أبناء الموظفين ورسوم المدارس الخاصه !!

والله وانت صاج انا المدارس الخاصة شاقتني والله تخيل كل بونص وكل اوفر تايم يجيني اقطه على المدارس


ياخي مانبي ببلاش بس على الاقل خصم 40% اقل مافيها خلونا نتنفس شوي كل يوم زايدين الاسعار علينا

 

والله معاك حق

الأجانب عيالهم تخرجوا اللي صار دكتور واللي صار مهندس واللي صار مدرس
بفلوس الكويت ومدارس خاصه والتكاليف من جيب الشركه

بس احنا حتى خصم مالنا

قصوا علينا مره سووا خصم على حضانه !! والخصم ما يسوى بعد

شكرا على الموضوع اخوي

 

والله بس راح اضيف شغله انا احنا عندنا بايكويت يعطون الاجانب فقط 250 دينار لكل ولد وشكرا جزيلا على الموضوع الهام جدا.

 

أنا بعد أؤيد دعم تدريس أبناء الموظفين في المدارس الخاصة،

يا أخي خلهم يعتبرونها نوادي صحية، يعني يعطون دعم 40% من اشتراكات النوادي الصحية لتنمية العضلات و الجسم و لا يساهمون بتنمية العقول،

و الله شيء محير

 

كلامك صحيح 100% الحين النوادي ولا المدارس

 

والله معاكم حق

 

بعمليات الخفجى المشتركه .. يعطون 5000 ريال سنويا (يعنى 400 د.ك) مصرف إذا كان ولدك وإلا بنتك يدرس بالجامعه ، لكن حدك بس إثنين.
حلوين , لو عندك ولدين بالجامعه ... تصرف لك زياده 66 د.ك شهريا ... العوض ولا القطيعه ..

 

حسب معلوماتي ان شركة تكساكو الواقعة في ميناء الزور تدفع رسوم الدراسة كاملة لابناء الموظفين . ونتمنى من الشركات الكويتية النفطية ان تحذوا حذو شركة تكساكو . وان تعتني بالموظفين الكويتيين كما تعتني الشركات الاخرى بموظفيها

 

مشكور حيييل يا امير القلوب على اللفتة الجميلة منك
وبصراحة فعلا عيب لما الشركة يكون خيرها على الغريب
وعيالنا الي هم عيال الديرة ما يطولهم شي في هالمجال رغم ان التعليم اهو اهم شي لثروة الوطن وهم اهلها

 

وانا بعد وياكم
وياليت تهتم النقابات في الموضوع

 

ميزة المدارس الخاصة

قبل لا تتهجمون علي وتقولون شفيها مدارس الحكومة ....... إقرأ الموضوع أولا
كلنا نعرف مدى تدني مستوى المدارس الحكومية في الكويت:
الصفوف مليانة ..... قالت اختي الصغيرة عن عطل كل المكيفات ..... و هناك نقص الكراسي .... عدم توفر الكتب ....... عدم حرية إختيار المدرسة ......... مشكلة المدرسين الخصوصيين ........ قلت الاهتمام بالطالب ....... الخ
لذلك وانا منهم اخترت المدرسة الخاصة لإبني والحمدالله مرتاحين ...... ولكن لماذا تدفع الشركة للأجانب 90% من سعر المدرسة الخاصة و لا شئ للأبناء الكويتيين؟ للعلم ان الكثير من الشركات الكويتية توفر ميزت التأمين الصحي و المدارس الخاصة لموظفينها.

 

كلامك صحيح بل كل الشركات النفطية الخليجية توفر خدمة المدارس الخاصة


لكن لاحياة لمن تنادي

 

بالعكس محد راح يتهجم عليك
والكل يدري ان المدارس الخاصه احسن الف مره من مدارس الحكومه

يا اخي كافي المدرسين
خبره وأكفاء ويدرسون بضمير ويأسسون الطلاب صح

وحتى الملابس تشتريها من المدرسه علشان الكل يصير مثل الشي

اما في الحكومه للأسف نقص كطاولات ، كراسي ، كتب ، فصول ، معلمين !!!
وغير جذي مافي اهتمام ولا عطاء من قبل المدرسين
يطلع التلميذ من المدرسه مو فاهم شي ويضطر الأبو انه يسجله في تقويه او يحطله مدرس خصوصي علشان يتأسس صح


في جنوب السره فاتحين مدارس يديده اسمها مدارس نموذجيه
فرحنا فيها لأن يطبقون نظام المدارس الخاصه

مافي جناط ثقيله ولا واجبات وكل معلمتين تمسك صف واحد
يعني وحده تدرس مواد علميه وحده مواد ادبيه

قلنا خوش شي
وكل يوم الثاني نكتشف ان المدرسه فيها نقص بشي معين
مره قالوا نقص في عدد الصفوف ولازم نفتح فصول يديده
ومره ثالوا نقص في الخزائن الموجوده في كل صف لكتب التلاميذ
ومره نقص في الكتب الدراسيه
ومره نقص في عدد المدرسات !!!

يعني قبل لا تطبقون شي يديد جهزوا كل شي
مو توهقون التلاميذ في هالمدارس اللي مو كامله وناقصه وغير جذي حتى التكيف كل يوم مخترب في فصل
مع العلم ان هالمدارس ما صار لها 3 سنين يعني يديده !!

 

شركتنا الموقره ينطبق عليها مثل القائل : (( عنز الفريج أدور التيس الغريب )) أو (( عين عذاري تسقي البعيد وتخلي القريب )) ومتبعين ......................من حبنااااااااااا لها بنوفررررررر لها........ بس علينا (( هالترشيد )) الله يحفظها وسامحها شركتنا!!!!

 

انا ايدك اخوي....بس تعديل للمثل اذا تسمحلي (( عنز الفريج ماتحب الا التيس الغريب ))

 

اي والله كلامك عدل ...ياله يارب يتغير القرار ويدفعون حق اعيالينا 90% وعيال الاجانب 30% زين عليهم او 50% ..احنا اولى بديرتنا..وانشالله على ماتزوج وعيالي يكبرون يتغير القرار D: