شرايكم باقتراح تغير نظام الشفتات (تصويت) [الأرشيف] - منتدى العاملين بالقطاع النفطي الكويتي

مشاهدة النسخة كاملة : شرايكم باقتراح تغير نظام الشفتات (تصويت)

ali_85

11-12-2007, 04:37 AM

السلام عليكم ورحمه الله وبركاته

اعتقد انكم سمعتوا باقتراح تغير نظام الشفتات الحالي المقدم من اخوانكم العمال في مينا عبدالله
واعتقد انه مرت عليكم ورقه التواقيع
المهم حبيت اني اطرح الوضوع من يديد حق الي ماعنده فكره وحق الي عارض الفكره بدون مايفهم الفكره عدل
الاقتراح اهو تغير النظام الحالي الي اهو 8 ساعات الى نظام 12 ساعه طبعا الي يسمعني راح يقول نفس (koc)
لا مو نفسهم راح اشرحلكم النظام بالتفصيل
النظام الحالى وهو (نظام 8 ساعات)
يومين صبح يومين عصر يومين ليل ويومين اوف (وعلى قوله بعض الخوان يوم ونص لانه نص اليوم يضيع بالنوم بعد دوام الليل)
والنظام المقترح هو (12 ساعه)
يومين صبح يومين ليل واربع ايام اوف
طبعا مميزات النظام اليديد مثل مانذكرت بالكتاب الي اذكره
1- استفاده العامل من ايام الراحه اربع ايام مقارنه بيومين بالنظام القديم (حتى لوكانت ال12 ساعه متعبه بس فيها راحه بالاوف حلوه يقدر الموضف يغير فيهم جو)
2-التوفير شغلات وايد راح تتوفر علينا مثل
لبانزين والوقت يعني بدال لا اطق درب 12 مره بالاسبوع بين بيتكم والدوام راح يصير 8 بس
(وراح تعمر السيارات ويانا اكثر :D)
والي يقول انه نظام ال12 ساعه مافيه اوفر تايم لاني ماقدر اكمل 24 ساعه بالعكس
الوفر تايم راح يصير اريح واكثر (اشرح هالنقطه بختصار)
طبعا معضمنا متعود على دوام ال16 ساعه لاتقولون 12 تعب
المهم نرجع النظام اليديد يوم الدوام راح يكون في شفتين دوام وشفتين اوف
يعني مثلا لو كنت مدوام صبح وشفت الليل اوفر تايم انادي اي احد من الشفتين الي بره
(يعني الاوفر تايم راح يكون اكثر ب4 ساعات من الحين واريح في الدوام لانه راح يكون 12 ساعه بس مو 16

والحين اتمنى منكم التصويت اذا كنت موافق على التغير ولا لا
وطبعا ياريت كل واحد يذكر بالموضع عيوب ومميزات النظام اليديد غير الي ذكرتهم انا

ali_85

11-12-2007, 06:03 AM

ونسيت اذكرلكم نقطه وايد حلوه واهي في الايجازات
في النظام الحالي لما تاخذ 6 ايام يطلعلك 10 ايام لانه في اوفين قبل وبعد
اما في النظام اليديد تاخذ بس 4 ايام يطلعلك 12 يوووووووووووووم ايجازه يعني وفرت رصيد ايجازات وطلعت ايام اكثر بعد
ياجماعه النظام مايستاهل انطالب فيه

algharib

11-12-2007, 05:33 PM

:)والله ياريت:)

shayib80

11-12-2007, 07:11 PM

اهوا زين بس حق الoperators الي في الcocker مو زين لان معناته ساعات عمل اكثر وشغل وتعب اكبر
آسف انا مو ياكم

إلا إذا تبي تشتغل معاي في نفس وحدتي انا موافق :)

ali_85

11-12-2007, 11:24 PM

خلاص يطبق على الكل ماعدا الكوكر

ali_85

11-13-2007, 06:39 AM

اخواني ياريت الي يصوت او يرد يذكر لنا ليش موافق شنو عاجبه بالنظام وشنو الي موعاجبه اذا موكان موافق علشان نكون بالصوره
ونتعرف على السلبيات والايجايات

HELPER

11-13-2007, 09:23 PM

[والنظام المقترح هو (12 ساعه)
يومين صبح يومين ليل واربع ايام اوف
اقتباس من المشاركه.

المشكله ان الشركه تعاني من مشكلة الاجازات المرضيه واعتقد ان هذا النظام يساعد بقوه على المرضيات حتى اللي ماعنده مرضيات راح يسويها وبصراحه شي يشجع يعني اربع يام مرضي يطلع لك ثمانية ايام ... بعد منو يبي يطلع اجازه , وتعال طالب في بيع الايجازات بعد .
لهذه الاسباب اعتقد انه من المستحيل ان توافق عليه الشركه .

HELPER

11-13-2007, 09:25 PM

عفوا 12 يوم اجازه بعد سك 4 ايام

احمد علي محمد

11-14-2007, 01:15 AM

لا اوافق ممكن يوم صبح ويوم عصر ويومين اوف مثل محطات الكهرباء شرايك سك يومين 6 ايام اوف

L'operatore

11-14-2007, 10:26 AM

بالنسبه لي أتمنى
يكون الدوام مثل الـ Koc
يومين بـ يومين
لأن يومين الصبح متعبه حيل :(

الرويشد

11-14-2007, 10:47 PM

بالمشمش يوافقون

فلير مولعه

11-15-2007, 04:49 AM

انا موافق واعتبرني معاك

ali_85

11-16-2007, 12:30 AM

بالمشمش يوافقون

اذكرلنا اسبابك اخوي ليش

Waluigi

11-16-2007, 06:39 AM

معاك قلبا و قالبا

مواق

11-16-2007, 04:48 PM

نظام دوام 12 ساعة اكثر من يطالب في هم قسم الاطفاء . وانا ماألومهم اللهم لاحسد .. المسئولين موفرين لهم بالمركز ، ديوانية فيها تلفزيون 64 بوصه بلازما ، نادي صحي رياضي ، مطبخ مجهز ، وهناك اشياء اخرى لااحب الحديث عنها .. طبعا غير فترات الراحة الطويلة والسبب هو طبيعة عمل الاطفاء . فمن الطبيعي ان دوام 12 ساعة راح يكون حلو ومريح بالنسبه لهم ... لكن هناك اقسام لايمكن تطبيق هذا النظام عليهم مثلا العمليات لو طبق هذا النظام معناته ان الشركة حكمت عليهم بعقوبة الاعمال الشاقة المؤبدة .

Mr.L.P.G

11-17-2007, 10:22 AM

موافق جملة وتفصيلا

ali_85

11-17-2007, 03:11 PM

لا اوافق ممكن يوم صبح ويوم عصر ويومين اوف مثل محطات الكهرباء شرايك سك يومين 6 ايام اوف

ماتفكرون الا بالسكات ياجماعه نبي نقلل السكات بالنظام اليديد

MAB-OLD-REFINARY

11-24-2007, 08:52 AM

الصراحه انا مو موافق لانه دوام الصبح 12 ساعه و اذا صار رمضان و ارمضان السنه اليايه راح يكون في الصيف يا سلااااااام 12 ساعه و دوامك صبح و في رمضااااااان يا حلاوه و جنه مو لك ريليفك يعطيها سك او مرضيه يا حبيييييييييييييييبي وشكرااااااااااااااا

ali_85

11-24-2007, 02:09 PM

وردة حيدر

12-05-2007, 11:40 PM

أنا أؤيد بس في حالة الموظف لما يطلع 10 أيام إجازة أو حتى لو الأربع أيام أوف يستغلها و يونس نفسه مع أهله.. و بالتحديد مرته و عياله إذا كان متزوج. لأن حرام الزوجة تقعد تنطر الأوف مال ريلها تبي تغير جو معاه.. تلاقيه يا يقضي مصالح أهله ولا تغيير الجو عنده مع ربعه و بس و لا إذا يبي يتهرب ينام و "أنا تعبـــــــــــــان"......!!! ترى الأرواح تبي الأرواح و لازم الواحد يقدر مثل ما إحنا نقدر شغلكم و تعبكم:rolleyes:

ali_85

12-06-2007, 12:29 AM

طبعي عنيد

12-06-2007, 02:03 AM

هل يطبق هالقانون او حجي ماخوذ خيره ؟؟؟؟؟؟؟؟؟؟

؟ ارجو الورد وعلى منو راح تعرضونه؟

Euro

12-06-2007, 02:50 AM

اكيد هذا افضل نظام بس وقعنا وقدمناه واسحبوا علينا محد رد .. وهذا النظام وايد حلو لأنه راح يقلل من الطبيات .. ويقلل من النقص لما يكون شفتين اوف وشفتين مداومين

Euro

12-06-2007, 02:52 AM

اهوا زين بس حق الoperators الي في الcocker مو زين لان معناته ساعات عمل اكثر وشغل وتعب اكبر
آسف انا مو ياكم

إلا إذا تبي تشتغل معاي في نفس وحدتي انا موافق :)

شايب .. احنا ARDS يعني يمكم ... وشغلنا نفس شغلكم .. يعني وقفت على 4 ساعات زياده ؟ 4 ايام اوف شي مو طبيعي .. نشوف اهلنا ويمدينا نقعد معاهم على الاقل

Euro

12-06-2007, 02:55 AM

اتوقع اربع ايام راح يكون ترتيبهم يو للاهل ويوم لربع ويوم للعيال ويوم لام العيال ;)

لا مو هذا الترتيب ... لأن انت الحين بالاوف .. يوم نايم تقعد العصر لي الحين دايخ وراسك يفتر .. ما يمديك تكح واترد تنام .. معناته انت تطلع يوم واحد اوف بس

اما 4 ايام .. يا الهي شي مو طبيعي

ali_85

12-06-2007, 07:12 AM

يمعومد اوفك يبدي من اول اوف بعد صلاة العشى لانك توك قايك وراح تجمع العصر والمغرب والعشى لانك من التعب ماقمت تصلي
ووبعدين ثاني يوم راد البيت الساعه 10 علشان تنام حق الصبح

Euro

12-06-2007, 01:26 PM

ياسلااام .. اربع ايام .. على الاقل الواحد يمديه يلعب warcraft على راحته

Q8VICTOR

01-10-2008, 01:29 AM

بالنسبة لي دوام الثنعش ساعة افضل لان نقدر نشوف الدنيا والنظام الحالي مخلي حياتنا دوام بدوام وحتى الاوف مايسوى وقلبة العصر لليل احلى من اوفنا

Toxic

01-10-2008, 12:45 PM

والله يا شباب كلامكم على العين و الراس بس انا من ناحيتي اشوفها فكره فاشله !!
انتو وايد شايفين ان الدوام اللي احنا فيه مو زين مع انه وايد زين و يكسر الروتين الخايس الي احنا فيه
و ثاني شي لو ما ياني رليفي ؟؟ و محد رضا ايي من برا ؟؟ جم ساعه يحقلي اقعد ؟؟ بتقول 4 ساعات ؟؟ بقولك ما يمديك تروح البيت و تنام لأن وراك بس 8 ساعات احسب نص ساعه الطريج و نص ساعه تبديل ملابس يعني بقا 7 ساعات تحط راسك و تنام و تقوم تداوم 12 ساعه ؟؟؟ وايد متعبه .. و ما تقدر تقعد اوفر تايم 12 ساعه لأنك بتكون مداوم 24 ساعه و بتكمل دوامك يعني 36 ساعه @@ !!!
و اتمنى انكم تفكرون بالpanel operator ولا تفكرون بنفسكم و بس ؟؟ هل يعقل موظف يجابل الشاشه 12 ساعه ؟؟ و بعدين الي يقول ان ال4 ساعات مو فارقه !! منو قالك مو فارقه ؟؟ لو رليفي يتأخر علي نص ساعه اعفسه .. وانا واحد ما احب الاوفر تايم ... يعني يادوبك تخلص ال8 ساعات و انحاش البيت
و بخصوص العيد .. لو صدف العيد في اول يوم اوف فهذا العيد راح عليك لأن اوفك 4 ايام يعني ماكو اوفرتايم
و في شغله ثانيه .. نسبه الغازات الي نتنفسها بالمصفاة كبيره مو صغيره و الحد الي حاطينه لك له حد 8 ساعات يكون عادي اما فوق ال8 ساعات يكون خطر !!!!
و في بعد شغله .. لما تكون الوحده اللي انا اشتغل فيها ، فيها اوبريترين "2 اوبريتر" :) شلون بيقزر الزام ؟؟ لا كمبيوتر عندنا ولا تليفون ولا شي يعني عذاب في عذاب

اتمنى انكم تنقاشون فكرة يوم صبح و يوم عصر و يوم ليل و يومين اوف .. و تضيفون عليها فكرة ان الاوف ما ينحسب من الرصيد
او خلونا على دوامنا بس الاوف ما ينحسب من الاجازه لو طلعت اكثر من شفت سايكل .. و اتمنى تناقشون فكرة الخصم اللي يخصمونه لما الواحد يطلع اجازه .. لأن اذا واحد طلع 22 يوم اجازه ينزله 120 دينا تقول معاش سايق تنكر

اتمنى تفكرون بالكل بشكل عام مو كل واحد يفكر بعمره و بس و انا اقول انها فكره فاشله و مو مدروسه و مشكورين

و اسف على القرقه :)

صخرة رسوبية

01-10-2008, 12:53 PM

انا اقترح 4 ايام 24 ساعة
و يوم اوف

Neilz

01-10-2008, 02:27 PM

والله انا معاكم او مو معاكم معاااكم لانه حلوه اربع ايام اووف شغل عدل مخيمات وقعده مع الاهل..ومو معاكم لانه مثل ماقال واحد من الشباب راح تزييييييد الطبيات وراح تصير حووووسه ولوووووويه عشان هالشي ماراح يوافقون عليه الشركه لو شنو نسوي ....

راشد العجمي14012

01-10-2008, 03:18 PM

الله يعطيك العافيه على الموضوع لان طريقه الشفت الحالى تعيشنا فى غربه ونحن بين اهلنا ونظام 12 ساعه ممكن نعوض الوقت الى حرمنا اولادنا منه واتمنا يحقق الاقتراح الى حقيقه
ولكم جزير الشكر

blackjack161

01-11-2008, 10:31 AM

ياسلااام .. اربع ايام .. على الاقل الواحد يمديه يلعب warcraft على راحته

اشفيه الاخ متحطم على اللعبه اقول 12 انا مو وياكم احسن شي يومين صبح يومين عصر اول يومين عصر ثاني يومين ليل و اربع ايام اوف احسن بس لازم يكون فيه 6 شفتات A.B.C.D.E.F علشان يصلح و يكون الساعات 6 ساعات بس من 6الصبح الى 12 الظهر الى 6 المغرب الى 12 نص الليل الى 6 الفجر و بس يعطيكم العافيه على الموضوع

WaRiO

01-11-2008, 08:40 PM

من 7 صباحا الى 7 مساءا ..... ثم من 7 مساءا الى 7 صباحا

هو النظام الجميل اما يومين صبح هم موووو شي الكي او سي انفع

hapy

01-12-2008, 07:44 AM

انا موراضي لان عدد ساعات النوم تزداد في الدوام الان 8ساعات مانشوف بعض الربع الا اخرساعه ولا مرات نقومه ترى الشفت انتهى لاويقول بعين قويه والله تعبنا البارحه والمسؤول بخبر كان تقديره مستتر ( يجامل )why

قبــــــــس

01-13-2008, 06:34 PM

يا جماعه مثلا اذا الدوام 12 ساعه و اول ما دخلت الشلتر قالولك في تشغيل تعني راح تراكض بالوحده 12 ساعه

القحطاني

01-13-2008, 06:38 PM

يا جماعه مثلا اذا الدوام 12 ساعه و اول ما دخلت الشلتر قالولك في تشغيل تعني راح تراكض بالوحده 12 ساعه

بن نفل

01-14-2008, 09:03 PM

اوافق على تغيير النظام وجعله مثل الكي او سي ازين واحسن واريح

ali_85

01-15-2008, 06:23 AM

يعطيكم العافية ياجماعه وعطونا اقتراحاتكم علشان نوصل للافضل بس الموهم يغيرون النظام الحالي

q8nwm

01-19-2008, 02:38 AM

لا والله النظام القديم افضل بوايد اهم شيء راحة العاملين

q8nwm

01-19-2008, 02:46 AM

لا اوافق على 12 ساعة نموت في الوحدات وتعب يزيد اتا اقول نظام القديم افضل بوايد

q8nwm

01-19-2008, 02:52 AM

لا والله تعب 12 ساعه على العاملين وعلى الوحدات صعب لا افضل نظام القديم

Toxic

01-23-2008, 01:24 AM

اقترااااااااااااح فاااااشل

ali_85

01-24-2008, 12:12 AM

اقترااااااااااااح فاااااشل

لاتعصب علينا اخوي الموضوع فاتحينا لنقاش وعطنا اسبابك واقتراحاتك
همسة : استانس لو نطالب لي باجر محد مهتم فينا ولا براحتنا يعني ماراح يتغير شي بس موحرام نحلم