الحين ليش ما

[redrose]

ليش ما يسون لنا جمعيه خاصه فينا مثل


(جمعية الشرطة والجيش )

[أبو خالد]

صج صج من احسن الاقتراحات اللي سمعتها من تعينت بالكي او سي

[redrose]

ميرسي خالصِ

[علميني الحب]

أقتراح جميل
أتمنى النظر فيه

[كويتي]

كل الشكر للأخت redrose لطرحها هذا الإقتراح؛ و للعلم ينص الباب الخامس (الخدمات و المساعدات) من لائحة النظام الأساسي للنقابة مادة (12) فقرة (5) على الآتي:

5- الخدمات التعاونية:
كالعمل على تأسيس الجمعيات التعاونية للإرتفاع بالمستوى الإجتماعي و الإقتصادي للعامل و زيادة القوة الإنتاجية للعمال و الأخذ بأحدث أساليب التدريب.

كما تنص المادة (14) من الباب السادس على ما يلي:

المادة (14) :
تقوم النقابة باستثمار أموالها في المشروعات و أوجه الاستثمار المضمونة الربح و التي لا تتعارض مع أحكام المادة (73) من قانون العمل في القطاع الأهلي.

بس ربعنا للأسف ماشين على المثل الكويتي العتيــــج

عمك أصمخ،؛،

[زهرة التوليب]

والله اقتراح روعه

بس عاد ربعنا ينفذون والا طاف كالعاده ؟؟

[Q8_oil]

ليش تبون جمعية خاصة فيكم و بأسعار مخفضة مو إنتوا بالنفط و معاشكم 2000 !!

هذا للأسف تفكير الناس :(

[بلبل عنقريزي]

اقتراح روعه

[Future]

شلون نفعل الموضوع لانه مثل ما قالوا الاخوان اقتراح رائع.
واقل شي يفتحون جمعيات في منطقة غرب الكويت والشمال لانهم بعيدين عن الخدمات

[Q8_oil]

إن شاء الله لما تجينا نقابة نفس الأوادم و تكون بنيتهم خدمة الموظف بالفعل ممكن يسوون لنا

و إذا سووها تستاهل ريد روز ديسكاونت 50% عشان إهيه صاحبة الفكرة :)

[جونم جقرم]

الصرااحة اقترااحج رووعه وانااا بضيف شغلة عليييه بدال مايسوون جمعية وبلبله خلهم عالاقل يزيدوون علاوة غلاء المعيشة ((:

[ABDULLAH]

إقتراح ممتاز و يخلون الموظفين يساهمون بالتأسيس و يكون لهم مثل صندوق الجمعيات برقم الشركة

[ضارى]

السلام عليكم ورحمة الله وبركاته


أقتراح مميز أختى redrosse نسأل الله العزيز القدير أن يرى النور

وكما قال الاخوان أن تكون له أفرع بالحقول (الروضتين - المناقيش - برقان)

ومنا إلى إدارة ونقابة الشركة للعمل على تطبيق هذا الاقتراح المميز


والسلام عليكم

[المشاكس]

مافي شك ان الأقتراح ممتاز ...... ولكن الجمعية من راح يتبناها ..... الشركة أو النقابة ؟

إذا النقابة ... ماعتقد راح يسوون شي .. لأن من زمان يعني قبل هالقائمة طلبة النقابة أنها تفتح محلات بقاله في الحقول بس الشركة رفضت الطلب حسب علمي ....

ثاني شي القائمة الحالية مع أحترامي الشديد لها .... تقدم لها بعرض عن طريق محمد السنعوسي ... إن يأجر منهم الجزء الخلفي من النقابة بمبلغ 10آلاف دينار شهرياً على أن يقوم بوضع أعلانات وعمل منتزه ترفيهي مشابه لشوبيز السالمية ... إلا ان النقابة رفضت الطلب وقامة بتأجيره على المتعهد الحالي بمبلغ زهيد جداً مقارنة بالمكان والمساحه .. لا وبعد فتره زادو المساحه المؤجره وضمو لها حمام السباحه بدون زيادة الأجار ................... والفاهم يفهم ...... وتبون جمعية بعد

[Q8_oil]

محنا شيلي مخزبقنا و مضيعنا غير النقابة

[المهندس]

أختي ريد روز - الاقتراح هذا قديم وتم طرحه من قبل اداره خدمات الاحمدي - بس لم يتم الموافقه عليه لعده اسباب واهيه

مثل

1- ماكو ميزانيه
2- وين راح يبنونه
3- لازم ننطر مدينه الاحمدي اليديده اللي فيها كل شي او ليمن يوافقون مجلس الامه والحكومه على مدينه الاحمدي الذكيه (شغل حكومه يعنياللي مو عارفين راسهم من كرياسهم)
4- القوه الشرائيه - يقولون مو قويه لأنه جزء كبير من موظفين الشركه مو ساكنين في الأحمدي - يعني اللي في الديره شلون بيستيفيدون منها

وهالشغلات - عوائق وماكو قرار واسباب واهيه

وشكرا :)

[redrose]

ليش يعني كل شي ما يصير ؟ عيل االنقابة ليش موجوده اذا مثل هذي الإقتراحات ما يبت فيها وتنفذ .

عيــــــــل خـــــــل يشــــلون الناس اللي الموجوده حاليا " وهما يا الله نفسي ".....

[A/KARIM]

بصراحة خوووووش فكرة

بس وين اللي ينفذ ؟؟؟؟؟؟

[المهندس]

ليش يعني كل شي ما يصير ؟ عيل االنقابة ليش موجوده اذا مثل هذي الإقتراحات ما يبت فيها وتنفذ .

عيــــــــل خـــــــل يشــــلون الناس اللي الموجوده حاليا " وهما يا الله نفسي ".....

على حسب معلوماتي النقابه تدري في هذا الموضوع_ وأتوقع انهم مقتنعين في فكره التأجيل ليمن يتم بناء الأحمدي الجديده - اللي فيها كل شي :)

خل ننطر ونشوف اذا فيها كل شي:rolleyes:

[أبو خالد]

اخوي المهندس..

لا تذبح الفكرة وهي توها ما شافت النور

اذا على المكان الكي او سي عندها مناطق لا تحصى واذا على القوة الشرائية .. عندك فوق ال 19 ألف موظف بالقطاع النفطي وما تبي عندك قوة شرائية...

الحرس والجيش والشرطة حاطين جمعياتهم في اكثر من مكان ... وتلقى مكان جمعياتهم ماله شغل بتواجد العاملين العسكر ؟؟؟


انا من رايي يكون ادارة الجمعية من قبل الموظفين في القطاع النفطي .. أو نفط الكويت (لا نقابة ولا الشركة )

النقابة حطت ايدها على مدخل المستشفى .... ومدري شلون نظام توزيع الأنشطة هناك (يعني شلون انطبخت وانأكلت ..مدري)
الشركة كنها وزارة الشؤون ... يومها بسنة .. ويحكم على الطابع الحكومي

خل يقظبونها ناس من الشركو أو القطاع .. عشان يستفيدون ويفيدون...

[Shoomy]

ردروز .. بصراحه فكره حلوة ... أهنيج عليها :D

نتمنى انها تشوف النور وانشالله تطبق :p

بس السؤال اللي طرح نفسه وتعور.... وين بيسوونه؟؟ بأي منطقه؟؟ :confused:

هني الحجي :D

يعني جمعيه الشرطه شتسوي بجنوب السره؟؟؟ :rolleyes:

[alaslamy]

بصراحه اختي فكره حلوه

وإن شاء الله تطبق ونفتك من اعضاء الجمعيات اللى لعبو علينا!!!

[م.محمد]

اكتب اقتراحك
اشتنطر

عسى يوافقون

[المهندس]

اخوي المهندس..

لا تذبح الفكرة وهي توها ما شافت النور

اذا على المكان الكي او سي عندها مناطق لا تحصى واذا على القوة الشرائية .. عندك فوق ال 19 ألف موظف بالقطاع النفطي وما تبي عندك قوة شرائية...

الحرس والجيش والشرطة حاطين جمعياتهم في اكثر من مكان ... وتلقى مكان جمعياتهم ماله شغل بتواجد العاملين العسكر ؟؟؟


انا من رايي يكون ادارة الجمعية من قبل الموظفين في القطاع النفطي .. أو نفط الكويت (لا نقابة ولا الشركة )

النقابة حطت ايدها على مدخل المستشفى .... ومدري شلون نظام توزيع الأنشطة هناك (يعني شلون انطبخت وانأكلت ..مدري)
الشركة كنها وزارة الشؤون ... يومها بسنة .. ويحكم على الطابع الحكومي

خل يقظبونها ناس من الشركو أو القطاع .. عشان يستفيدون ويفيدون...


يالغالي يالحبيب :) شكو اذبح الفكره انا - الفكره قديمه وناقشوها الجماعه اللي عندنا والاعذار والاسباب الواهيه مثل ما قلت فوق - انا مالي شغل.

بالنسبه للقوه الشرائيه - الجمعيه لشركه النفط او للقطاع النفطي ككل- واي شركه فينا (في القطاع النفطي) راح تتبناها ووراح اتديرها -ما يبون عوار راس الجماعه

وانا مع الفكره ميه بالميه (اول واحد راح يستفيد انا)

[الولدالذهبى]

ما نبى جمعية
نبى اشتراك سنوى مع مركز سلطان
:)
بعد لا زياده ولا يحزنووون
خل نحلم
:)






وبس

[أبو خالد]

ها يا نقابة... شنو الاجراءات المطلوبة عشان نطالب بانشاء الجمعية (لا تخافون جمعية تعاونية) ؟؟؟

رجاءاً أفيدونا

[norema-sarto]

ليش ما يسون لنا جمعيه خاصه فينا مثل


(جمعية الشرطة والجيش )



أقتراحك مقبول

بس للأسف راح ينطبق في آخر يوم لتقااااااااعدك
خخخخخخخخخخخخخخخخخخ

لأنهم راح يطلعون قرار للمتقاعدين ألا وهو:

لا يحق للمتقاعد ولا لأقربائه بالتمتع بهذه الميزة؟؟؟

[أبو خالد]

الله يذكرك الشهادة يا فيروز..

الحين عندنا المتقاعدين من القطاع النفطي/ أو نفط الكويت .... وهذول نسبتهم كبيرة .. يعني قوة شرائية

المهم لو يتم الشي هذا راح تكبر قاعدة المساهمين وبالتالي كل التجار راح يستذبحون عشان يعرض عندنا بالجمعية لأن الكل راح يتوجه لها عشان يشتري ... سواء كان بالنفط او من برّا

[أمني]

السلام عليكم
بالنسبة لشركة البترول الوطنية
منحة نقابة البترول الوطنية ارض بميناء عبدالله امام المصفاة قبل المواقف العامة لاستثمارها ( مطاعم وسوبر ماركت )
هذا الكلام من 4 او 5 سنين وللحين النقابة نايمة
الخلل وين من الشركة والا النقابة

[أبو خالد]

الخلل لا من النقابة ,,, ولا من الشركة .... الخلل مننا طال عمرك (حنا اللي مو قاعدين عدل )


يا نقابتنا العزيزة.... رجاء أبدوا رايكم (لا تكتفون بالمشاهدة)

على افتراض ان الخبر اللي جابه اخونا -أمني- مثبت

[المهندس]

المشكله في العقليات الاداريه اللي عندنا - ما في روح مبادره وما في روح متابعه - كل تفكيرهم شلون يصولون للمنصب الأعلى - وما يبون مسئوليه عليهم!!! يبون اي مشروع ما ايي اللا بأقتراح او من شكوى من نقابه او ناس علشان يتحركون.

[أبو خالد]

يمكن الحل في انه يروح مجموعة من العاملين بالقطاع ويقدمون رغبة (يعملون طلب) لدى وزارة الشؤون أظن هي الجهة المعنية ... ولا تعور راسك بنقابة ولا بشركة ...

إذا قدرنا نشكل مجموعة - أتوقع يوجد حد أدنى لتشكيل مجموعة- ان شاء الله راح نوصل لنتيجة


أنا راح أسأل في الموضوع من جميع النواحي ,,, وان شاء الله راح أطلع بشي على الأقل نهاية الاسبوع الجاي

واللي يملك أي معلومة تفيد الموضوع .. رجاء لا يحرمنا من معلوماته

[BO_SHROOQ]

اقتراح روعه بس ما اعتقد يصير

وبعدين هذا مو من اختصاص النقابه اعتقد

لان الجمعيه لازم تصير بقرار من الشركة نفسها وتنسيق منها

هذا اعتقاد مني وليس تاكيد

[radar]

ليش ما يسون لنا جمعيه خاصه فينا مثل


(جمعية الشرطة والجيش )

عزيزي redrose لك تحيه مني خاصة
إقتراحك جدا في محله
وحاب أفيدك وهذا للعلم إن هذا الاقتراح موجود بأجندة الاتحاد وتوجد مراسلات جاده بهذا بالموضوع وهو على جدول الاعمال ورحل الى المفاوضات
والمتابعة جارية لهذا الموضوع ونتمنى من الله العلي القدير أن يرى النور قريبا بإذن الله
وهذا للعلم.
هذا ما جآنا من إتحاد البترول ولهم جزيل الشكر

[القبطان]

قبل خمس سنوات كان في مشروع كبير بإعادة هيكلة البنية الإسكانية لبيوت الأحمدي وإنشاء مرافق كاملة للمدينه ومنها ماتفضلتم به
ولكن
وقف المشروع فجأة
ومن بعض الأنظمه التي إقترحها القائمين على الموضوع
إنشاء مجمعات سكنية بحيث يغطي كل موظفين الشركة ولا يحتاج بأن يمسك أحد دور كما هو حاصل الآن على بيوت الشركه.
(((ولكن شكل الأزمة الإسكانية معديه))).

[nuclear]

الى الان سمعت اقتراحين ممتازين الاول اقتراح انهم يغيرون مسمى بدل الايجار علشان العاملين يستفيدون من بدل الايجار و هذا الاقتراح الثاني يبيله جمعية و الله

[nuclear]

قبل خمس سنوات كان في مشروع كبير بإعادة هيكلة البنية الإسكانية لبيوت الأحمدي وإنشاء مرافق كاملة للمدينه ومنها ماتفضلتم به
ولكن
وقف المشروع فجأة
ومن بعض الأنظمه التي إقترحها القائمين على الموضوع
إنشاء مجمعات سكنية بحيث يغطي كل موظفين الشركة ولا يحتاج بأن يمسك أحد دور كما هو حاصل الآن على بيوت الشركه.
(((ولكن شكل الأزمة الإسكانية معديه))).

ربعنا للخلف در شلون تييبلهم مشروع للامام سر يتوهقون مايعرفون شيسوون فيلغونه احسن لهم و يمكن البوقه مو محرزه و الله اعلم
للعلم لا اتهم احد نهائيا كلمه و بس :)