ممكن تفيدوني بخبرتكم و نصايحكم لموظفة يديده [الأرشيف] - منتدى العاملين بالقطاع النفطي الكويتي

مشاهدة النسخة كاملة : ممكن تفيدوني بخبرتكم و نصايحكم لموظفة يديده

Blue angel

11-26-2007, 12:20 AM

السلام عليكم و رحمه الله و بركااااااااااااته

اشلونكم و شخباركم ؟؟؟ ان شالله كلكم بخير ، اتمنى تعطوني اشوي من وقتكم و تفيدوني بنصايحكم و خبراتكم في شركة نفط الكويت ، عاد شجعووووووووووووووني مابي احباط :p

يعطيكم العافيه و بالتوفيق للجميع يااااااااااااااااااااااااااااااااااااااااااااااااا ااااااااااارب

Phox

11-26-2007, 12:33 AM

مبروك ان شاء الله

وين قابلينج اى فريق ؟

م.محمد

11-26-2007, 01:50 AM

ترى شغل الشركه يشق شق ديري بالج
8 ساعات دوام رسمي وماكو راحه كلش
اللهم بس وقت الغدا والصلاه بس
والله يعينج :)

هذا الي اقدر افيدج فيه
بس عسى ماخترعتي ؟

الناهض

11-26-2007, 07:56 AM

مبروك انشالله وعساها فال حلو عليج انشالله
انصحج بالالتزام بالدوام والمثابره بالعمل
(((من جد وجد ومن زرع حصد ومن سار علي الدرب وصل)))
حاولي اتميزين بشغلج وتخلين لج طابع خاص بشغلج
كثر ماتقدرين لا تاخذين طبيات لانها تأثر علي ترقياتج وتقريرج السنوي((الشركه تعتمد علي نظام اسمه الرينج او المفاضله))
واتمني لج التوفيق والنجاح بحياتج العمليه والمهنيه

alaslamy

11-26-2007, 08:01 AM

ألف مبروك والله يوفقج إن شاء الله

وإذا في اي سؤال احنا حاضرين وبالخدمه

الفيصل

11-26-2007, 08:10 AM

ألف مبرووك ان شاء الله

وماكو الا كل خير الدوام ان شاء الله سهاله

ولكن الالتزم مطلوب ما عليج الا داومين الـ 8 ساعات

تمنياتي لج بالتوفيق

Reem

11-26-2007, 09:44 AM

الف مبروووووك :) مثل ما قالو الاخوان .. اهم شي الالتزام ولا تكثرين طبيات .. وانشالله نشوفج تيم ليدر P:

القعقاع

11-26-2007, 10:49 AM

لا يبااااااا الدعوة سهاااالات سوي اللي تسوينه

كل شي واسطه

قريد ,تنقلااااات,كل شييييييييييييييي واسطه

والحق ينقال

dehen_3ood

11-26-2007, 10:53 AM

بالمبارك الوظيفة وعسى الله يعطيج من خيرها ويكفيج شرها إن شاء الله
موفقة إن شاء الله ..

..

أسعدنا حضورج وتواجدج الكريم معانا
وحياج الله معانا اختي الكريمة ..

القناص

11-26-2007, 12:12 PM

مبروك على الوظيفه

راح تشوفين العجايب فى الشركه

كل شئ بالواسطه

و الله يوفكج

الولدالذهبى

11-26-2007, 12:28 PM

والله يا اختى اذا جامعيه
رووحى دوريلج وزاره والا هيئه
أبرك لج من الشركه
ع الأقل الراحه النفسيه
ومثل اليوووم الجو غيم وحلووو
احنا بس فراره بالبر
والوزارات قز ع البحر
:) :)

وبس

PetroleumENG

11-26-2007, 02:09 PM

والله يا اختى اذا جامعيه
رووحى دوريلج وزاره والا هيئه
أبرك لج من الشركه
ع الأقل الراحه النفسيه
ومثل اليوووم الجو غيم وحلووو
احنا بس فراره بالبر
والوزارات قز ع البحر
:) :)

وبس

You Are Right

Blue angel

11-26-2007, 06:43 PM

بالبدايه الله يبارك فيكم و يوفقكم يا رب ، يعطيكم الف عافيه على اهتمامكم بالرد علي و مشكورين ما قصرتوا

اهم شي انا اشتغل بضميري و الباقي على الله ، الله سبحانه يعطي الانسان على قد نيته ، الوزاراااااااات لووووووعه على الاقل الواحد يحلل راتبه ، انا يشرفني انضمامي لكم و ان شالله اكون عضوه متميزه

بالتوفيييييييق للكل

op2

11-26-2007, 06:47 PM

ال شي مبروك الوظيفه وبالتوفيق

ومثل ماقالو الي قبلي الدوام واسطه ونصيحه لا تشدين حيلج بالشغل لانج بتنصدمين لما بتلقين المهمل بعمله بالواسطه يترقا

وبالتقيم افضل من الي يشتغل

قزريها حب شمسي وجاي وقهوه وسوالف واشتغلي عن الحلال والحرام مو اكثر

لا تبذلين مجهود بالشغل ابذليه بالواسطه

وقتها بتوصلين للاعلى

Blue angel

11-26-2007, 07:41 PM

الله يبارك فيك تسلم ما قصرت ، كل مكان فيه واسطه بس مافي واسطه اقوى من الله سبحانه و تعالى ، عندي امل اني على قد شغلي بحصد ان شالله و الله كريم ، الله يوفق الجميع يا رب

احمد علي محمد

11-26-2007, 11:05 PM

اللة يعينج علي الشقا مالقيتي الا البترول لو لاقية اي وزارة اسنعلج

HUMMER

11-26-2007, 11:15 PM

مبروك اختي الوظيفه وشدي حيلج ومالج شغل باحد وكثر ماتعطين كثر ماتاخذين
وكافي مميزات الشركه اللي محد يحصلها بالوزارات
وبالتوفيق ان شاء الله

علميني الحب

11-27-2007, 12:36 PM

مبروك
ولا يسعنى إلا نرحب فيج بينا ومعانا
ولكن ما راح أزيد على ما قالوا الأخوان
كل شي بالواسطه
أشتغلتي أو قعدتي
إذا حبتج عيني ما ضامج الدهر وأنا أخوج
هذا أنا 9 سنوات كرف ما حصلت على شي يفتح النفس وغيري تعينوا بعدي وعليهم بالعافيه

Blue angel

11-27-2007, 03:04 PM

الله يبارك فيكم و يوفقكم يا رب ، مشكورين على الرد و الله كريم ،بسوي اللي علي و الحمد لله على كل حال ، موفقين يا رب

skipper

11-27-2007, 03:27 PM

اول شي مبروك
وثاني شي زين سويتي ويتي الشركه احسن من الحكوممه بمليون مره
ومالج شغل باللي يقولج الشركه موزينه
الشركه احسن من غيرها وفيها مميزات احسن من الحكومه
ونصيحتي لج
انطباعج الاول بالشركه يعني بالعربي شدي حيلج بأول سنتين راح ترتاحين العمر كله انشالله
لانه الانطباع الاول شي مهم بالشركه ومتعارف عليه عند المسؤلين

وثاني شي حاولي ماتاخذين طبيات لانها تأثر
وسلامتج وتعيشين
ووين العزيمه نبي حلاوه التعين :)

Engineer

11-27-2007, 04:47 PM

أولا مبروك القبول أختي الكريمة

ثانيا أهم شي في هالشركة انج تكونين طموحه وعندج هدف مع الالتزام طبعا وصدقيني راح تلقين كل خير

بالتوفيق للجميع

lin80

11-27-2007, 05:06 PM

لا لا خفو عليه من الحين ماكو الي الخير باب بس كليوم تقومين من النوم لا تسرعين

جونم جقرم

11-27-2007, 10:06 PM

جونم جقرم

11-27-2007, 10:07 PM

لا لا خفو عليه من الحين ماكو الي الخير باب بس كليوم تقومين من النوم لا تسرعين

line80 ويييينك من ال hse

:D:D:D

Blue angel

11-27-2007, 11:50 PM

Skipper الله يبارك فيك مشكور ما قصرت ، ان شالله العزيمه مؤجله لشهر 2 اذا عطونا الكادر :)
Engineer يعطيك ألف عافيه على التشجيع و الله يبارك فيك و ان شالله بسوي بنصايحك
lin80 مشكور على الرد ، المشكله الدوام من 7 يعني ما يمدي الواحد ينام بس الطريج حلو لانه عكس السير
ft-50 مشكور على تشجيعك ( اقصد احباطك ) لي، ليش عاد تسود الدنيا يويهي سلامتي من القهر ان شالله عدويني ياااااااااارب قولي آمييييييييييييييييييييييييييييييييييين

مشكورين واااااااااااايد على الرد سواء اللي شجعني او اللي حبطني و يعطيكم العافيه و بالتوفيق للجميع يا رب

ABDULLAH

11-27-2007, 11:52 PM

موفقة و الله يبارك لج في وظيفتج و نفسج آميين

norema-sarto

11-28-2007, 09:21 AM

ما عندي شي أضييييفة
كل اللي قالووووووووووه صح x صح

اللي عنده واسطة .....لا يخاف على نفسة

واللي ما عنده ......يتوكل على الله أولا وعلى نفسه ثانيا
ولا تسمعين كلام اللي معاااااج....وسوي اللي يقوله ضميييييرج

وبالتوفيييييق

رحال

11-28-2007, 09:30 AM

مبروك

تحتاجين إلى 3 زيارات ميدانية إلى كل من :-

1- فريق عمل شؤون العاملين
2- فريق عمل التعويضات
3- فريق عمل العلاقات الصناعية

مع وافر الشكر والاحترام ... ومبروك مرة ثانية

skipper

11-28-2007, 09:37 AM

لاتنسين سجلي بالصندوق التكميلي ترى زين
والتعويضات يفيدونج بالموضوع اكثر
واخذي نسخه من كتاب العامل عشان تعرفين اللي لج واللي عليج

ثامر الخالدى

11-28-2007, 12:39 PM

1- شغلج افهميه وتمكنى منه عدل

2- استفيدى من الاقدم منك فى القسم واخذى من خبرتهم

3- اذا فيه مقاول معاكم حاولى تستفيدين منهم لانهم دايما حافظين شغلنا كله

4-اسألى عن كل شى لانج جديده ومحد يلومج فى السؤال

5- من جد وجد ومن زرع حصد

6- الشركه من احسن الاماكن فى العالم ( الناس اللى يخربون او يصلحون...اللى موعاجبه الوضع ليش ما يطلع )

اخيرا الله يوفق الجميع.:d

المنصور

11-28-2007, 02:19 PM

اول شي مبروك على الوظيفة

يمكن الكلام اللي بقوله مكرر او مستهلك لكن اخذي منه اللي يعجبج وتركي اللي ما يعجبج

شدي حيلج بالشغل والأهم اهو الإلتزام بالحضور والانصراف ، خلج دقيقه بشغلج ولا تستحين من السؤال مره ومرتين وثلاث ، عطي غيرج انطباع جيد عند لأن اهم شي الانطباع الأول اللي يبين للناس اذا انتي راعية شغل ولا راعية قعده وسوالف واتكال على الغير.

خلي عندج طموح.. انج توصلين إلى مراكز عاليه

سكري باب الاحباط ولا تفتحينه للناس أبدًا ، لأن في ناس بس مهمتها انها تحبط غيرها.. خصوصًا الموظفين الجدد ، واللي تشوفينه يحبطج ويقول لج ليش اشتغلتي هني.. قولي له انت شمقعدك دام الشركة او الفريق او القروب موزين!! اللي ما يعجبه المكان خل يتوكل على الله

لا تسرعين بالهاي وي حتى لو كنتي متأخره ، تأخري 5 دقايق واخذي لج كلمتين من المسئول ولا انج تسوين حادث ويصير فيج شي لا قدر الله

لا تكثرين من الغيابات والمرضيات لأنهم موزينين لملفج كموظفة جديده

كل شي تاخذينه بشغلج وبمجهودج مو بالواسطة ، صحيح ان الواسطة موجوده لكن توكلي على الله وخلي شغلج اهو اللي يثبت وجودج (سئلي مجرب) ودايمًا تذكري هالآية { وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ وَسَتُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُمْ بِمَا كُنْتُمْ تَعْمَلُونَ} (التوبة:105)

اذا مسئولج عطاج شغل.. لا تقولين هذا مو شغلي ، لأن هالكلمه مو زينه ، حتى لو كان مو شغلج.. سويه وانتي فرحانه لأن هالشي راح ينفعج مع الايام الجايه

راح تشوفين ناس قاعده وما تشتغل وتسوي مشاكل وتحط واسطات ويمكن تاخذ تقييم احسن من تقييمج السنوي لكن توكلي على الله والله ما يضيع تعب

آخر نقطه..

أقصى تقييم يعطيج اياه مسئولج في السنه الأولى لج اهو جيد + (Good +) لأن هالشي صاير عرف في الشركه ، إلا اذا كان التيم ليدر مو راد على أحد وعطاج التقييم اللي انتي تستاهلينه ، واذا صار مثل ما انا ذكرت.. ترى السنه اللي وراها بيعطيج تقييم احسن وأحسن.

وبالتوفيق ان شاء الله

Blue angel

11-28-2007, 03:04 PM

عبد الله الله يبارك بعمرك يا رب مشكور و الله يوفقك يا رب
فيروز يعطيك العافيه على الرد و بالتوفيق ان شالله
رحال الله يبارك فيك، اكيد انا مريت على كل هالاقسام و مشكور على الرد
Skipper هلا مره ثانيه اي انا سجلت بالصندوق التسجيل صار اجباري مع توقيع العقد، شكرا على الاهتمام
ابو فهد يعطيك ألف عافيه على هالنصايح و اكيد بستفيد منهم و بطبقهم و مشكور ما قصرت

Blue angel

11-28-2007, 03:08 PM

المنصور تسلم ايديك و يعطيك ألف الف عافيه ، تعبتك معاي مشكور وايد على التشجيع و النصايح المفيده اللي اكيد بستفيد منها ، الله يوفقك و يعطيك على قد نيتك يا رب

مشكورين كل اللي ردوا و عطوني من وقتهم

باش دبلوم

11-28-2007, 03:54 PM

اولا ارحب فيج كموظفة فى الشركة

وثانيا هم ارحب فيج كعضوه فى المنتدى

وثالثا اتمنى لج التوفيق والسداد والتألق فى الوظيفه

ورابعا واخيرا لا تهتمين لكل من تكلم وتحلطم من الشركة والدوام لو ما فيها خير نفس مايقولون ماراح يقعدون فيها ولا يوم تلقينهم اول ناس يطلعون منها .

وبالتوفيق

nuclear

11-30-2007, 10:19 PM

الله يبارك فيك تسلم ما قصرت ، كل مكان فيه واسطه بس مافي واسطه اقوى من الله سبحانه و تعالى ، عندي امل اني على قد شغلي بحصد ان شالله و الله كريم ، الله يوفق الجميع يا رب

السلام عليكم
اولا مبروك الوظيفه و ثانيا شدي حيلج و مالج شغل بالاحباطات الواحد او الوحده اكيد حاطله منهج يمشي عليه انشاء الله يكون صحيح خلج على ما انتي عليه و الباقي على الله و بالنسبه لموضوع انه ماكو واسطه اكبر من الله بهذي صدقتي شدي حيلج و مالج شغل باحد و الله يوفقج و يوفق الجميع
و دمتم سالمين

Blue angel

12-01-2007, 10:52 PM

باش دبلوم مشكور وايد و يعطيك ألف عافيه على تشجيعك لي هذا من ذوقك ، بالتوفيق يارب

Nuclear و عليكم السلام ، الله يبارك فيك تسلم ما قصرت ، اكيد كل واحد حاطله هدف و يمشي عليه يتوكل على الله و يبذل مجهود و اكيد باذن الله بيوصل للي يبيه ، الله يوفق الجميع يا رب و مشكور على الدعم

الشايب

12-02-2007, 12:38 AM

وعليك السلام

هلا وغلا

ومبروك الوظيفه

وانشالله اول معاش لي

:)

وما أوصيك بالطبيات :)

وموفقه خير انشالله

Blue angel

12-02-2007, 03:27 PM

هلا فيك يا الشايب ، الله يبارك فيك و يطول بعمرك، راح عليك اول معاش مو باقي منه شي، اسمه الله علي من الطبيات ان شالله ما احتاجهم ، الله يوفق الجميع و مشكور على الرد :)

الارياق

12-03-2007, 12:47 AM

ما شاء الله عليج بلو انجل اربع صفحات نصايح نزلي انتخبات والله دام جذي شعبيتج

أبو خالد

12-03-2007, 08:48 AM

أقول ... ما صارت

الحين من بداية طرح الموضوع لتاريخ اليوم وانتم طايحين له نصايح!!!

يبا ... خلاص صارت البنت قديمة ماعادهي بجديدة ولا عادهي ب فرش (طازه)

روحوا شوفوا لكم موضوع ثاني طيحوا له سوالف

redrose

12-03-2007, 08:58 AM

مبروك على الوظفيه ،، وشدي حيلج من اولها

Blue angel

12-03-2007, 03:49 PM

الارياق اول شي مشكور على المشاركه ، اشوه قلت ماشالله لا تحسدني و الله خوش فكره و اخليك انت مفتاحي الانتخابي :)

ابو خالد حياك الله و مشكور على المشاركه لا للحين انا يديده توني كملت اسبوعين من داومت و للحين ما بلشنا بالشغل تونا بالدورات و خلهم يشاركوني و يفيدوني بنصايحهم ليش زعلان؟؟؟ بالتوفيق يارب

red rose الله يبارك فيك / فيج ، مشكورين على النصيحه و ان شالله بطبقها :)