مطعم شركة البترول وما ادراك ما مطعم شركة البترول

[فيصل العجمي]

السلام عليكم ورحمة الله وبركاته

الأخوان موظفي شركة البترول الوطنية انا احد اخوانكم في مصفاة الأحمدي وخدمات هذا المطعم تعيسة جدا لا نظافة ولا أكل ولا غيرة ,, وصراحة لا أعلم سبب تمسكهم بهذه الشركة مع ان هناك الكثير من الشكاوي بخصوص هذه الشركة ,, اعتقد انها نفس الشركة اللي ماسكة جميع المصافي.
بالنسبة للمدراء والمسؤلين دواهم صباحي ولا يعانون مانعانيه نحن موظفي الشفتات ,, فلو أردنا طلب أكل من خارج المصفاة نواجه أحياناً مشاكل مع حرس البوابة من أخواننا منسوبي وزارة الداخلية بسبب التعليمات التي لديهم تمنع المؤكلات ونحن لا نلومهم على ذلك ولكن نلوم من وضع تلك التعليمات ,, فلماذا لا يوفرون لنا البديل ومايلائم طبيعة عملنا ؟؟؟

نرجوا ان تصل هذه الرسالة لمسامع المسؤلين واعضاء نقابة الـ Knpc

[bo6elly44]

يعطيك العافيه يا خوي و الصراحه ما في احد ماكلها غيرنا موظفين الشفتات المكتب الرئيسي حاطين لهم كفيه او دلع وحنا كانتين نفس بقالات الورز لا اومافيه إلا بيبسي او كاكاو عشان إيحوشنا حارج :)

[نسناس]

احلى مافي المطعم خيار باللبن :)
الله يديم النعمه مالنا الا الصبر

[المارد]

كلما اكل بهالمطعم ينتفخ بطني لليوم الثاني الحمدلله والشكر ........ مادري شحاطين بهالاكل... نتمنى وقفه جاده من النقابه للتغيير ........ (;

[أبو طلال]

و الحال من بعضه للعاملين بالفترة الصباحيه ...

فما يقدم من سناك بوكس من قبل نفس الشركة يصل

للموظفين في حاله مزريه ... حيث السندويشات بارده و قد

تكون بايته ... و السلطه من نوعية رديئه و بعضها يغلب عليها

اللون الأسود لقدمها ... و أغلب الأحيان يكون ثلاث أرباعها ملفوف

يمكن لأنه رخيص هاليومين ... و الله يكون بعون الموظفين علما بأن

أغلبهم تخلى عن هذه الوجبات و أكتفى بالبسكويت و الشاي ...

و مع ملاحظة أن المسئولين الكبار تقدم لهم وجبات خاصه تصل في أطباق نظيفه

و مغلفه جيدا ... و لهذا لا يشعرون أو يلتفتون لمعاناة غيرهم من الموظفين ...

[المارد]

انا اقول يسوون عقد مع مطعم برقان والله احسن ... :d

[prince]

السلام عليكم يا اخوان
انا أقول وين النقابة ليش ماتطلب لنا !!!!!!!!!!!!!
بس أنا أقول
الله يكون بالعون

[حبيب البترول]

اي نقابة يا اخوان النقابة مشغولة بالأتحاد ومشاكل الأتحاد مو فاضية لكم ولمشاكلكم ونحن في ميناء عبدالله كلمناهم من زمان ولكن لا حياة لمن تنادي

[yaqoub banyan]

مشكلة المطعم مزرية وتعب الواحد حدة الاكل الله يزيد النعمة بس قاعدين نصبر على البلاء الي حايشنة منة

[KNPC]

يعطيك العافيه يا خوي على الطرح المهم جدا
ابصراحة المطعم تعيس جدا جدا بس أكيد تمسك الشركة بالمطعم فية مصلحة لأح الأشخاص المحسوب عليهم
الأمر لا يخفى على الجميع أنفع وأستنفع
يجب على النقابة ان تأخذ قرار وبسرعة للموضوع

[المتمكن]

نرجوا ان تصل هذه الرسالة لمسامع المسؤلين واعضاء نقابة الـ Knpc
وايضا اتمنى ان تصــــــل هذه الرساله الى
النقابه
قبــــــل المسئــــوليــــن

[فيصل العجمي]

السلام عليكم ورحمة الله وبركاته

جزاكم الله خير اخواني الكرام ونتمنى ان تصل الرسالة للمسؤلين ان شاءالله ولأخواننا اعضاء النقابة

[نسناس]

الالبان والروب يجيبون ارخص شي يوفرون

[عبدالله العصيمي]

اتفقوا جميعاً على أول يومين من الأسبوع ولا تطلبوا أكل من المطعم حتى لو اضطررتم لإحضار الساندويشات معكم من الخارج إذا كان الأكل يُمنع دخوله للمصفاة ، وأطلبوا مدير الخدمات الإدارية للحضور ومتابعة الأمر ..
قد يشكل هذا الإجراء حلاً أو جزءاً من الحل ..

تحياتي

[Operator]

انا اقول

مالــــــك الا الصـــــــبر وش ودّاك لـــــه

[المارد]

المطعم يجيب اليهد وخصوصا الشوربه .... الحمدلله والشكر

[ابيك ترتاح]

اوافقكم الراي اخوان فعلا المطعم تعيس لأبعد الحدود
وجد 3 مرات بالسلطه ( شعر ) واشتكيت وحياة لمن تنادي

[الرويشد]

تبون يتعدل لا نطلب من كلش لمدت يومين او ثلاث وترى الحين فرصتنا لانه رمضان وناس ادخل اكل معاها والحرس ترى يطوفون كل واحد وجبته معه والله راح يطقون على راسهم انا مره لاقي خنفسانه مادري ازهيوي في المرق ومره التفاح فيا دود والبسكوت بالكيس داخله حشرات وعل فكره انا ترى وديت عينات حق المختبر بره الشركه قال الدهن صارله سنه او مليون سنه يطبخون منه كل شي

[أميرة الرقه والذوق]

اي والله الأكل استغفر الله ماتشتهي تطااالعه

الله يسامحهم بس

[سراب الصيف]

والله الموضوع هذا من زمان في بالي تكفون نبي حل حتى برمضان محنا عقادرين نفطر ولا نتسحر
الله يخلي مطاعم الوجبات السريعه

[loard]

النقابه عندها خبر بس ماتقدر تسوي شي والسبب لاهين بمصالحهم الخاصه؟ او خايفين من الرشيد

[Fire]

والله انا اضم صوتي لصوتكم ياأخواني الله يديمها من نعمه بس شنو نسوي كتبنا شكاوي
بس ماكو فايده

انا اقول نتمسك براي اخوي عبدالله العصيمي

ودمتم سالمين

[فيصل العجمي]

اخواني الكرام انتم مصدر قوة النقابة والاتحاد
فأنتم من يدعمهم للمطالبه بحقوقكم وان تخاذل البعض في مطالبكم فمثل ماوصلنا اعضاء النقابه ماحنا عجزانين من توصيل شكوانا الى الادارة وراح احاول اجيب ايميلات المدراء لمراسلتهم بخصوص بعض الشكاوي في المنتدى

[bo.3li]

الموضوع كله تنفيع وبس وحتى السافتي شوز والبلسوت المشكله انه الشركه تدفع مبالغ مو بسيطه
بس على الفاضي الوجبه سعرهاالاصلي دينارين ونص تقريبا تخيل جم موظف موجود لو تتعاقد الشركه
مع ميس الغانم راح يوافق على عدد الوجبات وراح يكون ربحان بعد بس الضاهر الي قاعد ينفعونه
ما ينقدر عليه وطماع

[زهرة التوليب]

للأسف المطعم سيء للغايه
مع ان الشركه ماعليها قاصر ما ادري ليش يتعاملون مع مطعم مو نظيف وعليه شكاوي
وعلى كثر الشكاوي ما اشوف اي اجراء او اي تغير !!!

حاطين لنا في مبنى دار الوطنيه أردى كافيه
وغالي وغير جذي مرات أكلهم محزر !!

خل يشوفون الشركات الثانيه ويتعلومون منها
حتى الوزارات الحكوميه مطاعهم احسن بوايد منا

[احمد علي محمد]

لو تدشون مطعم ميناء عبداللة وتشمون الممرات راح ماتاكلون شيء بعدة مطعم كلة بنغالية وهنود ريحت الزيت مثل محطة تبديل الزيوت

[Rotating_Engineer]

كنا نشتكي من سوء خدمات التنظيف في دائرتنا و واحد جزاه الله خير جمع تواقيع الموظفين ودزها حق مسئول النظافة والحين مكاتبنا من اورع ما يكون والحمامات تلق من النظافة, افضل الحلول كتابة رسالة شكوى وارسالها الى المسئولين

[زهرة التوليب]

كنا نشتكي من سوء خدمات التنظيف في دائرتنا و واحد جزاه الله خير جمع تواقيع الموظفين ودزها حق مسئول النظافة والحين مكاتبنا من اورع ما يكون والحمامات تلق من النظافة, افضل الحلول كتابة رسالة شكوى وارسالها الى المسئولين

اشتكو موظفين وايد
وعندهم اثبانات ان الأكل مو نظيف
مرات يلقون في السلطه حشرات عزكم الله
وياخذون الوجبه نفسها يودونها للمسؤول ويشوف بعينه
ويتوعد انه راح ياخذ اجراء وطبعا عمك اصمخ

الظاهر المناقه مالت هالشركه راسيه على واحد من الكباريه وما يبون يخسرونه

ولا عزاء للموظفين

[كنبس]

هالمطعم ابو المشاكل لا ادارته ولا المسؤلين الى بالشركه الى عليه على العمال كلهم متفقين
والمحسوبيه والقوة اقوى من الاداره حتى بمخاطبته او التقدم بشكوى والاثبات لادارة المطعم
يبا مالكم الاحل واحد لو تسمعون الكلام وتقررون باسبوع مقاطعه بالكامل من جميع الاقسام ومع توزيع وقت المقاطعه بالمصافى
وباقى الاقسام بوقتها مع التنسيق عن طريق هذا المنتدى والتلفونات والاصرار عليه ونشر لوحات بالمقاطعه عند الجسور والبوابات
ابرك من اعلانات التهنئه لفلان وعلان "وعساكم من عواده وتقبل طاعتكم "
تخيل لو مسؤلين المطعم يشوفون هالاعلان عند الجسور بموعد المقاطعه شوف النتيجه
بس بشرط الاتفاق والتنسيق مع المقاطعه بالكامل
غير هذا الحل مافيه لاننا جربنا الشكوى لهم وللنقابه من قبل
ولكن عمك اصمخ
انا عن نفسي مقاطع المطعم من سنه والسبب رداءه الاكل والسكر(الله يبعدكم منه )
واكلى معاى او الله يعز القطيه والربع . بلا مطعم بلا بطيخ
الله يديم النعمه . حط فلوسك بالشمس واكل وانت مرتاح
وتحياتي لكم

[frfosha]

مرحبه عليكم جميعا والله يا خوي على طاري المطاعم ملوت المصافي يفشلون انت شفت الكرواسو مالتهم تقول جنك منقعها بماي يا اخي خلها على الله حاميها حراميها ومناقصات هالمطاعم شيل لا تشيل زمنفعه لبعض المسؤلين وبعض شركات التغذيه للاسف

[fireeccc]

السلام عليكم
اول شي ياجماعه لازم نشوف حل حق المواضيع اللي اكبر من المطعم واذا على مشكله المطعم اجمعوا تواقيع عشره موظفين من كل قسم وتابعوها

[Mr.Kv]

انا لقيت نمل في الاكل وكلمت الشفت ليدر وقالي اخذه للعياده واكتب شكوى وسويت اللي قالي تدرون شنو صار؟؟؟؟؟
ثاني يوم الطعم دازلي بقلاوه!!!!!!! وما صار شي بعدها!!!!!! بقلاووووووووه!!!!!!!!!!!!!!!!

[frfosha]

مرحبه يا اخوان ، استغفر الله على وجباتهم ونفس ما قال اخوي knpc أنفعك وتنفعني ولو راح ترجع منو ماسك هالشركه راح تلقاه من الناس اللي لهم مصالح يا اخوان خلوها على الله والله لو يعطوني انا مناقصة التغذيه حتى الموش واليريش اسويه لكم لووووووووووووووووووول لا أتغشمر ومشكورين

[Neilz]

ياجماعه احنا جم مره اشتكينا على مطعم الشركه بورقه مسوينها حق اليونتات كلها او ماكو شي للحين تدروووون شسوووون السلطه يخلونها من امس لين غدا اليوم الثاني يعني صج صج ماكو مراقبه من احد نهائيا ...او حبيت اقولكم شي صار بواحد من ربعي تسمم من اكل الداوم او من يومها ماقام ياكل كلش من اكل الشركه ديرو بالكم يالربع ....

تحـــــــــــــــــــياتي

[زهرة التوليب]

مو بس جذي تره حتى الكانتين رايح فيها واللي يشتغلون فيه مو نظاف

تلقاه يترس تب ماي من البراده ويوديه المطبخ وكل شوي ياخذ منه حق الجاي والقهوه وغيره !!!

عاد تب ؟؟ شنو يبي يغسل سياره ؟؟

وغير البوق طبعا كل اخر اسبوع اييك يبي يحاسبك يقولك 4 دنانير ؟؟
وانت طول هالاسبوع مو طالب غير قهوه وجاي ؟

والله انا اعرف وحده معاي بالدوام شكت في الحساب قالت له ابي اشوف انا شنو طالبه هالاسبوع
عاد يوم شافت الورقه انصدمت شافت عصير البرتقال يوم 400 ويوم 600 فلس ؟؟
قالت له ليش؟ جان يقولها اللي يشتغل بالكانتن (مصري) على حسب وزن البرتقاله ؟

طبعا ما سكتت وكلمت السوبر فايزر مالهم وبغه يخصم عليه يوم شاف البوق وعرف انهم يقصون على الموظفين ويبالغون في السعر
بس ماكو فايده يتعدلون يومين وطول الاسبوع بوق ؟

[الزعيم]

ياجماعه .. المشكله هاذي صارلها سنوات. والكل يشتكي ويطالب لكن عمك اصمخ !! اهم شي انفسهم والباقين بكيفهم ..!!

[engineera]

السلام عليكم انا صراحه ايب اكلي معاي :)وحدي قهوه او شاي من الكفتيريا من عقب ماجربت السناك بوكس مالهم ...الله يديم النعمه