندج)

    تذكرون المعجون الصغير اللي ريحته تبط الراس ومعاه عود لونه احمر وكنا نبطله بالمقلوب ونرعصه ونلف العود عليه وننفخ عشان نسوي تفاخيه وطبعا لاتفاخيه ولا شي لين تطلع بلاعيمك منه.

    تذكرون لما كنا نشوف افتح ياسمسم وانتأثر بكعكي اللي ياكل بسكوت ونشتري بسكوت كاكاو ونقعد ناكل مثله.

    تذكرون يوم الجمعة ... نقعد من الصبح علشان نسمع أغنية في عالم الشعوب قصائص لا تنتهي وعالم حلو بهي يسكن في القلوب من قصص الشعوب.

    تذكرون لما كنا نربط الشرشف او الفله على رقبتنا يعني يكون سوبرمان ونصعد فوق الكبت وانط على الدواشق واخر شي طاب غلط ومنكسره ايدك

    تذكرون لما هبينا في مجلة المجالس وبصفحة كريمة شاهين اللي يكتبون فيها ...انا فتاة ابلغ من العمر 18 سنه واحببت شابا حبا جما ولا استطيع ان افارقه وتقدم لي اكثر من مره ولكن اهلي رفضوا .

    تذكرون لما يبلشون الشباب يدخنون زقاير كل واحد حاط باكيت بمخباته ولافه بكلينكس عشان ما يبين من الدشداشه الصيفيه ولي شاف واحد من الربع يدخن يسأله السؤال المعهود (ها فلان تكنها ولا ما تكنها ) لووول شدعوه شي زين عاد ...وكان لازم مالبورو احمر شعار الرجوله.

    تذكرون ايام الدراسه قبل يعني يكون بنشد حيلنا بالدراسه ونشتري قلم فسفوري اصفر ولا برتقالي عشان نظلل على الشي المهم اخر شي مظللين على كل الكتاب وين الشي المهم مادري لوووول.

    تذكرون لما تطوروا الشباب بالطلعه عقب سوق الديره والعماره البيضه قاموا يروحون الصالحيه ويدشون محل محل ويتطمشون حجي هذا بجم وهذا بجم) لين يطردهم راعي المحل لما يعرف ان المخباة مافيها الا 1.500 حق الرده يا بالتاكسي ولا وانيت.

    تذكرون اول ما يبوق الصبيان سيارة الوالد كانت الريل اليمين على البانزين والريل اليسار على البريك من الثواره .... ولازم طبعا يمر على الربع بالفريج ايتشيحط عليهم.... واديلوووووو بريك وبانزين

    تذكرون لما كانت جائزة البيبسي سياره بالمغاطي مالت البطول كنا الظهر نروح الحوش الوراني ونبطل السحاحير كلها وبعدين نرد نسكرهم اي كلام جود الغازات كلها طايره ومتبخره وصاير ماي مايوه.

    تذكرون لما يقول الاستاد ان هذي الصفحات ملغيه ايوااااااااااا تعال شوف التشخط اللي على الصفحه من فوووووووووق لي تحت ولا نشقها خير شر من الكتاب.....شدعوه هالحقد عاد

    تذكرون لما اتهاوش مع ولد جيرانكم وتقوله وخر عن بيتنا وعن رصيفنا يقولك مو رصيفكم هذا رصيف الحكومه.....كلام منطقي الصراحه لووول ويقعد يحوس جبال بيتكم ويمر يمك ويقولك ماحشتك ماحشتك.

    تذكرون كمبوتر صخر 170 لما حنينا على الوالد عشان يشتريه عشان يساعدنا بالدراسه اخر شي محولين على لعبة الاميره ام الخواتم ورامبو اللي يطير الطياره ولي دش الوالد حطينا شريط بنك المعلومات يعني استفاده لوووول.

    تذكرون لما يروحون الصبيان السوق مع الوالد يشتري لهم خامات حق العيد ...اخر شي شاري طاقه كامله نفس اللون.... وتشوف باول يوم العيد من الوالد لي الاخو الصغير نفس الدشاديش ( تقول فرقة التلفزيون لوووووول.)

    تذكرون شامبو درين اللي بغرشه حمره مادري ورديه يعني كان كشخه بس ياوووووووووويلك يحوش عيونك 3 ايام انت عمي لوووووول.

    تذكرون لا بغوا الشباب يشيلون حديد قبل يعبون قواطي نيدو اسمنت ويحطون بينهم بايب حديد وهووووووووبا واخر شي منكسر ه ظهورهم لووووووووووول.

    تذكرون الكشكول الادعم اللي في صوره بابا جابر الله يرحمه ومن ورى صوره بعير والمسجد اللي بالضاحيه ..


    تذكرون لي طاح ضرسك قبل تقولك امك مسكه وقطه فوق وقول يارب اخذ ضرس الحمار وعطني ضرس غزال........واخر شي طايح مره ثانيه يم ريولك لوووووووووول. يكون علاج نفسي يعني ..


    هذي جمعتها لكم من هنا وهناك مع تنقيح جامد ودقييييق وما بقى غير نصهم قلت خل اونسكم :cool:
     
  9. ياخساره

    ياخساره بـترولـي نشيط جدا

    مشكوره يا اختي على هالموضوع الجميل

    بس (( نصيحه ))

    ديري بالج (( SAD_SHU )) يقرا موضوعح

    تقبلي تحياتي

     

مشاركة هذه الصفحة