أبناء الموظفين ورسوم المدارس الخاصه !!

[أمير القلوب]

السلام عليكم ورحمة الله وبركاته

أولا أود الشكر الجزيل لكل القائمين والعاملين على هذا المنتدى والأخوه الأعضاء والزوار جميعا.............

الموضوع اللي أحب أتكلم فيه هو موضوع تدريس أبناء العاملين الكويتيين في قطاع المدارس الخاصه واللي بصراحه يشكل هم وهاجس كل أب وأم لبناء افضل مستقبل تعليمي لأبناؤهم...والتساؤل هنا لماذا تتكفل المؤسسه في أو الشركه برسوم تدريس أبناء الأجانب كاملة اذا كانت المدرسه من نفس اللغه أو البلد الذي ينتمي له العامل الأجنبي و80% من المصاريف تتكفل به المؤسسه أو الشركه التي يعمل بها اذا كانت المدرسه أجنبيه مثلا تكون مدرسه بنظام بريطاني أو أمريكي (النسب على حسب علمي ومعلوماتي من بعض الأخوه الأجانب العاملين) !!!!!!!!!!!!!!!!!؟؟؟؟؟؟؟؟؟؟؟؟؟..

والمشكله أنه أغلب الطلاب الغير كويتيين بعد التخرج من الثانويه العامه يهاجرون الى بلادهم وهم على أعلى درجات التفوق والعلم للعمل في بلدان آخرى غير الكويت يعني بمعنى أدق وصريح جدا خيرهم مو للكويت للأسف وليس الجميع عشان محد يزعل..........

ياجماعه يامسؤولين انظروا لأبناء الموظفين كثروه ممكن تستغل في خدمة الكويت أولا والقطاع النفطي ثانيا في المستقبل خصوصا أذا تخرجت أجيال على مستوى عالي من العلم والمعرفه ...

الحكومه ماقصرت وفرت المدارس الحكوميه لكن الكل يملك المعرفه والدرايه الكامله والكافله عن مستوى التعليم الحكومي وماله داعي ادخل في تفاصيل التدريس الحكومي.


الشركه لاتتكفل برسوم أبناءنا نحن العاملين الكويتيين هذا بس عشان احنا كويتيين وبلدنا الكويت اللي احنا ننتمي لترابها وندفع الغالي بس عشان ذره من رملها ، لكن على الأقل 50% من رسوم التدريس .

شكرا للجميع واتمنى محد يزعل من هالكلام من الأخوه غير الكويتيين.

[63447]

والله وانت صاج انا المدارس الخاصة شاقتني والله تخيل كل بونص وكل اوفر تايم يجيني اقطه على المدارس


ياخي مانبي ببلاش بس على الاقل خصم 40% اقل مافيها خلونا نتنفس شوي كل يوم زايدين الاسعار علينا

[أمير القلوب]

مشكور أخوي63447 على مرورك وردك وياريت الفكره توصل للمسؤولين وشكرا على ردك مره ثانيه :)

[زهرة التوليب]

والله معاك حق

الأجانب عيالهم تخرجوا اللي صار دكتور واللي صار مهندس واللي صار مدرس
بفلوس الكويت ومدارس خاصه والتكاليف من جيب الشركه

بس احنا حتى خصم مالنا

قصوا علينا مره سووا خصم على حضانه !! والخصم ما يسوى بعد

شكرا على الموضوع اخوي

[أمير القلوب]

يعطيج العافيه أختي زهرة التوليب على المشاركه وشكرا على المرور والتعليق

[EQUATER-1]

والله بس راح اضيف شغله انا احنا عندنا بايكويت يعطون الاجانب فقط 250 دينار لكل ولد وشكرا جزيلا على الموضوع الهام جدا.

[أمير القلوب]

أشكرك أخوي الكريم Equater-1 على مداخلتك والمعلومه اللي فدتنا فيها عن نظام ايكويت تجاه الرسوم ..ونبهتني ان اضيف شغله أن الموضوع اللي كنت اتكلم فيه كنت اقصد المطبق في نظام KOC وشكرا مره ثانيه على تفاعلك .

[Mr. Engineer]

أنا بعد أؤيد دعم تدريس أبناء الموظفين في المدارس الخاصة،

يا أخي خلهم يعتبرونها نوادي صحية، يعني يعطون دعم 40% من اشتراكات النوادي الصحية لتنمية العضلات و الجسم و لا يساهمون بتنمية العقول،

و الله شيء محير

[63447]

أنا بعد أؤيد دعم تدريس أبناء الموظفين في المدارس الخاصة،

يا أخي خلهم يعتبرونها نوادي صحية، يعني يعطون دعم 40% من اشتراكات النوادي الصحية لتنمية العضلات و الجسم و لا يساهمون بتنمية العقول،

و الله شيء محير



كلامك صحيح 100% الحين النوادي ولا المدارس

[Online]

والله معاكم حق

[جابر]

بعمليات الخفجى المشتركه .. يعطون 5000 ريال سنويا (يعنى 400 د.ك) مصرف إذا كان ولدك وإلا بنتك يدرس بالجامعه ، لكن حدك بس إثنين.
حلوين , لو عندك ولدين بالجامعه ... تصرف لك زياده 66 د.ك شهريا ... العوض ولا القطيعه .. :)

[الشيب]

حسب معلوماتي ان شركة تكساكو الواقعة في ميناء الزور تدفع رسوم الدراسة كاملة لابناء الموظفين . ونتمنى من الشركات الكويتية النفطية ان تحذوا حذو شركة تكساكو . وان تعتني بالموظفين الكويتيين كما تعتني الشركات الاخرى بموظفيها

[h2s]

مشكور حيييل يا امير القلوب على اللفتة الجميلة منك
وبصراحة فعلا عيب لما الشركة يكون خيرها على الغريب
وعيالنا الي هم عيال الديرة ما يطولهم شي في هالمجال رغم ان التعليم اهو اهم شي لثروة الوطن وهم اهلها

[نفطي كويتي]

وانا بعد وياكم
وياليت تهتم النقابات في الموضوع

[ENG78]

قبل لا تتهجمون علي وتقولون شفيها مدارس الحكومة ....... إقرأ الموضوع أولا
كلنا نعرف مدى تدني مستوى المدارس الحكومية في الكويت:
الصفوف مليانة ..... قالت اختي الصغيرة عن عطل كل المكيفات ..... و هناك نقص الكراسي .... عدم توفر الكتب ....... عدم حرية إختيار المدرسة ......... مشكلة المدرسين الخصوصيين ........ قلت الاهتمام بالطالب ....... الخ
لذلك وانا منهم اخترت المدرسة الخاصة لإبني والحمدالله مرتاحين ...... ولكن لماذا تدفع الشركة للأجانب 90% من سعر المدرسة الخاصة و لا شئ للأبناء الكويتيين؟ للعلم ان الكثير من الشركات الكويتية توفر ميزت التأمين الصحي و المدارس الخاصة لموظفينها.

[سالم الخالدي]

كلامك صحيح بل كل الشركات النفطية الخليجية توفر خدمة المدارس الخاصة


لكن لاحياة لمن تنادي

[زهرة التوليب]

بالعكس محد راح يتهجم عليك
والكل يدري ان المدارس الخاصه احسن الف مره من مدارس الحكومه

يا اخي كافي المدرسين
خبره وأكفاء ويدرسون بضمير ويأسسون الطلاب صح

وحتى الملابس تشتريها من المدرسه علشان الكل يصير مثل الشي

اما في الحكومه للأسف نقص كطاولات ، كراسي ، كتب ، فصول ، معلمين !!!
وغير جذي مافي اهتمام ولا عطاء من قبل المدرسين
يطلع التلميذ من المدرسه مو فاهم شي ويضطر الأبو انه يسجله في تقويه او يحطله مدرس خصوصي علشان يتأسس صح


في جنوب السره فاتحين مدارس يديده اسمها مدارس نموذجيه
فرحنا فيها لأن يطبقون نظام المدارس الخاصه

مافي جناط ثقيله ولا واجبات وكل معلمتين تمسك صف واحد
يعني وحده تدرس مواد علميه وحده مواد ادبيه

قلنا خوش شي
وكل يوم الثاني نكتشف ان المدرسه فيها نقص بشي معين
مره قالوا نقص في عدد الصفوف ولازم نفتح فصول يديده
ومره ثالوا نقص في الخزائن الموجوده في كل صف لكتب التلاميذ
ومره نقص في الكتب الدراسيه
ومره نقص في عدد المدرسات !!!

يعني قبل لا تطبقون شي يديد جهزوا كل شي
مو توهقون التلاميذ في هالمدارس اللي مو كامله وناقصه وغير جذي حتى التكيف كل يوم مخترب في فصل
مع العلم ان هالمدارس ما صار لها 3 سنين يعني يديده !!

[منطقي]

شركتنا الموقره ينطبق عليها مثل القائل : (( عنز الفريج أدور التيس الغريب )) أو (( عين عذاري تسقي البعيد وتخلي القريب )) ومتبعين ......................من حبنااااااااااا لها بنوفررررررر لها........ بس علينا (( هالترشيد )) الله يحفظها وسامحها شركتنا!!!!

[اطفائي طموح]

شركتنا الموقره ينطبق عليها مثل القائل : (( عنز الفريج أدور التيس الغريب )) أو (( عين عذاري تسقي البعيد وتخلي القريب )) ومتبعين ......................من حبنااااااااااا لها بنوفررررررر لها........ بس علينا (( هالترشيد )) الله يحفظها وسامحها شركتنا!!!!


انا ايدك اخوي....بس تعديل للمثل اذا تسمحلي (( عنز الفريج ماتحب الا التيس الغريب ))

[engineera]

اي والله كلامك عدل ...ياله يارب يتغير القرار ويدفعون حق اعيالينا 90% وعيال الاجانب 30% زين عليهم او 50% ..احنا اولى بديرتنا..وانشالله على ماتزوج وعيالي يكبرون يتغير القرار D:

[redrose]

الحين ابي اعرف ؟

منو أولـــــى الكــويتــــــــــــــــــــــــــــــي والا الأجنبي

[Network]

الحين ابي اعرف ؟

منو أولـــــى الكــويتــــــــــــــــــــــــــــــي والا الأجنبي




:mad::mad:الكويتي طبعاً بس عمك..................!:mad::mad:

[مقهورة]

انزين اللي كويتيه وبنتها امريكية ولا بريطانية هل يدفعون لها وووين تروح

السؤال حق رفيجتي

[بلبل عنقريزي]

عيل ماسمعتوا بعين عذاري ؟

["خالد"]

انا معاك الف مليون بالمية
ولكن كان في محاولة لعمل شيء من الخصم (هذا بالنسبة للKOC على الأقل) ولكن ذهبت أدراج الرياح و ما إقدرو إلا على المدارس "السكة" وإعذروني على هذا الوصف - ولكن هذا هو الواقع المرير

مع اني ما ودي احبطكم ولكن بصريح العبارة أقبض من دبش

بالنسبة للنقابات انت شوف أعضاء النقابات (ما افتكر يعرفون اي شيء عن المدارس الخاصة ولا اعتقد يمثل لهم هالموضوع اي اهمية بالنسبة لهم) و بعدين إحكم - ولا تعليق ازيد

انت زيادات ومستحقة من زمان وموافق عليها تطلع من لجنة تدش لجنة - اجتمعو لا ما إجتمعو - البنك الدولي يا طلابت البنك الدولي.........حالة..... وتقول رسوم مدارس الخاصة لازم يودونك اليونسكو

[The^Queen]

اللي يحر ان في جنسيات ماتستاهل وقاعده تاخذ هالخصم وايون بعدين يناجرونا ويتفلسفون عن مستوا التعليم في دوله الكويت وليش ماتدخلون عيالكم مدارس خاصه !!
ياليت بس نتساوي فيهم :(

[Fighter]

لا هاليومين طايحين بس بخصومات حق فنادق ومنتجعات مادري كل يوم بروح اسكن بفندق
المهم يقولون بعد انه في خصم على مدرسة كيمبردج اللي بحولي و الفحيحيل بس عاد شدو حيلكم ودوا عيالكم مدارس خاصه

[Reyad]

السلام عليكم اخواني

بغيت استفسر اذا كان عندنا عروض حق الحضانات والمدارس الخاصه

دورت بالمنتدى ما لقيت , قلت يمكن ما عندنا

او اذا عندنا يمكن محد حط الموضوع

ويريت اذا ماكان عندنا تطالبلنا النقابات بهالخصومات

ارجو الافاده

وشكرا

[Reyad]

يا جماعه ليش محد يرد على موضوعي ؟؟؟:eek:

[سالم الخالدي]

يا جماعه ليش محد يرد على موضوعي ؟؟؟:eek:

لأنه على حسب علمنا لا يوجد عروض على مدراس خاصة

[DocTor aLMaNaGeesH]

مرحبا يا شباب .. :)
انا عندي استفسار بسيط بخصوص المدارس الخاصه
فيها خصم لنا او عروض مثلا :D

[محمد اليتامى]

مرحبا يا شباب .. :)
انا عندي استفسار بسيط بخصوص المدارس الخاصه
فيها خصم لنا او عروض مثلا :D


الأجانب مجانا ً

و الكويتيين أعتقد خصم يا 15 أو 20 % بس ما ني متأكد


بالتوفيق

[جونم جقرم]

مرحبتيين كباار

في موضووع مثبت عن كافة العروض لموظفي الشركة

[redrose]

والله حاله الشركة مثل عين عذاري - تسقي عيال الأجانب وعيالنا لاء

[LaRambla]

ماكو اخوي

هذا انا مدخل عيالي مدارس خاصه وسنويا قاعد ادفع سبع تالاف ولا حصلت خصم حتى واحد بالمية

[The^Queen]

السلام عليكم ورحمه الله وبركاته


اتوجه بموضوعي لقسم الخدمات العامه


في نقص بمعرفه المزايا اللي تميز عاملين الشركه
وفي نقص بهالجانب بالذات
يعني في مزايا وايد قاعده اشوفها بالكي ان بي سي
وعروض حلوه وايد
هل تنطبق علينا؟
انزين اذا ماتنبطق ليش مو قاعدين نشوف تحرك لنا؟
يعني يا من الكي بي سي وسيركيولار للكل وننشمل معاهم؟ ياماكو شي؟
ليش الشركات الثانيه عندها عروض بالطيران وبالدي اتش ال وبالمستشفيات والمنجعات و و و و

وكوفبك؟
شنو لهم؟


وبعدين عيزنا واحنا نطالب
ميزونا!
عاملونا معامله الاجانب
نبي خصومات بالمدارس الخاصه ليش الاجنبي له 90% حتا الهنود والباكستيين مع احترامي الشديد لهالجنسيات
واحنا مالنا ولاحتا 10% عيالهم احسن من عيالنا بشنو؟؟؟؟؟؟؟؟

لو اداره الشركه تتجه لاحد هالجهات الخاصه وتكلمها وتطالب باعطائنا خصم لموظفين الشركه وعيالهم واهلهم لو 10% (وهلاشي ماراح يكلف الاداره ولا دينار) الجهه ماراح تخالف واحنا نستفيد
سواءا من مستشفيات خاصه
من مدارس خاصه
من فنادق
من جهات ثانيه

سمعت ان عندنا خصومات بمحلات بالصالحيه بس ماعرفتهم!!!!
سمعت ان عندنا خصومات بشركه الطيران اللي موجوده عندنا دون ذكر اسمها
بس لي سئلنا عن الخصم تقولك الموظفه عندك خصم 10% بالاميه انزين حسبي التذكره تطقطقلكم وتقولك السعر جذي ومبلغ وقدره (نفس سعر لو بحجزها من بره واغلا شوي) وفوقه رسوم اصدار ورسوم مادري منو ويطلع السعر اغلا
هو هو هو !!!!
شستفدنا


ابي احد بس يدش قسم العروض الخاصه ويشوف شنو موجود لموظفين الكي ان بي سي والكي او سي ويقارن باللي عندنا وايي يقولي السبب لو سمحتو

[KUFPEC Experet]

السلام عليكم

ملكتنا وينج الله يهداج هاده المملكة ورايحة ولهنا عليج وعلى نشاطج

بالنسبة لقسم الخدمات العامة عندنا .... في نقطة بسيطة بس الموظفيم مو ملاحظينها وانا تكلمت عنها من قبل ان عدد الموظفين في شركتنا قليل لذلك صعب نحصل عروض خاصه من الشركات لأن احنا بالنسبة لهم غير مفيدين .... لأن عدد الناس الي رح تشارك قليل .... الكي ان بي سي ماشاءالله عددهم 5000 موظف تقريبا وأيضا الكي او سي علشان هذا الشي تشوفين العروض والخصومات اكثر ...

اما بالنسبة للمدارس الخاصة فكل القطاع النفطي ياخذ 10% بدون حتى إثبات بس تقولين انا بالبترول يعطونج الخصم وانا شخصيا حصلت هذا الخصم ...

اما بالنسبه حق الفنادق والمنتجعات فالحمدلله القسم نشيط بإنه يحصل خصومات طول السنة والدليل عندج توه منتجع سيشل (كمبنسكي) سابقا خوش عرض بس جم واحد راح ؟؟؟؟؟

والدي اتش ال لنا خصم معتبر سإلي الشخص المختص انا من ست سنوات ادري عن الخصم هذا لأني سألت الشخص المختص ذاك الوقت ....

ارجع وأقولج سبب عدم حصولنا على خصومات كبيرة هو قلة عدد الموظفين وقلة مشاركتهم ... شفتي حفلة الشركة الي صارت في الشيراتون .. سبب إختيار الرئيس لوقت الغدا لأن الموظفين كل سنه مايشاركون بالحفل الا عدد قليل منهم ..... ولا في ناس وايد اتصلو يقولون مانبي نروح الحفله بس بنطلع مبجر بنروح البيت !


بالنسبة لمحلات الصالحية ... كان القطاع النفطي كله يتمتع بخصم خاص من تناغرا قيمته 20% ، بس تغير النظام عندهم فماصرنا نتمتع بهذا الخصم ....

وحاضرين يا ملكتنا بالي تامرين فيه

[KingLear]

السي شل كلمتهم أول ما نزل العرض وكله محجوز لي شهر ثمانية :( ماكو عندهم حتى ملحق فاضي

[The^Queen]

يا حيا الله الخبيرررررررره
اهلين كوفبك اكسبرت


اولا اشكرلج سرعه الرد
ثانيا اشكرلج السؤال وولهت عليج العافيه بس شسوي بيزي ومن بيزي بيزي <<(يعني باجازه طويله الامد)
ثالثا (شرايج فيني وانا قاعده اكتب ميمو لووول)


صج بخصوص العروض والمميزات
صراحه مافي توعيه عليها
يعني لو تنحط بالانترانت حالها حال البولييزيس
افضل وايد علي الاقل الواحد يعرف ماله وماعليه
وبخصوص الفنادق سيركيولر بين وين ووين وقعدي دوري عقبها ! وتذكري منو مطرشها؟؟؟؟؟؟ وشنو العرض ؟؟؟؟؟؟

المفروض يكون لهامكان مثبت مثلات الانترانت مال السي اس او مثبته علي الهوم بيج مالتنا صح والا لأ؟
توفيرا للوقت والحهد


بخصوص عدد الموظفين
صج احنا 150 موظف
بس ها لموظفين لهم عوايل
يعني اذا حسبتي ممكن نطلع باكثر من 300 شخص اذا مو اكثر
صج مو 3000 بس هم عدد حلو اتوقع لو يخاطبون الجهات ماراح يستهينون بهالعدد
كل جهه الكي بي سي محصله خصم فيها او ميزه المفروض تتعم علي السبسيديريز وتتوحد المزايا

وبخصوص المدارس الخاصه والله ماعندي خبر اي مدارس ياليت تكرين لنا
وبسئل المزايا للموظف واسرته اقارب درجه اولي؟ يعني يشمل الاخت الاخ واالام والابو؟
والا لأ؟


واشكرج علي المعلومات اللي ادليتي فيها اول مره اعرفها

[KUFPEC Experet]

ياهلا ومرحبا في الكوين

بالنسبة حق تثبيت معلومات الحجوزات وااااايد صعبة لأن الأسعار تعتمد على الموسم ودايما تتغير لأنها غير مدعومه ....

وبالنسبة للمميزات كلها تتطلب دعم يعني لازم تتخصص لها ميزانية علشان نقدر نحصل على شاليهات ثابته لنا مثل باقي القطاع النفطي الي يدعمون رحلات العمره ... والشاليهات ... وحسب الي عرفنا ان رئيس مجلس الإدارة الجديد يشجع ووااااايد ترفيه الموظفين لأن مؤمن ان هذا الشي ينعكس على عملهم وانشاءالله في اقرب وقت يتحقق هذا الشي وتتمتعون بخدمات ترفيهيه تونسكم ......

أما بالنسبة للمدارس فكل المدارس الخاصه معتمده هذا النظام مثال مدرسة التكامل ، المدرسة البريطانية ، المدرسة الإنجليزية .....

بسأل شنو المزايا الي تقصدين ان الموظف وأهله يتمتعون فيها ؟؟؟

وهذي الساعة المباركة الي اجاوب فيها وانشاءالله تكون الأجوبة وافية وكافية

[The^Queen]

لاوالله يزاج الله كل خير حبيبتي قاعده تجاوبين

المزايا اللي اقصدها
مثلا الحين اذا في ميزه للموظف هل يحق لاهله يتمتعون فيها
مثلا الحين انا لي تذاكر مخفضه اقدر احجز لاهلي؟
النادي مخفض
اقدر اخذ حق اختي اشتراك علي؟
وقيسي علي هالمنوال


بالنسبه لموضوع المدارس الخاصه
والله المدارس اللي سئلتهم قالولي مافي خصم لموظفين البترول

شاكرتلج تواصلج واجابتج حبيبتي

[KUFPEC Experet]

السلام عليكم ،

بالنسبة لحجز الفنادق والشاليهات تقدرين تحجزين لهم بإسمج اكثر من غرفة او اكثر من شاليه ويتمتعون الأهل بالخصم

أما النوادي بس الموظفة وزوجها وأولادها اهم الي يتمتعون بالخصم

[The^Queen]

http://img91.imageshack.us/img91/6595/519thanksuj5.gif

[الغضنفر]

السلام علكم
بيما اننا على ابواب الدخول الى المدارس هل يوجد خصومات على المدارس الخاصه للموظفين في شركة نفط الكويت
وشكرا

[زعتر وبابونج]

مشكور أخوي على هالموضوع

وأنا كنت بكتب عن هالموضوع والحمدلله اني لقيت شي يخص موضوعي

المفروض تحقيق المساواه مثل ما هم يشتغلون احنا بعد نشتغل ... الفرق احنا فلوسنا ترد لديرتنا ويا ليت احد يقدر يسوي شي بخصوص هالموضوع حتى لو نرفع مطالبه بهالشي .... مو لازم الشركة تدفع لنا 90% مثل الوافدين احنا راضين بالـ 50%

اما نقابتنا الله يخلف عليها ما يدرون وين الله قاطهم دزيت ايميل قبل سنة وقالوا ان شاء الله يصير خير
بعدين دزيت ايميل قبل شهر ولا أحد رد علي يا كثر وعودهم بوقت الانتخابات :mad:

[Strongman-koc]

حجي هذا الكلام قالوه من قبلنا الكثير من العاملين بالشركه من اخوانه بس لا حياه لمن تنادي شنو بيدنه الله كريم

[Workers]

السلام عليكم ورحمة الله وبركاتة

تم دمج المواضيع المتعلقة بالمدارس الخاصة هنا حسب التسلسل الزمني


هنا موضوع مميز لاخونا الوسام عن:

مقارنة مزايا الموظفين بين القطاع النفطي الخليجي والقطاع النفطي الكويتي (http://www.q8ow.com/vb/showthread.php?t=656&highlight=%CE%D5%E6%E3%C7%CA+%C7%E1%CE%C7%D5%C9)

[القوافي]

المدارس الحكوميه افضل من الخاصه عندنا في الكويت وذلك لعدة أسباب.......ممكن ذكرها فيما بعد...

[Workers]

ياهلا ومرحبا في الكوين

بالنسبة حق تثبيت معلومات الحجوزات وااااايد صعبة لأن الأسعار تعتمد على الموسم ودايما تتغير لأنها غير مدعومه ....

وبالنسبة للمميزات كلها تتطلب دعم يعني لازم تتخصص لها ميزانية علشان نقدر نحصل على شاليهات ثابته لنا مثل باقي القطاع النفطي الي يدعمون رحلات العمره ... والشاليهات ... وحسب الي عرفنا ان رئيس مجلس الإدارة الجديد يشجع ووااااايد ترفيه الموظفين لأن مؤمن ان هذا الشي ينعكس على عملهم وانشاءالله في اقرب وقت يتحقق هذا الشي وتتمتعون بخدمات ترفيهيه تونسكم ......

أما بالنسبة للمدارس فكل المدارس الخاصه معتمده هذا النظام مثال مدرسة التكامل ، المدرسة البريطانية ، المدرسة الإنجليزية .....

بسأل شنو المزايا الي تقصدين ان الموظف وأهله يتمتعون فيها ؟؟؟

وهذي الساعة المباركة الي اجاوب فيها وانشاءالله تكون الأجوبة وافية وكافية


مو مسوين خصم ولافلس ومن فترة بسيطة زادت الرسوم 15% .

[بترولي قديم]

مسوين خصم ولا مو مسوين ....المهم ليش الأجنبي يودي عياله أحسن المدارس الخاصه بالكويت ....؟؟
وإحنا الكويتيين عيالنا طايح حظهم بالمدارس الحكوميه
اللي المدرس ماخذ معاشه ماخذه..... درس الولد ولا ما درس.....
وأردى المدرسيين اللي يالوطن العربي
لو فيه خير ....تفرط فيه ديرته..؟؟
شنو الأجانب اللي بالقطاع النفطي قاعديين يسوون قنابل ننويه....!!......؟؟؟
ياريت تعرفون أي مدارس يودون عيالهم........أحسن المدارس...بالمستوى التعليمي أتكلم
مستغلين الموضوع عدل....وإحنا يا خلاف
اللهم لا حسد....:confused:...بس وين مصلحة البلد بمستقبلها ومستقبل عيالها

[عبدالحميد دشتي]

كلام سليم :)

بس ماراح يشوف النور اذا هذي النقايه و هذا الاتحاد

واسمحلي على المداخله

[faleh]

مسـاء الخير للجميع - أنــا اليوم مسجل ولدي بمدرسة المستقبل ثنائية اللغه وسألتهم فيه خصم للقطاع النفطي - وقالي لاتحلــم !!!! ودفعت وأمري للــه !!!!

[ابن الغاز]

نتمنى يكون هنالك تفاعل من نقاباتنا وهذا من ابسط حقوق موظفين القطاع النفطي

[شركة من صادها عشى عيالة]

السلام عليكم ورحمة الله وبركاته

أولا أود الشكر الجزيل لكل القائمين والعاملين على هذا المنتدى والأخوه الأعضاء والزوار جميعا.............

الموضوع اللي أحب أتكلم فيه هو موضوع تدريس أبناء العاملين الكويتيين في قطاع المدارس الخاصه واللي بصراحه يشكل هم وهاجس كل أب وأم لبناء افضل مستقبل تعليمي لأبناؤهم...والتساؤل هنا لماذا تتكفل المؤسسه في أو الشركه برسوم تدريس أبناء الأجانب كاملة اذا كانت المدرسه من نفس اللغه أو البلد الذي ينتمي له العامل الأجنبي و80% من المصاريف تتكفل به المؤسسه أو الشركه التي يعمل بها اذا كانت المدرسه أجنبيه مثلا تكون مدرسه بنظام بريطاني أو أمريكي (النسب على حسب علمي ومعلوماتي من بعض الأخوه الأجانب العاملين) !!!!!!!!!!!!!!!!!؟؟؟؟؟؟؟؟؟؟؟؟؟..

والمشكله أنه أغلب الطلاب الغير كويتيين بعد التخرج من الثانويه العامه يهاجرون الى بلادهم وهم على أعلى درجات التفوق والعلم للعمل في بلدان آخرى غير الكويت يعني بمعنى أدق وصريح جدا خيرهم مو للكويت للأسف وليس الجميع عشان محد يزعل..........

ياجماعه يامسؤولين انظروا لأبناء الموظفين كثروه ممكن تستغل في خدمة الكويت أولا والقطاع النفطي ثانيا في المستقبل خصوصا أذا تخرجت أجيال على مستوى عالي من العلم والمعرفه ...

الحكومه ماقصرت وفرت المدارس الحكوميه لكن الكل يملك المعرفه والدرايه الكامله والكافله عن مستوى التعليم الحكومي وماله داعي ادخل في تفاصيل التدريس الحكومي.


الشركه لاتتكفل برسوم أبناءنا نحن العاملين الكويتيين هذا بس عشان احنا كويتيين وبلدنا الكويت اللي احنا ننتمي لترابها وندفع الغالي بس عشان ذره من رملها ، لكن على الأقل 50% من رسوم التدريس .

شكرا للجميع واتمنى محد يزعل من هالكلام من الأخوه غير الكويتيين.


و الله اخوي طرحك وايد مهم خاصة يوم قلت انه ابناء العاملين من غير الكويتين راح يرجعون بلادهم و اهم حاصلين على افضل تعليم من غير ما تستفيد الدولة منهم ...

اقتراحك مهم و اتمنى يلقى صدى عند المسؤولين لانه حال التعليم عندنا تعيس لاقصى و بما انه المؤسسة تتحمل اعباء دراسة ابناء الغير كويتين العاملين لديها فما يمنع انها تعامل الكويتي بالمثل و لو بنسبة معينة .

[hassankoc]

سبحان الله

[العندليب]

وينكم يانقابه ياكرام يا أخوه وينكم عن أبناء الموظفين في المدارس الخاصه واللي كاسر ظهورهم القسط اللي يدفعونه من دم قلوبهم على عيالهم عشان تعليم أفضل وفكر منييييييييير.... ولا بس الأجانب هم أصحاب الحق في تعليم أبناؤهم أفضل تعليم وأحسن دراسه والمشكله خيرهم لديرتهم (والله قهررررررررررررررررر)..أحنا مانحسدهم بس يانقابه والله هالموضوع في ذمتكم ليوم الدين مانبي مجانا بس على الأقل مشاركه من قبل شركة النفط بدفع ولو 50% من أجمالي تكاليف الدراسه ...(أدري الموضوع له شجون وشكثر تطرقوا له أخوان كرام وأنا من قبل كتبت عنه بس مايمنع أن أخوانا في النقابه يكون لهم دور... ولا دورهم بس نشوفه كل سنتين مره!!!!!!!!!!!!!!)


وشكرا

[Winchester]

الله يكون في عون الجميع ان شاء الله

يا اخوي النقابة مو مقصرة بس الشركة وما ادراك ما الشركة .

دائما اللي يبونه من مواضيع يمشونه واللي ما يبونه يقولك ميزانية وسوالف ..

الله كريم

[jambi]

ya allah tnmana e7a88on hal shai

aham shai t3leem 3yalna

[جونم جقرم]

والله للأمــــــــانة ماني عارف ليش تمييز الأجانــــــــب عن المواطنيـــن

مانــي عارف أيش مستفيدين منهم ؟؟

[LaRambla]

جان صرت اجنبي

[redrose]

عين عذاري تسقي الأجنبي وتخلي الكويتي

والله حاله

[touareg777]

ماكو الا ادور لي عماره اجار واحول الشقق الى فصول دراسيه وحمام سباحه وغرف نوم ودوام من 8 الصبح لي 4 العصر والتدريس باللغه العربيه للمواد العربي والاسلاميه والاجتماعيات والانجليزي لالارياضيات والانجليزي

بالكورس 450 دينار
وخصم خاص 300 لاعضاء المنتدى بسسس علشان الهنود وهوامير الشركه لا ايبون عيالهم

[names1]

عيال الاجانب ما يدشون المدارس الحكوميه لانها للكويتيين فقط فالمؤسسة ملزومه تدفع لمدارسهم خاصة .. لكن احنا راضين لو تساهم المؤسسة بشى قليل 30% مثلا

[kandaaa]

مبروك لموظفي التطبيقي صدور قرار المدارس الخاصه وعلي نقاباتنا التحرك

http://www.q8ow.com/up/uploads/cfd2152c8f.jpg (http://www.q8ow.com/up/)

[نشيط]

شنو القرااار؟؟

[Workers]

مايقصر اتحاد البترول فيه الخير والبركة ان شاء الله التصريح القادم سيفاجئكم

بشأن الرسوم الدراسية في المدارس الخاصة لابناء العاملين في القطاع النفطي

وجميع المطالبات ان شاء الله ( سترى النور قريباً )

[kandaaa]

يعطيك العافيه مراقبنا العام لاني ماعرفت ارفق القرار من غير ما اسوي له Zip

[Q8_oil]

مايقصر اتحاد البترول فيه الخير والبركة ان شاء الله التصريح القادم سيفاجئكم

بشأن الرسوم الدراسية في المدارس الخاصة لابناء العاملين في القطاع النفطي

وجميع المطالبات ان شاء الله ( سترى النور قريباً )

أي خير أي بركة الله يخليك الكادر مالنا ناقص 70 دينار هذا إللي قارته ألف جهة حكومة و البنك الدولي و ما خذينا فلس حمر تبي يعطونا مصريف مدارس أجنية

قويييييييييييييييييييييييييييييييييييييييييييييييي ييية

[Q8_oil]

كلمة إتحادنا فيه الخير هذا مسكن مو أكثر نقص فيه على عمرنا لحد يصدق

المستشفى صارلهم دهر يتكلمون فيه ولا شي صار
العلاج بالمستشفيات الخاصة كلام فاضي
بدل أثاث ال 1500 دينار إللي راحت عالناس المساكين حجي فاضي
تذاكر لندن هم كلام
ال 70 المقصوصة منا متى بترجع ( هذا إذا بترجع )

[blackberry]

أي خير أي بركة الله يخليك الكادر مالنا ناقص 70 دينار هذا إللي قارته ألف جهة حكومة و البنك الدولي و ما خذينا فلس حمر تبي يعطونا مصريف مدارس أجنية

قويييييييييييييييييييييييييييييييييييييييييييييييي ييية

زيد عليها الخمسين الأخيره للي حتى توه متخرج و عزابي ما تحوشه فلس منها .

[جونم جقرم]

الله يهنيهم

ونتمني أن نحذو حذوهــم

[Workers]

يعطيك العافيه مراقبنا العام لاني ماعرفت ارفق القرار من غير ما اسوي له Zip

ماسويت غير الواجب وتحت امرك :)

أي خير أي بركة الله يخليك الكادر مالنا ناقص 70 دينار هذا إللي قارته ألف جهة حكومة و البنك الدولي و ما خذينا فلس حمر تبي يعطونا مصريف مدارس أجنية

قويييييييييييييييييييييييييييييييييييييييييييييييي ييية

كلمة إتحادنا فيه الخير هذا مسكن مو أكثر نقص فيه على عمرنا لحد يصدق

المستشفى صارلهم دهر يتكلمون فيه ولا شي صار
العلاج بالمستشفيات الخاصة كلام فاضي
بدل أثاث ال 1500 دينار إللي راحت عالناس المساكين حجي فاضي
تذاكر لندن هم كلام
ال 70 المقصوصة منا متى بترجع ( هذا إذا بترجع )

هلا بالغالي انا معك في كل اللي ذكرته وحتى اوضح لك قصدي من( سترى النور قريباً ) اضغط ( هنا ) (http://www.q8ow.com/vb/showthread.php?t=15116)

[بيض عيون]

مطلب مثل هذا ممكن تحقيقة و لكن يحتاج جهد

يعنى ما يصير انا مجابل الانترنت و طايح مطالب بالنقابة و مو مستعد اسوى شى لتحقيق هذا الهدف

مطلب كبير مثل هذا ممكن تحقيقة لو توحد عمال القطاع النفطى كلهم و خلونا تخطى النقابات و مشاكلها و نوصل مطالبتنا الى نواب الامة

طبعا النواب ما راح يسون شى عشان سواد عيونا

يعنى الحل الامثل هو تجمع كل سكان منطقة و مخاطبة نائب منطقتهم..النائب ممكن يوسى المستحيل عشان عشر اصوات
فما بالك لو جاله 100 شخص مثلا بمطلب واحد؟

و لا تدرون شلون؟
يا يدفعون مصاريف المدارس للكويتيين أو يدخلون الاجانب المدارس الحكومية..و فلوسهم يعالجونا فيهم بالمستشفيات الخاصة

اما انى اقعد بالبيت و اطالب النقابة بكل شى و انا غير مستعد للتحرك للمطالبة بحقوقى ..و بعدين الوم النقابة


ترى انا مو نقابى و مو مسجل بالنقابة أصلا

[kandaaa]

ارجو من المشرفين دمج موضوعي مع موضوع ابناء الموظفين ورسوم المدارس الخاصه لتعم الفائدة

[feed gas]

يا معوووووووووووووود...لا يكون تصدقون هالكلام....خلونا علا الشياء الصغيره ترا هذا حدهم ربع الاتحاد....

[kandaaa]

مبروك لموظفي التطبيقي صدور قرار المدارس الخاصه وعلي نقاباتنا التحرك

http://www.q8ow.com/up/uploads/cfd2152c8f.jpg (http://www.q8ow.com/up/)



الجزء الاول من القرار


http://www.q8ow.com/up/uploads/514a26a646.jpg (http://www.q8ow.com/up/)