مصلى النساء في مركز التدريب البترولي !!! [الأرشيف] - منتدى العاملين بالقطاع النفطي الكويتي

زهرة التوليب

11-14-2007, 09:14 AM

للأسف شي يفشل لما نشوف مصلى النساء شبره حاطينها عند مصافط السيارات !!

وغير جذيس الوحده خربانه يعني الوحده تروح تبي تصلي تخيس في هالشبره !!

يعني كل هالمبنى والخبه وبالأخير مافي مصلى للنساء ؟
مسون لهم شبره صغيره قاطينها بره المبنى !!

ودي اعرف رايكم في هالموضوع واشوف تفاعلكم

brilliant

11-14-2007, 09:28 AM

للاسف هالشي يقل الاهتمام فيه عند تصميم اي مبنى
نتمنى الموضوع يوصل للمسؤولين وياخذون فيه قرار بسرع وقت

زهرة التوليب

11-14-2007, 10:31 AM

تسلم اخوي brilliant على تفاعلك وتواصلك بالموضوع

اتمنى هالشي يوصل للمسؤولين ويهتمون اكثر خاصه في أماكن المصلى سواء لرجال او النساء

mofraka

11-14-2007, 02:01 PM

روحوا كلموها مو تقول إنه بابها مبطل للكل

عاشق ال KPC

11-14-2007, 02:09 PM

المفروض المصلى أهم شي اختي ليش ما تقترحون عليهم يقسمون مصلى الرجال نصفين

Future man

11-14-2007, 08:58 PM

كلامج عدل وإذا كان عذرهم مافي مكان أنا لقيت مكان

الكافتريا اللي فوق عند مصلى الرجال ماعمرها إنترست ليش ما ياخذون منها جم متر ويسون مصلى للنساء

إعلامية KPC

11-14-2007, 10:13 PM

بصراحة لا تعليق
يعني ما ادري شنو اقول
على العموم ان شاء الله صوتك يوصل
وتنحل القصة

زهرة التوليب

11-18-2007, 09:58 AM

انا بصراحه موظفه في شركة البترول الوطنيه
بس احيانا يكون عندي كورسات في الptc

يعني المصلى مو بس حق موظفين المؤسسة !!
المصلى حق كل الموظفات اللي يكون عندهم كورسات في مبنى التدريب
المفروض يكون اكبر ومكانه احسن من هالمكان

ومنا الى المسؤولين في مبنى التدريب البترولي
ان شاء الله يوصل صوتنا ويحاولون يغيرون مكان مصلى النساء

اشكر كل من تفاعل مع الموضوع

ما قصرتوا يعطيكم الف عافيه

Shoomy

11-18-2007, 10:32 AM

D.M.D

11-18-2007, 10:46 AM

السلام عليكم
أنا اتمنى من المسؤولين انهم يهتمون بالمصليات أكثر من مكاتب المدراء , لان مكتب المسؤول او المدير خلال بضعة ايام تلقاه جاهز ومجهز بأحسن الاثاث , اما لو كان مصلى سواء مصلى رجال او نساء تلقاه مهمل ,
وياريت انهم يهتمون بالمصليات اكثر .
وياريت ماينسون مصلى مستشفى الاحمدي لان ضيق ولا يستوعب المصلين .
وشكرااااا

brilliant

11-18-2007, 11:31 AM

نرجوا من جميع الاخوات جمع تواقيع البنات بالاسماء والارقام الوظيفيه
وتقديم شكوى رسمية للعضوا المنتدب للتدريب (شذى الصباح)
وارفاق التواقيع مع الشكوى في ايميل
وارساله لها
وهذا ايميلها
shatha@kpc.com.kw

وانشالله انها ما راح تقصر

Green Tea

11-18-2007, 12:52 PM

ليش ماتصلون اب مكاتبكم ؟

brilliant

11-18-2007, 12:55 PM

يقولون مركز التدريب
مركز التدريب مكان تروحين له تاخذين دورات ماكو مكاتب

العضو المنتدب

11-18-2007, 09:51 PM

أنا لاحظت إن اغلب المراكز والمكاتب الرئيسية يكون أخر ما يفكر ببناءه هو المساجد ، ياسبحان الله وهذا إحنا مسلمين وبلد مسلم

اللي المسجد جينكو واللي المسجد غرفة زايدة حطو جم زولية وقرآن وستاندات وقالوا هذا مصلى

هذا يعطي دليل إن ربعنا مايعرفون الله عدل أول شيء مكاتبهم ومواقعها وبعدين بيت الله - الله المستعان

زهرة التوليب

11-19-2007, 10:43 AM

بصراحه بصراحه
انا كنت ماخذع كورس بمركز التدريب
ولمن سالت عن المصلى ودلوني اياه
عبالي يتغشمرون والله

ماصدقت وطاف ... ييت ثاني يوم وسالت اشخاص ثانيين ودلوني نفس المكان

انصدمت يعني شبره 2 في 3 وامه محمد تبي تصلي شلون؟؟

الله كريم بس

انا مثلج والله انصدمت يوم شفت المصلى !!!
قاطينه عند مصافط السيارات وصغير وحتى التكيف خربان !!

استغفر الله يعني لي هالدرجه استهتار ؟

والله انا قمت اصلي في دوامي قبل لا اروح الكورس
ولا هالبهذله

Green Tea

11-19-2007, 12:28 PM

يقولون مركز التدريب
مركز التدريب مكان تروحين له تاخذين دورات ماكو مكاتب

آها
مايصير جذي عاد أهم شي المصلى

سالم الخالدي

11-23-2007, 06:28 AM

السلام عليكم ورحمة الله وبركاته

بصراحة فعلا الموضوع مخزي ويفشل

تخيلوا الحين لو طلب المعلمين والمعلمات في هذا المركز غرفة للتدخين أو الرياضة

ما أظن المؤسسة راح تبخل عليهم

وكلنا أمل من الأخت شذى الصباح أسأل الله أن يجعلها ذخرا لأخوانها بأن تنظر في هذا الأمر وتبشرنا بأنه قد تم حله

وماهو ببعيد عن تاريخها الوظيفي المليء بالمنفعة للموظفين

q8security

11-25-2007, 03:01 AM

بصراحة انا شفت المصلى

عباره عن كيربي

مايتجاوز 4 في 4 تقريبا

وبرى المبنى صوب مصافط الزوار

بصراحة مهتمين بامور ثانية غيره؟؟؟؟؟؟؟؟؟؟؟؟؟
:(

brilliant

11-25-2007, 07:37 AM

المصيبه ان غرفة تدخين السيدات احلا بمليون مره من المصلى

http://www.q8ow.com/up/uploads/9ba190c66e.jpg

زهرة التوليب

11-25-2007, 08:33 AM

بعد مسوين غرفه تدخين حق السيدات

والمصلى كيربي؟؟

استغفر الله تحسون اخر شي فكروا فيه المصلى

brilliant

11-25-2007, 08:36 AM

اي هالمصلى في الشويخ قعدوا اسابيع دريلات وتكييف وجام ودنيا وبالخير طلع تدخين سيدات

زهرة التوليب

11-25-2007, 08:43 AM

للأسف ما ادري ليش جذي

وفي أغلب الشركات النفطيه

المصلى يكون آخر اهتماماتهم

تصدق عندنا في البترول الوطنيه في المبنى الرئيسي
المصلى قاطينه في السرداب لا وجدامه الكانتين !!
يعني البنات يروحون يصلون كل شوي طالع بويهم واحد من اللي يودون الجاي والقهوه !!

والمؤسسة حاطين لهم جبره يقولون مصلى !!

مافي احترام حق العبادة ولا مكان العبادة !!!

feed gas

11-29-2007, 09:11 AM

يبه عندكم لجنه زكاة الصباحيه...كلموهم وممكن يدبرولكم حل ...وكل شى ينحل بالعقل والتخطيط السلبم

sosha

11-29-2007, 10:50 AM

قمت اكره الكورسات اللي هناك ! اهي ما اوقفت على المصلى بس.. الله يتقبل بس

الجوزاء

12-01-2007, 12:39 PM

للاسف هالشي يقل الاهتمام فيه عند تصميم اي مبنى
نتمنى الموضوع يوصل للمسؤولين وياخذون فيه قرار بسرع وقت

صج والله كل مبني ينبي لازم يكون فيه مصلى للرجال وواحد ثاتي للنساء

شنو جبره مصلى النساء لا وبعد برا المبني ليش جذي وين قاعدين بالكويت والا اخاف بجنوب افريقيا ايام الفصل

العنصري بصراحه شي بايخ وما ينسكت عليه ولازم مثل ما قال اخونا يوصل الموضوع للمسئولين ولازم ياخذون فيه

قرار سريع ويوفرون مكان حق صلاة النساء داااااخل المبنى والا ترى بنبلغ حقوق الانسان عليهم شهالحاله؟؟؟؟

HUMMER

12-01-2007, 02:28 PM

اتمنى من ادارة مؤسسة البترول النظر في الموضوع
ومنا الى المسؤلين

الصايغ

12-02-2007, 12:07 AM

مو في مثل يقول من بره هالله هالله ومن داخل يعلم الله
اهم فكروا بالمكاتب والشكل المبني وبوقتها ماكان في وقت يفكرووون بالمصلي
او يمكن عندهم علم ان الصلاة بس انكتبت علي الرجال والنساء معفييين منها
والله عجب

sosha

12-11-2007, 10:58 AM

انا وايد حارني الموضوع..حاطين مصلى الرجال داخل و الحريم بره و لازم الوحده تمشي جدام هالرياييل و الكفتيريا و الكنتينات و الكلاسات عشان تطلع بره و توصل و تصلي..لا و الحمامات تكرمون بعاد..يعني لو تبي تتوضى يبيلها مشوار !

SOS_KW

12-12-2007, 12:43 AM

السلام عليكم

من المفترض ومن المسلمات في بلدنا الحبيب الكويت أن أي منشأة تقام يخصص بها مصلى للنساء وآخر للرجال سواء مجمعات أو مستشفيات وغيرها

اذا بلندن في مستشفياتهم مسوين مصلى للنساء وآخر للرجال .. والله أعلم وين بعد ..

وحنا هنيه في مكان حيوي لا يخلى من المتدربين .. سقط سهوا من مخطط المهندس الذي خطط هذا المبنى .. والمسؤول أو المسؤولين الذين اعتمدوا أيضا المخطط سالفة المسجد ...

فيا سبحان الله .. بلندن لأنه هذه المستشفيات يرتادها المسلمون اهتموا وخصصوا مصليات للنساء والرجال .. والمصلى الخاص بالنساء منزو في مكان يحترم المرأة المسلمة ... وعندنا في مركز التدريب موقعه .. كأنك رايح لحمام في سوق الهنود (مع اعتذاري الشديد لاستخدام هذا التشبيه).

وسجل يا تاريخ

وشكرا

زهرة التوليب

12-12-2007, 07:34 AM

اشكركم على تفاعلكم مع الموضوع

بوالفعل الموضوع ما ينسكت عليه

واذا فعلا نسوا يسوون مصلى لنساء
خلهم يستخدمون احد غرف التدريب ويحولونها الى مصلى
يعني السالفه مو صعبه

ولا انه يقونا في جبره بره المبنى وغير جذي بعيده عن الحمام الله يعزكم !!