مستشفى الأحمدي ...

[Q8_oil]

السلام عليكم ,

مؤسسة من أكير مؤسسات الدولة و أغناها على الإطلاق و تضم 12 مؤسسة و شركة و تملك مستشفى متواضع لا يستطيع خدمة كوظفي القطاع النفطي و خصوصا بأم عاملي هذا القطاع يجب أن تكون لهم رعية صحبة مميزة نظار لظروف العمل الشاث و الخطر الذين يقومون به و لكن للأسف مستشفي الأحمدي لا يستطيع أن يستوعب هذا العدد الكبير من أبناء القطاع كما أنه مستشفى لمنطقة الأحمدي و يستقبل أيضا الحالات الحرجة و المستعجلة.

فيجب على المسئولين أن يجددوه بحيث يستوعب أعداد أكبر من العدد الحالي.

[عبدالله العصيمي]

أخوي مهندس البورصة ، المؤوسسة لاتملك مستشفى شركة النفط ، وكان هناك نية لبناء مستشفى آخر ولكن توقف الأمر لسبب ما ، ولكن توجد فكرة قيد البحث وهي توزيع الموظفين حسب مناطق سكنهم على بعض المستشفيات ..
هذه معلوماتي الخاصة التي تحتمل الصواب والخطأ ..
تقبل تحياتي

[Q8_oil]

مشكور أخوي عبد الله على المشاركة و لكن المستشفى تحت شركة النفط و بالفعل تم إيقاف بناء المستشفى الجديد لأسباب غير معروفة و لكن يجب أن يكون للقطاع النفطي مستشفى خاص بهم

[MALS]

مستشفى الاحمدي Koc وحده لا يكفي القطاع النفطي
يجب بناء مستشفيين اخريين في جنوب السرة واخر في جنوب الجهراء
لكي يكون قريب للموظفين وعائلاتهم ويخفف الضغط على العيادات المختلفة
هذا رأيي ولكم الراي الاخر

[Future man]

انا اقوووووووول بلا بناء مستشفى وبلا ترميم مستشفى ال koc
افضل حل التأمين الصحي وعلاج موظفين القطاع النفطي وعائلاتهم في المستشفيات الخاصة

[سالم الخالدي]

انا اقوووووووول بلا بناء مستشفى وبلا ترميم مستشفى ال koc
افضل حل التأمين الصحي وعلاج موظفين القطاع النفطي وعائلاتهم في المستشفيات الخاصة

أنا معاك هذا هو الحل

[المشاكس]

كانت هناك ميزانية لبناء مستشفى لشركة نفط الكويت ولكن الميزانية ذهبت إلى مبنى المؤسسة الحالي وكان هذا في عهد الشيخ فهد الأحمد عندما كان وزيراً للنفط

والمستشفى تم بنائه ليستوعب موظفين شركة نفط الكويت ... لكن بعد ضم جميع الشركات النفطيه له اصبحت به هذه الكثافه

[KNPC]

كلامك صحيح

[dehen_3ood]

اشتبشرنا خير لما شفنا التحول والتغيير بالشكل العام للمستشفى !!
وقلنا زين !!
إداره يديده ..
دماء وعروق وشرايين وأورده يديده ..
روح يديده ..
إداره وتنظيم وسياسة يديده ..
يعني تغيير جذري ويديد .. هيااا
يعني خدمات يديده .. هياااا
يعني شي ما شفتوه !!

بس شنو إللي صار ..
كشخنا !! ومن بره هلا هلا ومن الداخل يعلم الله !!

تدش المستشفى عبالك مضيع داش الصالحية
لا الصالحية راحت عليها الحين .. عبالك داش الراية
شدعوه :D

بس اول عند الرسبشن !!
النفسيات اللهم يا كافي ودها تطقك وتهفك بأكبر ما عندها !!
زين ليش يبه ؟؟ إنتي واجهة حق المستشفى
المفروض ابتسامتج أشوفها من أول ما انزل من السيارة !!
لا سلام .. لا تفضلي او اتفضل أخوي .. لا اسلوب .. لا قال هالله

أمرنا لله بلوه وابتلينا فيها ومالنا إلا الصبر والدعاء !!
انطر عاد لين إييك الدور ..
لا حول ولا قوة إلا بالله العلي العظيم ..
دور الطبيب يهون !! بس والله الوضع يبجي لي نطرت تاخذ علاجك
شدعوه كل هالوقت .. يطبخون الأدوية طباخ ؟؟

عندك موعد!! متى ؟؟ بعد 3 أو 4 شهور هذا أقرب شي
ليش بعد الله يرحمك احسن ..
روح موت احسن لك !!
مواعيد التحاليل والفحوصات ولا الأشعة إن قربت بعد شهرين وثلاثه ..
ليش مبجرين وايد جذي تو الناس هذا احنا قاعدين شورانا؟
لا مضاعفات بالمرض والأمن مستتب !!
والله العظيم هذا انا صايمه إني ماخذه موعد حق الباطنية الشهر الياي من شهر 8 :confused:
يالله هانت :D

روح قسم الأسنان !!
ويييييييييه هذا بروحه فيلم !!
لا مكان سنع مثل الناس ..
نفسيات يالله سترك (مو العضو إللي معانا) هههههه
مواعيد طويلة إلي ليش عاد ؟؟
بالليل زحمة وطق مطاقق واكثرهم من الجنسيات الأخرى
والله اهم المستفيدين أكثر منا
عوار الضرس منو يتحمله ؟؟ يومين والويه ينتفخ ودك تطق روحك شلون تصبر جم شهر ؟

الواحد يقط فلوسه بالشمس وشقعد بالظلال احسن له
يبه نروح نعالج روحنا بفلوس أرحم ولا اتحلطم ورفعة الضغط من هالمستشفى
وليش نقط فلوسنا؟
مو المفروض مستشفى الشركة يصير من أحسن المستشفيات؟
خدمات ورعاية طبية من احسن ما يكون

تدش وتنام بالمستشفى (بعيد عنكم الشر)
تشوف اللوووويه بالجناح صبح .. عصر .. ليل جنك قاعد بالمارينا مو بالمستشفى
خبرنا المريض إن كان رجل طاعن بالسن ولا حرمة كبيره معاها مرافق
مو الأهل والأصدقاء والخلان وعسى السامع يقول آمين
شدعوه !!
لا انتوا خليتوا المريض يرتاح ولا المرضى إللي يمه يهيعون ..

والله شي يحز بالنفس ويضيق الخلق هالأوضاع المتردية
متى بس متى اتحسن واتطور ..
الموظفين بزدياد ما شاء الله
وكل مالها تزدحم من موظفين وعوايلهم وخداماتهم
وإللي مزرق من دوامه يروح يشرب كوفي :D

[HUMMER]

يعطيج العافيه على هالموضوع وصح كلامج الواحد ينطرعشان يدش حق الدكتور ساعه و4ساعات عشان ياخذ دواه والله مشكله

والشغله الثانيه اهيا اقتراح للشركه ان الواحد لويعالج بالخاص وييب لهم الفاتوره ويعطونه فلوسه موعلينا تامين صحي ولا زحمة المستشفى وبعدين في ناس بمناطق بعيده يعني يطق درب عشان مقبرة الاحمدي قصدي مستشفى الاحمدي.

وبعدين شوفوا غرف الخاص انا اول مره بالعالم اشوف غرفه خاصه الحمام عزكم الله مشترك مع الغرفه الثانيه بالله طلع نذل وقفل الباب ومافتحها علي شسوي اموت

والمواعيد لاحد يتكلم عنها لانها خياليه واذا قتلهم ليش يقولون لك في نقص دكاتره

الله يكون بعونه وبعون مرضانا

[dehen_3ood]

شكرا هامرررر على طلتك الكريمة ..

تصدق اخوي عاد إني سمعت إن راح يصير بالمستوصفات إللي تارسه مناطق الديره
دكاتره تابعه للمستشفى عشان الموظفين والموظفات إللي بيوتهم بالديره ما يطقون درب لي الأحمدي
لأن اكثر إللي يروحون المستشفى هم من سكان المنطقه العاشره
وتدري بعد احنا كلش مالنا خلق الدرب وطقة الدريج هذه


الله يكون بالعون !!

[ابوحمد]

الله يعينكم

لحد الان لقيت على المطاعم عندكم بالشركه

والنادي

والمستشفى



شنو باقي عندكم ... يعني ماصارت ميزات موظف شركه يمكن موظف الدوله احسن منك


ممكن سوال النقابه شنو قاعده تسوي اذا كل شي عندكم لحد الان مو مضبوط!؟؟؟؟؟؟


شدو حيلكم وعلى يدينكم التغيير الى الافضل باذن الله

[dehen_3ood]

أخوي ابوحمد مافي شي كامل والكمال لله سبحانه وتعالى

وفي كل الشركات وفي كل الوزارت لازم فيه أمور ودك تعدلها
وخلل لازم يتصلح !!

الشركة فيها إيجابيات وفيها سلبيات كثيره طغت وبدت تغطي على الإيجابيات !!

بس هم الواحد وده بالشي الأحسن والأفضل
يداوم وهو حاس براحه من كل شي
ويتمتع بأفضل الخدمات والمزايا

المستشفى فيها اجهزة وأدوية ممتازة بس عيبها الطوالة
فيها دكاتره زينه بس عيبها الاستقبال
فيها شي زين يقابله شي شين

وإن شاء الله اتغير الأمور إلى الأفضل
وهذا إللي نطمح له ونسعي له بإذن إللي عينه ما تنام


أسعدني مرورك الكريم اخوي

[HUMMER]

اخواني احنا بنعالج الشغلات اللي نشوفها غلط بهالمنتدى والموضوع مو نشر غسيل بالعكس
نسعى لان يكون الموظف مرتاح وماخذ كل مميزاته وتاكدو يااخوان ان الطرح مو اني قاعد اتبلى

لا والله انا ابيكم انتو تروحون وتشوفون بعينك وبعدين اذا احنا مانتكلم منو اللي راح يتكلم ترى اغلب
الموظفين القدامى يقولون الله يرحم ايام الانجليز كل موظف ماخذ (حقوقه) ومرتاح والحين الله يستر
ومشكورين

[ابوحمد]

اخوي همر محد قال انك تتبلى بالعكس انت قاعد توعي وتعرض مشكله على الجميع لايجاد حل لها والمصلحه طبعا عامه وما اتوقع انك راح تستفيد بروحك اذا تصلحت الامور طبعا الكل


وفالك طيب وخير ماسويت وكلنا اخوان في جميع القطاعات نتعاون على الخير وعلى تحقيق المصلحه العامه


وشد حيلك

[HUMMER]

تسلم حبيبي بو احمد

[dehen_3ood]

وكلنا اخوان في جميع القطاعات نتعاون على الخير وعلى تحقيق المصلحه العامه





بالضبط مثل ما تفضلت اخوي .. كلنا اخوان ونتعاون على الخير !!
وعسى الله يوفقنا ونحقق ما نصبوا إليه في مختلف القطاعات
القطاع النفطي شريان الدولة وكل ما ما كان الموظف مرتاح وماخذ حقوقه ومتمتع بكل مميزاته مثل ما تفضل اخوي هاكمر وقال .. فالشريان بضخ وبضخ وبضخ وبعود بالنفع على الموظف وعلى الديرة وبتحقق المصلحة العامة

[HUMMER]

مشكور اخوي عبدالله على هل المعلومه والله يسمع منك
قولوا امين

[HUMMER]

اصلا حتى لو اختلفنا بوجهات النظر مردنا بنتفق على المصلحه العامه لاننا موظفين غيورين

على انفسنا ومانحب التعامل على مبدا الطبقيه ولا الافضليه

[dehen_3ood]

اصلا حتى لو اختلفنا بوجهات النظر مردنا بنتفق على المصلحه العامه لاننا موظفين غيورين

على انفسنا ومانحب التعامل على مبدا الطبقيه ولا الافضليه


http://www.x88x.com/imgfiles/S1D81624.gif

[mohammed]

السلام عليكم ورحمة الله بوركاته
شاكر لك اختي الكريمه على هذا الموضوع الجميل والقيم
والمشاكل كثيره في المستشفى والي هو مفروض يكون المستشفى الرائد في الكويت
وخصوصا ل مؤسسة مثل القطاع النفطي
يعني لها ميزانية كبير جدا ولا يستطيعون بناء مستشفى جديد او تطوير المستشفى
الي فيها كراسي من السبعينات
الله المستعان

[المشاكس]

يامعودين لايسمعونكم غدراة الشركة تييبون طاري الفلوس ترا فيهم حساسيه من الفلوس ... :) يعني مالك أمل تروح تعالج بره وتييب لهم الفاتوره .... قبل كان ألي ساكن بالديره يروح حق مكتب الشركة ألي بالصالحية وياخذ ورقة الطبية من هناك ويوقعها من المستوصف ... الحين لازم تروح شؤون العاملين بالأحمدي علشان تاخذ الطبية ... يعني بدل مايسهلون على الموظف الأمور قاعدين يعقدونها
حبايبي مستشفى الشركة عمره مايتعدل مادامت هالنقابات موجوده .. لأن لا حياة لمن تنادي

[KNPC]

مستشفى الشركة ........الأخت ماقصرت بردت جبدي
كل الشكر لج دهن عووووووود على الموضوع

[MAB12]

يعطيكم العافيه على التفاعل الملحوظ

يا جماعه كلكم ذكرتوا عن المستشفى وطاقته الاستيعابيه من عدد الموظفين وعائلاتهم ونسيتوا شي مهم :

1- التجديد لعياداته وزيادة عددها ( الموعد يجي بعد 3 شهور )

2- بعض الاشخاص يتعرضون لتشخيص خاطئ ( يجب اختبار الكادر او القسم المشرف على التشخيص )

3- من بعد الساعه 3 يعني بعد انتهاء دوام الصباحي .. يستلم دكتور واحد او اثنين وتلقى زحمه عند الغرفه ( يعني العالم تتعب زياده من الانتظار وهي تعبانه )

4- لجنة العلاج بالخارج تاخذ وقت طويل على ما ترد عليك سواءاً بالرفض او القبول

5- الدوام يبدى الساعه 8 والمرضى مايدخلون اللا الساعه 8 ونص او تسع ( على يشرب الدكتور قلاص الشاي او كوب القهوه .... مزاجي نفس مسؤولينا )



اتمنى اني وفقت في ذكر بعض الملاحظات

[dehen_3ood]

السلام عليكم ورحمة الله بوركاته
شاكر لك اختي الكريمه على هذا الموضوع الجميل والقيم
والمشاكل كثيره في المستشفى والي هو مفروض يكون المستشفى الرائد في الكويت
وخصوصا ل مؤسسة مثل القطاع النفطي
يعني لها ميزانية كبير جدا ولا يستطيعون بناء مستشفى جديد او تطوير المستشفى
الي فيها كراسي من السبعينات
الله المستعان

شاكرة لك طلتك الكريمة أخوي ابوعبدالله

الحقيقة مستشفى القطاع النفطي يبيله قلب ما يتعب على قولة عبدالله الرويشد :)

وفي نقاط ما انذكرت ياليت الإدارة الكريمة تعدل على الموضوع لأني ما اقدر اضيف أو أعدل
ولكم كل الصلاحية بالتعديل والإضافة :)

[dehen_3ood]

أخوي مشاكس مشكور على هالطلة الكريمة

إحنا نقول إن شاء الله ونأمل بأن ينصلح الحال ويتعدل
والمستشفى من مرافق الشركة إللي تحتاج إلى إصلاح جذري شامل
وطبيعي إن ما وجدت الإدارة الحكيمة يعني راح ينوجد الإصلاح في كل القطاع النفطي

[dehen_3ood]

مستشفى الشركة ........الأخت ماقصرت بردت جبدي
كل الشكر لج دهن عووووووود على الموضوع


والشكر موصول لطلتك الكريمة أخوي

[A/KARIM]

الله يعطيكم العافيه على الموضوع و الله يعينا

[dehen_3ood]

الله يعين الجميع أخوي عبدالكريم

شاكره لك مرورك الكريم

[HUMMER]

والله اختي الحين المدخل صار جنج بالصالحيه وباقي الاقسام جنه بيعيد عنكم داشين مقبره بس ماعندهم
غير كل شوي يصبغون بلون الخايس الحليبي

[مختبرجي]

انا اقول لو المستشفى ترجع مثل ايام قبل قصدي ايام الانجليز وايد احسن
كل شي كان مرتب

[dehen_3ood]

والله اختي الحين المدخل صار جنج بالصالحيه وباقي الاقسام جنه بيعيد عنكم داشين مقبره بس ماعندهم
غير كل شوي يصبغون بلون الخايس الحليبي


إي والله وإنت الصاج
ناهيك (شرايكم فيها ناهيك) :D عن المواعيد الخرطي
وما تقدر تدش حق الطبيب المختص إلا بعد ما تشرفنا بحضورك للطبيب العام وهو عاد يقدر إذا تدش ولا ما تدش
والمواعيد حق الموظفات وزوجات الموظفين الحمل .. الله يعينهم
لا كراسي سنعة ولا مكان سنع
حسبنا الله ونعم الوكيل

[dehen_3ood]

انا اقول لو المستشفى ترجع مثل ايام قبل قصدي ايام الانجليز وايد احسن
كل شي كان مرتب

الانجليز كل شي عندهم مرتب وعندهم الشغل شغل
حتى حزام الأمان يربطونه :D (شكووو تكفيييين)

يسلمووو على هالطلة الكريمة مختبرجي

[مختبرجي]

انا اقول الاحسن بأن كل شركه تبني لها مستشفى خاصه لعمالها.
يعني مستشفى خاص بشركة البترول الوطنيه ومستشفى خاص بشركة البتروكيماويات ومستشفى خاص بايكويت .
وطبعا موشرط يكون مستشفى كبير وضخم يكون المستشفى على حسب كمية العمال لديه .
والحل الثاني اهو التأمين الصحي والعلاج يكون في المستشفيات الخاصه

[BG. 1]

فيجب على المسئولين أن يجددوه بحيث يستوعب أعداد أكبر من العدد الحالي.

موجود المخطط جاهز

وميزانيته سمعنا إنها أقرت ولكن حسب ما سمعنا إنها كانت مبالغ فيها وتم صرف النظر وأحسن شيء هو

كما ذكر الأخ فيوتشر مان

افضل حل التأمين الصحي وعلاج موظفين القطاع النفطي وعائلاتهم في المستشفيات الخاصة

[MMMS]

ليش ماتسوي شركتنا او نقابتنا .... حق موظفينها علاج بمستشفيات خاصة و عيادات بسعر رمزي او مخفض ؟ بلا زحمه وعوار راس ومواعيد تشيب الراس ...... واحسنتم وسلامتكم

[البرقان]

مستشفى النداء

تذكرت هذا المسمى الصدامى ابان فترة الغزو عندما غير (الصداميون) اسم المستشفى

النداء

اتخيل هذا المستشفى لو كان له صوت لبعث بنداء (استغاثه)

Sos


ولو كان له يد لاشار بالبنان على ادارات الشركة المتعاقبة


منذ اواؤل فترة التحرير كان هنالك فكرة انشاء مستشفى جديد ... وكانت المحاولة الاولى بعمل

مخططات لهيكل المستشفى (الخيالى) وعملت الدراسات التقديرية للتكلفة وكم يستوعب من المراجعيين


و بقدرة قادر .......... ركنت هذه الدراسات والاستعدادات

بعد عدة اصوات (نشاز) تستكثر المبلغ التقديري لانشاء المستشفى الجديد

و ايضا فكرة استحداث شركات (صغرى) من الشركة الام (النفط)

فكان المستشفى كجريح حرب ...كل فترة تكون هنالك تعديلات (فاشلة) للترميم ولكن هذا الجريح لا يزال ينزف


وعند اعلان (الطلاق) لهذا المستشفى من شركة نفط الكويت

وتزويجه من شركة الخدمات النفطية بادارة (الغانم)

سائت الحالة (اكثر) وسجلت عدة مخالفات من قبل وزارة الصحة الكويتية

وكان الترميم (العظيم)

مواقف مظللة ... مدخل مثل مداخل (الحانات) ... و كوفي شوب

اما الطواري والعيادات والاجنحة وغرف العمليات (بقيت) على حالها

وتم تعاقد مع شركة لتوفير موظفين استقبال (من عدة جنسيات)

ومع ترنح القيادة في ادارة دفة المسار

طلقت شركة الخدمات هذا المستشفى (من جديد)

و تزوج مرة اخرى من شركة نفط الكويت

ليكون هذا زواجها الثالث

تري هل قبل الرابعة .... يحتاج المستشفى الى محلل :d


تحياتي فقط لاغير

[أبو خالد]

السلام عليكم
شباب شرايكم .. بمستشفى الشركة ( عندي كلام واجد) :rolleyes:
بس اسمع تعليقكم بالأول

[M7MD]

للأسف المستشفى مخصص لفئه خاصه جدا وتقدر تقول عصابه وعلى فكره العصابه معروفه وواحد من العصابه اللي بالمستشفى صاير صدام ويشوف الناس عنده اقزام مع العلم هو القزم ويستانس لما يتصل فيه Dmd ((؟)) لانه يحب يقلقس عنده والمضحك في الامر مره حصلته يخلص جوازات مدير المستشفى (( مطراش ))

[أبو خالد]

أخوي محمد أنا قصدت المستشفى كله بشكل عام.... من حيث الادارة والتنظيم وطرق العلاج .. إلخ

[dehen_3ood]

تفضل دش على هالروابط اخوي الكريم

http://q8ow.com/vb/showthread.php?t=132

http://q8ow.com/vb/showthread.php?t=226

[M7MD]

يا ابو خالد انا فاهم قصدك ولما يصلح راس الهرم بالمستشفى راح يصلح كل شي بالاقسام

[أبو خالد]

هلا دهن العود
أنا حبيت استشف انطباع وآراء الإخوة الزملاء في نفط الكويت، واللي مر بتجربة شخصية يذكرها للقراء

[dehen_3ood]

هلا فيك اخ بوخالد
وحياك الله معانا بالمنتدى
أسعدنا انضمامك الكريم مع تمنياتنا لك بطيب الاقامة

وبالنسبة للمستشفى !! خلها على الله
اهي تجربة بس مرت؟؟ تجارب يالله بالستر
كل شي متلخبط بهالمستشفى ومخربط
وتحتاج إلى حل سريع وجذري وشامل

[M7MD]

يا ابوخالد انا فاهم قصدك بس لما يصلح راس الهرم راح يصلح معاه كل شي ...

[البرقان]

الموضوع مكرر مكرر مكرر

كان للزميلة دهن عود موضوع مشابه

و لا يزال قيد النقاش

فما الحاجة الى انشاء و تكرار النقاش

الموضوع السابق ...اضغط (http://www.q8ow.com/vb/showthread.php?t=226)

مجرد تنبيه و اقترح دمجه مع سابقه


و اسمه مستشفى الاحمدي ... وليس مستشفى الشركة

تحياتي فقط لا غير

[فيصل العجمي]

السلام عليكم ورحمة الله وبركاته

تم دمج الثلاث مواضيع التي تتكلم عن مستشفى الأحمدي مع المضوع الاقدم
وهو موضوع الأخ مهندس البورصه حيث انه اقدم موضوع فيهم

وحتى تعم الفائدة ولا يتشتت فكر الأخوان والأخوات

[norema-sarto]

يعطيكم العافية ككككككككلكم :)

أول شي مبروكين على المنتدى وهم بعد على الزيادة

صج المستشفى تعدلت (طبعا بس جدام )
وورا...ما أدري متى بسووووونه

بس صراحة فرق عن قبل 10 سنين...مشكورين المسؤلين اللي حاولوا يغيرون
ويعدلون فيها ( بس ما تترقع )خخخخخخخخخخ

[اداري]

هذه مصيبه مو مستشفى موعد الأسنان لتقويم 4 سنوات قمة المصخرة
والعيادات الثانية مو احسن من عيادةالاسنان الله كريم
شوفوا شركات النفط في باقي الخليج !

[Q8_oil]

المصخرة إن هالمستشفى هو يعالج الأشخاص إللي تعتبر مهنتهم الأخطر و الأكثر شقاء بالكويت

و لازلت أقول إن القطاع النفطي بالكويت مظلوم و سيظل كذلك

[PIC]

ياجماعة صار مستشفى الشركة حلم

يعني ما فيه ميزانية ولا مافيه صاحب قرار

[النادر]

اللي يدبل كبدك


المصريين شايخيين في المستشفى


والاجانب راثعين في الادويه

[Q8_oil]

للأسف هذا الوضع مو غريب خير الكويت مو لأهلها خير الكويت للمقيمين

[loard]

العتب كله على نقابه نفط الكويت..........لم ولن تحرك ساكن .....عاجبهم الوضع دام معاملاتهم ماشيه .........للاسف نسوا مصلحه العمال

[النفطيه]

مساكم الله بالخير جميعا

عيدكم مبارك وعساكم من عواده

يا خوى اى نقابه تتكلم عنها النقابه الحاليه المستشفى والقايمين على المستشفى مشين مصالح النقابه مسفرين فلان ومعالجين فلان من تحت لى تحت لا ملف ولايحزنون يصرفون ادويه مكلفه لفلان يالله على هالوضع وتبى النقابه تتكلم عن المستشفى شغلها ماشى وبالطقاق انتوا ياالمساكين

لكن يبشرون بالخير الانتخابات جايه بيشوفون

[HUMMER]

والله اخوب بونايف انا معاك باقتراحك اللي الواحد يتمنى تطبيقه

[بوعبدالرحمن]

وآنا بيتنا بحولي اذا ولدي صار مريض مضطر اطق درب 40 كيلو رايح و 40 كيلو راد تكفه شسوي ؟ تعبنا واحنا نتكلم ؛

[HUMMER]

الله يكون بعون الجميع وخلي نقط قلوسنا بالشمس ونقعد بالظلال
ولا منت المستشفي اذا بتاخذ ورقه من الاستقبال جنك بتسجل بالجامعه
و24 ساعه منفسين ليش ماادري

[زهرة التوليب]

مستشفى الأحمدي كل ماله وفي الحضيض

الريسبشن حاطين لك ناس نفسيتهم في خشومهم مالهم خلث يشتغلون ولا يردون على احد
ولما تبي تروح تحلل دم يدخلون الحريم مع الرياييل !!! شنو هالمصخره ليش مو الحريم بغرفه والرياييل بغرفه !!!

وقسم مراجعه الحوامل الله يعينهم والله كل مراجعه دكتور شكل
وكل دكتور يعطيك تشخيص ويطلب تحليل ولما تيي الموعد الياي ما يسألك ولا يبلغك بنتيجة التحليل !!
عيل ليش طالبين تحاليل وخرابيط ودوخة راس !!

ومواعيدهم رايحه فيها يكتبون لك الموعد الساعه 7 ونص وتدخل الساعه 10 !!!
والسبه ان حظرت الدكتور ياي الساعه 7 ونص او 8 الا ربع وقاعد يشرب النسكافيه ماله وبعدها يتغرف للمرضى

الناس تطورت والأرقام تطلع بالشاشه علشان يدشون الناس بالدور وبنظام واحنا بالأحمدي ماكو
كله تدرعم او تطلع السستر تنادي الرقم !!! خو ليش هالعباله حطوا شاشه تطلع عليها الأرقام وفكو نفسكم


وما خفي كان أعظم

[Winchester]

انا بعرف الفلوس وين يودونها

ولا احنا ما نستاهل مستشفى يديد

[SMART_BOY]

لا والله نستاهل

بس واقفة عند رئيس مجلس الوزراء

عساه يقر المستشفى ويخلصنا

والا يعطونا تامين صحي ونفتك

[سالم الخالدي]

هذا الحلم من عشر سنوات ومدام هذا وضعنا ما أظن ن بيصير مستشفى


لاتنسون تمرون على توقيعي وتشوفون الفرق بيننا وبين القطاع النفطي في الخليج من الناحية الصحية

[Q8_oil]

لازم يتم بناء مستشفي جديد و كبير يخدم طاقم القطاع النفطي جميعا

[Ahmadi Ambulance]

مستشفى الأحمدي كل ماله وفي الحضيض

الريسبشن حاطين لك ناس نفسيتهم في خشومهم مالهم خلث يشتغلون ولا يردون على احد
ولما تبي تروح تحلل دم يدخلون الحريم مع الرياييل !!! شنو هالمصخره ليش مو الحريم بغرفه والرياييل بغرفه !!!

وقسم مراجعه الحوامل الله يعينهم والله كل مراجعه دكتور شكل
وكل دكتور يعطيك تشخيص ويطلب تحليل ولما تيي الموعد الياي ما يسألك ولا يبلغك بنتيجة التحليل !!
عيل ليش طالبين تحاليل وخرابيط ودوخة راس !!

ومواعيدهم رايحه فيها يكتبون لك الموعد الساعه 7 ونص وتدخل الساعه 10 !!!
والسبه ان حظرت الدكتور ياي الساعه 7 ونص او 8 الا ربع وقاعد يشرب النسكافيه ماله وبعدها يتغرف للمرضى

الناس تطورت والأرقام تطلع بالشاشه علشان يدشون الناس بالدور وبنظام واحنا بالأحمدي ماكو
كله تدرعم او تطلع السستر تنادي الرقم !!! خو ليش هالعباله حطوا شاشه تطلع عليها الأرقام وفكو نفسكم


وما خفي كان أعظم

صح السانك... ونسيتي انتظار الصيدلية

[Ahmadi Ambulance]

مساكم الله بالخير جميعا

عيدكم مبارك وعساكم من عواده

يا خوى اى نقابه تتكلم عنها النقابه الحاليه المستشفى والقايمين على المستشفى مشين مصالح النقابه مسفرين فلان ومعالجين فلان من تحت لى تحت لا ملف ولايحزنون يصرفون ادويه مكلفه لفلان يالله على هالوضع وتبى النقابه تتكلم عن المستشفى شغلها ماشى وبالطقاق انتوا ياالمساكين

لكن يبشرون بالخير الانتخابات جايه بيشوفون

صح كلامك ... و لا حبتك عيني ما ضامك الدهر

[Ahmadi Ambulance]

المصخرة إن هالمستشفى هو يعالج الأشخاص إللي تعتبر مهنتهم الأخطر و الأكثر شقاء بالكويت

و لازلت أقول إن القطاع النفطي بالكويت مظلوم و سيظل كذلك

الله المستعان

[Ahmadi Ambulance]

هذه مصيبه مو مستشفى موعد الأسنان لتقويم 4 سنوات قمة المصخرة
والعيادات الثانية مو احسن من عيادةالاسنان الله كريم
شوفوا شركات النفط في باقي الخليج !

انا بالدائرة الطبية مو محصل موعد قبل 3 شهور علشان اعالج ضرسي

الله المستعان

[Ahmadi Ambulance]

للأسف المستشفى مخصص لفئه خاصه جدا وتقدر تقول عصابه وعلى فكره العصابه معروفه وواحد من العصابه اللي بالمستشفى صاير صدام ويشوف الناس عنده اقزام مع العلم هو القزم ويستانس لما يتصل فيه Dmd ((؟)) لانه يحب يقلقس عنده والمضحك في الامر مره حصلته يخلص جوازات مدير المستشفى (( مطراش ))

لووووووووووول

[Ahmadi Ambulance]

إي والله وإنت الصاج
ناهيك (شرايكم فيها ناهيك) :D عن المواعيد الخرطي
وما تقدر تدش حق الطبيب المختص إلا بعد ما تشرفنا بحضورك للطبيب العام وهو عاد يقدر إذا تدش ولا ما تدش
والمواعيد حق الموظفات وزوجات الموظفين الحمل .. الله يعينهم
لا كراسي سنعة ولا مكان سنع
حسبنا الله ونعم الوكيل

الله المستعان ...

[frfosha]

أنا بصراحه مع الي قال انه م نبي مستشفى خاص بالقطاع النفطي نبي نتعالج بأي مستشفى خاص يليق بمستوى موظف هذا القطاع حالنا حال المؤسسات والشركات الثانيه

[Mr. Engineer]

أنا برأيي أنه مهما عدلوا و حسنوا من الخدمات و الأجهزة و الأطباء،
فسوف تبقى مشكلة رئيسية، ألا و هي الازدحام، فمهما كبروا و طوروا و زادوا الموظفين فلا يوجد مستشفى بالعالم يستطيع أن يخدم حوالي 10000 موظف و عائلاتهم بالإضافة إلى الخدمات الطارئة لمنطقة الأحمدي، و أيضاً تبقى مشكلة بعده عن مناطق العاصمة و الجهراء.

فيجب برأيي بناء مستشفى متطور في الأحمدي للجراحة، الولادة، طب الأسنان، طب العيون، وغيرها من أقسام. بالإضافة إلى استقبال الطوارئ و الأمراض الموسمية اليومية المختلفة.

و بالوقت نفسه تخصص عدد من المستشفيات الخاصة في المناطق المتعددة لاستقبال حالات الطوارئ و الأمراض الموسمية و المتكررة (انفلونزا، مغص، صداع، رمد، طوارئ الأسنان، .... الخ)، مع القيام بأخذ تحويل لمستشفى الأحمدي للحالات الجراحية غير الحرجة و النوم بالمستشفى و غيرها.

و بهذا توفر الشركة من تكاليف العلاج في المستشفيات الخاصة و يخف الضغط على مستشفى الأحمدي.

و شكراً

[Q8_oil]

و الله كلام سليم و لكن يجب بناء مستشفى يلبي إحتياجات القطاع النفطي ل 10 سنوات قادمة و ليست للوضع الحالي فقط

[عاشق ال KPC]

منو فيكم يروح مستشفى الاحمدي لي صار مريض أعتقد 70% ما يروحون لأن زحمه غير طبيعيه غير الطريج رايح راد المفروض المؤسسه تسويلنا تأمين صحي أفضل وأوفر لها وتفكنا من التعب وتخفف الضغط على المستشفى
وشكرا

[brilliant]

في طريقة حلوه تسويها ارامكو السعوديه وهي مستشفى التامينات ,,, تدفع الشركة للمستشفى تامين صحي للموظف سنوي ويعالج طول السنه بلاش مهما كان نوع العلاج وهالمستشفيات كثيره بالسعوديه وبينهم تنافس شديد وهالشي من صالح الموظفين

[D.M.D]

والله انا رايي من رايكم انه المفروض الؤسسة اتوفر مستشفيات خاصة لموظفين القطاع النفطي يراجعون فيها لان :
1- المستشفى بعيد عن المناطق الداخليه
2-المستشفى مهما يرممون فيه مامنه فايده والزحمه كل مالها تازيد
وشكرااااا

[زهرة التوليب]

مستشفى الأحمدي تخلي الموظف الكويتي يهون انه يتعالج فيها

1- زحمه
2- مكانها بعيد (يعني نيي الدوام وايد ابرك)
3- المواعيد والمراجعات تاخذ لها جم شهر
4- الغرف الخصوصي معدوده على الأصابع

يعني صراحه احسن مافيها الأدويه والا مراجعات وفحوصات مو ذاك الزود
وتاخذ لها وقت

الحل الوحيد ان يسوون لنا خصم حق العلاج في المستشفيات الخاصه
ويفكونا من اللويه

[Network]

:mad::mad:المستشفى مأسااااااااااااااااااااااااه:mad::mad:

:eek::eek: إذا أذوني تعورني و بموت من الألم يعطوني موعد عشان يشوفني دكتور الأنف و الأذن و الحنجر؟! الموعد متى بعد شهر شهرين ثلاث أنا و حظي!!!!!!!!!:eek::eek:

:confused::confused:حتى التشخيص غلط:confused::confused:

لا حول ولا قوة إلا بالله

[الشقااوي]

نعم حنا بحاجه لمستشفى جديد وكبير يخدم جميع الموظفين وعائلاتهم

لان الحالي اصبح مبنى متهالك قديم جدا وصغير

اذكر لكم موقف كنت مرقد في المستشفى وكان ذاك اليوم هواا قوي واذا بالدريشه طاحت من شدت الهواء وانكسرت جنبي وانا نايم على السرير الله ستر ولطف

[ابو فاطمة]

السلام عليكم ,

مؤسسة من أكير مؤسسات الدولة و أغناها على الإطلاق و تضم 12 مؤسسة و شركة و تملك مستشفى متواضع لا يستطيع خدمة كوظفي القطاع النفطي و خصوصا بأم عاملي هذا القطاع يجب أن تكون لهم رعية صحبة مميزة نظار لظروف العمل الشاث و الخطر الذين يقومون به و لكن للأسف مستشفي الأحمدي لا يستطيع أن يستوعب هذا العدد الكبير من أبناء القطاع كما أنه مستشفى لمنطقة الأحمدي و يستقبل أيضا الحالات الحرجة و المستعجلة.

فيجب على المسئولين أن يجددوه بحيث يستوعب أعداد أكبر من العدد الحالي.


الله يرحم والديك على هالموضوع الطيب...

وبصراحة كلامك 100% مضبوط وصح ولازم مو يتجدد الا يتغير بكبرة ويتطور ويتكبر ويكون له افرع عالاقل 3 متوزعين في غير الاحمدي

[PetroleumENG]

انا اقوووووووول بلا بناء مستشفى وبلا ترميم مستشفى ال koc
افضل حل التأمين الصحي وعلاج موظفين القطاع النفطي وعائلاتهم في المستشفيات الخاصة

I am agree with you

[أبو خالد]

يبدو انه في اجماع ساحق بأن المستشفى حده حده تعبان ومو ملحق على المراجعين
ترا انا مو مع شيلته بالعكس وجوده مطلوب
لكن تعال وشوف بعض الشركات النفطية .. بعضهم مسوين اتفاقية مع مستشفيات خاصة مثل الهادي ودار الشفاء (الخفجي وكوفبيك)
مرتاحين ومريحين موظفينهم..... ليش باقي الشركات لأ؟؟؟؟؟؟؟؟؟!!!!!!!!!

[نفطي كويتي]

مشكور أخوي عبد الله