بيوت الشركه ....... وسالفة الانتظار ارجو التفاعل من الجميع( ارجو التثبيت)

الكاتب : احساس | المشاهدات : 3,553 | الردود : 47 | ‏27 مايو 2008
  1. احساس

    احساس بـترولـي جـديـد

    42
    0
    0
    السلام عليكم ورحمةمن الله وبركاته



    اخواني الاعزاء نواجه مشكلة غلاء الاجارات والعقارات بشكل عام والكل يعلم ذلك


    لماذا الكثير من موظفين الشركه يتمتعون بالسكن في بيوت الشركه ويمتلكون بيوت اخرى

    في مختلف مناطق الكويت بينما البعض الاخر يستأجر ب400 و500و غيرها من الاسعار اللي انتم اعرف

    مني بها بعضها يصل الى 800 دينار شهري.

    مانحسد ربعنا على اللي (عندهم بيتين ويستأجرونها وهم قاعدين في بيوت الشركه) عليهم بالعافيه

    وعسى ربي يزيدهم من فضله .

    لاكن السؤال اللي يطرح نفسه ما ذنب الموظف المسكين اللي مقدم من 5 و 6 سنوات او اكثر؟ وماسك الدور

    ليش لان البيوت مليانه من الموظفين اللي يمتلكون بيوت اخرى.!!!!

    او الموظف الجديداللي راتبه مو هذاك الزود ويطمح انه يفتك من هالاجار اللي كاسر ظهره ويوصل له الدور بأقرب وقت

    ليش مايكون فيه اهتمام من ادارة الشركه بصدد هذا الموضوع؟

    وين دور النقابه من هذاالموضوع ؟ ( ولا مايبون يعمون على نفسهم)

    مو مشكله خل يكون فيه مهله للموظف بعد استلام بيته من الحكومه سنه او سنتين او اكثر للي يبي يبني

    قسيمه او يعدل في بيته, ويكون فيه لجنه تشكل من الشركه لمتابعه هذا الموضوع بالذات.

    انا اجزم ان الكثير من قراء هذا الموضوع راح يتضايقون(( لاكن الحق ينقال)).

    بما انهم موظفين ولهم الأحقيه في سكن الشركه نحن أيضا كذلك .

    ارجو من ادارة المنتدى تثبيت الموضوع لأهميته.​
     
  2. كابتن-koc

    كابتن-koc بـترولـي جـديـد

    7
    0
    0
    سلام لكل اخوي شنو تبي ببيوت الشركه التعبانه خل تولى عنك لانها ما تستاهل يقصون من معاشك اكثر من 300 دينار اذا انت قريد 13 و فوق على بيت كله فيران و حشرات و صاله اكثر من خمسين سنه على حطته غير سالفه البوق المنتشره بالاحمدى يا صاحبي الفلوس هذي اجر فيه احسن شقه او دور او خلك ساكن مع الوالد و اصرفها على اعيالك وايد ابرك من بيوت الشركه هذي علما بان فلوس الاجار ال 300 الى يقصونها الشركه منك هما البدلين علاوه سكن و بدل اجار و اذا تبي بيت بالشركه فيه وايد بيوت فاضيه بس يبيلك اشوي واسطه و انت اتعب و دور على هل البيوت ومع الواسطه تطلع لك و انا من ناحيتى ما ابي هل البيت الى ما يسوا فلوس اجاره و شكرا اخوي على موضوعك الفلوس ال 300 ابرك منه
     
  3. مسوي زحمه والشارع فاضي

    مسوي زحمه والشارع فاضي بـترولـي نشيط

    97
    0
    0
    موضوع جيد لطرح
    كلالالالالالالالالالالالالام جميل ومهم
    بس وين النقااااااااابه
    بس وين النقااااااااابه
    بس وين النقااااااااابه
    بس وين النقااااااااابه
    بس وين النقااااااااابه
    بس وين النقااااااااابه
    بس وين النقااااااااابه
    بس وين النقااااااااابه

    كل موضوع لازم ندخل خشم النقابه فيه
    ليش ما يكون هناك أتصال بين الشركه والرعايه السكنيه وشوفون الاخوان إلي عندهم بيوت حكومه ويطلعونهم
    هذا امر سهل
    يعني موظف خدمته 20 أو 15 أو 25 وما عنده بيت إييي هييي
    متخوشش العقل يا ناس
    واحد أعرفه دورة من رقم 50 إلى رقم 80 أنا خابر الدور ينقص ويتقدم ما يرجع ويتأخر

    أنا عاوز حد يفهمني حاتجنن يا ناس

    لو تقدم الشركه طلب بأسامي القداما أصحاب الخدمه الطويله لرعايه السكنية وتشوف شكلي وهقتهم اخوانا وأبائنا أصحاب الخدمه الطويله

    يا ناس فسااااااااد إداري مستفحل لووووووووووووول عجبتني الكلمه الاخيره
    هذا من القهر على قولت مرشح يا اخي شي يحر <------- ما لت على امك عيب الرجال يقول شي يحر يقول مثلا شي يقهر شي يبط الجبد مو يحر



    شكرا للعضو احساس على هالموضوع جيت على الجرح والشي إلي يحر :)
     
  4. ALI 07

    ALI 07 بـترولـي نشيط جدا

    326
    0
    0
    بيوت الشركه ما عليها حسوفه ما تسوي الاجار كلها سرق (واحد من الربع يقول لي في الصيف حاره جداوفي الشتاء كذلك برد قارس ) لان مافيه عازل
     
  5. bdr

    bdr بـترولـي نشيط

    57
    0
    0
    آنا أقول بدبل البيت يعطونا شقق وماله كثرها بدال ماندفع هلأجارات النار و النظام اليديد ان الموظفين اليدد مالهم بيوت شركه سواء بدور ولا بدون دور
     
  6. Q8y

    Q8y بـترولـي جـديـد

    44
    0
    0
    قدمت قبل 4 سنوات على بيت في الشمال وليلحين ماكو شيء لانها بالاقدمية

    اغلب الموظفين عندهم قسايم مؤجرينها وقاعدين في بيت الشركة !

    عند التقديم على بدل الايجار يطلبون منك ورقة من الاسكان ! زين ليش ما تطلب من اللي عنده بيت شركة ؟

    شركة بطيخ ومافيها قيادي حازم .

    شركة دايخة ... اروح اسأل عن جريدي يقولولي ما رفعنا جريد فيك ليلحين .. سقط سهوا !

    اااااااه قلبي متروسة بس خلوها على الله
     
  7. Eng.Vampire

    Eng.Vampire بـترولـي خـاص

    بيوت الشركة ما تسوى الانتظار لا ويقصون منك بدل السكن .. واخر شي بيت كله فيران وحشرات وبلاوي حتى التكييف الناس تشتكي منه
     
  8. مزيووووون

    مزيووووون موقوف

    92
    0
    0
    ازيدكم من الشعر بيت



    قريد 13 وفوق يستحق بيت........................... أما اللي 12 وتحت لا يستحق بيت إلا إذا كان متوظف قبل سنة 2002
     
  9. نفطاوي

    نفطاوي بـترولـي جـديـد

    14
    0
    0
    انا اقول القانون والشرع يقول انه مو من حق اى احد كان ياخذ نصيب غيره وللعلم انا سائل فيها انه مايجوز شرعا انك تاخذ بيت الشركه وعندك بيت ثانى بره واماجره بعضهم حتى ماى سبيل حاط علا باله انه يصير ياخذ اجر من شى مو ملكه

    مايجوز انه نص موظفين الدوله اللى مو بالشركه بعد ماخذين بيوت الاحمدى وموظف الشركه مايحصل

    ارحمونا ياناس حتى لو بيوت الشركه ماتسوا
     
  10. ALI 07

    ALI 07 بـترولـي نشيط جدا

    326
    0
    0
    السلام عليكم جميعا الاخ نفطاوي شنو سالفه ماي السبيل
     
  11. alasad

    alasad بـترولـي جـديـد

    3
    0
    0
    السلام عليكم

     
  12. jem2008

    jem2008 بـترولـي نشيط جدا

    410
    0
    0
    كلامك صحيح وياريت اللي عندهم بيوت يطلعون من بيوت الشركه
    وخاصه بيوت المدره اللي تكلف ترميمها آلآف الدنانير والباجي 300 دينار
    وخاصه مدير الصيانه للبيوت روحو وشوفو شنو عنده كل هذا من اموال ايران اقصد الشركه
     
  13. احساس

    احساس بـترولـي جـديـد

    42
    0
    0
    السلام عليكم سوري على التاخير كانت عندي ظروف وما قدرت ارد عليكم اول باول


    اول شي بالنسبه لمشاركة الاخ كابتن

    مو كل الموظفين على درجه 13 ربعنابالانتاج ربي زرقهم بهالقريد وتعدل وضعهم شوي ولا الدوائر الثانيه لهم الله

    (ماكلينها) ولا الموظف اللي توه ماصار له الا سنتين او ثلاث ومعاشه مايتعدا 900 شيسوي يعني يأجر ب 600 و500

    وبعدين شنو !!! اخر الشهر متسلف كله على حساب الحلوين اللي قاعدين ببيوت الشركه لا ويمكن يكون مستأجر

    عند واحد منهم. يا اخي العزيز كلامك مو منطقي نهائياا

    ****************************************

    مسوي زحمه هلافيك.

    (يعني موظف خدمته 20 أو 15 أو 25 وما عنده بيت إييي هييي)

    الموضوع سهل لاكن يبيله واحد حازم وشوي متابعه من الشباب اللي مقدمين وماسكين الدور من سنين

    *****************************************

    حيا اخوي علي مو مشكله سالفة البرد والحر كل بيت قبل وبعد اي موظف يسون له صيانه

    اذا مو تبديل سقف.
     
  14. احساس

    احساس بـترولـي جـديـد

    42
    0
    0
    بخصوص سكن الاحمدي ليش انتم حاسدين اخوانكم علي السكن في بيوت الشركة المشكلة مو في المظف الي علي راس عملة وهو ساكن في الاحمدي مدام هو علي راس عملة هذا حقة وبعدين هو موساكن بلاش اذا كنت دور علي السكن شوف الي ماخذين البيوت وماجرينها هذا مايبي يسكن في الاحمدي بس الي علي راس عملة ويبي يسكن في الاحمدي هذا حقة وعلشان يكون في عملة وهو مرتاح في العمل ولايحاتي

    :confused::confused: اي من حقه اخوي اسد لو السالفه فيها عدل وبدل الاجار يستاهل وفوق ال500 يالحبيب ما

    قلنا شي لاكن هذا الظلم بعينه ومافيها اي ذرة انصاف انت لو مجرب هالاجارات اللي فوق طاقه الموظف متأكد

    ماراح تبرر موفقك بنفس الطريقه او العذر اللي ذكرته.

    يا ليت الشركه تطبق قرار نفس قرار الحرس وتعطي للي يرغب بالتقاعد معاش سنتين وفوق المعاش 500 دينار

    علشان يطلعون الناس تقاعد وتفتح المجال للناس المقدمه على منازل الشركه وللموظفين اللي ناطرين الدور

    على الترقيات.

    لاكن خلوها على الله
     
  15. ذيب برقان

    ذيب برقان بـترولـي جـديـد

    2
    0
    0
    المشكلة ياشباب مو الموظف اللى ساكن بيت شركة اعتقد ان هذا حقة المشكلة ان كثير من بيوت الشركة يسكنها ناس مو موظفين بالشركة
     
  16. احساس

    احساس بـترولـي جـديـد

    42
    0
    0
    هذي بعد معضله كبيره بس اللي ساكن في بيت للشركه ومو موظف فيها شلون سكن؟؟ نازل من السماء!!!!!!!

    اكيد ساكن باسم احد الموظفين وهالموظف ومو محتاج البيت وابو الشباب مسكن واحد من ربعه

    ويأخذ منه اللي تخصمه الشركه من راتبه.


    مشكور اخوي ذيب على المشاركه
     
  17. SUCTION

    SUCTION بـترولـي نشيط

    90
    0
    6
    بيوت الشركة

    السلام عليكم

    ادري ان بيوت الشركة موضوع قديم حتى الاتحاد مايقدر يحل هالمشكلة . :mad: اعرف موظفين ساكنين في بيوت الشركة ومؤجرين بيوتهم . وفي ناس مؤجرين بيوت الشركة على 350 دينار و 400 دينار أبي أعرف ليش ما يتم تجديد الاوراق سنويا بالنسبة للموظفين اللي ساكنين في بيوت الشركة مع العلم ان البدل الايجار يتم تجديد الاوراق سنويا .
    انا سألت النقابة القديمة وحتى النقابة الجديدة ليش ما يتم تجديد الأوراق قالوا لي ما نقدر نثير الموضوع لأن ربعهم اول الناس اللي راح تتضرر من القانون وراح يفلسون من بيوت الشركة والمسائيل بعد وياهم
    الصراحة صارلي 5 سنوات مقدم على بيت وقبض من دبش ما في شي بعد ما إرتفعت الايجارات الكل مؤجر بيته وقاعد في بيت الشركة اذا المسؤولين في المؤسسة يدرون وساكتين هذي مصيبة كبيرة وحسبي الله ونعم الوكيل
    :mad:
     
  18. workerq8

    workerq8 بـترولـي مميز

    613
    6
    18
    بيوت الشركة والمطالبة بالعدالة والحق يذكرني في قول الشاعر المتنبي

    يا أعدَلَ النّاسِ إلاّ في مُعامَلَتي.........فيكَ الخِصامُ وَأنتَ الخصْمُ وَالحكَمُ
     
  19. أبو خالد

    أبو خالد بـترولـي نشيط

    129
    0
    0
    محاسب
    الكويت
    سووا تجمع ورحوا للرئيس
    أو روحوا للصحافة ..... صدقوني راح يسوون شي
     
  20. bs-170

    bs-170 بـترولـي جـديـد

    2
    0
    0
    المسألة أ كيد ما فيها عدل, المفروض إن الشركة تطلب نفس الأوراق اللي تطلبها سنويا لصرف منحة السكن من ساكني بيوت الشركة , ولا مو معقول إن موظف يسكن في بيت مساحته 2000 م ب 300 دينار و موظف يسكن بمحكر ب 600 دينار,
     
جاري تحميل الصفحة...

مشاركة هذه الصفحة