سؤال محرج للجميع هل أنت راض عن مسؤولك ؟؟؟ ولماذا ؟؟

[سالم الخالدي]

السلام عليكم ورحمة الله


أدري ان الموضوع حساس شوي لكن لابد من المواجهة بكل أدب واحترام وهذا ما نطمحه في هذا المنتدى

كثيرا ما سمعنا عيوب الموظفين

هذا ينام - هذا يتأخر- هذه غير متعاونة - هذا يأخذ مرضيات -هذه ما تشتغل-

ودائما الهجوم على الموظفين المساكين


ايش رايكم تكون هذه المرةالأقلام موجهة على المسؤؤلين

والسؤال هنا هل أنت راض عن مسؤؤلك ؟؟؟؟؟؟ هل أنتي راضية عن المسؤؤل ؟؟؟


واذا كان الجواب بنعم أو لا يرجى ذكر السبب


فتعالوا بنا
نقيم المسوؤلين تقييم عدل بس ياليت يكون التقييم بكل حيادية

وكل أمانة مع ذكر السبب حتى يكون مرجع لكل مسؤؤل ويعرف ماهي السلبيات التي يكرهها الموظفين فيه

فيحاول تعديلها

[الغالية]

انا احترم مسؤولي .. لأنه رجل كبير بالسن وأقدم مني بالشغل

لكنني غير راضيه عنه أبداً .. للأسباب التالية :

1- لا يعرف ماهية شغلي .. يعني لو يصير اي خلل مايعرف يتصرف مع العلم انه صار له بنفس الإدراة اكثر من 30 سنه .

2- الحمدلله حاشمه نفسي عن الناس عشان جذيه ماعندي استئذنات وايد .. ولا عندي مرضيات إلا بالشديد القوي ... بمجرد ما صار لي حادث وعطوني مرضيه 3 اسابيع .. تغيرت النفسيه علي ..!!!

3- اذا اضطريت للاستئذان .. يحسسني كأني طالبة مدرسة !!

4- اذا بطلع إجازة .. ويكون توقيعه على ورقة الإجازة وعنده خبر من قبل التيم ليدر .. ما يطلب مني اسلم شغلي لأحد بالمره.. بس قبل لا أداوم بكم يوم .. يسلمون الشغل لناس تخربه وتعفسه علي ... يالله المستعان !!

5- يعامل الأجانب معاملة أحسن من معاملتي (مع العلم انه اجنبي) .. !!!

شكرا لإثارة الموضوع .. مع العلم اني ما اتحامل على الأجانب لكن .. للاسف يحبون انه الواحد يعطيهم برستيج المسئولين!!

[PIC]

والله مو عاجبني

مسئولي مسكين وضعيف وماعنده شخصية ولا له كلمة وللأسف كذاب وما يواجه

والله متوهقين فيه

[سالم الخالدي]

أحسنتي أختنا ( الغالية ) على هذه الصراحة

اذن نستفيد أن بعض المسؤولين لا يعرف شغل الموظفين اللي تحته .

ياليت أختنا توضحين معنى طالبة مدرسة ؟؟؟

في 3- اذا اضطريت للاستئذان .. يحسسني كأني طالبة مدرسة !!


ايضا أن بعض المسؤولين الأجانب يميز الأجانب ويبخس حق الكويتيين


منتظرين المشاركة من باقي الأخوة والأخوات

[سالم الخالدي]

والله مو عاجبني

مسئولي مسكين وضعيف وماعنده شخصية ولا له كلمة وللأسف كذاب وما يواجه

والله متوهقين فيه



فائدة أخرى أن بعض المسوؤؤلين ضعيف الشخصية ولا يملك قرار ويحاول التملص من الموظفين


ما قصرت أخونا PIC

[الغالية]

الواحد لما يستأذن يعطي خبر لمسؤوله انه بيطلع لسبب من الأسباب
ولما قلت طالبة مدرسة ... لانه يحسسني إني اطلب منه الإذن .. مو مجرد تبليغ !!
يعني يتنرفز .. وينافخ .. ويكلمني من طرف خشمه !!
عشان جذيه .. صرت اتعامل معاه بالإيميل ... وازيدك .. الحبيب صار يحذفه من غير ما يقراه !!!

مثل ما قلت .. المسألة مجرد برستيج وبس !!

[سالم الخالدي]

ياليت اخواننا المسؤولين يتذكرون حديث النبي عليه السلام


انه قال: «اللهم من ولي من أمر أمتي شيئاً فشق عليهم فشقق عليه، ومن ولي من أمر أمتي شيئاً فرفق بهم فأرفق به» رواه مسلم



وين الرفق بالناس

[KOC_747]

الوسام صبحك الله بالخير
والجميع

المسؤول باعتقادي الكل وده انه يكون متفهم و مراعي الموظفين اللي تحته

بس يأخي بعضهم على باله إنه دايم بهالمكان وما راح ينشال بيوم من الأيام ، وتلقاه مثل ما قالت الإخت المحترمة يبي يسوي حق نفسه برستيج وبس ، والمشكله لا جاك واحد وليش ما سويت جذيه وليش ما سويت ذاك ومنو معاك ومداوم ولا لا ويروح يسألك عن شغله على أبو إنه عارفها واللي يسأل عنه ماله علاقة باللي كان يأشر عليه

خلها على الله
وبالنسبة حقي صرت مع المسائيل على قولتهم رسمي
والجواب على قد السؤال على ما قيل


وشكراُ على تميزك بالمواضيع أخوي الخالدي.

[BG. 1]

حسب ما أشوف المسئول من تيم ليدر وفوق بالنسبة لقسمي ودي يتغير وينقفونه لانهم ما يدرون وين الله قاطهم

اما اللي تحتهم أشوه شوي منهم

[المشاكس]

ياليت يتم تحديد المسؤول .... في بعض الوظائف مسؤولينهم المباشرين متغيرين دائما .... مثل ألي بالحقول .... ويكون مسؤوله المباشر الثابت من تيم ليدر وفوق .... فهل يتم التقييم من التيم ليدر ....؟

[MAB12]

اكثر شي اكره بالمسؤولين المزاجيه .... مرات يكون متضايق برى العمل ولما يداوم على طول يفرغ في الناس اللي حواليه بالعمل ومرات يحسسك بمعاملته ايام الدراسه تسئتذن بكل شي كأنك مراقب واذا كلفك بشغل تلقاه يحوم على راسك يحسسك بتوتر وكانك مو قد الشي اللي كلفك فيه

وبعض المسؤولين والله من يطلع اجازه نتضايق يكون محبوب من الجميع

[سالم الخالدي]

ياليت يتم تحديد المسؤول .... في بعض الوظائف مسؤولينهم المباشرين متغيرين دائما .... مثل ألي بالحقول .... ويكون مسؤوله المباشر الثابت من تيم ليدر وفوق .... فهل يتم التقييم من التيم ليدر ....؟

تحديد المسؤول يرجع لك ... أنت اكتب أعلم بحال مسؤولك وعلى هذا فسر



سواء كان تيم ليدر أو


suctionhead

أو أعلى

[dehen_3ood]

الحمدالله انا راضية كل الرضا عن مسئولي
قبل ان يكون مسئول فهو إنسان محترم خلوق متدين ويعرف شلون يتعامل مع الموظفة
يقدر الظروف ويحرجك بتعامله وأسلوبه
وهالشي ينعكس عليك فيخليك تنتج أكثر وتحب الشغل أكثر
وأتمنى الصراحة إن الله لا يغير عليه ولا يتغير علي ويظل رئيسي على طول
يعطي كل ذي حقٍ حقه وعلى قد شغلك يعطيك وما يقصر معاك
الكل يبيه ويحبون ينتقلون عنده !!
جان زين في منه وايد بالشركة جان احنا بخير !!

[المشاكس]

اولاً قبل لاتكلم عن مسؤولي أبي أبين شي معهم

الإدارة فن ودراسة يعني مو كل واحد صار مسؤول يقدر يدير ألي تحته ..... لهذا السبب نشوف أكثر المسؤولين مايعرفون يديرون الموظفين ألي تحتهم ....

بالنسبة لي أعتبر مسؤولي المباشر المشرف .... وللأسف كنا من أحسن مايكون بس صار علينا هالمشرف قلب كيان الشغل فوق تحت وصار مزاج الموظفين بالحضيض .... وأفهم يا فهيم

[سالم الخالدي]

اولاً قبل لاتكلم عن مسؤولي أبي أبين شي معهم

الإدارة فن ودراسة يعني مو كل واحد صار مسؤول يقدر يدير ألي تحته ..... لهذا السبب نشوف أكثر المسؤولين مايعرفون يديرون الموظفين ألي تحتهم ....

بالنسبة لي أعتبر مسؤولي المباشر المشرف .... وللأسف كنا من أحسن مايكون بس صار علينا هالمشرف قلب كيان الشغل فوق تحت وصار مزاج الموظفين بالحضيض .... وأفهم يا فهيم

ممكن توضح أكثر أخوي المشاكس ودنا نبتعد عن الألغاز

ودنا نكون صريحين حتى يتفهم اخواننا المسؤولين نظرتنا عنهم وعيوبهم


والهدف من الموضوع علاج نقاط الضعف عند المسؤول

[HUMMER]

لانه عنصري ومومحترم

[Future man]

الحمد لله أنا مسؤولي ونعم كفو مو محسسنا إنه مسؤول من كثر ماهو متواضع حسينا إنه أخ كبير لنا الله لا يغير علينا إنشاء الله

أختي الغالية الحين مسؤولج إذا قرأ هذا الموضوع راح يعرفج :) لأنج ذكرتي إنه صار له 30 سنه في نفس الإدارة وإنج طلعتي إجازة مرضية 3 أسابيع
ههههههههه لا تخافين أتغشمر
;)

[المشاكس]

الأخ الخالدي .... كلامي واضح
المفروض أي موظف يستلم مسؤولية على موظفين يدخلونه كورس عن كيفيفة التعامل مع الموظفين أي مايسمى بفن الإداراة حتى يستطيع إداراة من هم تحته

[سالم الخالدي]

الأخ الخالدي .... كلامي واضح
المفروض أي موظف يستلم مسؤولية على موظفين يدخلونه كورس عن كيفيفة التعامل مع الموظفين أي مايسمى بفن الإداراة حتى يستطيع إداراة من هم تحته

أحسنت كلامك صحيح

[سالم الخالدي]

ومازلنا ننتظر المزيد من مشاركات الموظفين

[منصور المجيبل]

من المقصود بالمسئول

المراقب ولا المشرف او التيم ليدر

لان عملنا بدائرة الإنتاج التغير بالمسئول كثيرا لتنقلنا من سنتر الي اخر ومن منطقة لاخري

[سالم الخالدي]

مسؤولك اللي عنده كل الصلاحيات


عندنا في البترول هو التيم ليدر


ما أدري عن نفط الكويت من هو من لديه الصلاحيات

[المهندس]

مسئولي اصله من دول الضد ويتكلم بلكنتهم بس عنده جنسيه - اكيد عرفتووه - لول

يعني تخيلوا الوضع لول - الامتيازات للاجانب والترقيات لصالحهم - والكويتيين طايح حظهم ما ناخذ شغلنا اللا في الواسطه-

يا عمي خللوها على الله

[زهرة التوليب]

بصراحه انا من توظفت ومو راضيه عن مسؤولي واحس انه انسان ظالم ومو حقاني
يحب يكسر مياديف الموظفين ويحبطهم

انا عن نفسي لله الحمد ملازمه بدوامي وما عندي استئذانات وايد ولا طبيات
ومجابله شغلي لكني أتفاجأ إن مسؤولي فوق كل هذا يقيمني تقيم سيء
مره يحطلي 6.5 ومره 7 ؟؟ جني أطر منه وغيري يعطيهم 8 وفوق مع انهم مو ملتزمين في الدوام وعندهم اخطاء !!!

انظلمت وايد واشتكيت كذا مره وللأسف بس آخذ وعود على الفاضي لين آخر شي قلت لهم يا تنقلوني عند مسؤول ثاني يا اشوف لي دائرة ثانيه لأني زهقت من الظلم وغيري مو احسن مني !!!

ولله الحمد نقلوني عند مسؤول ثاني حقاني ويخاف الله ومحترم ويقدر شغلي وكفائتي
والحين انا مرتاحه وايد مع ان الشغل وايد لكن كتعامل وراحه نفسيه وايد مرتاحه

[الكويت]

بصراحه انا راضيه كل الرضى على مسئولي الحالي والسابق والحمدلله ان الله موفقني ان كل مسئول اكون عنده يكون احسن من الثاني :)

أول شي رجل متفهم ومستوى عالي من الثقافه وشخصيته حلوه ومرنه وأهم من هذا كله انه عادل بين الموظفين
ثاني شي كافي ان مكتبه ما يتسكر في وجه احد من الموظفين وهذا هو سبب نجاحه لأن الموظفين كلهم يعملون لإرضائه :)